1, 2. (a) Fakamatalaʻi ʻa e talanoa fakatātā ʻa Sīsū ki he tokotaha naʻe ʻoʻona ʻa e ngoue kālepí. (e) ʻOku anga-fēfē hono fakatātaaʻi ʻe he talanoá ʻa e ʻulungaanga ʻo e nima-homó mo e ʻofa maʻataʻataá?

 ʻI HE ʻaho ʻe taha, naʻe ʻalu pongipongia ai ʻa e tokotaha naʻe ʻoʻona ha ngoue kālepi ki he feituʻu faiʻanga fakataú ke totongi mai ha kau tangata ki heʻene ngoué. Naʻá ne tuʻuaki kiate kinautolu ha totongi pau, pea naʻe loto ki ai ʻa e kau tangatá. Ka koeʻuhí naʻe fiemaʻu ʻe he tokotaha naʻe ʻoʻona ʻa e ngoué ha kau ngāue tokolahi ange, naʻá ne toutou ʻalu ki he feituʻu faiʻanga fakataú lolotonga ʻa e ʻahó ke totongi mai ha kau tangata tokolahi ange. Naʻá ne loto ke ʻoatu ʻa e vahe ʻoku totonú ki he kau tangatá kotoa. ʻI he ngataʻanga ʻo e ʻahó, naʻe fakatahatahaʻi mai ʻe he tokotaha ko ení ʻene kau ngāué ke ʻoange ʻenau vahé. Pea tatau ai pē pe naʻa nau ngāue ʻaho kakato pe ko ha houa pē taha, naʻá ne ʻoange ʻa e vahe tatau kiate kinautolu. Kae kehe, naʻe kamata ke lāunga ʻa e kau tangata naʻe ngāue ʻaho kakató, naʻe pehē ange ʻe he tokotaha naʻe ʻoʻona ʻa e ngoué: ‘ʻIkai naʻa mou felotoi ki he totongi naʻá ku ʻoatú? ʻIkai ʻoku totonu kiate au ke u ʻoange ki heʻeku kau ngāué kotoa ha meʻa pē ʻoku ou loto ki ai? ʻOku mou mamahi koeʻuhi ko ʻeku nima-homó?’​—Māt. 20:1-15.

 ² ʻI he talanoa ʻa Sīsuú, ʻoku akoʻi mai ai ha lēsoni mahuʻinga fekauʻaki mo e “ʻofa maʻataʻatā” ʻa Sihová.  ^[1] (Lau ʻa e 2 Kolinitō 6:1.) Anga-fēfē? ʻE fakakaukau nai ha niʻihi ko e kau tangata naʻe ngāue ʻaho kakató naʻe totonu ke lahi ange ʻenau vahé ʻi he niʻihi kehé. Ka naʻe fakahāhā ʻe he tokotaha naʻe ʻoʻona ʻa e ngoué ʻa e ʻofa maʻataʻatā ki he kau ngāue naʻe ngāue konga ʻaho pē. Naʻe pehē ʻe ha mataotao ʻe taha fekauʻaki mo e kupuʻi lea “ʻofa maʻataʻatā” ʻoku ngāueʻaki ʻi he Tohi Tapú: “Ko e tefitoʻi fakakaukau fakalūkufua ʻo e kupuʻi leá, ko ha meʻaʻofa maʻataʻatā mo taʻetotongi kuo ʻoange ki ha tangata naʻe ʻikai tuha mo taau ia ke ne maʻu.”

3, 4. Ko e hā ʻa e ʻuhinga mo e founga kuo fakahāhā ai ʻe Sihova ʻene ʻofa maʻataʻataá ki he faʻahinga kotoa ʻo e tangatá?

