1-2. (a) Naʻe fēfē ʻa e tuʻunga ʻi Siuteá ʻi he taimi naʻe fai ai ʻe he ʻapositolo ko Paulá ʻa e tohi ki he kau Hepeluú? (e) Naʻe anga-fēfē hono fakamoʻoniʻi naʻe taimi totonu ʻa e tohi fakamānavaʻi ko ení?

 KO E kau Kalisitiane Hepelū naʻa nau nofo ʻi Selusalema mo Siuteá naʻa nau hokosia ʻa e ngaahi taimi faingataʻa ʻi he ngaahi taʻu hili ʻa e pekia ʻa Sīsuú. Taimi nounou hili hono fokotuʻu ʻa e fakatahaʻanga Kalisitiané, naʻe malanga hake ha fakatanga kakaha. (Ngā. 8:1) ʻI he taʻu nai ʻe 20 ki mui ai, naʻe fehangahangai ʻa e kau muimui ʻo Kalaisí mo e ngaahi faingataʻa fakaʻekonōmika mafatukituki, ngalingali naʻe fakatupunga ia ʻe ha honge naʻá ne uesia ki muʻa ange ʻa e fonuá. (Ngā. 11:​27-30) Kae kehe, ʻi he 61 T.S. nai, naʻe hokosia ʻe he kau Kalisitiané ha vahaʻa taimi nonga ʻi hono fakahoa atu ki he meʻa naʻe teu ke hokó. Lolotonga ʻa e vahaʻa taimi ko iá, naʻa nau maʻu ha tohi fakamānavaʻi mei he ʻapositolo ko Paulá—ko ha tohi naʻe fakamoʻoniʻi naʻe mātuʻaki taimi totonu.

² Ko e tohi ki he kau Hepeluú naʻe taimi totonu koeʻuhi ko e nonga naʻe hokosia ʻe he kau Kalisitiané heʻikai ke tuʻuloa. Naʻe tokonaki ʻe Paula ʻa e faleʻi ʻaonga ʻa ia te ne tokoniʻi ʻa e kau Kalisitiane ko iá ke kātekina ʻa e mamahi lahi naʻe teu ke nau fehangahangai mo iá. Ko e fakaʻauha ʻo e fokotuʻutuʻu faka-Siú ʻa ia naʻe tomuʻa tala ʻe Sīsuú, naʻe fakaofi mai. (Luke 21:20) Ko e moʻoni, naʻe ʻikai ke ʻiloʻi ʻe Paula pe ko e kau Kalisitiane ʻi Siuteá ʻa e taimi tofu pē ʻe hoko ai ʻa e fakaʻauha ko iá. Neongo ia, naʻe lava ke ngāueʻaki ʻe he kau Kalisitiane ko iá ʻa e taimi naʻe toé ke teuʻi kinautolu ʻaki hono fakaivimālohiʻi ʻenau tuí mo e kātakí.—Hep. 10:25; 12:​1, 2.

3. Ko e hā ʻoku tautefito ai ʻa e mahuʻinga ʻa e tohi ʻa Hepeluú ki he kau Kalisitiané ʻi he ʻahó ni?

 ³ ʻOku teu ke tau fehangahangai mo ha fuʻu mamahi lahi ange ia ʻi he meʻa naʻe hokosia ʻe he kau Kalisitiane Hepeluú. (Māt. 24:21; Fkh. 16:​14, 16) Ko ia tau lāulea angé ki he niʻihi ʻo e faleʻi ʻaonga naʻe tokonaki ʻe Sihova ki he kau Kalisitiane ko iá ʻa ia ʻe lava ke toe ʻaonga foki kiate kitautolu.

