1, 2. Ko e hā ʻoku makehe ʻo fekauʻaki mo e fononga ʻoku teu ke fai ʻe Panepasa mo Saulá, pea ʻe anga-fēfē ʻa e tokoni ʻa ʻena ngāué ki hono fakahoko ʻo e Ngāue 1:8?

 KO HA ʻaho fakafiefia eni ki he fakatahaʻanga ʻAniteoké. Mei he kotoa ʻo e kau palōfita mo e kau faiako hení, kuo fili ai ʻa Panepasa mo Saula ʻe he laumālie māʻoniʻoní ke na ʻave ʻa e ongoongo leleí ki he ngaahi feituʻu mamaʻo atú. a (Ngā. 13:1, 2) Ko e moʻoni, kuo ʻosi fekauʻi atu ha kau tangata taau ki muʻa. Neongo ia, ʻi he kuohilí, naʻe fononga ai ha kau misinale ki he ngaahi feituʻu naʻe ʻosi faiaka ai ʻa e lotu faka-Kalisitiané ia. (Ngā. 8:14; 11:22) ʻI he taimi ia ko ʻení, ko Panepasa mo Saula​—fakataha mo Sione Maʻake, ʻa ia te ne hoko ko ha tokoni​—ʻe fekauʻi atu kinautolu ki he ngaahi fonua ʻa ia ko e tokolahi taha ʻo e kakai aí ʻoku ʻikai te nau ʻiloʻi ʻa e ongoongo leleí.

² ʻI he taʻu ʻe 14 nai ki muʻa atu, naʻe pehē ai ʻe Sīsū ki heʻene kau muimuí: “Te mou hoko ko e kau fakamoʻoni kiate au ʻi Selusalema, ʻi he kotoa ʻo Siuteá mo Samēlia, pea ki he feituʻu taupotu taha ʻo e māmaní.” (Ngā. 1:8) Ko hono fakanofo ʻa Panepasa mo Saula ke na hoko ko e ongo misinalé ʻe tokoni ia ki hono fakahoko ʻa e ngaahi lea fakaekikite ko ia ʻa Sīsuú! b

3. Ko e hā naʻá ne ʻai ke faingataʻa ʻa e ngaahi fononga lōloa ʻi he ʻuluaki senitulí?

³ ʻI he ʻahó ni, ʻoku mālō mo e ngaahi meʻa foʻou kuo faʻu hangē ko e meʻalelé mo e vakapuná, ʻoku lava ai ʻa e kakaí ke nau fai ha ngaahi fononga mamaʻo ʻi he houa pē ʻe taha pe ua. Naʻe ʻikai ke pehē ʻa e tuʻungá ia ʻi he ʻuluaki senituli T.S. ʻI he taimi ia ko iá, ko e founga tefito ki he fononga ʻi ʻutá ko e lue-laló, ʻo faʻa fai ia ʻi he ngaahi konga fonua tokakovi. Ko ha fononga ʻaho ʻe taha, ʻa ia naʻe lavaʻi pē nai ai ʻa e kilomita ʻe 30, naʻe  fakaongosia ʻaupito! c Ko ia ai, lolotonga ʻoku ʻikai ha veiveiua naʻe fakatuʻotuʻa vēkeveke atu ʻa Panepasa mo Saula ki he ngāue ne vaheʻi angé, kuo pau pē naʻá na ʻiloʻi ʻe kau ki ai ʻa e feinga lahi mo e feilaulauʻi-kita.​—Māt. 16:24.

4. (a) Ko e hā naʻá ne tataki ʻa hono fili ko ia ʻo Panepasa mo Saulá, pea naʻe anga-fēfē ʻa e fakafeangai ʻa hona ngaahi kaungātuí ki he fakanofo ko iá? (e) ʻE lava fēfē ke tau poupou ki he faʻahinga ʻoku nau maʻu ʻa e ngaahi fatongia fakateokalatí?

