Ko e huafa ‘o e ‘Otuá ko Sihova pea ‘oku mahino‘i ‘oku ‘uhingá ko e “‘Okú ne Fakatupunga ke Hoko.” Ko Sihova ‘a e ‘Otua māfimafi-aoniú, pea na‘á ne fakatupu ‘a e me‘a kotoa pē. ‘Okú ne ma‘u ‘a e mālohi ke fai ha me‘a pē ‘okú ne fili ke fai.

‘I he lea faka-Hepeluú, na‘e tohi‘i ai ‘a e huafa ‘o e ‘Otuá ‘aki ‘a e mata‘itohi ‘e fā. ‘I he faka-Pilitāniá, ‘oku fakahaa‘i eni ‘aki ‘a e YHWH pe JHVH. ‘Oku ‘asi ‘a e huafa ‘o e ‘Otuá ‘i he mu‘aki konga tohi faka-Hepelū ‘o e Tohi Tapú ‘o meimei tu‘o 7,000. Ko e kakai ‘i he kotoa ‘o e māmaní ‘oku nau ngāue‘aki ‘a e fa‘unga kehekehe ‘o e huafa Sihová, ‘o pu‘aki ia ‘i he founga ‘oku angamaheni‘aki ‘i he‘enau leá.

▸ Vahe 1, pal. 15

Ko e Fa‘utohi ‘o e Tohi Tapú ko e ‘Otuá, ka na‘á ne ngāue‘aki ha kau tangata ke nau hiki ia. ‘Oku meimei tatau eni mo ha tangata pisinisi ‘okú ne tala ki he‘ene sekelitalí ke ne fai ha tohi ‘oku ‘i ai ‘ene ngaahi fakakaukaú. Na‘e ngāue‘aki ‘e he ‘Otuá hono laumālie mā‘oni‘oní ke tataki ‘aki ‘a e kau hiki Tohi Tapú ke nau hiki ‘ene ngaahi fakakaukaú. Na‘e tataki kinautolu ‘e he laumālie ‘o e ‘Otuá ‘i ha founga kehekehe, ‘i he taimi ‘e ni‘ihi na‘á ne ‘ai kinautolu ke nau mata vīsone pe ma‘u ha ngaahi misi ‘a ia na‘a nau hiki leva ia.

▸ Vahe 2, pal. 5

Ko e ngaahi akonaki eni ‘i he Tohi Tapú ‘okú ne fakamatala‘i ha mo‘oni tefito. Ko e fakatātaá, ko e tefito‘i mo‘oni ko e “ngaahi feohi koví ‘okú ne maumau‘i ‘a e  ngaahi anga ‘oku leleí” ‘okú ne ako‘i mai ‘oku uesia kitautolu ki he lelei pe ki he kovi ‘e he kakai ‘oku tau feohi mo iá. (1 Kolinitō 15:33) Pea ‘oku ako‘i mai ‘e he tefito‘i mo‘oni “‘ilonga ha me‘a ‘oku tō ‘e ha taha, ko e me‘a ia te ne utú foki” he‘ikai lava ke tau hao mei he ngaahi nunu‘a ‘o ‘etau ngaahi ngāué.​—Kalētia 6:7.

▸ Vahe 2, pal. 12

Ko ha pōpoaki eni mei he ‘Otuá. ‘E lava ke hoko ko ha fakamatala ia ‘o fekau‘aki mo e finangalo ‘o e ‘Otuá, ko ha akonaki fakae‘ulungaanga, ko ha fekau, pe ko ha fakamaau. ‘E lava foki ke hoko ia ko ha pōpoaki fekau‘aki mo ha me‘a ‘e hoko ‘i he kaha‘ú. ‘Oku lahi ‘a e ngaahi kikite ‘i he Tohi Tapú kuo ‘osi fakahoko.

▸ Vahe 2, pal. 13

Ko Sīsū ‘a e tokotaha na‘e fakahoko ai ‘a e ngaahi kikite lahi ‘i he Tohi Tapú fekau‘aki mo e Mīsaiá. Sio ki he puha “ Ngaahi Kikite ‘o Fekau‘aki mo e Mīsaiá.”

▸ Vahe 2, pal. 17, fakamatala ‘i laló.

Na‘e fakatupu ‘e Sihova ‘a e māmaní ke hoko ko ha ‘api palataisi ma‘á e fa‘ahinga ‘o e tangata ‘oku ‘ofa kiate iá. Kuo ‘ikai liliu ‘ene taumu‘á. Kuo vavé ni ke to‘o atu ‘e he ‘Otuá ‘a e fulikivanú pea ‘oange ki hono kakaí ‘a e mo‘ui ta‘engatá.

▸ Vahe 3, pal. 1

Ko Sētané ko e ‘āngelo ia na‘á ne kamata‘i ‘a e angatu‘u ki he ‘Otuá. ‘Oku ui ia ko Sētane, ‘a ia ‘oku ‘uhingá ko e “Tokotaha-Taliteke‘i,” koe‘uhí ‘okú ne fakafepaki kia Sihova. ‘Oku toe ui ia ko e Tēvolo, ‘a ia ‘oku ‘uhingá ko e “Tokotaha Lau‘ikovi Loi.” Na‘e ‘oange ‘a e hingoa ko ení kiate ia koe‘uhi ‘okú ne tala ha ngaahi loi fekau‘aki mo e ‘Otuá mo kākaa‘i ‘a e kakaí.

