Ngaahi Kī ki he Hoko ‘o Faitotonu Ange

‘OKU loto hotau Tokotaha-Fakatupú ke tau fiefia, ke ma‘u ha nonga ‘i loto, pea ke tokoni ki he fiefia ‘a e ni‘ihi kehé. Ko ia ai, ‘okú ne kole mai kia kitautolu ‘ke tau fai totonu mo loto ki he ofá.’ (Maika 6:8, PM) ‘E lava fēfē ke tau fai iá? ‘Oku fiema‘u ke tau fakatupulekina ‘a e ngaahi ‘ulungaanga ‘a ia ‘okú ne to‘o ‘a e ngaahi anga ‘oku ohi ai ‘a e fakamaau ta‘etotonú. Fakakaukau angé ki he founga ‘e lava ke tokoni‘i ai kitautolu ‘e he Tohi Tapú ke tau fai iá.

IKU‘I ‘A E MĀNUMANÚ. Ko e me‘atau mālohi taha ki he mānumanú ko e ‘ofá—‘o ‘ikai ko ha fo‘i fakakaukau pē pe tohoaki‘i fakaemanako—ka ko e ‘ofa feilaulau‘i-kita ki he ni‘ihi kehé. Ko e ‘‘ofa peheé ‘oku anga-lelei,’ pea “‘oku ‘ikai te ne kumi ki he‘ene lelei pē ‘a‘ana,” ko e lau ia ‘a e 1 Kolinitō 13:4, 5. ‘Ikai ngata aí, ko e ‘ofá ni ‘oku ‘ikai fakangatangata pē ia ki he fāmilí mo e ngaahi kaume‘á. “Kapau ‘oku mou ‘ofa kiate kinautolu ‘oku ‘ofa mai kiate kimoutolú, ko e hā ha totongi te mou ma‘u ai?” ko e ‘eke ia ‘e Sīsuú, peá ne hoko atu ‘o pehē na‘a mo e kau anga-ta‘efaka‘otuá ‘oku nau ‘ofa ki he fa‘ahinga ‘oku ‘ofa ‘ia kinautolú.—Mātiu 5:46.

IKU‘I ‘A E TOMU‘A FEHI‘Á. ‘Oku pehē ‘i he Ngāue 10:34, 35: “‘Oku ‘ikai ke filifilimānako ‘a e ‘Otuá, ka ‘i he pule‘anga kotoa pē, ko e tangata ko ia ‘oku manavahē kiate ia mo fai ‘a e me‘a ‘oku totonú, ‘okú ne tali ia.” ‘Oku ‘ikai tokonaki mai ‘e he ‘Otuá ‘a e fakamo‘uí ‘o makatu‘unga ‘i he matakalí, tu‘unga fakasōsialé, pe ko e tangata pe fefine. ‘I he‘ene vakaí, “‘oku ‘ikai ha Siu pe ha Kalisi, ‘oku ‘ikai ha pōpula pe ha tangata tau‘atāina, ‘oku ‘ikai ha tangata pe ha fefine.” (Kalētia 3:28) ‘I he taimi ‘oku tau fa‘ifa‘itaki ai ki he ‘Otuá, ‘oku tau iku‘i ‘a e tomu‘a fehi‘á. Fakakaukau angé ki he fa‘ifa‘itaki‘anga ‘a Dorothy, ‘a ia na‘e nofo ‘i ‘Amelika.

Na‘e hoko ‘o mātu‘aki fakahoha‘asi ‘a Dorothy ‘e he tomu‘a fehi‘a fakamatakalí ‘o ne loto ai ke kau ‘i ha angatu‘u fakakautau ke fakanonga ‘a e faingata‘a‘ia ‘a e kakai ‘uli‘uli ne lōmekiná. Kae kehe, lolotonga ‘a e taimi ko iá, na‘á ne ma‘u ai ha fakataha faka-Kalisitiane ‘a e Kau Fakamo‘oni ‘a Sihová pea na‘e maongo loloto ki ai ‘a e talitali māfana na‘á ne ma‘u fakatou‘osi mei he kau ‘uli‘ulí mo e kau pālangí. ‘Ikai fuoloa, na‘á ne hoko ai ‘o ‘ilo‘i ko e ‘Otuá pē ‘e lava ke ne liliu ‘a e loto ‘o e kakaí. ‘I he taimi na‘á ne hokosia ai ‘a e ‘ofa mo‘oni ‘a e Kau Fakamo‘oni pālangí—ko e kakai na‘á ne pehē na‘á ne “mei tāmate‘i ‘ikai toe tatali ke poupou‘i ha angatu‘u”—na‘e “māfana” ‘a hono lotó ‘o a‘u ki he tu‘unga na‘e ‘ikai lava ke ne toe ta‘ofi ai ‘ene tangí.

