Go setse go fetile dingwaga di le 17 fa e sa le Jesu a botsolotsa barutisi dipotso kwa tempeleng fa a ne a na le dingwaga di le 12. Ke dikgakologo tsa 29 C.E. Batho ba le bantsi ba bua ka Johane wa losika lwa ga Jesu, yo o rerang mo kgaolong yotlhe e e kwa bophirima jwa Noka ya Joredane.

Tsela e Johane a lebegang ka yone le e a buang ka yone e a kgatlha. O apara diaparo tsa boboa jwa kamela, e bile o ipanta ka lebanta la letlalo mo lothekeng. Dijo tsa gagwe ke tsie le tswina ya dinotshe. O rera ka eng? O raya batho a re: “Ikwatlhayeng, ka gonne Bogosi jwa magodimo bo atametse.”—Mathaio 3:2.

Batho ba itumelela go utlwa molaetsa wa ga Johane. Bontsi jwa bone ba a lemoga gore ba tlhoka go ikwatlhaya mme ba tlogele mekgwa ya bone e e sa siamang. Batho ba ba tlang kwa go ene ke ba “Jerusalema le ba Judea yotlhe le ba kgaolo yotlhe e e dikologileng Joredane.” (Mathaio 3:5) Bontsi jwa batho ba ba tlang kwa go Johane ba a ikwatlhaya. O ba kolobetsa mo nokeng ya Joredane. Goreng?

O kolobetsa batho e le sesupo sa gore ba ikwatlhaetse go bo ba tlodile kgolagano ya Molao wa Modimo. (Ditiro 19:4) Le fa go ntse jalo, ga se batho botlhe ba ba tshwanelegang go kolobediwa. Fa baeteledipele bangwe ba bodumedi, Bafarasai le Basadukae ba tla kwa go Johane, Johane o ba raya a re ke “bana ba dinoga tse di botlhole.” O ba raya a re: “Ungwang maungo a a bontshang gore lo a ikwatlhaya. Lo se ka lwa ithaya lwa re, ‘Rraarona ke Aborahame.’ Gonne ke a lo bolelela, Modimo a ka kgona go direla Aborahame bana ka maje ano. Selepe se setse se le mo meding ya ditlhare. Foo setlhare sengwe le sengwe se se sa ungweng maungo a a molemo se tshwanetse go remiwa se bo se latlhelwa mo molelong.”—Mathaio 3:7-10.

E re ka Johane a kgatlha batho ba le bantsi, a rera molaetsa o o maatla e bile a kolobetsa batho ba le bantsi, baperesiti le Balefi ba romelwa kwa go ene gore ba mmotse ba re: “O mang?”

Johane a re: “Ga ke Keresete.”

Ba mmotsa ba re: “Jaanong, o mang? A o Elija?”

O ba raya a re: “Ga ke Elija.”

Mme ba mmotsa ba re: “A o Moporofeti?” Ba bua ka Moporofeti yo mogolo yo Moshe a neng a re o tla tla.—Duteronome 18:15, 18.

Johane o ba araba a re: “Nnyaa!”

Ba tswelela ba mmotsa ba re: “O mang? Re bolelele gore re tle re ye go bolelela ba ba re romileng. Tota wa re o mang?” Johane o ba raya a re: “Ke nna lentswe la mongwe yo o goang a le kwa nageng a re, ‘Tlhamalatsang tsela ya ga Jehofa,’ fela jaaka moporofeti Isaia a buile.”—Johane 1:19-23.

Ka jalo, ba mmotsa ba re: “Jaanong ke ka ntlha yang fa o kolobetsa fa e le gore ga o Keresete kgotsa Elija kgotsa Moporofeti?” Johane o ba raya a re: “Ke kolobetsa mo metsing. Go na le mongwe mo gare ga lona yo lo sa mo itseng, yo o tlang kwa morago ga me.”—Johane 1:25-27.

Johane o dumela gore tiro ya gagwe ke go thusa batho go nna le maikutlo a a siameng gore ba kgone go amogela Mesia, yo e tla nnang Kgosi. Fa Johane a bua ka Jesu a re: “Yo o tlang kwa morago ga me o nonofile go mpheta, yo ke sa tshwanelegeng go mo rola ditlhako.” (Mathaio 3:11) Gape a re: “Yo o tlang kwa morago ga me o tla nna mogolo go mpheta, ka gonne o ne a nna gone pele ga me.”—Johane 1:15.

 Ka jalo, molaetsa wa ga Johane o o reng: “Ikwatlhayeng, ka gonne Bogosi jwa magodimo bo atametse,” o a tshwanela. (Mathaio 3:2) O bontsha batho gore bodiredi jwa ga Jesu Keresete, yo Jehofa a mo tlhomileng go nna Kgosi, bo tloga bo simologa.