‘Okú ke fakakaukau ‘oku faingata‘a ke fai ‘a e me‘a ‘oku totonú?— ‘Oku fakakaukau pehē ‘a e kakai tokolahi. ‘Oku tala mai ‘e he Tohi Tapú kiate kitautolu na‘e faingata‘a ‘aupito ki ha ki‘i tamasi‘i na‘e hingoa ko Siosaia ke fai ‘a e me‘a na‘e totonú. Ka na‘e ‘i ai hono ngaahi kaume‘a lelei na‘a nau tokoni‘i ia. Tau ako lahi angé fekau‘aki mo Siosaia mo hono ngaahi kaume‘á.

Ko e tamai ‘a Siosaiá ko ‘Āmoni, ko ha tu‘i ‘o Siuta. Na‘e anga-kovi ‘aupito ‘a ‘Āmoni mo lotu ki he ngaahi ‘aitolí. ‘I he taimi na‘e mate ai ‘a e tamai ‘a Siosaiá, na‘e hoko ‘a Siosaia ko e tu‘i ‘o Siuta. Ka na‘á ne kei ta‘u valu pē! ‘Okú ke fakakaukau na‘á ne anga-kovi ‘o hangē ko ‘ene tamaí?— ‘Ikai, na‘e ‘ikai ke pehē ia!

Na‘a mo e taimi na‘á ne kei si‘i ‘aupito aí, na‘e loto ‘a Siosaia ke talangofua kia Sihova. Ko ia na‘á ne fili ke kaume‘a pē mo e kakai na‘a nau ‘ofa kia Sihová. Pea  na‘a nau tokoni kia Siosaia ke fai ‘a e me‘a ‘oku totonú. Ko hai ‘a e ni‘ihi ‘o e ngaahi kaume‘a ‘o Siosaiá?

Ko e taha hono ngaahi kaume‘á ko Sēfanaia. Ko Sēfanaiá ko ha palōfita na‘á ne fakatokanga ki he kakai ‘o Siutá ‘e hoko ‘a e faingata‘a kia kinautolu kapau te nau lotu ki he ngaahi ‘aitolí. Na‘e fanongo ‘a Siosaia kia Sēfanaia pea lotu kia Sihova kae ‘ikai ko e ngaahi ‘aitolí.

Ko e taha ‘i he ngaahi kaume‘a ‘o Siosaiá ko Selemaia. Na‘á ne mei ta‘u tatau pē mo Siosaia pea na‘á na nofo vāofi ‘i he‘ena tupu haké. Na‘á na kaume‘a lelei pea ‘i he taimi na‘e mate ai ‘a Siosaiá na‘e tohi ai ‘e Selemaia ha hiva makehe fekau‘aki mo e lahi ‘o ‘ene ‘ofa kia Siosaiá. Ko Selemaia mo Siosaiá na‘á na fetokoni‘aki ke fai ‘a e me‘a ‘oku totonú mo talangofua kia Sihova.

Ko e hā ‘e lava ke ke ako meia Siosaiá?— Neongo na‘e kei tamasi‘i ‘a Siosaia, na‘á ne loto ke fai ‘a e me‘a na‘e totonú. Na‘á ne ‘ilo‘i ‘oku totonu ke kaume‘a pē mo e kakai ‘oku nau ‘ofa kia Sihová. Fakapapau‘i ‘okú ke fili ‘a e ngaahi kaume‘a ‘oku ‘ofa kia Sihova mo lava ke tokoni‘i koe ke ke fai ‘a e me‘a ‘oku totonú!