⁴ Ka ko e hā naʻe fakahinohinoʻi pau ai ʻe he laumālie māʻoniʻoní ke vaheʻi ʻa Panepasa mo Saula “ki he ngāue”? (Ngā. 13:2) ʻOku ʻikai ke tala mai ia ʻe he Tohi Tapú. ʻOku tau ʻiloʻi naʻe tataki ʻe he laumālie māʻoniʻoní ʻa hono fili ko ia ʻo e ongo tangatá ni. ʻOku ʻikai ke fakahaaʻi mai ia naʻe hanga ʻe he kau palōfita mo e kau faiako ʻi ʻAniteoké ʻo fakafepakiʻi ʻa e fili ko iá. ʻI hono kehé, naʻa nau poupouʻi kakato ʻa e fakanofo ko iá. Fakaʻuta atu ki he anga ʻo e ongoʻi kuo pau naʻe maʻu ʻe Panepasa mo Saulá ʻi hono fai ʻe hona fanga tokoua fakalaumālié, ʻo ʻikai te nau meheka, ʻa e ʻaukai, lotu, “hilifaki honau nimá kiate kinaua, pea nau tuku atu kinaua ke na ō.” (Ngā. 13:3) ʻOku totonu ke tau poupou foki mo kitautolu ki he faʻahinga ʻoku nau maʻu ʻa e ngaahi fatongia fakateokalatí, ʻo kau ai ʻa e kau tangata kuo fakanofo ko e kau ʻovasia ʻi he fakatahaʻangá. ʻI he ʻikai ke hoko ʻo meheka ki he faʻahinga ʻoku nau maʻu ʻa e ngaahi monū peheé, ʻoku totonu ke tau “fakaʻatuʻi kiate kinautolu ʻi he ʻofa ʻoku mahulu atu koeʻuhí ko ʻenau ngāué.”​—1 Tes. 5:13.

5. Fakamatala ki he meʻa naʻe kau ki he faifakamoʻoni ʻi he motu ko Saipaló.

⁵ Hili ʻena lue ki Selūsiá, ʻa ia ko ha taulanga ofi ki ʻAniteoke, naʻe tukufolau ai ʻa Panepasa mo Saula ki he motu ko Saipaló, ko ha folau ia ʻi he kilomita nai ʻe 200. d ʻI he tuʻunga ʻo Panepasa ko ha tupuʻi Saipaló, ʻoku ʻikai ha veiveiua naʻá ne vēkeveke ke ʻomi ʻa e ongoongo leleí ki he faʻahinga ʻi hono feituʻu tupuʻangá. ʻI he aʻu ki Salamisí, ko ha kolo ʻi he matāfanga fakahahake ʻo e motú, naʻe ʻikai ke toe fakamoleki noa ai ʻe he ongo tangatá ni ha taimi. Tuai-e-kemo, “naʻá na kamata fanongonongo ʻa e folofola ʻa e ʻOtuá ʻi he ngaahi sinakoke ʻo e kau Siú.” e (Ngā. 13:5) Naʻe fononga ʻa Panepasa mo Saula mei he ngataʻanga ʻe taha ʻo Saipaló ki he ngataʻanga ʻe tahá, ʻa ia ʻoku ngalingali pē naʻá na faifakamoʻoni ʻi he ngaahi kolo mahuʻingá ʻi he feituʻu naʻá na fou atu aí. Fakatuʻunga ʻi he hala naʻá na ʻalu aí, ʻoku ngalingali pē naʻe lue ʻa e ongo misinalé ni ʻi he kilomita nai ʻe 160!

6, 7. (a) Ko hai ʻa Sēsio Paulo, pea ko e hā naʻe feinga ai ʻa Pā-Sīsū ke ne fakatafokiʻi ia mei he ongoongo leleí? (e) Naʻe anga-fēfē hono fakafehālaakiʻi ʻe Saula ʻa e fakafepaki meia Pā-Sīsuú?

