1. Mosha o tshwanetse go dira tshwetso efe, mme ke eng fa a sa tshwanela go tshoga? (Bona setshwantsho se se simololang setlhogo.)

BASHA ba ka tswa ba itse gore pele motho a tsaya loeto, o tshwanetse go rulaganya gore o tlile go ya kae. Botshelo ke loeto, mme nako e e siameng ya go tlhopha gore o batla go dira eng mo botshelong ke fa o sa le mosha. Gone ke boammaaruri gore go dira jalo ga go motlhofo. Mosetsana mongwe yo o bidiwang Heather a re: “Go a tshosa ka gonne o tshwanetse go tlhopha gore o batla go dira eng ka botshelo jwa gago.” Mme o se ka wa tshoga. Jehofa o raya batho ba gagwe jaana: “O se ka wa leba kwa le kwa, gonne ke Modimo wa gago. Ke tla go thatafatsa. Ke tla go thusa tota.”—Isa. 41:10.

2. O itse jang gore Jehofa o batla gore o dire ditshwetso tse di molemo ka isagwe ya gago?

² Jehofa o batla gore o dire ditshwetso tse di molemo ka isagwe ya gago. (Mor. 12:1; Math. 6:20) O batla gore o itumele. Popo e ntle ya ga Jehofa e supela boammaaruri jwa seo. Gape akanya kafa Jehofa a re tlhokomelang ka gone le kafa a re rutang tsela e e molemo ya go tshela. Jehofa o raya ba ba ganang go dirisa kgakololo ya gagwe jaana: “Lo ne lwa . . . tlhopha selo se se sa intumedisang. . . . Bonang! Batlhanka ba me ba tla ipela, mme lona lo tla tlhajwa ke ditlhong. Bonang! Batlhanka ba me ba tla goa ka boipelo ka ntlha ya seemo se se molemo sa pelo.” (Isa. 65:12-14) Jehofa o a galalediwa fa batho ba  gagwe ba dira ditshwetso tse di siameng mo matshelong a bone.—Dia. 27:11.

3. Jehofa o batla gore o dire eng mo botshelong?

³ Jehofa o batla gore o dire eng mo botshelong? O ne a bopa batho gore ba itumelele go mo itse le go mo direla ka boikanyegi. (Pes. 128:1; Math. 5:3) Batho ga ba tshwane le diphologolo ka gonne tsone di itumelela fela go ja, go nwa le go tsala. Modimo o batla gore o itumele ka go tlhopha go dira dilo tse di molemo thata go feta tse diphologolo di di ratang. Mmopi wa gago ke “Modimo wa lorato” e bile ke “Modimo yo o itumetseng,” yo o bopileng batho “mo setshwanong sa gagwe.” (2 Bakor. 13:11; 1 Tim. 1:11; Gen. 1:27) Fa o etsa Modimo wa rona yo o lorato, o tla itumela. A o kile wa iponela kafa temana eno ya Baebele e leng boammaaruri ka gone, ya re: “Go na le boitumelo jo bogolo mo go abeng go na le jo bo leng gone mo go amogeleng.” (Dit. 20:35) Tsela e botshelo bo leng ka gone e bontsha gore mafoko ano a boammaaruri. Ka jalo, Jehofa o batla gore mekgele ya gago e bontshe gore o a mo rata le gore o rata batho ba bangwe.—Bala Mathaio 22:36-39.

4, 5. Ke eng se se neng se dira gore Jesu a itumele?

⁴ Jesu Keresete o tlhometse basha sekao se se molemo. Fa a sa ntse a le monnye, ga go pelaelo gore o ne a tshameka le go ijesa monate. Lefoko la Modimo le a re go na le “nako ya go tshega . . . le nako ya go tlolaka.” (Mor. 3:4) Gape Jesu o ne a atamalana le Jehofa ka go ithuta Dikwalo. Fa a na le dingwaga di le 12, barutisi ba kwa tempeleng ba ne ba gakgamadiwa ke “tlhaloganyo ya gagwe le dikarabo tsa gagwe” ka dithuto tsa Modimo.—Luke 2:42, 46, 47.

