Na‘á ku sai‘ia ‘i he ngaahi me‘a ‘o natulá talu mei he‘eku kei si‘í. Ko hoku fāmilí na‘a nau sai‘ia ma‘u pē ke ‘alu ki he ngaahi vaotā manakoa mo e ngaahi anovai faka‘ofo‘ofa na‘á ne takatakai‘i homau koló ko Jyväskylä, ‘i Finilani Lotoloto. Na‘á ku sai‘ia foki ‘i he fanga manú. ‘I he‘eku kei si‘í, na‘á ku loto ke fā‘ofua ki he pusi mo e kulī kotoa pē na‘á ku sio ki aí! ‘I he‘eku fu‘u lahí, na‘e fakahoha‘asi au ‘i he‘eku sio ki he founga hono ngaohikovi‘i ‘e he kakaí ‘a e fanga manú. ‘I he faai mai ‘a e taimí, na‘á ku kau ‘i ha kautaha ki he totonu ‘a e fanga manú, ‘a ia na‘á ku fetaulaki ai mo ha kakai na‘a nau ma‘u ‘a e fakakaukau tatau.

Na‘a mau kau ‘i ha feingangāue ki he totonu ‘a e fanga manú. Na‘a mau tufaki ha fakamatala mo fokotu‘utu‘u ha ngaahi laka fakahāhā fakataha mo ha fakamo‘oni ‘oku ‘ikai ke mau poupou‘i ‘a e ngaahi falekoloa fulufulu‘imanú pehē ki he ngaahi fale fakatotolo ‘oku nau ngāue‘aki ‘a e fanga manú ke ‘ahi‘ahi‘i ai ‘enau faito‘ó. Na‘a mau fokotu‘u foki ha kautaha fo‘ou ke malu‘i ‘a e fanga manú. Na‘a mau fai ‘a e fo‘i nga‘unu mahu‘inga ko ení koe‘uhi na‘a mau loto ke ‘unu ‘emau ngāué ki mu‘a, ka na‘a mau fa‘a fepaki mo e kau ma‘u mafaí. Na‘e tu‘o lahi hono puke au ‘o ‘ave ki he fakamaau‘angá.

Tānaki atu ki he‘eku tokanga ki he fanga manú, na‘e fakahoha‘asi au ‘e he ngaahi palopalema kehe takatakai ‘i he māmaní. Faai atu ‘a e taimí, na‘á ku kau ‘i ha ngaahi kautaha lahi, ‘o kau ai ‘a e kautaha fakavaha‘apule‘anga ‘oku nau taukapo’i ‘a e totonu ‘a e tangatá mo hono malu‘i ‘o e ‘ātakaí. Na‘á ku fakahangataha hoku iví ke poupou‘i ‘enau ngaahi ngāué. Na‘á ku taukapo‘i ‘a e kau masivá, fiekaiá, mo e fa‘ahinga ‘oku ‘ikai ke nau malava taukapo‘i kinautolú.

‘I he faai mai ‘a e taimí na‘á ku fakatokanga‘i he‘ikai malava ke u liliu ‘a e māmaní. Neongo ‘oku malava ‘e he ngaahi kautaha ko ení ke fakalelei‘i ha ngaahi palopalema iiki pē, ka ko e ngaahi palopalema lalahí ‘oku ‘alu ia ke toe kovi ange. Na‘e hangē ia kuo uesia ‘e he koví ‘a e māmaní kotoa pea na‘e ‘ikai ha taha ‘e tokanga ki ai. Na‘á ku ongo‘i ‘oku ‘ikai ha‘aku mālohi.

‘I he ongo‘i loto-mamahi koe‘uhi ko e ‘ikai ha tokoní, na‘e kamata ke u fakakaukau fekau‘aki mo e ‘Otuá pea mo e Tohi Tapú. Na‘á ku ako Tohi Tapu ki mu‘a mo e Kau Fakamo‘oni ‘a Sihová. Neongo na‘á ku hounga‘ia ‘i he anga-lelei mo e mahu‘inga‘ia fakafo‘ituitui na‘e fakahaa‘i mai ‘e he Kau Fakamo‘oní, ka na‘e te‘eki ai ke u mateuteu ke liliu ‘eku tō‘onga mo‘uí. Ka ‘i he taimí ni, ‘oku kehe ‘a e ngaahi me‘á ia.

Na‘á ku to‘o hake ‘eku Tohi Tapú pea kamata lau ia. Na‘e hoko ia ko ha fakafiemālie lahi ki hoku ngaahi laveá. Na‘á ku fakatokanga‘i ‘a e konga lahi ‘i he Tohi Tapú ‘okú ne ako‘i mai ke tau tokanga‘i lelei ‘a e fanga manú. Ko e fakatātaá, ‘i he Palōveepi 12:10 ‘oku pehē ‘oku “tokaga‘i e he tagata maonioni ae moui a ene manu.” (Paaki Motu‘a) Na‘á ku toe ‘ilo‘i ‘oku ‘ikai ko e ‘Otuá ‘a e tupu‘anga ‘o e ngaahi palopalema ‘i he māmaní. ‘I hono kehé, ‘oku toe kovi ange ‘a e ngaahi palopalemá koe‘uhi ko e kakai tokolahi ‘oku ‘ikai ke nau muimui ‘i he ngaahi tataki ‘a e ‘Otuá. Na‘e maongo lahi kiate au ‘i he‘eku ako ki he ‘ofa mo e kātaki fuoloa ‘a Sihová.​—Saame 103:8-14.

