‘I HE Sēnesi vahe 22, ‘oku pehē ‘e he Tohi Tapú na‘e tala ‘e he ‘Otuá kia ‘Ēpalahame ke ne fononga ki ha feitu‘u mama‘o mei hono ‘apí ke fai ha feilaulau. ‘Oku pehē ai: “Pea to‘o ‘e Epalahame ‘a e fefie ki he feilaulau, ‘o ne hilifaki ki hono foha ko Aisake; pea ne to‘o ‘e ia ‘a e afi mo e hele, pea na laka atu fakataha.”—Sēn. 22:6.

‘Oku ‘ikai ke fakamatala‘i ‘i he Tohi Tapú ia ‘a e anga hono fakamo‘ui ha afi ‘e he kakai ‘i he kuonga mu‘á. Ko ia na‘e tutu ‘e ‘Ēpalahame mo ‘Aisake ha afi peá na ‘alu leva mo e afi ko iá? Na‘e pehē ‘e ha tokotaha fakamatala Tohi Tapu he‘ikai malava nai ha afi ke “kei uloulo ‘i ha fononga lōloa.” ‘I hono kehé, kuo pau pē na‘e ‘alu ‘a ‘Ēpalahame mo hono fohá mo e me‘a kotoa na‘á na fiema‘u ke fakamo‘ui ‘aki ha afi.

Ka ‘oku pehē ‘e he ni‘ihi na‘e ‘ikai faingofua ke fakamo‘ui ha afi ‘i he ngaahi taimi ko iá. Ko ia ‘i he taimi ‘e ni‘ihi, na‘e tutu ‘e he kakaí ha afi ‘aki ‘enau ‘omai ha malala mo‘ui, mahalo ko ha malala mei he afi ‘o e kaungā‘apí. ‘Oku tui ‘a e kau mataotao tokolahi na‘e ‘ave ‘e ‘Ēpalahame ha malala‘i afi mo‘ui ‘o ne fononga mo ia. ‘Oku pau pē na‘á ne fa‘o ia ‘i ha ‘ai‘anga me‘a, mahalo ko ha kulo na‘e tautau ‘aki ha sēini, pea na‘á ne ‘ave ‘a e kuló ‘i he‘ene fonongá. (‘Ai. 30:14) Na‘e pau pē na‘á ne ngāue‘aki leva ‘a e malala‘i afi mo‘ui ko iá mo e fanga ki‘i ‘akau mōmoá ‘i he taimi pē na‘á ne fiema‘u ai ke tafu ha afi.