⁵ Jesu e ne e le motho yo o itumetseng. Ke eng se se neng se mo itumedisa? O ne a itse gore Modimo o ne a batla gore a ‘bolelele bahumanegi dikgang tse di molemo’ le go dira gore ‘difofu di kgone go bona gape.’ (Luke 4:18) Go dira se Modimo a se batlang go ne ga dira gore Jesu a itumele. Pesalema 40:8 e tlhalosa sentle tsela e a neng a ikutlwa ka yone, o ne a re: “Ke itumeletse go dira thato ya gago, wena Modimo wa me.” Jesu o ne a itumelela go ruta batho ka Rraagwe yo o kwa legodimong. (Bala Luke 10:21.) Nako nngwe fa a sena go ruta mosadi mongwe ka kobamelo ya boammaaruri, o ne a raya barutwa ba gagwe a re: “Dijo tsa me ke gore ke dire thato ya yo o nthomileng le go wetsa tiro ya gagwe.” (Joh. 4:31-34) Go rata Modimo le batho ba bangwe go ne go dira gore Jesu a itumele. Le wena seo se ka go itumedisa.

6. Ke eng fa go le molemo gore o tlotle le Bakeresete ba ba nonofileng mo tumelong ka mekgele ya gago?

⁶ Bakeresete ba le bantsi ba ile ba itumela fa ba sa ntse ba le basha ka gonne e ne e le babulatsela. Ke eng fa o sa bue le bangwe ba bone ka mekgele ya gago? Baebele ya re: “Go na le go kgoreletsega ga dithulaganyo kwa go se nang puo ya sephiri teng, mme go na le se se fitlhelelwang mo go nang le bagakolodi ba bantsi teng.” (Dia. 15:22) Bakeresete bano ba ka nna ba go bolelela gore tirelo ya nako e e tletseng e go ruta dilo tse di ka go solegelang molemo botshelo jwa gago jotlhe. Le fa gone Jesu a ile a rutwa ke Rraagwe kwa legodimong, o ne a tswelela a ithuta fa a ne a le mo lefatsheng. Ka sekai, o ne a ithuta gore go rerela batho dikgang tse di molemo le go ikanyega fa o lekwa go dira gore motho a itumele. (Bala Isaia 50:4; Baheb. 5:8; 12:2) Mma re tlotle ka mefuta e e farologaneng ya tirelo ya nako e e tletseng e e ka dirang gore o itumele.

7. Ke eng fa basha ba le bantsi ba itumelela tiro ya go dira barutwa?

⁷ Jesu o ne a re: “Tsamayang . . . lo dire batho ba ditšhaba tsotlhe barutwa . . . lo ba rute.” (Math. 28:19, 20) Fa e le gore o ikaeletse go dira tiro eno, o tla bo o tlhopha tiro e e molemo tota e e galaletsang Modimo. Mme fela jaaka tiro nngwe le nngwe, o tlhoka nako gore o kgone go nna setswerere mo go yone. Mokaulengwe mongwe yo o bidiwang Timothy yo o  neng a nna mmulatsela a sa le mosha, o ne a bua jaana: “Ke rata go direla Jehofa mo tirelong ya nako e e tletseng ka gonne ke tsela e ke bontshang ka yone gore ke a mo rata. Kwa tshimologong, ke ne ke sa kgone go nna le dithuto tsa Baebele, mme ke ne ka ya kwa lefelong le lengwe mme morago ga kgwedi ke ne ke ithuta Baebele le batho ba le mmalwa. Motho mongwe yo ke neng ke ithuta Baebele le ene o ne a simolola go tla dipokanong. Fa ke tswa kwa Sekolong sa Baebele sa Bakaulengwe Ba ba Sa Nyalang, * ke ne ka abelwa go ya go direla kwa lefelong le lengwe mme fa ke le koo, ke ne ka ithuta le batho ba le banê. Ke rata go ithuta le batho, le go bona kafa moya o o boitshepo o ba thusang ka gone gore ba fetoge.”—1 Bathes. 2:19.