▸ Vahe 3, pal. 4

Na‘e fakatupu ‘e Sihova ‘a e kau ‘āngeló ki mu‘a fuoloa ia peá ne toki fakatupu ‘a e māmaní. Na‘e fakatupu kinautolú ke nau nofo ‘i hēvani. ‘Oku ‘i ai ‘a e kau ‘āngelo tokolahi hake ‘i he teau milioná. (Taniela 7:10) ‘Oku ‘i ai honau ngaahi hingoa mo honau ngaahi ‘ulungaanga kehekehe, pea ko e kau ‘āngelo mateakí ‘oku nau fakafisi ke lotu ange kiate kinautolu ‘a e fa‘ahinga ‘o e tangatá. ‘Oku nau ma‘u ha ngaahi ngafa kehekehe pea ‘oku vahe‘i kinautolu ki ha ngāue kehekehe. Ko e ni‘ihi ‘o e ngāué ni ‘oku kau ai ‘a e ngāue ‘i he ‘ao ‘o e taloni ‘o e ‘Otuá, ‘oatu ‘ene ngaahi pōpoakí, malu‘i mo tataki ‘ene kau sevāniti ‘i he māmaní, fakahoko ‘ene ngaahi fakamāú, pea poupou‘i ‘a e ngāue fakamalangá. (Saame 34:7; Fakahā 14:6; 22:8, 9) ‘I he kaha‘ú, te nau faitau fakataha mo Sīsū ‘i he tau ‘o ‘Āmaketoné.​—Fakahā 16:14, 16; 19:14, 15.

▸ Vahe 3, pal. 5; Vahe 10, pal. 1

Ko ha me‘a pē ‘oku tau ongo‘i, fakakaukau‘i, pe fai ‘oku fepaki mo Sihova pe ko hono finangaló ko e angahala ia. Koe‘uhi ‘oku maumau‘i ‘e he angahalá hotau vaha‘angatae mo e ‘Otuá, kuó ne ‘omai kiate kitautolu  ‘a e ngaahi lao mo e ngaahi tefito‘i mo‘oni ‘e tokoni‘i ai kitautolu ke tau faka‘ehi‘ehi mei he angahala ‘oku fai ‘ilo‘ilo paú. ‘I he kamata‘angá, na‘e fakatupu ‘e Sihova ‘a e me‘a kotoa pē ‘o haohaoa, ka ‘i he taimi na‘e fili ai ‘a ‘Ātama mo ‘Ivi ke na talangata‘a kia Sihová, na‘á na faiangahala ai pea ‘ikai te na kei haohaoa. Na‘á na tupu ‘o motu‘a peá na mate, pea koe‘uhi ‘oku tau ma‘u tukufakaholo ‘a e angahalá meia ‘Ātama, ‘oku tau tupu foki ai ‘o motu‘a pea tau mate.

▸ Vahe 3, pal. 7; Vahe 5, pal. 3

Ko e tau eni ‘a e ‘Otuá ke faka‘auha ai ‘a e māmani ‘o Sētané mo e fulikivanú kotoa.

▸ Vahe 3, pal. 13; Vahe 8, pal. 18

Ko e Pule‘anga ‘o e ‘Otuá ko ha founga-pule ia kuo fokotu‘u ‘e Sihova ‘i hēvani. Ko Sīsū Kalaisi ‘oku pule ko hono Tu‘í. ‘I he kaha‘ú, ‘e ngāue‘aki ‘e Sihova ‘a e Pule‘angá ke ne to‘o atu ‘a e fulikivanu kotoa pē. ‘E pule mai ‘a e Pule‘anga ‘o e ‘Otuá ki he māmaní.

▸ Vahe 3, pal. 14

Na‘e fakatupu ‘e he ‘Otuá ‘a Sīsū ki mu‘a ia ‘i he me‘a kotoa pē. Na‘e fekau‘i mai ‘e Sihova ‘a Sīsū ki he māmaní ke ne pekia ma‘á e fa‘ahinga kotoa ‘o e tangatá. Hili hono tāmate‘i ‘a Sīsuú, na‘e fokotu‘u hake ia ‘e Sihova. ‘Oku pule ‘a Sīsū he taimí ni ‘i hēvani ko e Tu‘i ‘o e Pule‘anga ‘o e ‘Otuá.

▸ Vahe 4, pal. 2

Na‘e kikite‘i pe tomu‘a tala ‘e he Tohi Tapú ‘a e taimi ‘e hā ai ‘a e Mīsaiá. ‘E hoko eni ‘i he ngata‘anga ‘o ha vaha‘a taimi ‘oku ui ko e uike ‘e 69, ‘a ia na‘e kamata ‘i he ta‘u 455 K.M. pea ngata ‘i he ta‘u 29 T.S.

