KO E laui miliona ʻo e kau Kalisitiané ʻoku nau fili ke ʻoua ʻe kātoangaʻi ʻa e Kilisimasí. ʻOku anga-fēfē ʻenau ongoʻi fekauʻaki mo ʻenau filí? ʻOku nau ongoʻi ʻoku nau tō mei ha meʻa? ʻOku ongoʻi ʻe heʻenau fānaú ʻoku nau liʻekina? Fakakaukau ki he meʻa ʻoku leaʻaki ʻe he Kau Fakamoʻoni ʻa Sihova takatakai ʻi he māmaní fekauʻaki mo e meʻá ni.

Manatuʻi ʻa Sīsū Kalaisi: “Ki muʻa ke u hoko ko e taha ʻo e Kau Fakamoʻoni ʻa Sihová, naʻe tātātaha ʻeku ʻalu ki he lotú. Naʻá ku toki ʻalu pē ki he lotú ʻi he Kilisimasí pe Toetuʻú. Neongo ia, naʻa mo e taimi ko iá, naʻe ʻikai ke u fakakaukau fekauʻaki mo Sīsū Kalaisi. ʻOku ʻikai ke u toe kātoangaʻi ʻa e Kilisimasí, ka ʻoku ou maʻu ʻa e ngaahi fakataha faka-Kalisitiané tuʻo ua ʻi he uike pea ʻoku ou akoʻi ki he niʻihi kehé ʻa e meʻa ʻoku leaʻaki ʻe he Tohi Tapú fekauʻaki mo Sīsū!”​—EVE, ʻAOSITELĒLIA.

Ko e fiefia ʻi he foaki atú: “Naʻá ku fiefia ʻi he taimi naʻe ʻomai ai ʻe he kakaí ha meʻaʻofa taʻeʻamanekina. Ko u saiʻia ʻi hono fakaʻohovaleʻi aú! ʻOku ou toe saiʻia ʻi hono faʻu ʻa e ngaahi kaati pea tā valivali ʻa e ngaahi fakatātā maʻá e niʻihi kehé koeʻuhí ʻoku ʻai ai ke nau ongoʻi fiefia ange pea ʻoku ʻai ai au ke u fiefia foki.”​—REUBEN, ʻAILANI TOKELAU.

Tokoni ki he faʻahinga ʻoku fiemaʻu tokoní: “ʻOku mau fiefia ʻi he feimeʻakai ki he kakai ʻoku puké. ʻI he taimi ʻe niʻihi ʻoku mau ʻave kiate kinautolu ʻa e matalaʻiʻakau, keke pe ko ha kiʻi meʻaʻofa ke ʻai kinautolu ke nau fiefia. ʻOku mau fiefia heni koeʻuhí ʻoku lava ke mau ʻaʻahi ki he kakai ko ení ʻi ha faʻahinga taimi pē ʻo e taʻú.”​—EMILY, ʻAOSITELĒLIA.

Fakatahataha ʻa e fāmilí: “ʻI he fakatahataha homau fāmilí, ʻoku maheni ai ʻema fānaú mo ʻenau fanga faʻētangatá, mehikitangá, kuí mo honau fanga kāsiní ʻi ha ʻatimosifia nonga. Koeʻuhi ʻoku ʻikai ke mau toki fakatahataha pē ʻi he ngaahi ʻaho mālōlō pau, ʻoku ʻikai ai ke mau ongoʻi kuo pau ke mau ʻaʻahi kiate kinautolu ka ʻoku ʻiloʻi ʻe homau fāmilí ko ʻemau ʻaʻahi kiate kinautolú koeʻuhi ʻoku mau ʻofa ʻiate kinautolu.”​—WENDY, ʻOTU MOTU KEIMENI.

Nonga: “ʻI he taimi Kilisimasí, ʻoku hā ngali ʻoku lahi fau ʻa e meʻa ke faí pea ko e niʻihi tokosiʻi pē ʻoku nau fakakaukau fekauʻaki mo e nongá. Kuó u ako fekauʻaki mo e ngaahi talaʻofa ʻa e Tohi Tapú ki he faʻahinga ʻo e tangatá; ʻoku ou ongoʻi nonga. ʻOku ou ʻiloʻi ʻe maʻu ʻe heʻeku fānaú ha kahaʻu fakafiefia.”​—SANDRA, SIPEINI.