⁶ Naʻe fonu ʻa Saipalo ʻo e ʻuluaki senitulí ʻi he lotu loí. Naʻe hoko ʻo tautautefito ʻene hā mahino iá ʻi he taimi naʻe aʻu ai ʻa Panepasa mo Saula ki Pāfosí, ʻi he  matāfanga fakahihifo ʻo e motú. ʻI he feituʻu ko iá, naʻá na fetaulaki ai mo ha “tangata Siu ko hono hingoá ko Pā-Sīsū, ʻa ia ko ha tokotaha faifakalouʻakau pea ko ha palōfita loi.” Pea “naʻá ne ngāue ki he kōvana ko e tangata poto ko Sēsio Pauló.” f ʻI he ʻuluaki senitulí, ko e kau Loma ʻilomeʻa fakasōsiale tokolahi​—naʻa mo ha “tangata poto,” hangē ko Sēsio Pauló​—naʻa nau faʻa hanga ki ha tokotaha faimana pe ko ha tokotaha vavalo fakaʻasitalolosia ki ha tokoni ʻi hono fai ha ngaahi fili mahuʻinga. Ka neongo ia, naʻe mahuʻingaʻia ʻa Sēsio Paulo ʻi he pōpoaki ʻo e Puleʻangá pea naʻá ne “holi vēkeveke ke fanongo ki he folofola ʻa e ʻOtuá.” Naʻe ʻikai ke saiʻia heni ʻa Pā-Sīsū, ʻa ia naʻe toe ʻiloʻi foki ʻaki hono hingoa fakalakanga ko e ʻElimasí, ʻa ia ko hono ʻuhingá ko e “Tokotaha Faifakalouʻakau.”​—Ngā. 13:6-8.

⁷ Naʻe ʻikai ke tali ʻe Pā-Sīsū ʻa e pōpoaki ʻo e Puleʻangá. Ko e moʻoni, ko e founga pē naʻe lava ai ke ne maluʻi ʻa hono lakanga faitākiekina ʻi he tuʻunga ko e tokotaha faleʻi ia kia Sēsio Pauló ko ʻene “fakatafokiʻi ʻa e kōvaná mei he tuí.” (Ngā. 13:8) Ka heʻikai ke sio pē ʻa Saula ia kae hanga ʻe ha tokotaha faimana ia ʻi he nofoʻanga kōvaná ʻo ofeʻi ʻa e mahuʻingaʻia ʻa Sēsio Pauló. Ko ia ai, ko e hā e meʻa naʻe fai ʻe Saulá? ʻOku pehē ʻe he fakamatalá: “Ko Saula, ʻa ia naʻe toe ui ko Paulá, ʻi heʻene hoko ʻo fonu ʻi he laumālie māʻoniʻoní, naʻá ne sio fakamamaʻu atu kia ʻElimasi [Pā-Sīsū] ʻo ne pehē: ‘ʻA e tangata kuo fonu ʻi he kākā kotoa pē  mo e kovi pango kotoa pē, ʻa koe ko e foha ʻo e Tēvoló, ʻa koe ko e fili ʻo e meʻa kotoa pē ʻoku māʻoniʻoní, ʻe ʻikai koā ke tuku hoʻo mioʻi ʻa e ngaahi founga totonu ʻa Sihová? Vakai, ko e toʻukupu ʻo Sihová ʻoku ala atu kiate koe, pea te ke kui, ʻo ʻikai sio ki he maama ʻo e laʻaá ʻi ha taimi.’ ʻI he taimi pē ko iá naʻe tō kiate ia ha fuʻu kakapu mo ha fakapoʻulituʻu, pea naʻá ne kumi takai holo ha taha ke ne taki ia ʻi hono nimá.” g Ko e hā ʻa e ola naʻe hoko ʻi he foʻi ngāue fakaemana ko ení? “ʻI he sio ʻa e kōvaná ki he meʻa kuo hokó, naʻá ne hoko ai ko ha tokotaha tui, he naʻá ne ofoofo ʻi he akonaki ʻa Sihová.”​—Ngā. 13:9-12.

8. ʻE lava fēfē ke tau faʻifaʻitaki ʻi he ʻahó ni ki he loto-toʻa ʻa Paulá?