‘Oku anga-fēfē ‘etau ‘ilo‘i na‘e ngata ia ‘i he ta‘u 29 T.S.? Ko e uike ‘e 69 na‘e kamata ia ‘i he ta‘u 455 K.M. ‘i he taimi na‘e a‘u ai ‘a Nehemaia ki Selusalema pea kamata ke toe  langa ‘a e koló. (Taniela 9:25; Nehemaia 2:1, 5-8) Hangē pē ko hono ‘ai ‘e he fo‘i lea ko e “tōsení” ke tau fakakaukau ki he mata‘ifika 12, ‘oku pehē pē hono fakamanatu mai kiate kitautolu ‘e he fo‘i lea “uiké” ‘a e mata‘ifika 7. Ko e ngaahi uike ‘i he kikité ni ‘oku ‘ikai ko e ngaahi uike ia ‘o e ‘aho ‘e fitu ka ko e ngaahi uike ‘o e ta‘u ‘e fitu, fakatatau ki he lao fakaekikite “ko e ‘aho ki he ta‘u.” (Nōmipa 14:34; ‘Isikeli 4:6) ‘Oku ‘uhinga ení ko e uike taki taha ko hono lōloá ko e ta‘u ‘e fitu pea ko e uike ‘e 69 ‘oku tānaki ia ‘o ma‘u ‘a e ta‘u ‘e 483 (69 x 7). Kapau te tau lau ‘a e ta‘u ‘e 483 mei he 455 K.M., te tau a‘u ai ki he ta‘u 29 T.S. Ko e ta‘u tofu pē eni na‘e papitaiso ai ‘a Sīsū peá ne hoko ko e Mīsaiá!​—Luke 3:1, 2, 21, 22.

Na‘e tomu‘a tala ‘e he kikite tatau pē ha toe uike ‘e taha, ‘a ia ko ha toe ta‘u kehe ia ‘e fitu. ‘I he lolotonga ‘a e vaha‘a taimi ko ení, ‘i he ta‘u 33 T.S., ‘e tāmate‘i ai ‘a e Mīsaiá, pea kamata ‘i he ta‘u 36 T.S., ‘e malanga‘i ai ‘a e ongoongo lelei ‘o e Pule‘anga ‘o e ‘Otuá ki he ngaahi pule‘anga kotoa pē ‘o ‘ikai ki he kau Siú pē.​—Taniela 9:24-27.

▸ Vahe 4, pal. 7

‘Oku ako‘i mai ‘e he Tohi Tapú ko Sihova ko e ‘Otuá ko e Tokotaha-Fakatupú ia pea na‘á ne fakatupu ‘a Sīsū ki mu‘a ‘i he ngaahi me‘a kehe kotoa pē. (Kolose 1:15, 16) Ko Sīsuú ‘oku ‘ikai ko e ‘Otua Māfimafi-Aoniú ia. Na‘e ‘ikai ‘aupito te ne taukave‘i na‘á ne tatau mo e ‘Otuá. Ko hono mo‘oní, na‘á ne pehē: “‘Oku lahi ‘a e Tamaí ‘iate au.” (Sione 14:28; 1 Kolinitō 15:28) Ka ‘oku ako‘i ‘e he ngaahi lotu ‘e ni‘ihi ‘a e Tolu-Taha‘i-‘Otuá, ko e ‘Otuá ko e toko tolu ‘i he taha: Ko e Tamai, ko e ‘Alo, pea mo e laumālie mā‘oni‘oni. ‘Oku ‘ikai ‘i he Tohi Tapú ‘a e fo‘i lea “Tolu-Taha‘i-‘Otuá.” Ko ha akonaki loi eni.

 Ko e laumālie mā‘oni‘oní ko e ivi ngāue ia ‘o e ‘Otuá, ko hono ivi ngāue ta‘ehāmai ia ‘okú ne ngāue‘aki ke fai ‘a hono finangaló. ‘Oku ‘ikai ko ha tokotaha ia. Ko e fakatātaá, ko e mu‘aki kau Kalisitiané “na‘a nau hoko ‘o fonu kotoa ‘i he laumālie mā‘oni‘oní,” pea na‘e pehē ‘e Sihova: “Te u hua‘i hifo ha konga hoku laumālié ki he fa‘ahinga kakano kotoa pē.”​—Ngāue 2:1-4, 17.

▸ Vahe 4, pal. 12; Vahe 15, pal. 17

‘I he taimi ‘oku lotu ai ‘a e kau Kalisitiane mo‘oní ki he ‘Otuá, ‘oku ‘ikai te nau ngāue‘aki ‘a e kolosí. Ko e hā hono ‘uhingá?

1. Kuo ngāue‘aki ‘a e kolosí ‘i he lotu loí ‘i ha taimi lōloa. ‘I he kuonga mu‘á na‘e ngāue‘aki ai ia ‘i he lotu ki natulá pea ‘i he ngaahi ouau fakaefehokotaki fakasino fakapanganí. ‘I he lolotonga ‘a e ‘uluaki ta‘u ‘e 300 hili ‘a e pekia ‘a Sīsuú, na‘e ‘ikai ke ngāue‘aki ‘e he kau Kalisitiané ‘a e kolosí ‘i he‘enau lotú. Ki mui ‘aupito mai, na‘e ‘ai ai ‘e ‘Emipola Konisitanitaine ‘o Lomá ‘a e kolosí ko ha faka‘ilonga ia ‘o e lotu faka-Kalisitiané. Na‘e ngāue‘aki ‘a e faka‘ilongá ni ‘i he feinga ke ‘ai ke manakoa ange ‘a e lotu faka-Kalisitiané. Ka ko e kolosí na‘e ‘ikai ha‘ane kaunga ‘e taha kia Sīsū Kalaisi. ‘Oku fakamatala ‘a e New Catholic Encyclopedia: “Ko e kolosí ‘oku ma‘u ia fakatou‘osi ‘i he ngaahi tō‘onga fakafonua ki mu‘a ‘i he Kalisitiané mo e ‘ikai Kalisitiané.”