“TUTUI ATU KI HE TUʻUNGA MATUʻOTUʻÁ”

4. Ko e hā ʻa e ngaahi pole naʻe fehangahangai mo e kau Kalisitiane Siú? (Sio foki ki he fakatātaá.)

⁴ Ko e kau Kalisitiane mei ha puipuituʻa faka-Siú naʻa nau fehangahangai mo ha pole lahi. ʻI ha taimi, ko e kau Siú naʻa nau hoko ko e kakai fili ʻa Sihová. Ko Selusalema ʻa e tuʻuʻanga ʻo e founga-pule ʻa e ʻOtuá ʻi he māmaní, pea naʻe hoko ʻa e temipalé ko e senitā ʻo e lotu maʻá. Ko e kotoa ʻo e kau Siu faitōnungá naʻa nau muimui ki he Lao ʻa Mōsesé ʻo fakatatau ki hono fakamatalaʻi ʻe heʻenau kau taki lotú. Ko e ngaahi akonaki ko iá naʻá ne tataki ʻenau founga kaí, ko ʻenau vakai ki he kamú pea naʻa mo ʻenau feohi mo e kau Senitailé. Kae kehe, naʻe ʻikai ke toe tali ʻe Sihova ʻa e ngaahi feilaulau ʻa e kau Siú hili ʻa e pekia ʻa Sīsuú. Naʻe malanga hake ai ha pole ki he kau Kalisitiane Siú, ʻa ia naʻa nau anga ki he muimui ki he Laó. (Hep. 10:​1, 4, 10) Naʻa mo e kau Kalisitiane matuʻotuʻá, hangē ko e ʻapositolo ko Pitá, naʻa nau fāinga ke feʻunuʻaki ki he niʻihi ʻo e ngaahi liliu ko ení. (Ngā. 10:​9-14; Kal. 2:​11-14) Koeʻuhi ko e ngaahi tui foʻou ʻa e kau Kalisitiane ko iá, naʻa nau hoko ai ko ha tāketi ʻa e kau taki lotu Siú.

5. Ko e hā naʻe fiemaʻu ki he kau Kalisitiané ke maluʻi kinautolu mei aí?

⁵ Ko e kau Kalisitiane Hepeluú naʻe poleʻi kinautolu ʻe he kau fakafepakí mei he tafaʻaki ʻe ua. Ko e taha, ko e kau taki lotu Siú naʻa nau fakafeangai kiate kinautolu ko ha kau tafoki ʻo fakafepaki ki he moʻoní. Tānaki atu ki ai, ko e niʻihi ʻo e kau Kalisitiane lau peé naʻa nau tuʻukāivi ko e kau muimui ʻo Kalaisí ʻoku totonu ke hokohoko atu ʻenau tauhi ʻa e ngaahi tafaʻaki kehekehe ʻo e Lao ʻa Mōsesé, mahalo ke fakaʻehiʻehi ai mei he fakatangá. (Kal. 6:12) Ko e hā ʻe tokoni ki he kau Kalisitiane faitōnungá ke pipiki ki he moʻoní?

6. Ko e hā naʻe fakalototoʻaʻi ʻe Paula hono ngaahi kaungātuí ke nau faí? (Hepelū 5:14–6:1)

 ⁶ ʻI he tohi ʻa Paula ki he kau Hepeluú, naʻá ne fakalototoʻaʻi hono ngaahi kaungātuí ke nau keli loloto ange ki he Folofola ʻa e ʻOtuá. (Lau ʻa e Hepelū 5:14–6:1.) Naʻe ngāueʻaki ʻe Paula ʻa e Ngaahi Konga Tohi Tapu Faka-Hepeluú ke fakaʻuhinga mo hono fanga tokouá ʻi he māʻolunga mamaʻo ange ʻa e founga lotu faka-Kalisitiané ʻi he lotu faka-Siú. a Naʻe ʻiloʻi ʻe Paula ko e ʻilo lahi ange mo hono mahinoʻi loloto ange ʻo e moʻoní te ne teuʻi ʻa e kau Kalisitiane ko iá ke nau ʻiloʻi mo talitekeʻi ʻa e ngaahi fakaʻuhinga halá koeʻuhí ke ʻoua naʻa takiheeʻi kinautolu.

