Ko e fakahohaʻasi fakaefehokotaki fakasinó ʻoku kau ki ai ha faʻahinga tōʻonga fakaefehokotaki fakasino ʻikai fiemaʻu pē​—kau ai ʻa e ala pe naʻa mo e ngaahi lea ʻoku natula fakaefehokotaki fakasino. Ka ʻi he taimi ʻe niʻihi ʻe lava ke faingataʻa ke fakafaikehekeheʻi ʻa e fakamatalilí, fakamalingá mo e fakahohaʻasi fakaefehokotaki fakasinó.

 ʻOkú ke ʻiloʻi ʻa honau kehekehé? Tali ʻa e  fehuʻi fekauʻaki mo e fakahohaʻasi fakaefehokotaki fakasinó ke ke ʻiloʻi!

 Ko e meʻa pangó, ko e fakahohaʻasi fakaefehokotaki fakasinó ʻoku ʻikai ke ngata maʻu pē ia ʻi hoʻo ʻosi mei he akó. Kae kehe, kapau te ke fakatupulekina ʻa e loto-maʻu mo e pōtoʻi ʻoku fiemaʻu ke fekuki ai mo e fakahohaʻasi fakaefehokotaki fakasinó he taimí ni, te ke mateuteu ai ke fekuki mo ia ʻi hoʻo hū ʻo ngāué. Pea ʻe aʻu nai ʻo ke taʻofi ha tokotaha ʻoku tōʻonga pehē mei haʻane fakamamahiʻi ʻa e niʻihi kehé!

 Ko e fakahohaʻasi fakaefehokotaki fakasinó ʻoku ngalingali ange ʻe taʻofi kapau ʻokú ke ʻiloʻi pe ko e hā ia pea mo e founga ke fakafeangai ai ki aí! Fakakaukau ki ha tuʻunga ʻe tolu pea mo e founga ke fekuki ai mo e tuʻunga taki taha.

 TUʻUNGÁ:

“ʻI he ngāué, ko e kakai tangata ʻe niʻihi naʻa nau taʻumotuʻa ange ʻiate au naʻa nau toutou tala mai naʻá ku foʻi hoihoifua pea naʻa nau fakaʻamu ange naʻe kei pongipongi. Naʻe aʻu ʻo lue ha taha ʻo kinautolu ʻi hoku tuʻá pea fakananamu hoku ʻulú!”​​—Tabitha, 20.

 ʻE fakakaukau nai ʻa Tabitha: ‘Kapau te u tukunoaʻi pē ia pea matuʻuaki ia, mahalo te ne taʻofi.’

 ʻUhinga heʻikai tokoni nai ai iá: ʻOku pehē ʻe he kau mataotaó ʻi hono tukunoaʻi ʻe he kau maʻukoviá ʻa e fakahohaʻasi fakaefehokotaki fakasinó, ʻoku faʻa hokohoko atu pē ia pea aʻu ʻo toe fakalalahi.

 Kae ʻahiʻahiʻi eni: Lea hake anga-mokomoko kae mahino ʻo tala ange ki he tokotahá ʻoku ʻikai te ke talitalituʻu ʻene leá pe tōʻongá. “Kapau ʻoku ala mai ha taha kiate au ʻi ha founga taʻetaau,” ko e lea ia ʻa e taʻu 22 ko Taryn, “ʻOku ou hanga hake pea tala ange ke tapu naʻa toe ala mai kiate au. ʻOku faʻa ʻohovale ai ʻa e tamasiʻí.” Kapau ʻe kei hokohoko atu pē ʻa e feinga ʻa e tokotahá, tuʻu maʻu pea ʻoua ʻe foʻi. ʻI heʻene haʻu ki hono tauhi maʻu ʻa e ngaahi tuʻunga fakaeʻulungaanga māʻolungá, ko e faleʻi ʻa e Tohi Tapú: “Ke mou tuʻu maʻu ko ha faʻahinga ʻoku matuʻotuʻa fakataha mo e tuipau mālohi.”​​—Kolose 4:​12.