³ ʻOku fakahaaʻi mai ʻe he Tohi Tapú ko e ʻofa maʻataʻatā ʻa e ʻOtuá ko ha “meʻaʻofa taʻetotongi” ia. (ʻEf. 3:7) Koeʻuhí ko e ʻikai malava ke haohaoa ʻetau talangofua kia Sihová, ʻoku ʻikai ai ke tau tuha ke maʻu ha lelei mei he ʻOtuá. Ko hono moʻoní, ʻoku tau tuha kitautolu mo e maté. Naʻe pehē ʻe Tuʻi Solomone: “Ko e meʻa ki he tangata, ʻoku ʻikai ha maʻoniʻoni ʻi mamani, ʻa ia ʻoku ne fai lelei, ʻo ʻikai angahala.” (Koh. 7:20) Ki mui ai, naʻe pehē ʻe he ʻapositolo ko Paulá: “Kuo faiangahala kotoa pē mo tōnounou ʻo ʻikai maʻu ʻa e lāngilangi ʻo e ʻOtuá,” pea ko e “totongi ʻoku ʻoatu ʻe he angahalá ko e mate.”​—Loma 3:23; 6:23a.

⁴ Koeʻuhí ko e ʻofa lahi ʻaupito ʻa Sihova ʻi he faʻahinga ʻo e tangatá, naʻá ne ʻomai ai “hono ʻAlo tofu-pē-taha-ne-fakatupú” ke pekia maʻa kitautolu. Ko e fakahāhā lahi taha ia ʻo e ʻofa maʻataʻataá. (Sione 3:16) Naʻe pehē ʻe Paula ko Sīsuú “kuo fakakalauni ia he taimí ni ʻaki ʻa e lāngilangi mo e ngeia ko e meʻa ʻi heʻene fuesia ʻa e maté, koeʻuhí ʻi he ʻofa maʻataʻatā ʻa e ʻOtuá, ke ne hokosia ai ʻa e maté maʻá e tokotaha kotoa pē.” (Hep. 2:9) ʻIo, “ko e meʻaʻofa ʻoku foaki ʻe he ʻOtuá ko e moʻui taʻengata ʻia Kalaisi Sīsū ko hotau ʻEikí.”​—Loma 6:23e.

5, 6. Ko e hā ʻa e meʻa ʻe hokó kapau ʻe puleʻi kitautolu ʻe he (a) angahalá? (e) ʻofa maʻataʻatā?

⁵ Ko e hā ʻoku tau faiangahala ai mo maté? ʻOku pehē ʻe he Tohi Tapú “ko e faihala ē ʻa e tangata ʻe toko tahá kuo pule ai ʻa e maté ko e tuʻi.” Koeʻuhí ko kitautolú ko e hako ʻo ʻĀtama, ʻoku tau hoko ai ʻo taʻehaohaoa pea tau mate. (Loma 5:12, 14, 17) Kae kehe, ʻe lava ke tau kei fili ke ʻoua ʻe puleʻi kitautolu ʻe he angahalá. ʻE malava fēfē ke hoko iá? ʻI he taimi ʻoku tau fakahaaʻi ai ʻa e tui ki he feilaulau huhuʻi ʻa Kalaisí, ʻoku tau maʻu ai ʻa e ʻaonga mei he ʻofa maʻataʻatā ʻa Sihová. ʻOku pehē ʻe he Tohi Tapú: “ʻI he lahi fau ʻa e faihalá, naʻe toe hulu fau ange ai ʻa e ʻofa maʻataʻataá. Ki he taumuʻa ko e hā? Koeʻuhí, hangē tofu pē ko e pule ʻa e angahalá ko e tuʻi fakataha mo e maté, ke pehē pē foki ʻa e lava ʻa e ʻofa maʻataʻataá ke pule ko e tuʻi fakafou ʻi he māʻoniʻoní ʻo taki atu ki he moʻui taʻengata fakafou ʻia Sīsū Kalaisi.”​—Loma 5:20, 21.

