BANYALANI
3: Go Tlotlana
GO KAYA ENG?
Fa batho ba ba nyalaneng ba ratana, ba a tlotlana le fa ba sa dumalane ka sengwe. Buka nngwe e e buang ka lenyalo ya re fa banyalani ba tlotlana “yo mongwe ga a kitla a pateletsa gore dilo di dirwe ka tsela ya gagwe. Go na le moo, fa go na le bothata, ba tlotla ka jone. Ba a reetsana fa yo mongwe a tlhalosa maikutlo a gagwe e bile ba leka go batla tsela e e ka ba berekelang botlhe.”
BAEBELE YA RE: “Lorato . . . ga lo ipatlele melemo ya lone fela.”—1 Bakorintha 13:4, 5.
“Ke bontsha gore ke tlotla mosadi wa me ka go tila go dira sepe fela se se ka mo utlwisang botlhoko kgotsa go thuba lenyalo la rona.”—Micah.
GORENG GO LE BOTLHOKWA?
Fa banyalani ba sa tlotlane, ba ka kgobana ka mafoko le go nyatsana mme babatlisisi ba re seo se tla dira gore ba feleletse ba tlhalane.
“Go sotla mosadi wa gago ka mafoko kgotsa go dira metlae ka ene go tla dira gore a inyatse, a se ka a tlhola a go tshepa e bile go ka dira gore go se ka ga nna monate mo lenyalong la lona.”—Brian.
SE O KA SE DIRANG
ITLHATLHOBE
Mo malatsing a le supa a a latelang, ela tlhoko tsela e lo tlotlang ka yone le e lo dirisanang ka yone. Go tswa foo, ipotse dipotso tse di latelang:
-
‘A ke ne ke mo kgoba thata ka mafoko kgotsa ke ne ke mo akgola thata?’
-
‘Ke bontshitse ka ditsela dife gore ke a mo tlotla?’
DIPOTSO TSE LO KA TLOTLANG KA TSONE
-
Ke eng se nka se dirang kgotsa se nka se buang gore o bone gore ke a go tlotla?
-
Ke eng se ke se dirang kgotsa se ke se buang se se dirang gore o ikutlwe e kete ke a go nyatsa?
DIKAKANTSHO
-
Tsaya pampiri mme o kwale dilo tse tharo tse o ka ratang gore mosadi wa gago a di dire go go bontsha gore o a go tlotla. Kopa mosadi wa gago gore le ene a dire jalo. Tsaya pampiri ya gago o e neye mosadi wa gago mme o tseye ya gagwe. Go tswa foo, lekang go berekela mo dintlheng tseo.
-
Kwala dilo tse o di ratang ka botho jwa monna kgotsa mosadi wa gago. Go tswa foo, mmolelele gore o lebogela botho joo jwa gagwe.
“Go bontsha monna wa me gore ke a mo tlotla go raya gore ke dire dilo tse a di ratang le tse di mo itumedisang. Ga ke tlhoke go dira sepe se se kalo, dilo tse dinnye fela tse ke di dirang le tse ke di buang di ka mmontsha gore ke a mo tlotla.”—Megan.
Kgang ga se gore wena o tsaya gore o tlotla monna kgotsa mosadi wa gago, ntlha ke gore a ene o ikutlwa a tlotliwa.
BAEBELE YA RE: “Aparang lorato lwa bopelotlhomogi, bopelonomi, mogopolo o o ikokobeditseng, bonolo, le go itshwara ka bopelotelele.”—Bakolosa 3:12.
Tse Dingwe Tse O ka Di Kgatlhegelang
TORA YA TEBELO
Go Dirisana le Molekane wa Gago ka Tlotlo
Kafa monna kgotsa mosadi a ka buisanang le molekane wa gagwe ka tlotlo ka teng?
TSOGANG!
Ditsela Tsa go Bontshana Tlotlo
Go bontsha tlotlo mo lenyalong ga se selo se se tshwanetseng go dirwa sewelo; ke karolo ya botlhokwa thata ya lenyalo. O ka bontsha jang molekane wa gago tlotlo?
TSOGANG!
Go Bontsha Gore o a Leboga
Fa monna le mosadi ba lemoga dilo tse di molemo tse mongwe le mongwe wa bone a nang le tsone ba bo ba akgolana, lenyalo la bone le a nonofa. Ke eng se se ka go thusang go bontsha gore o a leboga?
TSOGANG!
Kafa o ka Tilang go Bua Mafoko a a Tlhabang ka Gone
O ka dira eng fa e le gore wena le molekane wa gago lo letlile gore puo e e utlwisang botlhoko e senye kamano ya lona?