⁸ Naʻe ʻikai ke manavahē ʻa Paula ia ʻia Pā-Sīsū. ʻOku pehē pē ʻa e ʻikai totonu ke tau foʻi ʻi he taimi ʻoku feinga ai ʻa e kau fakafepakí ke fakavaivaiʻi ʻa e tui ʻa e faʻahinga ʻoku nau mahuʻingaʻia ʻi he pōpoaki ʻo e Puleʻangá. Ko e moʻoni, ʻoku totonu ke tau ʻai ʻetau leá “ke hoko maʻu pē . . . ʻo anga-ʻofa, ʻo fakaifoifo ʻaki ha māsima.” (Kol. 4:6) ʻI he taimi tatau, ʻe ʻikai te tau loto ke ʻai ke ʻi ha tuʻunga fakatuʻutāmaki ʻa e tuʻunga lelei fakalaumālie ʻa ha tokotaha mahuʻingaʻia koeʻuhí pē ke kalofi ai ʻa e fakafepakí. Pehē foki ʻoku ʻikai totonu ke tau tauholomui koeʻuhí ko e ilifiá mei  hono fakaeʻa ʻa e lotu loí, ʻa ia ʻoku hokohoko atu ʻene “mioʻi ʻa e ngaahi founga totonu ʻa Sihová” ʻo hangē ko ia naʻe fai ʻe Pā-Sīsuú. (Ngā. 13:10) ʻI he hangē ko Paulá, fakatauange ke tau talaki loto-toʻa ʻa e moʻoní pea langaʻi ʻa e mahuʻingaʻia ʻa e faʻahinga loto-moʻoní. Pea neongo ʻe ʻikai nai ke fuʻu hā mahino ʻa e poupou ʻa e ʻOtuá ʻo hangē ko ia naʻe hoko ʻi he tuʻunga ʻo Paulá, ʻoku lava ke tau fakapapauʻi ʻe ngāueʻaki ʻe Sihova ʻa hono laumālie māʻoniʻoní ke tohoakiʻi mai ʻaki ʻa e faʻahinga ʻoku tāú ki he moʻoní.​—Sione 6:44.

9. Naʻe anga-fēfē hono fokotuʻu ʻe Paula mo Panepasa ha faʻifaʻitakiʻanga lelei ki he faʻahinga ʻoku takimuʻa ʻi he fakatahaʻangá he ʻaho ní?

⁹ ʻOku hā mahino mai, naʻe hoko ha liliu ʻi he taimi naʻe mavahe ai ʻa e kau tangatá mei Pāfosi ʻo nau tukufolau ki Peaká, ʻa ia naʻe ʻi he matāfanga ʻo ʻĒsia Mainá, ko hono mamaʻó ko e folau tahi kilomita nai ʻe 250. ʻI he Ngāue 13:13, ʻoku fakamatalaʻi ai ʻa e kulupú ni ko “Paula mo hono kaungāfonongá.” Ko e fakaleá ni ʻokú ne fakahuʻunga mai ko Paula naʻe takimuʻa he taimi ko ení ʻi he ngaahi ngāue ʻa e kulupú. Kae kehe, ʻoku ʻikai ke ʻi ai hano fakahaaʻi mai ia ʻo pehē naʻe hoko ʻa Panepasa ʻo meheka kia Paula. ʻI hono kehé, ko e ongo tangatá ni naʻe hokohoko atu ʻena ngāue fakataha ke fakahoko ʻa e finangalo ʻo e ʻOtuá. ʻOku fokotuʻu mai ʻe Paula mo Panepasa ha faʻifaʻitakiʻanga lelei ki he faʻahinga ʻoku takimuʻa ʻi he fakatahaʻangá he ʻaho ní. ʻI he ʻikai feʻauhi ki he tuʻu-ki-muʻá, ʻoku manatuʻi ʻe he kau Kalisitiané ʻa e lea ʻa Sīsū: “Ko kimoutolu kotoa ko e fanga tokoua.” Naʻá ne tānaki mai: “ʻIlonga ʻa ia ʻokú ne hakeakiʻi iá ʻe fakatōkilaloʻi, pea ʻilonga ʻa ia ʻokú ne fakatōkilaloʻi iá ʻe hakeakiʻi.”​—Māt. 23:8, 12.