⁶ Neongo ʻetau kei angahalaʻiá, ʻoku ʻikai fiemaʻu ke tau fakaʻatā ʻa e angahalá ke ne puleʻi kitautolu. Ko ia, ʻi he taimi ʻoku tau faihala aí, ʻoku tau kole ʻa e fakamolemole ʻa Sihová. Naʻe ʻomai ʻe Paula ʻa e fakatokanga: “Ko e angahalá kuo pau ke ʻoua ʻe pule ia kiate kimoutolu, he ʻoku ʻikai te mou ʻi he malumalu ʻo e laó ka ʻi he malumalu ʻo e ʻofa maʻataʻataá.” (Loma 6:14) ʻE lava fēfē leva ke tau maʻu ʻaonga mei he ʻofa maʻataʻatā ʻa e ʻOtuá? Naʻe pehē ʻe Paula: “Ko e ʻofa maʻataʻatā ʻa e ʻOtuá . . . ʻoku akoʻi ai kitautolu ke tau talitekeʻi ʻa e anga-taʻefakaʻotuá mo e ngaahi holi fakamāmaní pea ke tau moʻui ʻaki ʻa e fakakaukau leleí mo e māʻoniʻoní mo e anga-līʻoa fakaʻotuá ʻi he lotolotonga ʻo e fokotuʻutuʻu lolotonga ko ʻení.”​—Tai. 2:11, 12.

7, 8. Ko e hā ʻa e ʻuhinga ʻo e pehē ko e ʻofa maʻataʻatā ʻa Sihová ʻoku “fakahaaʻi ʻi he ngaahi founga kehekehe”? (Sio ki he ʻuluaki fakatātā ʻi he kupú ni.)

⁷ Naʻe tohi ʻe he ʻapositolo ko Pitá: “Fakatatau ki he meʻaʻofa kuo maʻu ʻe he tokotaha taki taha, ngāueʻaki ia ke mou fetauhiʻaki ai ʻi he tuʻunga  ko e kau tamaioʻeiki lelei ʻo e ʻofa maʻataʻatā ʻa e ʻOtuá, ʻa ia ʻoku fakahaaʻi ʻi he ngaahi founga kehekehe.” (1 Pita 4:10) Ko e hā ʻa e ʻuhinga ʻo e pehē ko e ʻofa maʻataʻatā ʻa Sihová ʻoku “fakahaaʻi ʻi he ngaahi founga kehekehe”? ʻOku ʻuhinga iá tatau ai pē pe ko e ha ʻa e ngaahi faingataʻa te tau fehangahangai nai mo ia ʻi he moʻuí, ʻe ʻomai ʻe Sihova ʻa e meʻa ʻoku tau fiemaʻú kae malava ke tau kātekina ia. (1 Pita 1:6) Te ne ʻomai maʻu pē kiate kitautolu ʻa e meʻa tofu pē ʻoku tau fiemaʻú koeʻuhí ke tau lava ʻo ikuʻi ʻa e ʻahiʻahi taki taha.

⁸ Naʻe tohi ʻe he ʻapositolo ko Sioné: “Naʻa tau maʻu kotoa mei heʻene fonu mahuohuá, naʻa mo e ʻofa maʻataʻatā ʻi he funga ʻo e ʻofa maʻataʻatā.” (Sione 1:16) Koeʻuhí ko e lahi ʻo e ngaahi founga ʻoku fakahaaʻi ai ʻe Sihova ʻene ʻofa maʻataʻataá, ʻoku tau maʻu ai ʻa e ngaahi tāpuaki lahi. Ko e hā ʻa e niʻihi ʻo e ngaahi tāpuaki ko iá?

9. ʻOku anga-fēfē ʻetau maʻu ʻaonga mei he ʻofa maʻataʻatā ʻa Sihová, pea ʻe lava fēfē ke tau fakahaaʻi ʻoku tau houngaʻia ai?

