Esethere 8:1-17

TSHAMEKA

Moredekai o newa maemo (1, 2)
Esethere o ikuela kwa kgosing (3-6)
Kgosi e ntsha taelo e nngwe (7-14)
Bajuda ba golotswe e bile ba itumetse (15-17)

8 Mo letsatsing leo Kgosi Ahasueruse o ne a naya Kgosigadi Esethere ntlo ya ga Hamane,+ yo e neng e le mmaba wa Bajuda;+ mme Moredekai o ne a tla fa pele ga kgosi, ka gonne Esethere o ne a boletse gore Moredekai ke wa losika lwa gagwe.+ ² Foo kgosi e ne ya rola palamonwana ya yone+ e e tshwayang e e neng e e tsere mo go Hamane e bo e e naya Moredekai. Mme Esethere o ne a tlhoma Moredekai gore a okamele dithoto tsotlhe tsa ga Hamane.+ ³ Mo godimo ga moo, Esethere o ne a bua gape le kgosi. O ne a khubama fa dinaong tsa yone mme a lela a kopa gore kgosi e thibele leano le le bosula le Hamane wa Moagage a neng a le logetse Bajuda.+ ⁴ Kgosi e ne ya otlololela lore lwa segosi lwa gauta kwa go Esethere,+ mme Esethere o ne a tla a ema fa pele ga kgosi. ⁵ O ne a re: “Fa e le gore seno se itumedisa kgosi e bile fa e le gore e nkutlwela botlhoko, mme fa e le gore kgosi e bona go siame e bile ke a e itumedisa, a go kwalwe taelo ya gore go phimolwe makwalo a ga rramaano yole e bong Hamane+ morwa Hamedatha wa Moagage,+ a a neng a a kwadile gore a fedise Bajuda mo diporofenseng tsotlhe* tsa kgosi. ⁶ Gonne nka kgona jang go itshokela go leba masetlapelo a a tla welang batho ba gaetsho, le gone nka kgona jang go itshokela go bona ba losika lwa me ba bolawa?” ⁷ Ka jalo, Kgosi Ahasueruse o ne a raya Kgosigadi Esethere le Moredekai wa Mojuda a re: “Ke neile Esethere+ ntlo ya ga Hamane, mme ke laetse gore ba mo kaletse mo koteng,+ ka ntlha ya leano la gagwe la go tlhasela* Bajuda. ⁸ Jaanong lo ka kwala sepe fela se lo bonang se siame mo leineng la kgosi mo boemong jwa Bajuda lo bo lo se tshwaya ka palamonwana ya kgosi e e tshwayang, ka gonne molao o o kwadilweng mo leineng la kgosi e bile o tshwailwe ka palamonwana ya kgosi e e tshwayang ga o ka ke wa fetolwa.”+ ⁹ Ka jalo, bakwaledi ba kgosi ba ne ba bidiwa ka nako eo mo kgweding ya boraro, e leng kgwedi ya Sifane,* mo letsatsing la bo23, mme ba ne ba kwala sotlhe se Moredekai a neng a se laela Bajuda, mmogo le babusi ba dikgaolo,+ balaodi le dikgosana tsa diporofense*+ go simologa kwa India go ya kwa Ethiopia, diporofense* di le 127, porofense* nngwe le nngwe e kwalelwa ka mokwalo wa yone* le setšhaba sengwe le sengwe ka puo ya sone, le Bajuda ba ne ba kwalelwa ka mokwalo wa bone* le ka puo ya bone. ¹⁰ O ne a laela gore molao oo o kwalwe mo leineng la ga Kgosi Ahasueruse a bo a o tshwaya ka palamonwana ya kgosi e e tshwayang+ mme o ne a roma barongwa ba ba tsamayang ka dipitse gore ba ise makwalo ao; ba ne ba palama dipitse tse di lobelo tse di tsamaisang makwalo, tse di ruetsweng go dirisiwa mo tirelong ya segosi. ¹¹ Mo makwalong ano kgosi e ne e neile Bajuda mo metseng yotlhe e e farologaneng tetla ya gore ba phuthege mmogo mme ba iphemele le gore ba nyeletse, ba bolaye ba bo ba senye mophato ope fela wa setšhaba sepe kgotsa porofense* e e ka ba tlhaselang, go akaretsa basadi le bana le gore ba gape dithoto tsa bone.+ ¹² Seno se ne se tla direga mo letsatsing le le lengwe mo diporofenseng* tsotlhe tsa ga Kgosi Ahasueruse, mo letsatsing la bo13 la kgwedi ya bo12, e leng kgwedi ya Adare.*+ ¹³ Se se kwadilweng* mo lekwalong leo se ne se tshwanetse go ntshiwa e le molao mo diporofenseng* tsotlhe. Se ne se tshwanetse go itsisiwe ditšhaba tsotlhe, gore Bajuda ba bo ba ipaakantse mo letsatsing leo gore ba ipusolosetse mo babeng ba bone.+ ¹⁴ Barongwa ba ba palameng dipitse tse di tsamaisang makwalo tse di dirisiwang mo tirelong ya segosi, ba ne ba tswa ka bonako e bile ba itlhaganetse go ya ka taelo ya kgosi. Molao oo o ne wa tlhomiwa le kwa kagong ya phemelo* ya Shushane.*+ ¹⁵ Jaanong Moredekai o ne a tswa kwa kgosing a apere diaparo tsa segosi tse di botala jwa loapi le bosweu, a rwele serwalo se segolo sa gauta, e bile a apere kobo ya letsela le le boleta la wulu e phepole.+ Mme motse wa Shushane* o ne wa goa ka boitumelo. ¹⁶ Bajuda ba ne ba golotswe,* ba ne ba itumetse thata e bile ba ne ba newa tlotlo. ¹⁷ Mme mo diporofenseng* tsotlhe le mo metseng yotlhe, gongwe le gongwe kwa taelo ya kgosi le molao wa yone o neng o fitlhile gone, Bajuda ba ne ba itumetse thata, ba dira mekete le meletlo. Batho ba le bantsi ba ditšhaba tsa lefatshe leo ba ne ba amogela tumelo ya Bajuda,+ ka gonne ba ne ba boifa Bajuda.

Dintlha Tse di Kwa Tlase

^ Kgotsa “mo dikgaolong tsotlhe tse di nang le taolo.”

^ Seheb., “ka gonne o ne a ntsha seatla sa gagwe kgatlhanong le.”

^ Kgotsa “kgaolo e e nang le taolo.”

^ Kgotsa “ka mokgwa wa bone wa go kwala.”

^ Kgotsa “ka mokgwa wa yone wa go kwala.”