 IKU‘I ‘A E FAKAKAUKAU TA‘EFAKASŌSIALÉ. Ki mu‘a ke hoko ko e kau Kalisitiané, ko e ni‘ihi ‘o e mu‘aki kau muimui ‘o Sīsuú ne nau hoko ko e kau fa‘a konā, kau ma‘u koloa fakamālohi, kau paati longoa‘a, mo e kau lea kovi. Neongo ia, ‘i he tokoni ‘a e ‘Otuá na‘a nau fetongi ‘a e ngaahi tō‘onga kovi ko iá ‘aki ‘a e ‘ofa, anga-lelei, mo e lelei. (1 Kolinitō 5:11; 6:9-11; Kalētia 5:22) Pehē pē ‘i he ‘ahó ni, kuo fai ‘e he kakai ‘e laui miliona ‘a e ngaahi liliu lelei ‘i he‘enau mo‘uí ‘aki ‘enau tafoki ki he ‘Otuá. Ko ha fakatātā ko Firuddin, ‘a ia ‘oku nofo ‘i ‘Asapaisani.

Ko Firuddin na‘e tauhi hake ia ‘i ha ‘api paea, ‘a ia na‘á ne fa‘a fuhu ai mo e tamaiki tangata kehé. ‘I hono tu‘unga ko ha tokotaha lahí, na‘á ne hoko ai ko ha faiako tau fangatua fesi. “Na‘á ku anga-kovi, anga-fakamamahi, mo anga-fakamālohi,” ko ‘ene leá ia. “Kapau na‘e ngalo ha me‘a ‘i hoku uaifí ko Zahra, lolotonga ‘a e taimi kaí—na‘a mo ha me‘a heu nifo—na‘á ku tā ia. Pea kapau na‘e siofi ia ‘e ha taha ‘i he‘ema lue fakatahá, na‘á ku fai ‘a e me‘a tatau ki he tokotaha ko iá!”

‘I he ‘aho ‘e taha, na‘e maongo ai ki he loto ‘o Firuddin ‘a ‘ene ako ‘o ‘ilo na‘e kole ‘a Sīsū ki he ‘Otuá ke ne fakamolemole‘i ‘a e kau sōtia na‘a nau tutuki iá. (Luke 23:34) ‘Ko e ‘Alo pē ‘o e ‘Otuá ‘e lava ke fai peheé,’ ko ‘ene fakakaukaú ia. Hili iá, na‘á ne kamata leva ke fekumi ki he ‘Otuá. ‘I he taimi na‘e tala ange ai ‘e he Kau Fakamo‘oni ‘a Sihová te nau tokoni‘i iá, na‘á ne tali lelei ha ako Tohi Tapu ta‘etotongi. ‘Ikai fuoloa mei ai, na‘e kamata ke lelei ange ‘a hono anga‘itangatá. Ko e mo‘oni, na‘á ne hoko ‘o anga-lelei ‘aupito kia Zahra ‘o ne kamata mo ia foki ke ako Tohi Tapu. ‘I he ‘ahó ni ko kinaua fakatou‘osi ‘okú na fā‘ūtaha ‘i he melino he lotu mo‘oní.