2.  Na‘e ‘ikai ke pekia ‘a Sīsū ‘i ha kolosi. Ko e ngaahi fo‘i lea faka-Kalisi na‘e liliu ko e “kolosí” ‘oku ‘uhinga tefito ia ki ha “fu‘u pou tu‘u hangatonu,” “konga papa,” pe “fu‘u ‘akau.” ‘Oku fakamatala ‘a e The Companion Bible: “‘Oku hala‘atā ke lēkooti ha me‘a ‘i he lea faka-Kalisi ‘o e [Fuakava Fo‘oú] ke a‘u ‘o fakahu‘unga ai ki ha konga papa ‘e ua.” Na‘e pekia ‘a Sīsū ‘i ha fu‘u pou tu‘u hangatonu.

3.    ‘Oku ‘ikai fiema‘u ‘e Sihova ke tau ngāue‘aki ha ngaahi ‘īmisi pe ngaahi faka‘ilonga ‘i he‘etau lotú.​—‘Ekisoto 20:4, 5; 1 Kolinitō 10:14.

▸ Vahe 5, pal. 12

Na‘e fekau‘i ‘e Sīsū ‘ene kau ākongá ke nau kātoanga‘i ‘a e Fakamanatu ‘o ‘ene pekiá. ‘Oku nau fai eni ‘i he ta‘u taki taha ‘i he ‘aho 14 ‘o Nīsaní, ‘a e ‘aho tatau na‘e kātoanga‘i ai ‘e he kau ‘Isilelí ‘a e Pāsová. Ko e mā mo e uaine, ‘a ia ‘okú na fakafofonga‘i ‘a e sino mo e ta‘ata‘a ‘o Sīsuú, ‘oku paasi takai atu ia ki he tokotaha kotoa ‘i he Fakamanatú. Ko e fa‘ahinga te nau pule fakataha mo Sīsū ‘i hēvaní te nau kai ‘a e maá mo inu ‘a e uainé. Ko e fa‘ahinga ‘oku nau ma‘u ‘a e ‘amanaki ko e mo‘ui ta‘engata ‘i he māmaní ‘oku nau kau anga-faka‘apa‘apa ki he Fakamanatú ka ‘oku ‘ikai te nau kai ‘a e maá pe inu ‘a e uainé.

▸ Vahe 5, pal. 21

Ko e fo‘i lea faka-Hepelū ko e neʹphesh pe ko e fo‘i lea faka-Kalisi ko e psy·kheʹ ‘i he Tohi Tapú ‘oku ‘uhinga ia (1) ko ha tokotaha, (2) ko ha manu, pe (3) ko e mo‘ui ‘a ha taha pe ko ha manu. Ko ha fakatātā eni ‘e ni‘ihi:

• Ko ha tokotaha. ‘Oku pehē ‘e he Tohi Tapú ‘i he ‘aho ‘o Noá ‘na‘e fakahaofi ai ha toko valu [faka-Kalisi psy·kheʹ].’ (1 Pita 3:20) ‘Oku ‘uhinga heni ‘a e fo‘i lea faka-Kalisi psy·kheʹ ki he kakai​—ko Noa mo hono uaifí, mo hona foha ‘e toko tolú, mo e ngaahi uaifi ‘o e ngaahi fohá.

• Ko ha manu. “Na‘e folofola leva ‘a e ‘Otuá: ‘Ke ngaeve ‘a e ngaahi me‘amo‘ui [faka-Hepelū neʹphesh] ‘i he ngaahi vaí, pea ko e ngaahi me‘amo‘ui ‘oku puná  [faka-Hepelū neʹphesh] ke nau puna ‘i ‘olunga he māmaní ‘i he ‘atā ‘o e langí.’ Na‘e folofola leva ‘a e ‘Otuá: ‘Ke tupu mai ‘i he māmaní ‘a e ngaahi me‘amo‘ui ‘o fakatatau ki honau fa‘ahinga, ko e fanga manu lalata mo e fanga manu totolo mo ngaolo mo e fanga manu kaivao [faka-Hepelū neʹphesh] ‘o e māmaní ‘o fakatatau ki honau fa‘ahinga.’ Pea na‘e hoko ‘o pehē.”​—Sēnesi 1:20, 24.

• Ko e mo‘ui ‘a ha taha pe ko ha manu. Na‘e folofola ‘a Sihova kia Mōsese: “Ko e kau tangata kotoa pē na‘a nau feinga ke tāmate‘i koé [faka-Hepelū “tāmate‘i ho‘o neʹphesh”] kuo nau mate.” (‘Ekisoto 4:19) ‘I he ‘i māmani ‘a Sīsuú, na‘á ne pehē: “Ko au ‘a e tauhi-sipi leleí; ko e tauhi-sipi leleí ‘okú ne tuku atu ‘ene mo‘uí [faka-Kalisi psy·kheʹ] koe‘uhiā ko e fanga sipí.”​—Sione 10:11.