10. Fakamatalaʻi ʻa e fononga mei Peaka ki ʻAniteoke Pisitiá.

¹⁰ ʻI heʻenau aʻu ki Peaká, naʻe mavahe ʻa Sione Maʻake meia Paula mo Panepasa ʻo ne foki ki Selusalema. Ko e ʻuhinga ki heʻene mavahe fakatuʻupakeé ʻoku ʻikai ke fakamatalaʻi mai ia. Naʻe hokohoko atu ʻa Paula mo Panepasa, ʻo na fononga mei Peaka ki ʻAniteoke ʻi Pisitiá, ko ha kolo ʻi he vahefonua ʻo Kalētiá. Naʻe ʻikai ko ha fononga faingofua eni, he ko ʻAniteoke Pisitiá ʻoku mita nai ʻe 1,100 hono māʻolungá mei he fukahi tahí. Ko e ngaahi hala moʻunga fakatuʻutāmakí naʻe toe ʻiloa foki ia ʻi he lahi ai ʻa e kau kaihaʻa fakamālohí. ʻI he hangē ne ʻikai ke feʻunga pē ʻi he meʻa ko ení, ʻoku hangehangē naʻe toe hokosia ʻe Paula ʻi he  taimi ko ení ha ngaahi palopalema fakaemoʻui lelei. h

11, 12. ʻI he lea ʻa Paula ʻi he sinakoke ʻi ʻAniteoke ʻo Pisitiá, naʻe anga-fēfē ʻene langaʻi ʻa e mahuʻingaʻia ʻa ʻene kau fanongó?

¹¹ ʻI ʻAniteoke ʻo Pisitiá, naʻe hū ʻa Paula mo Panepasa ki he sinakoké ʻi he Sāpaté. ʻOku pehē ʻe he fakamatalá: “Hili hono lau ki he kakaí ʻa e Laó pea mo e ngaahi tohi ʻa e Kau Palōfitá, naʻe ʻoatu ʻe he kau ʻōfisa tauhi ʻo e sinakoké ha fekau kiate kinaua, ʻo pehē: ‘Ongo tangata, ongo tokoua, kapau ʻoku ʻi ai haʻamo lea fakalototoʻa ki he kakaí, mo leaʻaki ia.’” (Ngā. 13:15) Naʻe tuʻu hake ʻa Paula ke lea.

¹² Naʻe kamata ʻa Paula ʻaki ʻene lea ki heʻene kau fanongó: “Kau tangata, kau ʻIsileli mo kimoutolu kotoa pē ʻoku manavahē ki he ʻOtuá.” (Ngā. 13:16) Ko e kau fanongo ʻa Paulá ko e kau Siu mo e kau ului. Naʻe anga-fēfē ʻa e langaʻi ʻe Paula ʻa e mahuʻingaʻia ʻa e kau fanongo ko ʻení, ʻa ia naʻe ʻikai te nau ʻiloʻi ʻa e ngafa ʻo Sīsū ʻi he taumuʻa ʻa e ʻOtuá? ʻUluakí, naʻe fakamatala kongokonga lalahi ʻa Paula ki he hisitōlia ʻo e puleʻanga Siú. Naʻá ne fakamatala ki he anga hono hanga ʻe Sihova ʻo “hakeakiʻi ʻa e kakaí lolotonga ʻenau nofo ko e kau muli ʻi he fonua ko ʻIsipité” pea mo e hanga ko ia ʻe he ʻOtuá ʻi he hili honau tukuangé ʻo “kātakiʻi . . . kinautolu ʻi he toafá” ʻi he taʻu ʻe 40. Naʻe toe fakamatala foki ʻa Paula ki he founga naʻe malava ai ʻe he kau ʻIsilelí ke nau maʻu ʻa e Fonua ʻo e Talaʻofá pea mo e anga hono hanga ʻe Sihova ʻo “vaheʻi ange honau fonuá ke hoko ko honau tofiʻa.” (Ngā. 13:17-19) Kuo fai ʻa e fakahuʻunga ʻo pehē, naʻe lave nai ʻa Paulá ki ha ngaahi kupu Fakatohitapu  pau ʻa ia naʻe toki ʻosi atu pē hano lau leʻo-lahi ʻi he ngaahi mōmeniti ki muʻá ko ha konga ia ʻo e ouau ʻo e Sāpaté. Kapau ko e tuʻungá ia, ko ha toe fakatātā eni ʻe taha ʻoku fakahaaʻi ai naʻe ʻilo ʻe Paula ʻa e founga ke ne lava ai ʻo “hoko ko e ngaahi meʻa kotoa pē ki he ngaahi faʻahinga kakai kotoa pē.”​—1 Kol. 9:22.