7. Ko e hā ʻa e ngaahi pole ʻoku tau fehangahangai mo ia ʻi he ʻaho ní?

⁷ Hangē ko e kau Kalisitiane Hepeluú, ʻoku tau fetaulaki mo e ngaahi fakamatala mo e ngaahi fakaʻuhinga ʻoku fepaki mo e ngaahi tuʻunga māʻoniʻoni ʻa Sihová. Ko e kau fakafepakí ʻoku nau faʻa ʻohofi ʻetau ngaahi tui makatuʻunga ʻi he Tohi Tapú ʻi he fekauʻaki mo e tuʻunga fakaeʻulungāngá, ʻo taukaveʻi ʻoku tau tomuʻa fehiʻa mo anga-fakamamahi. Ko e ngaahi tōʻonga mo e fakakaukau ʻa e māmaní ʻoku fakaʻaʻau ke toe mamaʻo ange ia mei he vakai haohaoa ʻa e ʻOtuá ki he ngaahi meʻá. (Pal. 17:15) Ko ia ai, kuo pau ke tau fakaivimālohiʻi ʻetau malava ke ʻiloʻi pea talitekeʻi ʻa e ngaahi fakakaukau ʻoku ngāueʻaki ʻe he kau fakafepakí ʻi heʻenau feinga ke fakalotosiʻiʻi pe naʻa mo hono takiheeʻi kitautolu.—Hep. 13:9.

8. ʻE lava fēfē ke tau fai ha fakalakalaka ki he tuʻunga matuʻotuʻa fakalaumālié?

⁸ ʻOku lelei ke tau ngāueʻaki ʻa e faleʻi naʻe ʻoange ʻe Paula ki he kau Kalisitiane Hepeluú, ke tutui atu ki he tuʻunga matuʻotuʻa fakalaumālié. ʻOku kau ki ai hono maʻu ha ʻilo loloto ki he moʻoní pea ohi ʻa e anga ʻo e fakakaukau ʻa Sihová. ʻOku hokohoko atu ʻa e ngāue ko ení naʻa mo e hili ʻa e fakatapui pea papitaisó. Tatau ai pē pe ko e hā hono fuoloa ʻetau kau ki he moʻoní, ko kitautolu kotoa kuo pau ke tau lau mo ako tuʻumaʻu ʻa e Folofola ʻa e ʻOtuá. (Saame 1:2) Ko ha taimi-tēpile lelei ʻo e ako fakafoʻituituí te ne tokoniʻi kitautolu ke fakaivimālohiʻi ha ʻulungaanga naʻe fakamamafaʻi ʻe Paula ʻi heʻene tohi ki he kau Hepeluú: Ko e tuí.—Hep. 11:​1, 6.

“MAʻU ʻA E TUÍ ʻO TAKI ATU KI HONO FAKAHAOFI ʻO ʻETAU MOʻUÍ”

9. Ko e hā naʻe mātuʻaki mahuʻinga ai ki he kau Kalisitiane Hepeluú ke nau maʻu ʻa e tui mālohí?

⁹ Naʻe fiemaʻu ki he kau Kalisitiane Hepeluú ʻa e tui mālohi ke nau hao ʻi he fakaofi mai ʻa e mamahi lahi ki Siuteá. (Hep. 10:​37-39) Naʻe fakatokanga ʻa Sīsū ki hono kau muimuí ʻi heʻenau sio kuo ʻātakaiʻi ʻa Selusalema ʻe he kau taú, ʻoku totonu ke nau hola ki he ngaahi moʻungá. Ko ʻene faleʻí naʻe ngāueʻaki ia ki he kotoa ʻo e kau Kalisitiané, ʻo tatau ai pē pe naʻa nau nofo ʻi he kolo ko iá pe ʻi he ngaahi feituʻu ʻutá. (Luke 21:​20-24) ʻI he taimi ko iá, ko ha kakai naʻe fakamanamanaʻi ʻe ha kau tau fakatūʻuta naʻe anga-maheni ke nau kumi ki ha maluʻanga ʻi ha kolo naʻe ʻaaʻi hangē ko Selusalemá. Ko e hola ki he ngaahi moʻungá naʻe hā ngali taʻeʻuhinga pea naʻe fiemaʻu ki ai ʻa e tui lahi.