‘I he taimi ko ení, na‘á ku ma‘u ha kūponi ki he tohi Ko e Hā ‘Oku Ako‘i Mo‘oni ‘e he Tohi Tapú? pea fakahū ia. Taimi nounou mei ai na‘e ‘a‘ahi mai ha ongo Fakamo‘oni ‘a ia ko ha ongo me‘a mali ki hoku matapaá ‘o tu‘uaki mai ha ako Tohi Tapu, ‘a ia na‘á ku tali. Na‘e kamata foki ke u ma‘u ‘a e ngaahi fakataha faka-Kalisitiane ‘i he Fale Fakataha‘angá. Ko hono olá, na‘e kamata ke faiaka ‘a e mo‘oni ‘o e Folofolá ‘i hoku lotó.

‘I he tokoni ‘a e Tohi Tapú, na‘e malava ke u fai ha ngaahi liliu lahi. Na‘e tuku ‘eku ifí mo e inu tōtu‘á. Na‘á ku fakalelei‘i hoku fōtungá mo e tō‘onga leá. Pea na‘á ku fakatonutonu ‘eku fakakaukau ki he kau ma‘u mafai mā‘olungá. (Loma 13:1) Na‘á ku toe li‘aki foki ‘eku tō‘onga mo‘ui ta‘etāú, ‘a ia ko e tafa‘aki ia na‘á ku vaivai aí.

Ko e liliu faingata‘a taha kiate aú ko hono fakatupulekina ha vakai totonu ki he ngaahi kautaha ki he totonu ‘a e tangatá mo e fanga manú. Na‘e ‘ikai ke hoko ia ‘i ha pō pē ‘e taha. ‘I he ‘uluaki taimí, na‘á ku ongo‘i te u lavaki‘i ‘a e ngaahi kautaha ko ení kapau te u fakafisi. Kae kehe, na‘e kamata ke u hounga‘ia ‘i he Pule‘anga ‘o e ‘Otuá, ‘a ia ko e ‘amanaki mo‘oni pē ia ‘e taha ki hotau māmaní. Na‘á ku fili leva ke ‘oatu kotoa hoku iví ki hono poupou‘i ‘a e Pule‘anga ko iá pea tokoni‘i ‘a e ni‘ihi kehé ke ako fekau‘aki mo ia.​—Mātiu 6:​33.

‘I he hoko ko e tokotaha ngāue ki he ngaahi liliu fakapolitikale mo fakasōsialé, na‘á ku vahevahe ‘a e kakaí ki ha kulupu ‘e ua​—‘a ia ko ha kulupu lelei pe kovi—​pea na‘á ku mateuteu ke fakafepaki‘i ‘a e fa‘ahinga ‘oku ou fakakaukau ‘oku koví. Kae mālō mo e tokoni ‘a e Tohi Tapú, ‘oku ‘ikai ke u toe ma‘u ha ongo‘i tāufehi‘a ki he ni‘ihi kehé. Ka ‘oku ou feinga ke fakatupulekina ‘a e ‘ofa faka-Kalisitiané ki he kakai kotoa pē. (Mātiu 5:​44) Neongo ‘a e ngaahi founga kehé, ‘oku ou fakahaa‘i ‘a e ‘ofa ko ení ‘aki ‘eku vahevahe ‘a e ongoongo lelei ‘o e Pule‘anga ‘o e ‘Otuá. ‘Oku ou fiefia ke sio ki he founga hono faka‘ai‘ai ‘e he ngāue anga-‘ofa ko ení ‘a e melino mo e fiefia pea ‘oatu ai ki he kakaí ha ‘amanaki mo‘oni.

‘Oku ou ma‘u ha nonga ‘i hoku ‘atamaí ‘i he‘eku tuku ‘a e ngaahi me‘á ki he to‘ukupu ‘o Sihová. Ko ia ‘oku ou tuipau, ko e Tokotaha-Fakatupú ‘e ‘ikai te ne faka‘atā ke ngaohikovi‘i ‘a e fanga manú mo e fa‘ahinga ‘o e tangatá ‘o ta‘engata, pe faka‘atā ‘a e māmani faka‘ofo‘ofa ko ení ke faka‘auha. ‘I hono kehé, fakafou ‘i hono Pule‘angá, ‘oku vavé ni ke ne fakalelei‘i ‘a e maumau kotoa kuo fakahoko ki he māmaní. (‘Aisea 11:​1-9) ‘Oku ‘omai ai kiate au ‘a e fiefia lahi ‘i he ‘ikai ko e ‘ilo pē ki he ngaahi mo‘oni ko ení ka ke tokoni‘i foki mo e ni‘ihi kehé ke nau tui ki ai. ‘Oku ‘ikai ke u toe ongo‘i ‘oku fiema‘u ke u liliu ‘a e fo‘i māmaní.