 Fēfē kapau ʻoku fakamanamanaʻi koe ʻe he tokotaha ʻokú ne fakahohaʻasi koé? Kapau ko e tuʻungá ia, ʻoua ʻe fakafepakiʻi iá. Hola mei he tuʻungá ʻi he vave taha ʻe ala lavá, pea kumi tokoni ki ha tokotaha lahi falalaʻanga.

 TUʻUNGÁ:

“ʻI heʻeku kalasi onó, naʻe puke au ʻe ha ongo tamaiki fefine ʻi he vahaʻa loki akó. Ko e taha ʻiate kinaua naʻe fakatangata, pea naʻá ne loto ke ma kiʻi ʻalu. Neongo naʻá ku fakafisi, naʻe hokohoko atu ʻena fakahohaʻasi au ʻi he ʻaho kotoa ʻi he ʻosi ʻa e kalasi taki taha. Naʻe tuʻo taha ʻena tekeʻi au ʻo fakapipiki ki ha holisi!”​—Victoria, 18.

 Naʻe fakakaukau nai ʻa Victoria: ‘Kapau te u tala eni ki ha taha, ʻe ui au ko u foʻi, pea mahalo heʻikai ke tui mai ha taha kiate au.’

 ʻUhinga heʻikai nai ke tokoni ai ʻa e fakakaukau ko iá: Kapau ʻokú ke tauholomui mei hono tala ha tokotaha, ko e tokotaha ʻokú ne fakahohaʻasi koé ʻe hokohoko atu nai pea aʻu ʻo ne fakamamahiʻi koe.​—Tangata Malanga 8:11.

 Kae ʻahiʻahiʻi eni: Kumi ki ha tokoni. Ko e ngaahi mātuʻá mo e kau faiakó ʻe lava ke nau ʻoatu ʻa e poupou ʻokú ke fiemaʻu ke fekuki ai mo e tokotaha ʻokú ne fakahohaʻasi koé. Kae fēfē kapau ʻoku ʻikai ke toʻo mamafa ʻe he kakai ʻokú ke tala ki aí ʻa hoʻo lāungá? ʻAhiʻahiʻi eni: ʻI he taimi kotoa ʻoku fakahohaʻasi ai koé, hikiʻi hifo ʻa e fakaikiikí. Fakakau ai ʻa e ʻaho, taimi mo e feituʻu ʻoku hoko aí, fakataha mo e meʻa naʻe leaʻaki ʻe he tokotaha naʻá ne fakahohaʻasi koé. Pea ʻoange leva ha tatau ki hoʻo mātuʻá pe faiakó. Ko e kakai tokolahi ʻoku nau fakafeangai fakamātoato ange ki ha lāunga ʻoku hiki ʻi ha tala-ngutu pē.

 TUʻUNGÁ:

“Naʻá ku ilifia ʻaupito ʻi he tamasiʻi ʻe taha ko eni naʻe kau ʻi he timi ʻakapulú. Naʻá ne meimei mita ʻe ua (fute ʻe 6.5) hono lōloá, pea naʻe kilokalami ʻe 135 nai hono mamafá (pāuni ʻe 300)! Naʻá ne ʻosi fakapapauʻi ʻi hono ʻatamaí te ne ‘maʻuʻi au.’ Naʻá ne toutou kole mai ʻi he meimei ʻaho kotoa pē​—ʻi ha taʻu kakato ʻe taha. ʻI he ʻaho ʻe taha, ko kimaua pē naʻe ʻi he loki akó, pea naʻe kamata ke ne fakaofiofi mai kiate au. Naʻá ku puna ki ʻolunga peá u lele ki tuʻa ʻi he matapaá.”​​—Julieta, 18.

 ʻE fakakaukau nai ʻa Julieta: ‘Ko e anga pē ia ʻo e tamaiki tangatá.’

 ʻUhinga heʻikai tokoni nai ai iá: ʻOku ngalingali heʻikai liliu ʻe he tokotaha ʻokú ne fakahohaʻasi koé ʻene tōʻongá kapau ʻoku fakakaukau ʻa e tokotaha kotoa ʻoku ala tali ia.