⁹ ʻOku fakamolemoleʻi ʻe Sihova ʻetau ngaahi angahalá. ʻOku tau fakamālō ʻi he ʻofa maʻataʻatā ʻa Sihová ke fakamolemoleʻi ai ʻetau ngaahi angahalá. Ka ʻokú ne fai ení kapau pē ʻoku tau fakatomala mo hokohoko atu ʻa e faitau mo ʻetau ngaahi holi angahalaʻiá. (Lau ʻa e 1 Sione 1:8, 9.) Naʻe fakamatalaʻi ʻe Paula ki he kau Kalisitiane pani ʻi hono taimí ʻa e anga ʻo hono fakamolemoleʻi ʻe Sihova ʻa e angahalá. Naʻá ne pehē: “Naʻá ne [ʻOtua] fakahaofi kitautolu mei he mafai ʻo e fakapoʻulí peá ne ʻave kitautolu ki he puleʻanga ʻo e ʻAlo ʻokú ne ʻofa aí, ʻa ia ʻoku fakafou ʻiate ia ʻetau maʻu hotau fakatauʻatāina fakafou ʻi he huhuʻí, ʻa e fakamolemole ʻo ʻetau ngaahi angahalá.” (Kol. 1:13, 14) ʻOku tau houngaʻia moʻoni ʻi he faimeesi ʻa e ʻOtuá ʻo tau loto ai ke fakahīkihikiʻi ia. Pea koeʻuhí ko hono fakamolemoleʻi ʻe Sihova ʻetau ngaahi angahalá, ʻoku lava ke tau toe maʻu ai ʻa e ngaahi tāpuaki fakaofo kehe.

10. Ko e hā ʻoku tau fiefia ai koeʻuhi ko e ʻofa maʻataʻatā ʻa e ʻOtuá?

¹⁰ ʻOku lava ke tau maʻu ha vahaʻangatae melino mo e ʻOtuá. ʻOku tau taʻehaohaoa, ko ia mei he ʻaho naʻe fanauʻi ai kitautolú, ʻoku tau hoko ko e ngaahi fili ʻo e ʻOtuá. Neongo ia, naʻe pehē ʻe Paula: “Ne tau hoko ʻo fakalelei mo e ʻOtuá fakafou ʻi he pekia ʻa hono ʻAló, lolotonga ko ia ʻetau hoko ko hono ngaahi filí.” (Loma 5:10) Koeʻuhí ko e huhuʻí, ʻe lava ke tau hoko ai ʻo fakalelei mo e ʻOtuá, ʻa ia ko ʻetau lava ke melino mo ia pea hoko ko hono ngaahi kaumeʻa. Naʻe fakamatalaʻi eni ʻe Paula mo e anga ʻene fekauʻaki mo e ʻofa maʻataʻatā ʻa Sihová ʻi he taimi naʻá ne pehē ai ki hono fanga tokoua paní: “Ko eni kuo lau kitautolu ʻoku tau māʻoniʻoni ko e ola ia ʻo e tuí, tuku ke tau maʻu ʻa e melino mo e ʻOtuá fakafou ʻi hotau ʻEiki ko Sīsū Kalaisí, ʻa ia ʻoku toe fakafou foki ai hotau fakaaʻu, ko e meʻa ʻi he tuí, ki he ʻofa maʻataʻatā ko ʻeni ʻa ia ʻoku tau tuʻú ni aí.” (Loma 5:1, 2) He houngaʻia ē ko kitautolu ʻi heʻetau fiefia hono maʻu ha vahaʻangatae melino mo Sihova!

11. ʻOku anga-fēfē hono ʻomai ʻe he kau paní ʻa e ‘fanga sipi kehé’ ki he māʻoniʻoní?

¹¹ ʻE lava ke tau hoko ʻo māʻoniʻoni ʻi he ʻao ʻo e ʻOtuá. Naʻe tohi ʻe he palōfita ko Tanielá fekauʻaki mo e taimi ʻo e ngataʻangá, ‘ko e kau fakapotopotó’ ʻa ia ko e kau paní te nau ʻomai ʻa e ‘toko lahi ki he māʻoniʻoní.’ (Lau ʻa e Taniela 12:3.) ʻE anga-fēfē hono fai ia ʻe he kau paní? ʻOku nau malangaʻi ʻa e ongoongo leleí mo akoʻi ʻa e ngaahi lao ʻa Sihová ki he laui miliona ʻo e ‘fanga sipi kehé.’ (Sione 10:16) ʻOku nau tokoniʻi ʻa e faʻahinga ko ení ke vakai ki ai ʻoku nau māʻoniʻoni ʻi he ʻao ʻo e ʻOtuá, ʻa ia ʻoku malava pē iá koeʻuhi ko e ʻofa maʻataʻatā ʻa Sihová. Naʻe fakamatalaʻi ʻe Paula: “ʻOku ʻi he tuʻunga ko ha meʻaʻofa taʻetotongi ʻa hono lau ko ia ʻoku nau māʻoniʻoni ko e meʻa ʻi heʻene [ʻOtua] ʻofa maʻataʻataá fakafou ʻi he fakatauʻatāina kuo fai ʻe he huhuʻi naʻe totongi ʻe Kalaisi Sīsuú.”​—Loma 3:23, 24.