10. ʻE ueʻi ʻe he tui mālohí ʻa e kau Kalisitiané ke nau fai ʻa e hā? (Hepelū 13:17)

¹⁰ Naʻe toe fiemaʻu ki he kau Kalisitiane Hepeluú ke nau falala ki he faʻahinga naʻe ngāueʻaki ʻe Sīsū ke tataki ʻa e fakatahaʻangá. Ko e faʻahinga naʻe takimuʻá ʻoku ngalingali naʻa nau ʻoatu ʻa e ngaahi fakahinohino pau ke tokoni ki he tokotaha kotoa ʻi he fakatahaʻangá ke muimui ki he fakahinohino ʻa Sīsuú ʻi he taimi totonu pea ʻi ha founga fokotuʻutuʻu maau. (Lau ʻa e Hepelū 13:17.) Ko e foʻi lea faka-Kalisi naʻe ngāueʻaki ʻi he Hepelū 13:17 ki he “talangofua” ʻoku fakahuʻunga ki ha tokotaha ʻoku ueʻi ia ke ne talangofua koeʻuhí ʻokú ne falala ki he tokotaha  ʻokú ne ʻoange ʻa e fakahinohinó. ʻOku kau ki ai ʻa e meʻa lahi ange ʻi he talangofua pē kiate ia koeʻuhi ko ʻene maʻu ʻa e mafai ke ʻoange ʻa e fakahinohinó. Ko ia naʻe fiemaʻu ki he kau Kalisitiane Hepeluú ke nau langa hake ʻenau falala ki he faʻahinga naʻe takimuʻá ki muʻa ke hoko mai ʻa e mamahi lahí. Kapau naʻe talangofua ʻa e kau Kalisitiané ki he ngaahi fakahinohino ʻa e faʻahinga naʻe takimuʻá lolotonga ʻa e ngaahi vahaʻa taimi nongá, ʻe faingofua ange kiate kinautolu ke nau fai pehē ʻi he ngaahi taimi faingataʻá.

11. Ko e hā ʻoku mātuʻaki fiemaʻu ai ʻa e tui mālohí ki he kau Kalisitiané ʻi he ʻahó ni?

¹¹ ʻI he ʻahó ni, ʻoku tau fiemaʻu ʻa e tui hangē ko ia naʻe maʻu ʻe he faʻahinga naʻa nau ʻuluaki maʻu ʻa e tohi ʻa Paulá. ʻOku tau moʻui ʻi ha taimi ʻa ia ko e tokolahi taha ʻo e kakaí ʻokú nau talitekeʻi—pea aʻu ʻo manukiʻi—ʻa e fakatokanga ʻa e Tohi Tapú fekauʻaki mo e ngataʻanga ʻo e fokotuʻutuʻu ko ení. (2 Pita 3:​3, 4) Tānaki atu ki ai, neongo ʻoku fakaeʻa mai ʻe he Tohi Tapú ʻa e ngaahi fakaikiiki lahi fekauʻaki mo e ngaahi meʻa ʻe hoko lolotonga ʻa e fuʻu mamahi lahí, ʻoku lahi ʻa e ngaahi meʻa ʻoku ʻikai ke tau ʻiloʻi. ʻOku fiemaʻu ke tau maʻu ʻa e tui mālohi ko e ngataʻanga ʻo e fokotuʻutuʻu ko ení ʻe hoko mai ʻi hono taimi totonu pea ʻe tokangaʻi kitautolu ʻe Sihova.—Hap. 2:3.

12. Ko e hā te ne tokoniʻi kitautolu ke tau hao atu ʻi he fuʻu mamahi lahí?

¹² Kuo pau foki ke tau toe fakaivimālohiʻi ʻetau tui ki he fouʻanga ʻoku ngāueʻaki ʻe Sihova ke tataki kitautolú—“ʻa e tamaioʻeiki anga-tonu mo potó.” (Māt. 24:45) ʻI he kamata ʻa e fuʻu mamahi lahí, te tau maʻu nai ha ngaahi fakahinohino fakahaofi moʻui pau, hangē ko ia naʻe maʻu nai ʻe he kau Kalisitiane Hepeluú ʻi hono ʻātakaiʻi ʻe he kau tau Lomá ʻa Selusalemá. Ko e taimi eni ke fakaivimālohiʻi ai ʻetau falala mo e tuipau ki he tataki te tau maʻu mei he faʻahinga ʻoku nau takimuʻa ʻi he kautaha ʻa Sihová. Heʻikai ke tau ʻamanekina te tau muimui ki heʻenau tatakí ʻi he tuipau lolotonga ʻa e fuʻu mamahi lahí ʻo kapau ʻoku tau fāinga ke muimui ki ai he taimí ni.