13. ʻE lava fēfē ke tau langaʻi ʻa e mahuʻingaʻiá ʻi he loto ʻo ʻetau kau fanongó?

¹³ ʻOku totonu foki mo kitautolu ke tau feinga ke langaʻi ʻa e mahuʻingaʻia ʻa e faʻahinga ʻoku tau malanga ki aí. Ko e fakatātaá, ʻi hono ʻiloʻi ʻa e puipuituʻa fakalotu ʻo ha taha ʻe malava ke tokoni ia kia kitautolu ke tau fili ai ʻa e ngaahi kaveinga ʻa ia te ne mahuʻingaʻia tefito aí. Pehē foki, ʻe malava ke tau lave ki ha ngaahi konga ʻo e Tohi Tapú ʻa ia ʻoku alāanga nai mo ia ʻa e tokotahá. ʻE ola lelei nai ke ʻoange ki he tokotahá ke ne lau mai mei heʻene tatau fakafoʻituitui ʻo e Tohi Tapú. Kumi ki ha ngaahi founga ke langaʻi ai ʻa e mahuʻingaʻiá ʻi he loto ʻo hoʻo kau fanongó.

14. (a) Naʻe anga-fēfē ʻa e kamata ʻe Paula ʻene lea ʻo kau ki he ongoongo lelei fekauʻaki mo Sīsuú, pea ko e hā ʻa e fakatokanga naʻá ne ʻoangé? (e) Naʻe anga-fēfē ʻa e fakafeangai ʻa e fuʻu kakaí ki he lea ʻa Paulá?

¹⁴ Naʻe hoko atu ʻa e fakamatala ʻa Paulá ki he anga ʻo e tukuʻau mai ʻa e laine ʻo e ngaahi tuʻi ʻIsilelí ʻo aʻu ki ha “fakamoʻui, ko Sīsū,” ʻa ia ko hono tokotaha fakamelomeló ko Sione ko e Faipapitaisó. Naʻe fakamatala leva ʻa Paula ki he anga hono tāmateʻi ʻo Sīsū pea mo hono fokotuʻu hake ia mei he maté. (Ngā. 13:20-37) “Ko ia ai, tuku ke ʻilo ʻe kimoutolu,” ko e fakamatala ia ʻa Paulá, “fakafou ʻi he tokotahá ni ʻoku fanongonongo atu ai ha fakamolemole ʻo e ngaahi angahalá kiate kimoutolu . . . ʻE lau ai ʻe he ʻOtuá ʻoku māʻoniʻoni ʻa e tokotaha kotoa ʻoku tuí.” Naʻe hanga leva ʻe he ʻapositoló ʻo ʻoange ki heʻene kau fanongó ʻa e fakatokanga ko ʻení: “Tokanga ke ʻoua naʻa hoko ʻa e meʻa ʻoku leaʻaki ʻi he tohi ʻa e Kau Palōfitá kiate kimoutolu: ‘Vakai ki ai, ʻa kimoutolu kau luma, pea mou ofo ai, pea mou puli mei hoku ʻaó, he ʻoku ou fai ha ngāue ʻi homou ngaahi ʻahó, ko ha ngāue ʻe ʻikai ʻaupito te mou tui ki ai naʻa mo hano fakamatala fakaikiiki atu ia ʻe ha taha kiate kimoutolu.’” Ko e fakafeangai naʻe fai ki he lea ʻa Paulá naʻe fakaofo. “Naʻe kōlenga ʻa e kakaí kiate kinaua ke na fakamatala ʻo fekauʻaki mo e ngaahi meʻá ni ʻi he Sāpate hono hokó,” ko e fakamatala ia ʻa e Tohi Tapú. ʻIkai ko ia pē, ʻi he hili hono tukuange atu ʻa e fakataha naʻe fai ʻi he sinakoké, “ko e tokolahi ʻo e kau Siú pea mo e kau ului naʻe lotu ki he ʻOtuá naʻa nau muimui ʻia Paula mo Panepasa.”​—Ngā. 13:38-43.