  Tānaki atu ki ai, ‘i hono fai ‘e ha taha ha me‘a ‘aki ‘ene “mo‘uí kotoa,” ‘oku ‘uhinga iá ‘okú ne fai loto-lelei ia pea ki he lelei taha ‘o ‘ene malavá. (Mātiu 22:37; Teutalōnome 6:5) Ko e fo‘i lea neʹphesh pe psy·kheʹ ‘e lava ke toe ngāue‘aki ia ke fakamatala‘i ‘a e holi pe ‘uakai ‘a ha me‘amo‘ui. Ko ha tokotaha mate pe ko ha sino kuo mate ‘e lava ke lau ia ko ha neʹphesh pe psy·kheʹ.​—Nōmipa 6:6; Palōveepi 23:2; ‘Aisea 56:11; Hākeai 2:13.

▸ Vahe 6, pal. 5; Vahe 15, pal. 17

Ko e fo‘i lea faka-Hepelū mo e faka-Kalisi na‘e liliu ko e “laumālie” ‘i he pulusinga faka-Tonga ‘o e Liliu Tohi Tapu Māmani Fo‘oú ‘oku lava ke ‘uhinga ia ki he ngaahi me‘a kehekehe. Ka ‘oku ‘uhinga ma‘u pē ki he me‘a ‘oku ta‘ehāmai ki he fa‘ahinga ‘o e tangatá, ‘o hangē ko e matangí pe ko e mānava ‘a e fa‘ahinga ‘o e tangatá mo e fanga manú. Ko e ngaahi fo‘i leá ni ‘oku ‘uhinga nai ia ki he fa‘ahinga laumālie pea ki he laumālie mā‘oni‘oní, ‘a ia ko e ivi ngāue ‘o e ‘Otuá. ‘Oku ‘ikai ke ako‘i mai ‘e he  Tohi Tapú ia ‘oku hokohoko atu ‘a e mo‘ui ‘a ha konga mavahe ‘o ha taha ‘i he hili ‘ene maté.​—‘Ekisoto 35:21; Saame 104:29; Mātiu 12:43; Luke 11:13.

▸ Vahe 6, pal. 5; Vahe 15, pal. 17

Ko e Kihená ko e hingoa ia ‘o ha tele‘a ofi ki Selusalema ‘a ia na‘e tutu mo faka‘auha ai ‘a e vevé. ‘Oku ‘ikai ha fakamo‘oni ia na‘e fakamamahi‘i pe tutu mo‘ui ‘i he taimi ‘o Sīsuú ‘a e fanga manú pe tangatá ‘i he tele‘a ko ení. Ko ia ko e Kihená ‘oku ‘ikai te ne fakahaa‘i ha feitu‘u ta‘ehāmai ‘a ia ‘oku fakamamahi‘i mo tutu ai ‘a e kakaí ‘o ta‘engata. ‘I he taimi na‘e lea ai ‘a Sīsū fekau‘aki mo e fa‘ahinga ‘oku lī ki Kihená, na‘á ne talanoá ‘o fekau‘aki mo e faka‘auha faka‘aufuli.​—Mātiu 5:22; 10:28.

▸ Vahe 7, pal. 20

Ko e lotu eni na‘e ‘oange ‘e Sīsū ki he‘ene kau ākongá ‘i he‘ene ako‘i kinautolu ki he founga ke lotu aí. ‘Oku toe ui ia ko e Ko ‘Emau Tamai pe sīpinga lotu. Ko e fakatātaá, na‘e ako‘i ‘e Sīsū ke tau lotu ‘o peheni:

• “Ke fakamā‘oni‘oni‘i ho huafá”

  ‘Oku tau lotu kia Sihova ke ne faka‘ata‘atā hono huafá, pe ongoongó, mei he loi kotoa pē. ‘Oku fai ení koe‘uhi ke fakalāngilangi‘i mo faka‘apa‘apa‘i ai ‘e he tokotaha kotoa pē ‘i hēvani pea ‘i māmani ‘a e huafa ‘o e ‘Otuá.

• “Ke hoko mai ho Pule‘angá”

  ‘Oku tau lotu ke faka‘auha ‘e he founga-pule ‘a e ‘Otuá ‘a e māmani fulikivanu ‘o Sētané, ke pule mai ki he māmaní, pea ke ne ‘ai ‘a e māmaní ko ha palataisi.

• “Ke fai ho finangaló . . . ‘i māmani”

  ‘Oku tau lotu ke fakahoko ‘a e taumu‘a ‘a e ‘Otuá ki he  māmaní koe‘uhi ke lava ai ‘a e fa‘ahinga talangofua mo haohaoa ‘o e tangatá ‘o mo‘ui ta‘engata ‘i Palataisi, ‘o hangē pē ko e me‘a na‘e fiema‘u ‘e Sihova ‘i he taimi na‘e fakatupu ai ‘a e tangatá.