8. Basha bangwe ba Bakeresete ba ile ba dira eng mo tirong ya go dira barutwa?

⁸ Basha bangwe ba Bakeresete ba ile ba ithuta puo e nngwe. Ka sekai, Jacob wa kwa Amerika Bokone o ne a kwala jaana: “Fa ke na le dingwaga di le supa, bontsi jwa bana ba ke neng ke tsena sekolo le bone ba ne ba bua Se-Vietnam. Ke ne ke batla go ba bolelela ka Jehofa, ka jalo morago ga nako, ke ne ka simolola go ithuta puo ya bone. Ke ne ke e ithuta thata ka go bapisa makasine wa Tora ya Tebelo wa Se-Vietnam le wa Seesemane. Gape ke ne ka itirela ditsala kwa phuthegong ya Se-Vietnam ya mo lefelong la rona. Ke ne ka nna mmulatsela fa ke na le dingwaga di le 18. Moragonyana, ke ne ka ya Sekolong sa Baebele sa Bakaulengwe Ba ba Sa Nyalang. Go ya kwa sekolong seo go ile ga nthusa thata mo kabelong ya me ka gonne ke nna mogolwane fela mo setlhopheng sa puo ya Se-Vietnam. Batho ba le bantsi ba ba buang Se-Vietnam ba gakgamalela gore ke ithutile puo ya bone. Fa ke ba etetse, ba a nkamogela mme gantsi ke kgona go simolola thuto ya Baebele le bone. Bangwe ba bone ba ile ba gatela pele ba bo ba kolobediwa.”—Bapisa Ditiro 2:7, 8.

9. Tiro ya go dira barutwa e ka go ruta eng?

⁹ Tiro ya go dira barutwa e tla go ruta dilo tse di molemo, jaaka go nna motho yo o dirang ka natla, go buisana sentle le batho, go nna pelokgale le go nna le temogo. (Dia. 21:5; 2 Tim. 2:24) Gape tiro eno e monate thata ka gonne e go thusa gore o tlhatswege pelo ka dilo tse o di dumelang. Mo godimo ga moo, o ithuta go dira mmogo le Jehofa.—1 Bakor. 3:9.

10. O ka itumelela jang tiro ya go dira barutwa le fa o le mo tshimong e batho ba yone ba sa kgatlhegeng?

¹⁰ O ka itumelela tiro ya go dira barutwa le fa batho ba mo tshimong ya lona ba sa kgatlhegele molaetsa wa rona. Ke tiro e rotlhe re e tshwaraganetseng. Botlhe mo phuthegong ba nna le seabe mo go batleng batho ba ba ratang Modimo. Le fa gone mokaulengwe kgotsa kgaitsadi a le mongwe fela a ka thusa mongwe gore e nne morutwa wa ga Jesu, rotlhe re nnile le seabe e bile re ka itumelela seo. Ka sekai, mokaulengwe mongwe yo o bidiwang Brandon o ne a fetsa dingwaga di le robongwe a rera mo tshimong e batho ba yone ba neng ba sa kgatlhege. A re: “Ke rata go rera dikgang tse di molemo ka gonne ke se Jehofa a re kopang gore re se dire. Ke ne ka nna mmulatsela fela fa ke sena go fetsa sekolo. Ke itumelela go kgothatsa bakaulengwe ba basha mo phuthegong ya rona le go bona ba tokafatsa tsela e ba direlang Jehofa ka yone. Fa ke tswa kwa Sekolong sa Baebele sa Bakaulengwe Ba ba Sa Nyalang, ke ne ka abelwa go ya go direla kwa lefelong le lengwe. Gone ke boammaaruri gore ga ke ise ke tsamaye ke ithute le motho a bo a kolobediwa, le fa go ntse jalo, bakaulengwe le bokgaitsadi ba bangwe bone ba ile ba dira jalo. Ke itumelela gore ke ile ka ipeela mokgele wa go nna mmulatsela.”—Mor. 11:6.