 Kae ʻahiʻahiʻi eni: Talitekeʻi ʻa e fakatauele ke fakakata pē fekauʻaki mo e tuʻungá pe tali ki ai ʻaki ha malimali. ʻI hono kehé, fakapapauʻi ko hoʻo fakafeangaí​—kau ai ʻa e anga ho fōtungá​—ʻoku ʻai ai ke hā mahino ki he tokotaha ʻokú ne fakahohaʻasi koé ʻa e meʻa te ke lava ʻo matuʻuakí pe ʻikai ke matuʻuakí.

 TALANOA MOʻONI 1:

“ʻOku ʻikai pē te u saiʻia ke anga-kovi ki he kakaí. Ko ia naʻa mo e hanganaki fakahohaʻasi au ʻe he tamaiki tangatá, te u tala ange ke tuku​—ka naʻe ʻikai ke u fuʻu tuʻu maʻu, pea naʻá ku faʻa malimali ʻi heʻeku lea kiate kinautolú. Naʻa nau fakakaukau naʻá ku fakamalinga.”​—Tabitha.

•   Kapau ko Tabitha koe, naʻe mei fēfē hoʻo fakafeangai ki he faʻahinga ko ia naʻa nau fakahohaʻasi koé? Ko e hā hono ʻuhingá?

•   Ko e hā nai te ne ʻai ha tokotaha ʻokú ne fakahohaʻasi koe ke fakakaukau ʻokú ke fakamalinga kiate ia?

 TALANOA MOʻONI 2:

“Naʻe kamata kotoa ia ʻaki ha fanga kiʻi tūkuhua kovi pē mei he tamaiki tangata ʻe niʻihi ʻi heʻemau kalasi vaʻingá. Naʻá ku tukunoaʻi ʻenau ngaahi leá ʻi he ngaahi uike siʻi, ka naʻe ʻalu ke toe kovi ange. Naʻe kamata ke tangutu ʻa e tamaiki tangatá ʻi hoku tafaʻakí pea hili mai honau nimá ʻi hoku umá. Naʻá ku tekeʻi ia, ka naʻa nau tuku pē ʻe kinautolu. Faai atu pē, naʻe ʻomai ʻe he taha ʻo e tamaiki tangatá ha lauʻi pepa mo ha pōpoaki ʻikai lelei. Naʻá ku ʻave ia ki heʻeku faiakó. Naʻe tuli fakataimi ʻa e tamasiʻi mei he akó. Naʻá ku ʻiloʻi naʻe totonu ke u ʻalu ki he faiakó ʻi he kamataʻangá!”​—Sabina.

•   ʻOkú ke fakakaukau ko e hā naʻe fili ai ʻa Sabina ke ʻoua ʻe ʻalu ki heʻene faiakó ʻi he kamataʻangá? ʻOkú ke fakakaukau naʻá ne fai ha fili lelei? Ko e hā hono ʻuhingá pea ko e hā naʻe ʻikai totonu aí?

 TALANOA MOʻONI 3:

“Ko hoku tuongaʻané ʻa Greg naʻe fakaofiofi ha tamasiʻi kiate ia ʻi he falemālōloó. Naʻe ʻunu pē ʻa e tamasiʻí ʻo ofi ʻaupito kia Greg peá ne pehē ange, ‘ʻUma.’ Naʻe tala ange ʻe Greg ʻikai, ka naʻe ʻikai pē ke ʻalu ʻa e tamasiʻí. Ko hono moʻoní, naʻe pau ke tekelele ʻe Greg ʻa e tamasiʻí ki mamaʻo.”​—Suzanne.

•   ʻOkú ke fakakaukau naʻe maʻukovia ʻa Greg ʻi he fakahohaʻasi fakaefehokotaki fakasinó? Ko e hā hono ʻuhingá pe ko e hā naʻe ʻikai aí?

•   ʻOkú ke fakakaukau ko e hā ʻoku toumoua ai ʻa e tamaiki tangata ʻe niʻihi ke lea hake ʻi hono fakahohaʻasi fakaefehokotaki fakasino kinautolu ʻe ha tamasiʻi ʻe taha?

•   ʻOkú ke loto-tatau mo e founga naʻe fakaleleiʻi ai ʻe Greg ʻa e tuʻungá? Ko e hā naʻá ke mei faí?