15. Ko e hā naʻe hoko ʻi he Sāpaté ʻi he hili ʻa e lea ʻa Paulá?

¹⁵ ʻI he Sāpate hono hokó, naʻe fakatahataha mai “ʻa e meimei kotoa ʻo e koló” ke fanongo kia Paula. Naʻe ʻikai ke fiefia ʻa e kau Siu ʻe niʻihi ʻi he meʻá ni, ʻa ia naʻe “kamata ke nau fakafepakiʻi mo laukovi ki he ngaahi meʻa naʻe leaʻaki ʻe Paulá.” Naʻá ne hanga mo Panepasa ʻo tala ange loto-toʻa kiate kinautolu: “Naʻe pau ke tomuʻa leaʻaki kiate kimoutolu ʻa e folofola ʻa e ʻOtuá. Koeʻuhí ko hoʻomou fakafisingaʻi ia pea mo hoʻomou ʻai kimoutolu ke ʻikai te mou taau mo e moʻui taʻengatá, vakai, te mau hanga ā kimautolu ki he ngaahi puleʻangá. He kuo fai mai ʻe Sihova ha fekau kiate kimautolu fakafou ʻi he ngaahi leá ni: ‘Kuó u  fokotuʻu koe ko ha maama ki he ngaahi puleʻangá, ke ke hoko ko ha fakamoʻui ʻo aʻu ki he ngaahi ngataʻanga ʻo e māmaní.’”​—Ngā. 13:44-47; ʻAi. 49:6.

16. Naʻe anga-fēfē ʻa e fakafeangai ʻa e kau Siú ki he ngaahi lea mālohi ʻa e ongo misinalé, pea naʻe anga-fēfē ʻa e fakafeangai ʻa Paula mo Panepasa ki he fakafepakí?

¹⁶ Naʻe fiefia ʻa e kau fanongo Senitailé, pea “ko e faʻahinga kotoa pē naʻe hehema totonu ki he moʻui taʻengatá naʻa nau hoko ko e kau tui.” (Ngā. 13:48) Ko e folofola ʻa Sihová naʻe vave ʻene mafola atu ki he fonuá kotoa. Ko e fakafeangai ʻa e kau Siú naʻe kehe ʻaupito ia. Ko hono moʻoní, naʻe tala ange ʻe he ongo misinalé kiate kinautolu neongo naʻe leaʻaki ʻa e folofola ʻa e ʻOtuá ʻo muʻomuʻa kiate kinautolu, naʻa nau fili kinautolu ke nau fakafisingaʻi ʻa e Mīsaiá pea ko ia naʻa nau hanga atu leva ai ki he fakamaau tamaki ʻa e ʻOtuá. Naʻe fakakoviʻi ʻe he kau Siú ʻa e kau fefine tuʻu-ki-muʻa pea mo e kau tangata tuʻu-ki-muʻa ʻo e koló, “pea naʻa nau fakatupu hano fakatangaʻi ʻo Paula mo Panepasa pea lī kinaua ki tuʻa mei honau feituʻú.” Naʻe anga-fēfē ʻa e fakafeangai ki ai ʻa Paula mo Panepasá? “Naʻá na tūtuuʻi atu ʻa e efú mei hona vaʻé kiate kinautolu peá na ʻalu ki ʻAikoniume.” Ko ʻene ngata ia ʻa e lotu faka-Kalisitiané ʻi ʻAniteoke Pisitiá? Mole ke mamaʻo! Ko e kau ākonga naʻe toe aí “naʻe hokohoko atu [ʻenau] fonu . . . ʻi he fiefiá pea mo e laumālie māʻoniʻoní.”​—Ngā. 13:50-52.