13. Ko e hā naʻe feʻungamālie ai ʻa e faleʻi ʻi he Hepelū 13:5?

¹³ Lolotonga ʻa e tatali ʻa e kau Kalisitiane Hepeluú ki he fakaʻilonga ke holá, naʻe toe fiemaʻu ke nau tauhi ha moʻui faingofua, ʻo talitekeʻi ʻa e “ʻofa ki he paʻangá.” (Lau ʻa e Hepelū 13:5.) Ko e niʻihi ʻo kinautolu naʻa nau foua ʻa e ngaahi taimi ʻo e honge mo e masiva. (Hep. 10:​32-34) Neongo naʻe ʻi ai ha taimi naʻa nau loto-lelei ai ke kātekina ʻa e faingataʻá koeʻuhi ko e ongoongo leleí, ko e niʻihi naʻe kamata nai ke nau sio ki he koloá ko honau maluʻanga. Ka heʻikai lava ʻe he paʻangá ʻo maluʻi kinautolu mei he fakaʻauha naʻe teu ke hokó. (Sēm. 5:3) Ko hono moʻoní, ko ha taha pē naʻe ʻofa ki he ngaahi meʻa fakamatelié ʻoku ngalingali naʻe faingataʻa ange ke hola pea liʻaki honau ngaahi ʻapí mo e koloá.

14. ʻE lava fēfē ke tākiekina ʻe he tui mālohí ʻetau ngaahi fili he taimí ni fekauʻaki mo e ngaahi meʻa fakamatelié?

¹⁴ ʻE ueʻi kitautolu ke talitekeʻi ʻa e tuli ki he meʻa fakamatelié kapau ʻoku tau maʻu ʻa e tui mālohi ko e ngataʻanga ʻo e fokotuʻutuʻu ko ení ʻoku ofi. Ko e moʻoni, ko e kakaí te nau “laku ʻenau silivá ki he halá” koeʻuhí te nau ʻiloʻi “heʻikai lava ʻe heʻenau silivá pe ko ʻenau koulá ʻo fakahaofi kinautolu ʻi he ʻaho ʻo e houhau kakaha ʻa Sihová.” (ʻIsi. 7:19) ʻI he ʻikai tokangataha ki hono tānaki ʻa e paʻangá ki he lahi taha te tau ala lavá, ʻoku fiemaʻu ke tau fai ʻa e ngaahi fili te ne tokoniʻi kitautolu ke maʻu ha moʻui faingofua kae mafamafatatau. ʻOku kau ki ai hono talitekeʻi ʻa e fakatauele ʻo e maʻu ha moʻua ʻikai fiemaʻu pe fihia ʻi hono tokangaʻi ʻa e ngaahi meʻa fakamatelie lahí. Te tau toe tokanga ke fakaʻehiʻehi mei he hoko ʻo fuʻu pipiki tōtuʻa ki he ngaahi koloa kuo tau ʻosi maʻú. (Māt. 6:​19, 24) ʻE ʻahiʻahiʻi nai ʻetau tuí ʻi he fekauʻaki mo e ngaahi meʻa fakamatelié mo e ngaahi meʻa kehe lolotonga ʻetau tatali ke hoko mai ʻa e ngataʻanga ʻo e fokotuʻutuʻu ko ení.