11. Basha ba le bantsi ba itumelela mofuta ofe wa tirelo e e boitshepo?

¹¹ Re na le ditshono di le dintsi tsa go direla Jehofa. Ka sekai, basha ba le bantsi ba ithaopela  tiro ya go aga. Go tlhokega Diholo Tsa Bogosi di le dintsi. Go di aga ke tirelo e e boitshepo e e galaletsang Modimo e bile e ka go itumedisa. Fela jaaka mefuta e mengwe ya tirelo e e boitshepo, go dira le bakaulengwe le bokgaitsadi ba bangwe mo tirong eno go monate. Tiro ya go aga mafelo a kobamelo e re ruta gore re tseye pabalesego e le selo sa botlhokwa, gore re nne batho ba ba dirang ka natla le go dirisana sentle le ba ba eteletseng pele.

12. Go nna mmulatsela go ka go bulela ditshono dife?

¹² Mokaulengwe mongwe yo o bidiwang Kevin a re: “Go tloga fela ke sa le monnye, ke ne ke batla go direla Jehofa mo tirelong ya nako e e tletseng. Ke ne ka nna mmulatsela ke le dingwaga di le 19. Ke ne ke itshedisa ka go berekela mokaulengwe mongwe yo e neng e le moagi mme ke ne ke bereka malatsi a a rileng. Ke ne ka ithuta go tsenya marulelo, difensetere le mabati. Moragonyana, ke ne ka fetsa dingwaga di le pedi ke bereka le setlhopha sa namolo, re aga Diholo Tsa Bogosi le matlo a bakaulengwe a a neng a sentswe ke kgwanyape. Fa ke ne ke utlwa gore go tlhokega baithaopi ba go aga kwa Afrika Borwa, ke ne ka tsenya kopo mme ka amogelwa. Mo Afrika, re aga Holo ya Bogosi e ntšha morago ga dibeke di le mmalwa. Ke tsaya setlhopha sa bakaulengwe le bokgaitsadi ba ke berekang le bone e le lelapa la me. Re nna mmogo, re ithuta Baebele mmogo e bile re bereka mmogo. Gape ke itumelela go rera mmogo le bakaulengwe ba diphuthego tse re agang kwa go tsone. Mekgele e ke neng ka ipeela yone ke sa le monnye e dirile gore ke itumele fela thata.”

13. Ke eng fa basha ba itumelela go direla kwa Bethele?

¹³ Bangwe ba e neng e le babulatsela ba direla kwa Bethele. Go direla kwa Bethele go monate ka gonne sengwe le sengwe se o se dirang koo o se direla Jehofa. Maloko a Bethele a thusa gore go gatisiwe Dibaebele le dikgatiso tse  di thusang batho go ithuta boammaaruri. Mokaulengwe mongwe wa kwa Bethele yo o bidiwang Dustin a re: “Fa ke na le dingwaga di le robongwe, ke ne ka ipeela mokgele wa go tsenela tirelo ya nako e e tletseng, mme ke ne ka nna mmulatsela fela fa ke sena go fetsa sekolo. Morago ga ngwaga le halofo, ke ne ka amogelwa kwa Bethele mme fa ke le koo, ke ile ka ithuta go dirisa metšhine e e gatisang mme moragonyana ka bereka ka dikhomputara. Mo Bethele ke itumelela go utlwa ka kgatelopele e e dirwang mo tirong ya go rera mo lefatsheng lotlhe. Ke itumelela go direla mo Bethele ka gonne tiro e re e dirang e thusa batho gore ba atamalane le Jehofa.”