▸ Vahe 8, pal. 2

Na‘e tokonaki mai ‘e Sihova ‘a e huhu‘í ke fakahaofi ai ‘a e fa‘ahinga ‘o e tangatá mei he angahalá mo e maté. Ko e huhu‘í ko e totongi ia na‘e fiema‘u ke fakatau fakafoki mai ‘aki ‘a e mo‘ui haohaoa fakaetangata na‘e fakamoleki ‘e he ‘uluaki tangatá, ‘e ‘Ātama, pea ke fakalelei‘i ‘aki ‘a e vaha‘angatae ‘o e tangatá mo Sihova ‘a ia kuo maumau‘í. Na‘e fekau‘i mai ‘e he ‘Otuá ‘a Sīsū ki māmani koe‘uhi ke ne pekia ma‘á e kau angahalá kotoa. Koe‘uhi ko e pekia ‘a Sīsuú, ‘oku ma‘u ai ‘e he fa‘ahinga kotoa ‘o e tangatá ‘a e faingamālie ke mo‘ui ta‘engata pea hoko ‘o haohaoa.

▸ Vahe 8, pal. 21; Vahe 9, pal. 13

Ko e kikite ‘i he Taniela vahe 4 ‘oku ako‘i mai ai na‘e fokotu‘u ‘e he ‘Otuá ‘a hono Pule‘angá ‘i he 1914.

Ko e kikité: Na‘e ‘oange ‘e Sihova kia Tu‘i Nepukanesa ha misi fakaekikite fekau‘aki mo ha fu‘u ‘akau ‘a ia na‘e tā hifo. ‘I he misí, na‘e ha‘i takatakai ‘a e ukamea mo e kopa ‘i he tefito ‘o e fu‘u ‘akaú ke ta‘ofi ‘a ‘ene tupú ‘i ha vaha‘a taimi ko e “kuonga ‘e fitu.” ‘I he hili iá, ‘e toe tupu ‘a e fu‘u ‘akaú.​—Taniela 4:1, 10-16.

‘Uhinga ‘o e kikité kiate kitautolú: ‘Oku fakafofonga‘i ‘e he fu‘u ‘akaú ‘a e pule ‘a e ‘Otuá. ‘I he ngaahi ta‘u lahi, na‘e ngāue‘aki ai ‘e Sihova ‘a e ngaahi tu‘i ‘i Selusalemá ke nau pule ki he pule‘anga ‘Isilelí. (1 Kalonikali 29:23) Ka  na‘e hoko ‘o ta‘efaitōnunga ‘a e ngaahi tu‘i ko iá, pea na‘e ngata ‘a ‘enau pulé. Na‘e faka‘auha ‘a Selusalema ‘i he ta‘u 607 K.M. Na‘e kamata ai ‘a e “kuonga ‘e fitu.” (2 Tu‘i 25:1, 8-10; ‘Isikeli 21:25-27) ‘I he pehē ‘e Sīsū, “‘e tāmalaki ‘a Selusalema ‘e he ngaahi pule‘angá kae ‘oua kuo kakato ‘a e taimi kotofa ‘o e ngaahi pule‘angá,” na‘á ne lea ai ‘o fekau‘aki mo e “kuonga ‘e fitu.” (Luke 21:24) Ko ia na‘e ‘ikai ke ngata ‘a e “kuonga ‘e fitu” ‘i he taimi na‘e ‘i māmani ai ‘a Sīsuú. Na‘e tala‘ofa ‘e Sihova te ne fakanofo ha Tu‘i ‘i he ngata ‘a e “kuonga ‘e fitu.” Ko e pule ‘a e Tu‘i fo‘ou ko ení, ‘a Sīsū, ‘e ‘omai ai ‘a e ngaahi tāpuaki lahi ki he kakai ‘a e ‘Otuá ‘i he māmaní kotoa, ‘o ta‘engata.​—Luke 1:30-33.

Ko e lōloa ‘o e “kuonga ‘e fitu”: Ko e “kuonga ‘e fitu” na‘e fe‘unga ia mo e ta‘u ‘e 2,520. Kapau te tau lau ‘a e ta‘u ‘e 2,520 mei he ta‘u 607 K.M., te tau a‘u ai ki he ta‘u 1914. Ko e taimi ia na‘e fakanofo ai ‘e Sihova ‘a Sīsū, ko e Mīsaiá, ko e Tu‘i ‘o e Pule‘anga ‘o e ‘Otuá ‘i hēvaní.

‘Oku anga-fēfē ‘etau ma‘u ‘a e fika ko e 2,520? ‘Oku pehē ‘e he Tohi Tapú ko e ta‘u ‘e tolu mo e kongá ‘oku tatau ia mo e ‘aho ‘e 1,260. (Fakahā 12:6, 14) Ko ia ai, ko e “kuonga ‘e fitu” ko e liunga ua ia ‘o e fika ko iá, pe ko e ‘aho ‘e 2,520. Ko e ‘aho ‘e 2,520 ‘oku tatau ia mo e ta‘u ‘e 2,520 koe‘uhí ko e lao fakaekikite “ko e ‘aho ki he ta‘u.”​—Nōmipa 14:34; ‘Isikeli 4:6.

▸ Vahe 8, pal. 23

‘Oku lave ‘a e Tohi Tapú ki he ‘āngelo-pule pē ‘e taha, pea ko hono hingoá ko Maikeli.​—Taniela 12:1; Sute 9.