12. ʻOku anga-fēfē ʻene fekauʻaki ʻa e lotú mo e ʻofa maʻataʻatā ʻa e ʻOtuá?

¹² ʻOku lava ke tau ʻunuʻunu ofi ki he ʻOtuá fakafou ʻi he lotú. Koeʻuhí ko e ʻofa maʻataʻatā ʻa Sihová, ʻoku lava ai ke tau lotu kiate ia. ʻOku ui ʻe Paula ʻa e taloni ʻo Sihová ko e “taloni ʻo e ʻofa maʻataʻataá,” pea ʻokú ne fakaafeʻi kitautolu ke tau  fakaofiofi ki ai “ʻaki ʻa e tauʻatāina ʻo e leá.” (Hep. 4:16a) ʻOku lava ke tau lotu kia Sihova ʻi ha faʻahinga taimi pē ʻo fakafou ʻia Sīsū. Ko e moʻoni ko ha monū maʻongoʻonga ia! Naʻe pehē ʻe Paula: ‘ʻOku tau maʻu ʻa e lea tauʻatāina ko ení pea mo e fakaofiofi tauʻatāina ʻo makatuʻunga ʻi he falala-pau fakafou ʻi heʻetau tui kiate iá.’​—ʻEf. 3:12.

13. ʻE lava fēfē ʻe he ʻofa maʻataʻataá ke ne “tokoniʻi kitautolu ʻi he taimi totonú”?

¹³ ʻOku lava ke tau maʻu ʻa e tokoní ʻi he taimi totonu. Naʻe fakalototoʻaʻi kitautolu ʻe Paula ke tau lotu kia Sihova ʻi he taimi pē ʻoku tau fiemaʻu aí, “koeʻuhi ke tau aʻusia ʻa e mēsí pea maʻu ʻa e ʻofa maʻataʻataá ke ne tokoniʻi kitautolu ʻi he taimi totonú.” (Hep. 4:16e) ʻI he taimi pē ʻoku tau fehangahangai ai mo ha ngaahi ʻahiʻahi pe ngaahi faingataʻa ʻi heʻetau moʻuí, ʻe lava ke tau kōlenga kia Sihova ki ha tokoni. Pea ʻokú ne tali ʻetau ngaahi lotú neongo ʻoku ʻikai fiemaʻu ia ke ne fai pehē. ʻOkú ne faʻa ngāueʻaki hotau fanga tokouá mo e fanga tuofāfiné ke tokoniʻi kitautolu. ʻOku tali ʻe Sihova ʻetau ngaahi lotú “ko ia te tau mātuʻaki loto-lahi ai ke pehē: ‘Ko Sihova ʻa hoku tokoní; ʻe ʻikai te u ilifia. Ko e hā ʻe lava ke fai mai ʻe he tangatá kiate au?’”​—Hep. 13:6.

14. ʻOku anga-fēfē ʻaonga ʻa e ʻofa maʻataʻatā ʻa Sihová ki hotau lotó?

