Ruthe 1:1-22
1 Jaanong mo malatsing a fa baatlhodi+ ba ne ba diragatsa tshiamiso,* go ne ga nna leuba mo lefatsheng. Ka jalo, monna mongwe o ne a tswa mo Bethelehema+ wa Juda a ya go aga e le motswakwa kwa kgaolong* ya Moabe,+ ene le mosadi wa gagwe le bomorwawe ba babedi.
2 Leina la monna yoo e ne e le Elimeleke,* leina la mosadi wa gagwe e le Naomi* mme maina a bomorwawe ba babedi e le Mahelone* le Kilione.* E ne e le Baeferatha ba ba tswang kwa Bethelehema wa Juda. La bofelo ba ne ba tla mo kgaolong ya Moabe mme ba nna gone.
3 Moragonyana Elimeleke monna wa ga Naomi o ne a swa mme Naomi a sala le bomorwawe ba babedi.
4 Fa nako e ntse e tsamaya, banna bao ba ne ba nyala basadi ba Bamoabe; leina la yo mongwe e ne e le Orepa, mme leina la yo mongwe e le Ruthe.+ Ba ne ba nna koo dingwaga di ka nna lesome.
5 Moragonyana barwa bao ba babedi, Mahelone le Kilione, le bone ba ne ba swa, ka jalo mosadi yoo o ne a sala a se na bana le monna.
6 Mme o ne a tswa kwa kgaolong ya Moabe a na le dingwetsi tsa gagwe, ka gonne a ne a utlwile a le kwa Moabe gore Jehofa o segofaditse batho ba gagwe gape ka go ba naya dijo.*
7 O ne a tswa mo lefelong le a neng a nna mo go lone a na le dingwetsi tsa gagwe tse pedi. Fa ba ntse ba tsamaya mo tseleng ba boela kwa kgaolong ya Juda,
8 Naomi o ne a raya dingwetsi tsa gagwe tse pedi a re: “Tsamayang, boang, mongwe le mongwe a ye kwa ntlong ya ga mmaagwe. E kete Jehofa a ka lo bontsha lorato lo lo sa kgaotseng,+ fela jaaka lo lo bontshitse banna ba lona ba ba suleng, lwa bo lwa lo mpontsha.
9 E kete Jehofa a ka sireletsa mongwe le mongwe wa lona ka go mo naya legae le monna.”*+ Go tswa foo, o ne a ba suna mme ba thubega ka selelo.
10 Ba ne ba mo emelela ba mo raya ba re: “Nnyaa, re tla tsamaya le wena kwa bathong ba gaeno.”
11 Mme Naomi o ne a re: “Boang bomorwadiaka. Goreng lo tshwanetse go tsamaya le nna? A ke sa ntse nka kgona go tshola bana ba basimane ba e ka nnang banna ba lona?+
12 Boang bomorwadiaka, tsamayang, ka gonne ke tsofetse thata gore nka nyalwa. Tota le fa ke ne nka solofela gore ke tla nyalwa mo bosigong jono, ke bo ke tshola bana ba basimane,
13 a lo ne lo tla nna lo ba letile go fitlha ba gola? A lo ne lo tla gana go nyalwa gape ka ntlha ya bone? Nnyaa bomorwadiaka, ke lo utlwela botlhoko thata ka gonne Jehofa o nkotlhaile.”*+
14 Ba ne ba thubega ka selelo gape, mme morago ga moo Orepa a suna matsalaagwe a bo a boela morago. Mme Ruthe ene o ne a sala le ene.
15 Ka jalo, Naomi o ne a re: “Bona, ngwetsi mmogo le wena o boela kwa bathong ba gagabo le kwa medimong ya gagwe. Boa le ene.”
16 Mme Ruthe ene o ne a re: “O se ka wa nthapela gore ke go tlogele, gore ke se ka ka tsamaya le wena; ka gonne kwa o yang gone ke tla ya gone, le kwa o lalang gone ke tla lala gone. Batho ba gaeno e tla nna batho ba gaetsho, le Modimo wa gago e tla nna Modimo wa me.+
17 Kwa o swelang gone ke tla swela gone, mme ke tla fitlhwa gone. E kete Jehofa a ka nkotlhaya mo go botlhoko fa nka letla gore sepe fela se re kgaoganye, fa e se loso.”
18 Fa Naomi a bona gore Ruthe o ne a pateletsa go tsamaya le ene, o ne a tlogela go mo thibela.
19 Mme boobabedi ba ne ba tswelela ka mosepele go fitlha ba goroga kwa Bethelehema.+ Fa ba goroga kwa Bethelehema, batho botlhe mo motseng ba ne ba ba gakgamaletse. Basadi ba ne ba nna ba re: “A motho yo ke Naomi?”
20 Mme ene a raya basadi bao a re: “Lo se ka lwa mpitsa Naomi.* Lo mpitse Mara,* ka gonne Mothatayotlhe o ntshulafaleditse botshelo.+
21 Ke ne ke na le sengwe le sengwe fa ke tsamaya, mme Jehofa o dirile gore ke boe ke iphotlhere. Goreng lo tshwanetse go mpitsa Naomi, e re ka Jehofa a nkokobeditse e bile Mothatayotlhe a mpaketse masetlapelo?”+
22 Eno ke pego ya kafa Naomi a neng a boa ka gone a tswa kwa kgaolong ya Moabe+ a na le ngwetsi ya gagwe ya Momoabe e bong Ruthe. Ba ne ba goroga mo Bethelehema fa go simololwa go rojwa barele.*+
Dintlha Tse di Kwa Tlase
^ Seheb., “ba atlhola.”
^ Seheb., “masimong.”
^ Mo go kayang “Modimo Wa me Ke Kgosi.”
^ Mo go kayang “Boitumelo Jwa Me.”
^ Gongwe le tswa mo lefokong la Sehebera le le kayang “go koafala; go lwala.”
^ Mo go kayang “Yo o Koafalang; Yo o Tlogang a Swa.”
^ Seheb., “senkgwe.”
^ Seheb., “lefelo la boikhutso.”
^ Seheb., “seatla sa ga Jehofa se nnile kgatlhanong le nna.”
^ Mo go kayang “Boitumelo Jwa Me.”
^ Mo go kayang “Botlhoko.”
^ Semela se se tshwanang le korong.