17-19. ʻI he ngaahi founga fē ʻe lava ke tau faʻifaʻitaki ai ki he faʻifaʻitakiʻanga lelei naʻe fokotuʻu ʻe Paula mo Panepasá, pea ʻe lava fēfē ke tokoni ʻa ʻetau fai peheé ki heʻetau fiefiá?

¹⁷ Ko e anga ʻo e fakafeangai ʻa e ongo tangata faitōnunga ko ʻení ki he fakafepakí ʻokú ne ʻomai ha lēsoni mahuʻinga kiate kitautolu. ʻOku ʻikai ke tuku ʻetau malangá, naʻa mo e taimi ʻoku feinga ai ʻa e kakai tuʻu-ki-muʻa ʻo e māmaní ke taʻofi kitautolu mei hono fanongonongo atu ʻetau pōpoakí. Toe fakatokangaʻi ange foki, ʻi he taimi naʻe talitekeʻi ai ʻe he kakai ʻo ʻAniteoké ʻa ʻena pōpoakí, naʻe hanga ʻe Paula mo Panepasa ʻo “tūtuuʻi atu ʻa e efú mei hona vaʻé”​—ʻa ia ko ha faʻahinga ngaue eni ʻa e sinó naʻe fakahaaʻi ai ʻo ʻikai ko e ʻita ka ko ha fakaʻataʻatā ia mei ha ʻi ai ha toe kaunga atu ki ai. Naʻe ʻiloʻi ʻe he ongo misinalé ni ʻe ʻikai lava ke na puleʻi ʻa e anga ʻo e fakafeangai ʻa e niʻihi kehé. Ko e meʻa ia naʻe lava ke na puleʻí pe ʻe kei hoko atu koā ʻena malangá. Pea ko e meʻa ia naʻá na faí ko e malanga, ʻi heʻena hoko atu ko ia ki ʻAikoniumé!

¹⁸ Fēfē nai ʻa e kau ākonga naʻe toe ʻi ʻAniteoké? Ko e moʻoni, naʻa nau ʻi he feituʻu ʻa ia naʻe anga-fakafili ai ʻa e kakaí. Ka ko ʻenau fiefiá naʻe ʻikai ke fakatuʻunga ia ʻi ha tali lelei ʻe fai mai. Naʻe pehē ʻe Sīsū: “He fiefia ē ko e faʻahinga ʻoku fanongo ki he folofola ʻa e ʻOtuá pea tauhi iá!” (Luke 11:28) Pea ko e meʻa tofu pē eni naʻe fakapapauʻi ʻe he kau ākonga ʻi ʻAniteoke Pisitiá ke nau faí.

¹⁹ Hangē ko Paula mo Panepasá, fakatauange ke tau manatuʻi maʻu pē ko hotau fatongiá ke malangaʻi ʻa e ongoongo leleí. Ko e fili ko ia ke tali pe fakafisingaʻi ʻa e pōpoakí ko e meʻa ʻataʻatā pē ia ʻa ʻetau kau fanongó. Kapau ko e faʻahinga ʻoku tau malanga ki aí ʻoku nau ngali taʻefiefanongo, ʻe lava ke tau ako ha lēsoni mei he kau ākonga ʻi he ʻuluaki senitulí. ʻI he houngaʻia ʻi he moʻoní pea fakaʻatā kitautolu ke tataki ʻe he laumālie māʻoniʻoní, ʻe lava ke tau fiefia foki mo kitautolu, naʻa mo e ʻi he uhouhonga ʻo e fakafepakí.​—Kal. 5:18, 22.