 “ʻOKU FIEMAʻU KIATE KIMOUTOLU ʻA E KĀTAKÍ”

15. Ko e hā naʻe tautefito ai hono fiemaʻu ʻe he kau Kalisitiane Hepeluú ʻa e kātakí?

¹⁵ Ko e kau Kalisitiane Hepeluú naʻe pau ke nau kātekina ʻa e ngaahi ʻahiʻahi ʻo ʻenau tuí ʻi he fakaʻaʻau ke toe kovi ange ʻa e ngaahi tuʻunga ʻi Siuteá. (Hep. 10:36) Neongo naʻe fehangahangai ʻa e niʻihi ʻo e kau Kalisitiane Hepeluú mo e fakatanga kakaha, ko e tokolahi naʻa nau tali ʻa e lotu faka-Kalisitiané lolotonga ʻa e vahaʻa taimi nongá. Naʻe pehē ʻe Paula neongo naʻa nau kātekina ʻa e ngaahi ʻahiʻahi faingataʻa ʻo e tuí, naʻe ʻikai ke ofi ʻenau faingataʻaʻiá ki he faingataʻaʻia ʻa Sīsuú, ʻa ia, ko e aʻu ki he tuʻunga ʻo e maté. (Hep. 12:4) Kae kehe, ʻi he mafola ʻa e lotu faka-Kalisitiané, ko e kau fakafepaki Siú naʻe toe fakalalahi ange ʻenau loto-koná mo e loto-māfana tōtuʻá. ʻI he ngaahi taʻu siʻi pē ki muʻá, ko e ʻasi ʻa Paula ʻi Selusalemá naʻe fakatupunga ai ha māveuveu. Naʻe laka hake he kau Siu ʻe toko 40 naʻa nau “fuakava ke hoko ha mala kiate kinautolu kapau te nau kai mo inu ki muʻa ke nau tāmateʻi ʻa Paula.” (Ngā. 22:22; 23:​12-14) Neongo ʻa e loto-māfana tōtuʻa fakalotu mo e tāufehiʻa peheé, ko e kau Kalisitiane ko iá ʻe kei fiemaʻu ke nau fakatahataha ke lotu, malangaʻi ʻa e ongoongo leleí pea hanganaki tauhi ke mālohi ʻenau tuí.

16. ʻE lava fēfē ke tokoniʻi kitautolu ʻe he tohi ki he kau Hepeluú ke tau maʻu ʻa e vakai totonu ki he fakatangá? (Hepelū 12:7)

¹⁶ Ko e hā te ne tokoniʻi ʻa e kau Kalisitiane Hepeluú ke nau kātekina ʻa e fakafepaki naʻa nau fehangahangai mo iá? Naʻe ʻiloʻi ʻe Paula naʻe fiemaʻu ke nau maʻu ʻa e vakai totonu ki honau ngaahi ʻahiʻahí. Ko ia ai naʻá ne fakamatalaʻi ʻe fakaʻatā nai ʻe he ʻOtuá ʻa e ngaahi ʻahiʻahi ʻo e tuí ko ha konga ia ʻo hono akoʻi ʻo ha Kalisitiane. (Lau ʻa e Hepelū 12:7.) Ko e akoʻi ko iá ʻe lava ke ne tokoniʻi ha taha ke fakatupulekina pea fakaleleiʻi ʻa e ngaahi ʻulungaanga faka-Kalisitiane mātuʻaki mahuʻingá. ʻI he tokangataha ki he ola ʻo e ngaahi ʻahiʻahi peheé, ʻe faingofua ange ai ki he kau Kalisitiane Hepelū ko iá ke nau kātaki.—Hep. 12:11.

17. Ko e hā naʻe ako ʻe Paula fekauʻaki mo hono kātekina ʻa e fakatangá?

 ¹⁷ Naʻe fakalototoʻaʻi ʻe Paula ʻa e kau Kalisitiane Hepeluú ke nau kātekina ʻa e ngaahi ʻahiʻahí fakataha mo e fakapapau lahi ange. Naʻá ne ʻi ha tuʻunga lelei ke fai ʻa e tohi kiate kinautolu fekauʻaki mo e meʻá ni. ʻI he tuʻunga ko ha tokotaha fakatangaʻi ʻo e kau Kalisitiané ki muʻa, naʻá ne ʻiloʻi ʻa e meʻa naʻa nau fekuki mo iá. Naʻá ne toe ʻiloʻi ʻa e founga ke kātekina ai ʻa e fakatangá. He ko ē, naʻá ne fehangahangai mo e ngaahi founga kehekehe ʻo e fakafepakí ʻi he hili ʻene hoko ko ha Kalisitiané. (2 Kol. 11:​23-25) Ko ia naʻe lava ke lea ʻa Paula ʻi he tuipau fekauʻaki mo e meʻa naʻe fiemaʻu ki he kātakí. Naʻá ne fakamanatu ki he kau Kalisitiane ko iá ʻi heʻenau kātekina ʻa e ngaahi ʻahiʻahí, naʻe fiemaʻu ke nau falala ʻo ʻikai kiate kinautolu ka kia Sihova. Naʻe lava ke lea loto-toʻa ʻa Paula: “Ko Sihova ʻa hoku tokoní; ʻe ʻikai te u ilifia.”—Hep. 13:6.

