Naʻe foaki ki he toko hiva ʻo e Kau Fakamoʻoni ʻa Sihova ʻi ʻAositelēlia ʻa e setifikeiti ʻo e houngaʻia ʻi heʻenau fakahoko ʻa e “ngāue tuʻu-ki-muʻa” ki he kau tauhi fakalao ʻi he taha ʻo e ngaahi senitā ʻimikuleisoni lahi taha ʻi ʻAositelēliá. Naʻe maʻu ʻe he Kau Fakamoʻoní ʻa e palé mei he Curtin Immigration Detention Centre ofi ki Derby, ʻi ʻAositelēlia Hihifo. a

ʻI he uike taki taha, ʻoku ʻaʻahi ʻa e Kau Fakamoʻoní ki he kau tauhi fakalaó ke fanongo ki heʻenau ngaahi palopalemá pea vahevahe ange ha pōpoaki fakafiemālie mo e ʻamanaki mei he Tohi Tapú. “Naʻe vave hono fakatokangaʻi ʻa e ngaahi ola lelei ʻenau ʻaʻahí,” ko e lau ia ʻa Christopher Riddoch, ko e ʻōfisa fetuʻutaki fakalotu mo fakaeʻulungaanga ia ʻo e senitaá. Naʻá ne pehē ʻoku lelei ange ʻa e tōʻonga ʻa e kau tauhi fakalaó pea ʻoku nau fiefia ange hili ʻa e ngaahi ʻaʻahí, ʻa ia ʻokú ne fakaongoongoleleiʻi ʻa e kau tangatá “ʻi hono ʻiloʻi ʻoku ʻi ai ʻa e faʻahinga ʻoku nau mahuʻingaʻia moʻoni ʻi heʻenau leleí.”

Naʻe toe pehē ʻe Mr. Riddoch ko e setifikeiti ne ʻoange ki he Kau Fakamoʻoní ko ha kiʻi fakahāhā pē ia ʻo e fakamālō, “ki hono tokoniʻi ʻa e moʻui ʻa e kau tangata ʻoku nau tokangaʻí.” Naʻá ne toe pehē ko e Kau Fakamoʻoní “ʻoku fakaongoongoleleiʻi ai honau ngaahi fāmilí, fakatahaʻangá mo ʻenau tuí.”