Ko e mo‘oni, ko e ngaahi liliu ‘oku tau fai fakafo‘ituituí nai he‘ikai te ne fakalelei‘i e fakamaau ta‘etotonu ‘i he māmaní kotoa! Neongo ia, fēfē kapau ‘oku fakataumu‘a ‘a e ‘Otuá ke ‘omai ha māmani fo‘ou, ‘oku fakamaau totonu mo‘oni? He ko ē, ‘okú ne ma‘u mo‘oni ‘a e mafaí! Pea fakakaukau ki he me‘á ni: ‘I he 2 Tīmote 3:1-4, na‘e lave ki ai he kamata ‘o e kupu ki mu‘á, na‘a tau ‘ilo‘i ai na‘e tomu‘a tala mahino ‘e he Tohi Tapú ‘a e tu‘unga ‘e ‘i ai ‘a e kakaí fakalūkufua lolotonga hotau taimí. Ko e me‘a ko ia ne tomu‘a talá kuo fakahoko fakaikiiki ia—‘o hangē ko e ngaahi kikite Fakatohitapu lahi kehe. Ko ia ai, ‘oku ‘ikai ko ha‘atau tuku ia ki tafa‘aki ‘a e fakakaukau leleí, ‘i he taimi ‘oku tau fakakaukau fakamātoato ai ki he tala‘ofa ‘a e ‘Otuá ke fakangata ‘a e fakamaau ta‘etotonú kotoa. Ko e mo‘oni, ‘e fakahoko ‘e he ‘Otuá ‘a e taumu‘a ko iá. Anga-fēfē?

[Puha/Fakatātā ‘i he peesi 7]

FEKUMI ‘A HEIDE KI HE FAKAMAAU TOTONÚ

“Na‘á ku loto-mamahi ‘i he lau matakalí, taú, masivá, mo e ngaahi fakamaau ta‘etotonu kehé, pea na‘á ku kumi ki ha fakalelei‘anga,” ko e manatu ia ‘a Heide, ‘a ia ‘oku nofo ‘i ‘Amelika. “Na‘á ku feinga ke ngāue fakataha mo e nga‘unu ki he ngaahi totonu fakasivilé pea faifai atu pē ‘ou kau ki ha fa‘ahi fakapolitikale, ka na‘e hā ngali ta‘emalava ‘e he ngaahi me‘a ko ení ke fakahoko ha liliu mohu ‘uhinga.

“Na‘á ku ongo‘i na‘e fiema‘u ha liliu mahu‘inga lahi ange, pea ko e nga‘unu ‘a e kau hipí na‘e hā ngali lavame‘a. Neongo ia, ko e me‘a ko iá foki na‘e ta‘elavame‘a. Na‘á ku sio na‘e mahu‘inga‘ia ange ‘a e kau hipi tokolahi ‘i he fehokotaki fakasinó, faito‘o kona tapú, mo e fasi rock ‘i hono liliu ‘a e fokotu‘utu‘ú—ko ha ‘ilo na‘á ne ‘ai au ke u loto-mafasia lahi. Na‘á ku fetaulaki ki mui mo e taha ‘o e Kau Fakamo‘oni ‘a Sihová. Na‘á ne fakahaa‘i kiate au mei he Tohi Tapú ‘a e ngaahi liliu ‘oku taumu‘a ki ai ‘a e ‘Otuá. Ko e fakatātaá, na‘á ne fakahaa‘i mai ‘a e ngaahi konga Tohi Tapu hangē ko e Fakahā 21:3, 4, ‘a ia ‘oku pehē ai ko e ‘Otuá te ne holoholo ‘a e lo‘imata mei he mata kotoa pē pea fakangata ‘a e mamahí, tangí, mo e langá—‘a ia ‘oku fa‘a hoko tupu mei he fakamaau ta‘etotonú. ‘‘E lava ke mo‘oni ‘a e ngaahi tala‘ofa ko iá?’ ko ‘eku ‘eke hifo ia kiate aú.

“Na‘e matafi atu ‘eku veiveiuá ‘i he‘eku lau ‘a e me‘a ‘oku lea‘aki ‘e he Folofolá fekau‘aki mo e mālohi pea mo e ‘ofa ‘a e ‘Otuá pea mo e taimi na‘á ku hokosia ai ‘a e ‘ofa ‘i he lotolotonga ‘o e Kau Fakamo‘oni ‘a Sihová. ‘Oku ou vēkeveke tatali he taimí ni ki he fakahoko ‘o e ngaahi tala‘ofa ‘a e ‘Otuá.”

[Fakatātā ‘i he peesi 6]

‘Oku ikuna‘i ‘a e tomu‘a fehi‘á ‘i he taimi ‘oku tau fa‘ifa‘itaki ai ki he ‘ofa ‘a e ‘Otuá

[Fakatātā ‘i he peesi 6]

Ko Firuddin mo hono uaifí, ko Zahra