14. O ka ipaakanyetsa jang go tsenela tirelo ya nako e e tletseng?

¹⁴ O ka ipaakanyetsa jang go tsenela tirelo ya nako e e tletseng? Sengwe se se ka go thusang go direla Jehofa ka botlalo ke go lwela go nna le dinonofo tsa Bokeresete. Ka jalo, o tshwanetse go ithuta Baebele ka tlhoafalo, o tlhatlhanye ka se o se ithutang e bile o bontshe tumelo ya gago ka go nna le seabe kwa dipokanong. O ka dirisa nako ya fa o sa ntse o tsena sekolo go tokafatsa tsela e o rerang ka yone. Ithute go bontsha batho gore o a ba kgatlhegela ka go ba botsa dipotso le go reetsa dikarabo tsa bone. Gape o ka ithaopela go dira dilo dingwe kwa phuthegong, jaaka go phepafatsa Holo ya Bogosi le go e tlhokomela. Jehofa o itumelela go dirisa batho ba ba boikokobetso le ba ba mo direlang ka go rata. (Bala Pesalema 110:3; Dit. 6:1-3) Moaposetoloi Paulo o ne a kopa Timotheo gore a tsamaye le ene mo maetong a gagwe a borongwa ka gonne Timotheo “o ne a bolelwa [a le] molemo ke bakaulengwe.”—Dit. 16:1-5.

15. O ka dira eng gore o kgone go itshedisa fa o tsenela tirelo ya nako e e tletseng?

¹⁵ Go le gantsi, batho ba ba mo tirelong ya nako e e tletseng ba tlhoka go itshedisa. (Dit. 18:2, 3) Go dira khoso e khutshwane kwa sekolong go ka go thusa go bona tiro e e ka bonwang motlhofo e o ka kgonang go e dira ka malatsi a a rileng. Fa o ntse o rulaganya dilo tsa gago, bua le molebedi wa potologo le babulatsela ba mo lefelong la lona. Ba botse gore ke tiro efe ya boitshediso e e siametseng babulatsela. Mme fela jaaka Baebele e bua, “pitikela ditiro tsa gago mo go Jehofa mme dithulaganyo tsa gago di tla tlhomamisiwa thata.”—Dia. 16:3; 20:18.

16. Go direla Jehofa ka botlalo o sa ntse o le mosha go ka go baakanyetsa jang maikarabelo a o tla nnang le one mo isagweng?

¹⁶ Tlhomamisega gore Jehofa o batla gore o “tshware” botshelo jo bo itumedisang “ka thata.” (Bala 1 Timotheo 6:18, 19.) Tirelo ya nako e e tletseng e tla dira gore o nne le botsala jo bo molemo le bakaulengwe le bokgaitsadi ba le bone ba leng mo go yone mme gape e tla nonotsha tumelo ya gago. Bangwe ba ile ba lemoga gore go direla Jehofa ba sa le basha go ba thusitse gore ba nne le manyalo a a itumetseng. Go le gantsi bakaulengwe le bokgaitsadi ba ba nnileng babulatsela pele ba tsena mo lenyalong, ba ile ba kgona go tswelela ka tirelo ya bone fa ba sena go nyalana.—Bar. 16:3, 4.

17, 18. Go tlhopha gore o batla go dira eng go amana jang le dilo tse o di ratang?

¹⁷ Go tlhopha gore o batla go dira eng go amana thata le dilo tse o di ratang. Pesalema 20:4 e bua jaana ka Jehofa: “E kete a ka go naya go ya ka pelo ya gago, mme e kete a ka diragatsa boikaelelo jotlhe jwa gago.” Ka jalo, akanya ka se o batlang go se dira mo botshelong. Gape akanya ka dilo tse Jehofa a di dirang mo motlheng ono mme o bone gore o ka nna jang le seabe mo tirelong ya gagwe. Go tswa foo, ipeele mekgele e e tla mo itumedisang.

¹⁸ Go direla Jehofa ka botlalo go tla dira gore o itumelele botshelo le gore o mo galaletse. Baebele ya re: “Itumelele Jehofa thata, mme o tla go naya dikopo tsa pelo ya gago.”—Pes. 37:4.