“Ko e ʻOtuá ʻokú ne fakahaaʻi lelei mai ʻene ʻofa ʻaʻaná kiate kitautolu ʻi he foungá ni: Naʻe pekia ʻa Kalaisi maʻatautolu lolotonga ʻetau kei hoko ko e kau angahalá.”—Loma 5:8, Liliu Tohi Tapu Māmani Foʻoú.

 “Oku fakaha e he Otua ene ofa kiate kitautolu i he mea ni, lolotoga koe kau agahala akitautolu, ne bekia a Kalaisi maa tautolu.”—Loma 5:8, Paaki Motuʻa.

 Naʻe fakahāhā ʻe Sihova a ko e ʻOtuá ʻa e ʻofa lahi ʻi heʻene fakaʻatā hono ʻAló, ʻa Sīsū Kalaisi ke pekia koeʻuhi ko e faʻahinga angahalaʻia ʻo e tangatá. (Sione 3:16) ʻI hotau tuʻunga angahalaʻiá, ʻoku tau aafe ke fakakaukau pe fai ʻa e ngaahi tōʻonga ʻoku fepaki mo e ngaahi tuʻunga māʻoniʻoni ʻa e ʻOtuá. (Kolose 1:21, 22) Kae kehe, naʻe ʻai ʻe he ʻOtuá ke malava ke tau fakalelei mo ia “fakafou ʻi he pekia ʻa hono ʻAló.” (Loma 5:10) Ko e olá, ʻe lava ke tau maʻu ʻa e faingamālie ke maʻu ha vahaʻangatae lelei mo e ʻOtuá ʻi he taimí ni mo e ʻamanaki ki he moʻui taʻengata ʻi he kahaʻú.—Loma 5:11; 1 Sione 4:9, 10.

 Naʻe tohi ʻe he ʻapositolo ko Paulá ʻa e ngaahi lea ko ení ki he kau Kalisitiane naʻe nofo ʻi Lomá. ʻI he vahe 5 ʻo e tohi ʻa Paula ki he kau Lomá, naʻá ne fakamatalaʻi ʻa e ʻuhinga ke fiefia ai ʻa e kau Kalisitiané pea falala pau ki heʻenau ʻamanakí. (Loma 5:1, 2) Ko e ʻamanaki ko iá “ʻoku ʻikai iku ia ki he loto-mamahi,” koeʻuhí ʻoku makatuʻunga ia ʻi he ʻofa lahi ʻa e ʻOtuá kuó ne fakahāhā fakafou ʻia Sīsū. (Loma 5:5, 6) Naʻe hanganaki talangofua haohaoa ʻa Sīsū ki he ʻOtuá, ko e meʻa ia naʻe ʻikai ke fai ʻe he ʻuluaki tangatá ʻa ʻĀtama. (Loma 5:19) Ko e talangataʻa ʻa ʻĀtamá naʻe iku atu ai hono hakó ki he angahalá mo e maté. (Loma 5:12) ʻI hono kehé, ko e talangofua haohaoa ʻa Sīsuú mo ʻene pekia fakaefeilaulaú naʻá ne ʻai ai ke malava ki he faʻahinga talangofua ʻo e tangatá ke nau maʻu ʻa e ʻamanaki ʻo e moʻui taʻengatá.—Loma 5:21.