Ko Maikeli ‘a e Taki ‘o e kau tau ko e kau ‘āngelo faitōnunga ‘a e ‘Otuá. ‘Oku pehē ‘e he Fakahā 12:7: “Ko Maikeli mo ‘ene kau ‘āngeló na‘a nau faitau mo e talākoní . . . mo ‘ene kau ‘āngeló.” ‘Oku pehē ‘i he tohi Fakahaá  ko e Taki ‘o e kau tau ‘a e ‘Otuá ko Sīsū, ko ia ai, ko e Maikelí ko ha toe hingoa ia ‘e taha ‘o Sīsū.​—Fakahā 19:14-16.

▸ Vahe 9, pal. 4

Ko e kupu‘i lea ko ení ‘oku ‘uhinga ia ki he vaha‘a taimi ‘a ia ‘e hoko ai ‘a e ngaahi me‘a lalahi ‘i he māmaní ki mu‘a pē pea faka‘auha ‘e he Pule‘anga ‘o e ‘Otuá ‘a e māmani ‘o Sētané. Ko e kupu‘i lea meimei tatau, hangē ko e “faka‘osi‘osi ‘o e fokotu‘utu‘u lolotongá” mo e “‘i heni ‘a e Foha ‘o e tangatá,” ‘oku ngāue‘aki ia ‘i he kikite ‘a e Tohi Tapú ‘o ‘uhinga iá ki he vaha‘a taimi tatau. (Mātiu 24:3, 27, 37) Ko e “ngaahi ‘aho faka‘osí” na‘e kamata ia ‘i he taimi na‘e kamata pule ai ‘a e Pule‘anga ‘o e ‘Otuá ‘i hēvani ‘i he 1914 pea ‘e ngata ‘i he taimi ‘e faka‘auha ai ‘i ‘Āmaketone ‘a e māmani ‘o Sētané.​—2 Tīmote 3:1; 2 Pita 3:3.

▸ Vahe 9, pal. 5

‘I hono toe fakamo‘ui ‘e he ‘Otuá ha tokotaha kuo mate, ‘oku ui ia ko e toetu‘u. Ko e toetu‘u ‘e hiva ‘oku lave ki ai ‘i he Tohi Tapú. Ko ‘Ilaisiā, ‘Ilaisa, Sīsū, Pita, mo Paula na‘a nau fakahoko kotoa ‘a e ngaahi toetu‘u. Ko e ngaahi mana ko ení na‘e malava pē iá koe‘uhi ko e mālohi ‘o e ‘Otuá. ‘Oku tala‘ofa mai ‘e Sihova ‘e toetu‘u “fakatou‘osi ‘a e mā‘oni‘oní mo e ta‘emā‘oni‘oní” ki he mo‘ui ‘i he māmaní. (Ngāue 24:15) ‘Oku toe lave ‘a e Tohi Tapú ki ha toetu‘u ki hēvani. ‘E hoko eni ‘i he taimi ‘e toetu‘u ai ‘a e fa‘ahinga kuo fili, pe pani, ‘e he ‘Otuá ke nau mo‘ui ‘i hēvani fakataha mo Sīsū.​—Sione 5:28, 29; 11:25; Filipai 3:11; Fakahā 20:5, 6.

▸ Vahe 9, pal. 13

Ko e tō‘onga fakatēmenioó pe fakaha‘ele fa‘ahikehé ko e tō‘onga kovi ia ‘o e feinga ke fetu‘utaki mo e ngaahi laumālié, ‘o fai fakahangatonu pe fakafou ‘i ha tokotaha kehe, hangē ko ha toketā fakafa‘ahikehe, ko ha tokotaha fetu‘utaki fakafa‘ahikehe, pe ko ha tokotaha ‘ilo fakafa‘ahikehe. Ko e kakai ‘oku nau tō‘onga‘aki ‘a e fakaha‘ele fa‘ahikehé ‘oku nau fai ení koe‘uhí ‘oku nau tui ki he akonaki loi ‘oku mo‘ui atu ‘a e ngaahi laumālie ‘o e tangatá ‘i he maté ‘o nau hoko ko e ngaahi fa‘ahikehe mālohi. ‘Oku feinga foki ‘a e fanga tēmenioó ke tākiekina ‘a e fa‘ahinga ‘o e tangatá ke nau talangata‘a ki he ‘Otuá. Ko e ‘asitalolosiá, tongafisí, faimaná, tō‘onga fakafaimaná, tui fakafa‘ahikehé, ko e me‘a fakamēsikí, mo e mālohi mahulu hake ‘i natulá ko e konga foki ia ‘o e tō‘onga fakatēmenioó. Ko e ngaahi tohi lahi, ngaahi makasini, ngaahi fakamatala faka‘asitalolosia, ngaahi faiva, ngaahi fakatātā, pea na‘a mo e ngaahi hivá ‘okú ne ‘ai ‘a e fanga tēmenioó, faimaná, mo e mālohi mahulu hake ‘i natulá ke hā ngali ‘ikai hano maumau pe hā fakafiefia. Ko e ngaahi tō‘onga fakafonua lahi ‘i he putú, hangē ko e ngaahi feilaulau ‘oku fai ma‘á e kau maté, ngaahi kātoanga putu, mo e ngaahi ouau ma‘á e uitoú, mo e ngaahi ouau ‘āpoó, ‘oku kau foki ki ai ‘a e fetu‘utaki mo e fanga tēmenioó. ‘Oku fa‘a ngāue‘aki ‘e he kakaí ‘a e faito‘o kona tapú ‘i he‘enau feinga ke ngāue‘aki ‘a e mālohi ‘o e fanga tēmenioó.​—Kalētia 5:20; Fakahā 21:8.