¹⁴ ʻOku lava ke hoko ia ko e fakafiemālie ki hotau lotó. Ko ha tāpuaki lahi ia ʻi hono hanga ʻe Sihova ʻo fakafiemālieʻi kitautolu ʻi he taimi pē ʻoku tau mafasia fakaeongo aí. (Saame 51:17) ʻI he taimi naʻe tofanga ai ʻa e kau Kalisitiane ʻi Tesalonaiká mo e fakatangá, naʻe tohi ʻe Paula: “Fakatauange ki hotau ʻEiki ko Sīsū Kalaisí tonu mo e ʻOtuá ko ʻetau Tamaí, ʻa ia naʻá ne ʻofa ʻiate kitautolu mo ne ʻomai ʻa e fakafiemālie mo e ʻamanaki lelei fakafou ʻi he ʻofa maʻataʻataá, ke na fakafiemālieʻi homou lotó mo fakaivimālohiʻi kimoutolu.” (2 Tes. 2:16, 17) He fakafiemālie ē ko ʻetau ʻiloʻi koeʻuhi ko ʻene ʻofa maʻataʻataá, ʻoku ʻofa mo tokangaʻi ai kitautolu ʻe Sihova!

15. Ko e hā ʻa e ʻamanaki kuo tau maʻú koeʻuhi ko e ʻofa maʻataʻatā ʻa e ʻOtuá?

¹⁵ ʻOku tau maʻu ʻa e ʻamanaki ʻo e moʻui taʻengatá. Koeʻuhí ko ʻetau angahalaʻiá, naʻe ʻikai ai ke tau maʻu ʻa e ʻamanakí ka ne taʻeʻoua ʻa e tokoni  ʻa Sihová. (Lau ʻa e Saame 49:7, 8.) Ka kuo ʻomai kiate kitautolu ʻe Sihova ha ʻamanaki fakaofo. Ko e hā ia? Naʻe pehē ʻe Sīsū: “Ko eni ia ʻa e finangalo ʻo ʻeku Tamaí, ko e tokotaha kotoa pē ʻokú ne ʻiloʻi ʻa e ʻAló pea ngāueʻi ʻa e tui kiate iá te ne maʻu ʻa e moʻui taʻengatá.” (Sione 6:40) Ko ia ai, kuo tau maʻu ʻa e ʻamanaki ʻo e moʻui taʻengatá koeʻuhí ko e ʻofa maʻataʻatā ʻa Sihová. Naʻe pehē ʻe Paula: “Ko e ʻofa maʻataʻatā ʻa e ʻOtuá kuo fakaeʻa ia, ʻo ʻomi ai ʻa e fakamoʻuí ki he faʻahinga kakai kotoa pē.”​—Tai. 2:11.

16. Naʻe anga-fēfē ʻa e ngāuekoviʻaki ʻe he muʻaki kau Kalisitiané ʻa e ʻofa maʻataʻatā ʻa e ʻOtuá?

¹⁶ ʻOku lahi ʻa e ngaahi tāpuaki ʻoku tau maʻú koeʻuhí ko e ʻofa maʻataʻatā ʻa Sihová. Neongo ia, ʻoku ʻikai totonu ke tau ngāuekoviʻaki ʻene ʻofá ʻo fulihi ia ko ha kalofanga ke faiangahala ai. ʻI he haʻohaʻonga ʻo e kau muʻaki Kalisitiané, naʻe ʻi ai ha niʻihi naʻa nau feinga ke ‘fulihi ʻa e ʻofa maʻataʻatā ʻa e ʻOtuá ko ha kalofanga ia ki he faikovi taʻemīngaó.’ (Sute 4) Ngalingali naʻe fakakaukau ʻa e kau Kalisitiane taʻefaitōnunga ko ení ʻe lava ke nau kei faiangahala pē pea ʻe fakamolemoleʻi maʻu pē ʻe Sihova kinautolu. Naʻe aʻu ʻo nau feinga ke fakakau mai honau fanga tokouá ʻi he faiangahalá. Pehē foki ʻi he ʻahó ni, ko ha taha pē ʻoku fai pehē ʻokú ne “fakahouhauʻi ʻa e laumālie ʻo e ʻofa maʻataʻataá.”​—Hep. 10:29.

