Boitumelo Jwa go Aba
“Go na le boitumelo jo bogolo mo go abeng go na le jo bo leng gone mo go amogeleng.”—DITIRO 20:35.
Lebaka la go bo bangwe ba keteka Keresemose.
Fela jaaka Jesu a ile a bolela, go aba go dira gore motho yo o abang le yo o amogelang ba itumele. E re ka batho ba le bantsi ba batla go nna le boitumelo jwa go aba, ba tsaya go aba dimpho e le nngwe ya dilo tse di botlhokwa tse ba ka di dirang ka Keresemose. Ka sekai, tota le fa go ne go na le mathata a ikonomi ngogola, patlisiso nngwe e fitlhetse gore kwa Ireland, lelapa lengwe le lengwe le ne le lebeletse go dirisa madi a a kana ka R5 500 go reka dimpho tsa Keresemose.
Ke eng fa e le kgwetlho?
Batho ba le bantsi ba akanya gore go aba dimpho ka Keresemose go dira gore ba ngomoge pelo thata go na le gore ba itumele. Jang? Bareki ba le bantsi ba ikutlwa ba patelesega go reka dimpho tse ba se nang madi a tsone. Go reka dimpho e nna selo se se lapisang, ka gonne ka nako eo mongwe le mongwe o reka dimpho, go a tlala e bile go na le mela e meleele.
Ke melaometheo efe ya Baebele e e ka thusang?
Jesu o ne a re: “Itlwaetseng go aba.” * (Luke 6:38) Ga a ka a re batho ba abe dimpho fela ka nako e e rileng mo ngwageng, fa go solofetswe gore batho ba abele ba bangwe dimpho. Jesu o ne a rotloetsa balatedi ba gagwe gore ba itlwaetse go aba ka kgololesego, e nne tsela ya bone ya go tshela.
“A mongwe le mongwe a dire fela jaaka a sweditse mo pelong ya gagwe, e seng ka go ikgoga fela kgotsa ka go patelelwa, gonne Modimo o rata yo o nayang ka boitumelo.” (2 Bakorintha 9:7) Buka nngwe e e tlhalosang Baebele ya re se tota se kaiwang ke kgakololo ya ga Paulo ke gore, “ga go na sepe se se tshwanetseng go abiwa ka ‘go patelelwa’ mme motho a ikutlwa a patelediwa gore a abe.” Go nna motho “yo o nayang ka boitumelo” go raya gore motho ga a tshwanela go aba ka go bo a ikutlwa a tshwanetse go abela motho yo o rileng selo se se rileng ka nako e e rileng—tsela e go aba dimpho go dirwang ka yone ka Keresemose.
“Sa ntlha, fa go iketleetsa go le teng, go amogelesega segolobogolo go ya ka se motho o nang le sone, e seng go ya ka se motho a se nang sone.” (2 Bakorintha 8:12) Modimo ga a batle gore Bakeresete ba itsenye mo dikolotong go duelela dimpho tse di jang madi a mantsi. Go na le moo, fa motho a aba ‘go ya ka se a nang le sone,’ dimpho tsa gagwe ga se tse di siameng fela mme gape di “amogelesega segolobogolo.” A bo seo se lapolosa jang ne fa se bapisiwa le molaetsa wa nako ya malatsi a boikhutso o baphasalatsi ba o dirisang o o reng “reka jaanong o tla duela morago!”
^ ser. 8 Dithanolo dingwe tsa Baebele di dirisa fela lefoko “aba.” Le fa go ntse jalo, mo Segerikeng sa ntlhantlha, lediri le le dirisitsweng mo mafokong ao le bontsha sengwe se se tswelelang pele. Go bontsha bokao jo bo feletseng jwa lefoko le Jesu a le dirisitseng, Thanolo ya Lefatshe le Lesha e ranotse lefoko leo ka gore “itlwaetseng go aba.”