▸ Vahe 10, pal. 10; Vahe 16, pal. 4

Ko Sihova ‘a e ‘Otua Māfimafi-Aoniú, pea na‘á ne fakatupu ‘a e ‘univēsí kotoa. (Fakahā 15:3) Ko e ‘uhinga  ia ‘oku ‘O‘ona ai ‘a e me‘a kotoa pē peá ne ma‘u ‘a e tu‘unga-hau, pe mafai kakato, ke pule ki he‘ene fakatupú. (Saame 24:1; ‘Aisea 40:21-23; Fakahā 4:11) Kuó ne fa‘u ‘a e ngaahi lao ki he me‘a kotoa pē kuó ne fakatupú. ‘Oku toe ma‘u foki ‘e Sihova ‘a e mafai ke fakanofo ‘a e ni‘ihi kehe ke nau hoko ko e kau pule. ‘Oku tau poupou‘i ‘a e tu‘unga-hau ‘o e ‘Otuá ‘i he‘etau ‘ofa mo talangofua kiate iá.​—1 Kalonikali 29:11.

▸ Vahe 11, pal. 10

Ko ha fakatōtama ‘oku fai ‘osi fakakaukau‘i pē ia ke ‘ai ke mate ha ki‘i tama te‘eki fanau‘i. ‘Oku ‘ikai ko ha fakatu‘utāmaki eni pe ko e tupu mei ha fakafeangai fakanatula ‘a e sino fakaetangatá. Mei he taimi ‘o e feitama‘í, ko ha ki‘i tama ‘oku ‘ikai ko ha konga pē ia ‘o e sino ‘o e fa‘eé. Ko e ki‘i tamá ko ha tokotaha mavahe ia.

▸ Vahe 13, pal. 5

Ko e founga fakafaito‘o eni ‘a ia ‘oku huhu ai ‘a e toto kakató pe taha ‘o hono ngaahi konga tefito ‘e faá ki he sino ‘o ha tokotaha mei ha tokotaha kehe pe mei ha toto kuo tuku tauhi. Ko e konga tefito ‘e fā ‘o e totó ko e pelesimā, sela toto kulokula, sela toto hinehina, mo e peletileti.

▸ Vahe 13, pal. 13

‘I he Tohi Tapú, ko e fo‘i lea ki he “akonaki” ‘oku ‘ikai ko ha toe fo‘i lea pē ia ‘e taha ki he tauteá. ‘I he taimi ‘oku akonaki‘i ai kitautolú, ‘oku fakahinohino‘i, ako‘i, mo fakatonutonu ai kitautolu. Ko Sihová ‘oku ‘ikai ‘aupito ke ne ngaohikovi‘i pe anga-fakamamahi ki he fa‘ahinga  ‘okú ne akonaki‘í. (Palōveepi 4:1, 2) ‘Oku fokotu‘u ‘e Sihova ha fa‘ifa‘itaki‘anga faka‘ofo‘ofa ki he ngaahi mātu‘á. Ko e akonaki ‘okú ne faí ‘oku mātu‘aki ola lelei ‘o hoko mo‘oni ai ha tokotaha ‘o ‘ofa ‘i he akonakí. (Palōveepi 12:1) ‘Oku ‘ofa ‘a Sihova ‘i hono kakaí, pea ‘okú ne ako‘i kinautolu. ‘Okú ne ‘oange kiate kinautolu ‘a e fakahinohino ke fakatonutonu ‘a e ngaahi fakakaukau halá pea tokoni‘i ai kinautolu ke nau ako ke fakakaukau mo tō‘onga‘aki ha founga ‘oku fakahōifua kiate ia. Ki he ngaahi mātu‘á, ‘oku kau ‘i he akonakí ‘a hono tokoni‘i ‘enau fānaú ke nau mahino‘i ‘a e ngaahi ‘uhinga ‘oku totonu ai ke nau talangofuá. ‘Oku toe ‘uhinga iá ko hono ako‘i kinautolu ke nau ‘ofa kia Sihova, pea ke nau ‘ofa foki ‘i he‘ene Folofolá, ‘a e Tohi Tapú, pea mahino‘i ‘a hono ngaahi tefito‘i mo‘oní.

▸ Vahe 14, pal. 13

‘Oku nau ta‘ehāmai, ko e ngaahi me‘amo‘ui laumālie fulikivanu ‘oku nau ma‘u ‘a e ngaahi mālohi mahulu hake ‘i natula. Ko e fanga tēmenioó ko e kau ‘āngelo fulikivanu kinautolu. Na‘a nau hoko ‘o fulikivanu ‘i he‘enau ‘ai kinautolu ko e ngaahi fili ‘o e ‘Otuá ‘i he‘enau talangata‘a kiate iá. (Sēnesi 6:2; Sute 6) Na‘a nau kau ‘i he angatu‘u ‘a Sētane kia Sihová.​—Teutalōnome 32:17; Luke 8:30; Ngāue 16:16; Sēmisi 2:19.

▸ Vahe 16, pal. 4