18. Ko e hā ʻoku tau ʻiloʻi fekauʻaki mo e kahaʻú ʻa ia te ne tokoniʻi kitautolu ke kātekina ʻa e fakatangá?

¹⁸ Ko e niʻihi ʻo hotau fanga tokouá ʻoku nau kātekina ʻa e fakatangá ʻi he taimí ni. ʻE lava ke tau poupou mateaki kiate kinautolu fakafou ʻi heʻetau ngaahi lotú, pea ʻi he taimi ʻe niʻihi, ʻi ha ngaahi founga ʻaonga. (Hep. 10:33) Kae kehe, ʻoku tala mai māʻalaʻala ʻe he Tohi Tapú, “ko e faʻahinga kotoa ʻoku nau loto ke moʻui ʻaki ʻa e anga-līʻoa fakaʻotua ʻi he fekauʻaki mo Kalaisi Sīsuú, ʻe fakatangaʻi foki kinautolu.” (2 Tīm. 3:12) ʻI he ʻuhinga ko iá, ko kitautolu kotoa ʻoku fiemaʻu ke tau mateuteu ki he meʻa ʻoku toka mei muʻá. ʻOfa ke tau hokohoko atu ke falala kakato kia Sihova, ʻo tuipau te ne tokoniʻi kitautolu ke kātekina ha faʻahinga ʻahiʻahi pē te tau fetaulaki mo ia. ʻI he taimi kuo kotofá, te ne ʻomai ʻa e nonga ki he kotoa ʻo ʻene kau lotu faitōnungá.—2 Tes. 1:​7, 8.

19. Ko e hā ʻa e ngaahi sitepu ʻaonga ke tau fou ai ʻa ia ʻe lava ke ne tokoniʻi kitautolu ke mateuteu ki he fuʻu mamahi lahí? (Sio foki ki he fakatātaá.)

¹⁹ ʻOku ʻikai ha veiveiua ko e tohi ʻa Paula ki he kau Hepeluú naʻá ne tokoniʻi ʻa e kau Kalisitiane ʻi he ʻuluaki senitulí ke nau mateuteu ki he mamahi lahi te nau fehangahangai mo iá. Naʻe fakalototoʻaʻi ʻe Paula hono fanga tokouá ke nau maʻu ha ʻilo mo ha mahino loloto ange ki he Folofolá. ʻI he fai peheé ʻe teuʻi ai kinautolu ke ʻiloʻi pea talitekeʻi ʻa e ngaahi akonaki te ne fakavaivaiʻi ʻenau tuí. Naʻá ne fakalototoʻaʻi kinautolu ke fakaivimālohiʻi ʻenau tuí koeʻuhí ke nau muimui ʻi he vave tahá ki he fakahinohino ʻa Sīsuú pea mo e faʻahinga naʻa nau takimuʻa ʻi he fakatahaʻangá. Pea naʻá ne tokoniʻi ʻa e kau Kalisitiané ke langa hake ʻa e kātakí ʻaki hono maʻu ʻa e vakai totonu ki he ngaahi ʻahiʻahí, pea vakai ki ai ko ha faingamālie ia ke akoʻi ʻe heʻenau Tamai ʻofá. Fakatauange ke tau toe ngāueʻaki foki ʻa e faleʻi fakamānavaʻi ko ení. Te tau malava leva ai ke kātaki faitōnunga ʻo aʻu ki he ngataʻangá.—Hep. 3:14.