17. Ko e hā ʻa e akonaki mālohi naʻe ʻomai ʻe Pitá?

¹⁷ Kuo kākaaʻi ʻe Sētane ʻa e kau Kalisitiane ʻe niʻihi ʻi he ʻahó ni ʻaki ʻa e fakakaukau ʻo pehē ʻe lava ke nau faiangahala pea ʻe ʻotomētiki pē hono fakamolemoleʻi ʻe Sihova kinautolu. Ko e moʻoni ʻoku loto-lelei ʻa Sihova ke ne fakamolemoleʻi ʻa e kau faiangahala fakatomalá; neongo ia, ʻokú ne ʻamanekina mai ke tau faitau mo ʻetau ngaahi holi angahalaʻiá. Naʻe fakamānavaʻi ʻe Sihova ʻa Pita ke ne tohi: “Ko ia ai, ko kimoutolu siʻi faʻahinga ʻofeina, ʻi hoʻomou maʻu ʻa e ʻilo tokamuʻa ko ʻení, mou leʻo ke ʻoua naʻa takiheeʻi kimoutolu fakataha mo kinautolu ʻi he faihala ʻa e kakai maumau-laó pea mole ai ʻa hoʻomou tuʻu mālohi ʻa kimoutolú. ʻOua, kae hoko atu hoʻomou tupulekina ʻi he ʻofa maʻataʻataá mo e ʻilo ki hotau ʻEiki mo e Faifakahaofi ko Sīsū Kalaisí.”​—2 Pita 3:17, 18.

18. Koeʻuhí ko e ʻofa maʻataʻatā ʻa Sihová, ko e hā ʻa e ngaahi fatongia ʻoku tau maʻú?

¹⁸ ʻOku tau houngaʻia moʻoni ʻi he ʻofa maʻataʻatā ʻa Sihová. Ko ia ai, ʻoku totonu ke tau ngāueʻaki ʻa e ngaahi meʻaʻofa ʻoku tau maʻú ke fakalāngilangiʻi ʻa Sihova pea mo tokoniʻi ʻa e niʻihi kehé. ʻOku tau moʻuaʻaki ia kiate kinautolu. ʻE lava fēfē ke tau ngāueʻaki ʻa e ngaahi meʻaʻofa ko iá? ʻOku pehē ʻe Paula: “Ko ia ai, koeʻuhi ʻoku tau maʻu ʻa e ngaahi meʻaʻofa ʻoku kehekehe ʻo fakatatau ki he ʻofa maʻataʻatā kuo foaki mai kiate kitautolú, . . . kapau ko ha ngāue ʻi he fakatahaʻangá, tuku ke tau hokohoko atu ai pē ʻi he ngāué ni; pe ko ia ʻoku faiakó, tuku ke ne hokohoko atu ai pē ʻi heʻene faiakó; pe ko ia ʻoku ekinakí, tuku ke ne hokohoko atu ai pē ʻi heʻene ekinakí; . . . ko ia ʻokú ne fakahāhā ʻa e manavaʻofá, tuku ke ne fai fiefia ia.” (Loma 12:6-8) Koeʻuhí ko e ʻofa maʻataʻatā ʻa Sihová, ʻoku tau maʻu ai ʻa e fatongia ke ngāue mālohi ʻi he fakatahaʻangá, ke akoʻi ʻa e Tohi Tapú ki he niʻihi kehé, ke fakalototoʻaʻi hotau fanga tokouá mo e fanga tuofāfiné pea ke fakamolemoleʻi ha taha ʻokú ne fakalotomamahiʻi nai kitautolu.

19. Ko e hā ʻa e fatongia ʻoku tau maʻu ʻe sivisiviʻi ʻi he kupu hoko maí?

¹⁹ Hangē pē ko e faʻahinga kuo tāpuakiʻi ʻaki ʻa e ʻofa maʻataʻatā ʻa Sihová, ʻoku totonu ke ueʻi ai mo kitautolu ke tau fai hotau lelei tahá “ke faifakamoʻoni fakaʻāuliliki ki he ongoongo lelei ʻo e ʻofa maʻataʻatā ʻa e ʻOtuá.” (Ngā. 20:24) Te tau sivisiviʻi ʻa e fatongia ko ení ʻi he kupu hoko maí.