1. Fakatātaaʻi ʻa e ʻuhinga ʻoku mahuʻinga ai ke tokanga ki he taimí mo e meʻa ʻoku hoko takatakai ʻiate kitautolú. (Sio ki he ʻuluaki fakatātā ʻi he kupú ni.)

 ʻOKU mei kamata ʻa e fakataha-lahí. ʻOku lue hake ʻa e tokotaha seá ki he siteisí pea talitali lelei ʻa e tokotaha kotoa. Kuo mei kamata ʻa e hivá. ʻOku ʻiloʻi ʻe he kau fanongó ko e taimi eni ke tangutu aí. ʻOku nau saiʻia ke fanongo ki he ngaahi tā fasi mālié, pea ʻoku nau fakatuʻotuʻa atu ki he ngaahi malanga ʻe fakahoko maí. Kae mahalo ʻoku ʻi ai ha niʻihi ʻoku ʻikai ke nau tokanga ki he tokotaha seá pe fakatokangaʻi kuo tā ʻa e fasí. ʻI heʻene peheé, ʻoku ʻikai ai te nau fakatokangaʻi kuo kamata ʻa e fakataha-lahí, pea ʻoku nau kei lue takai holo pe talanoa mo honau ngaahi kaungāmeʻá. ʻI he tuʻunga ko ení ʻoku fakahaaʻi ai ʻa e meʻa ʻe lava ke hoko kapau ʻoku ʻikai ke tau ʻilo ki he taimí pe ko e meʻa ʻoku lolotonga hoko takatakai ʻiate kitautolú. Ko ha lēsoni mahuʻinga eni kiate kitautolu koeʻuhí ʻoku vavé ni ke kamata ha meʻa lahi ange, pea kuo pau ai ke tau mateuteu ki ai. Ko e hā ʻa e meʻa ko iá?

2. Ko e hā naʻe tala ai ʻe Sīsū ki heʻene kau ākongá ke nau “hanganaki leʻo”?

² Naʻe ʻoatu ʻe Sīsū ʻa e fakatokanga ki heʻene kau ākongá fekauʻaki mo e fiemaʻu ke nau hanganaki leʻo pea mo mateuteu ki he “fakaʻosiʻosi ʻo e fokotuʻutuʻu lolotongá.” Naʻá ne tala kiate kinautolu: “Hanganaki  fakasio, hanganaki ʻā, he ʻoku ʻikai te mou ʻilo pe ko fē ʻa e taimi kuo kotofá.” Hili iá, naʻá ne toutou pehē kiate kinautolu: “Hanganaki leʻo.” (Māt. 24:3; lau ʻa e Maʻake 13:32-37.) ʻOku toe fakahaaʻi ʻi he fakamatala ʻa Mātiú ʻa e fakatokanga ʻa Sīsū ki heʻene kau ākongá fekauʻaki mo e meʻá ni. Naʻá ne tala kiate kinautolu: “Ko ia ai, hanganaki leʻo, koeʻuhi ʻoku ʻikai te mou ʻiloʻi pe ko fē ʻa e ʻaho ʻe haʻu ai ʻa homou ʻEikí.” Pea naʻá ne toe fakatokanga kiate kinautolu: “Mateuteu mo kimoutolu koeʻuhi ʻi ha houa ʻa ia ʻe ʻikai te mou fakakaukau atu ai ko iá, ʻe haʻu ai ʻa e Foha ʻo e tangatá ia.” Naʻá ne toe pehē: “Ko ia ai, mou hanganaki leʻo, koeʻuhi ʻoku ʻikai te mou ʻiloʻi ʻa e ʻahó mo e houá.”​—Māt. 24:42-44; 25:13.

3. Ko e hā ʻoku tau tokanga ai ki he fakatokanga ʻa Sīsuú?

³ ʻOku tokanga ʻa e Kau Fakamoʻoni ʻa Sihová ki he fakatokanga naʻe ʻomai ʻe Sīsuú. ʻOku tau ʻiloʻi ʻoku tau moʻui ʻi he “taimi fakamui” pea ʻoku vavé ni ke kamata ʻa e “fuʻu mamahi lahi”! (Tan. 12:4; Māt. 24:21) Hangē ko ia naʻe tomuʻa tala ʻe Sīsuú, ʻoku malangaʻi ʻe he kakai ʻa Sihová ʻa e ongoongo lelei fekauʻaki mo e Puleʻangá ʻi he kotoa ʻo e māmaní. ʻI he taimi tatau, ʻoku tau sio ki he taú, mahamahakí, mofuiké mo e fiekaiá ʻi he ngaahi feituʻu lahi. ʻOku lahi ange ʻa e puputuʻu ʻa e ngaahi lotú pea lahi ange ʻa e faihiá mo e fakamālohí ʻi he ʻahó ni ʻi ha toe taimi. (Māt. 24:7, 11, 12, 14; Luke 21:11) ʻOku tau tatali vēkeveke atu ʻi he taimí ni ki he taimi ʻe haʻu ai ʻa Sīsū mo fakahoko ʻa e taumuʻa ʻene Tamaí.​—Mk. 13:26, 27.

4. (a) Ko e hā ʻoku lava ai ke tau tui ʻoku ʻiloʻi ʻe Sīsū he taimí ni ʻa e taimi ʻe hoko ai ʻa ʻĀmaketoné? (e) Neongo ʻoku ʻikai ke tau ʻiloʻi ʻa e taimi ʻe kamata ai ʻa e fuʻu mamahi lahí, ko e hā ʻoku lava ke tau fakapapauʻí?

⁴ ʻI heʻetau ʻalu ki he fakataha-lahí, ʻoku tau ʻiloʻi ʻa e taimi ʻe kamata ai ʻa e konga taki taha. Kae kehe, ʻoku ʻikai malava ke tau ʻiloʻi ʻa e taimi tofu pē ʻe kamata ai ʻa e fuʻu mamahi lahí. ʻI he ʻi māmani ʻa Sīsuú, naʻá ne pehē: “ʻI he fekauʻaki mo e ʻaho mo e houa ko iá, ʻoku ʻikai ha taha ʻe ʻilo ki ai, naʻa mo e kau ʻāngelo ʻo e langí pe ko e ʻAló, ka ko e Tamaí toko taha pē.” (Māt. 24:36) Ko e moʻoni, koeʻuhí ko Sīsū ʻa e tokotaha te ne taki ʻi he tau ʻo ʻĀmaketoné, ngalingali ʻokú ne ʻiloʻi he taimí ni ʻa e taimi ʻe kamata ai ʻa e tau ko iá. (Fkh. 19:11-16) Ka ʻoku teʻeki ai pē ke tau ʻiloʻi ʻa e ʻaho mo e taimi ʻe hoko mai ai ʻa e ngataʻangá. Ko e ʻuhinga ia ʻoku mātuʻaki mahuʻinga ai ke tau hanganaki leʻó, pea ʻoku ʻalu ke toe ofi ange ʻi he ʻosi ʻa e ʻaho taki taha. “ʻE ʻikai tuai!” (Lau ʻa e Hapakuke 2:1-3.) Ko e hā ʻoku lava ke tau fakapapauʻi ai ení?

5. ʻOmai ha fakatātā ke fakahaaʻi ai ko e ngaahi kikite ʻa Sihová ʻoku fakahoko maʻu pē ʻi hono taimi totonu.

⁵ Kuo fakahoko maʻu pē ʻa e ngaahi kikite ʻa Sihová ʻi hono taimi totonu! Ko e fakatātaá, fakakaukau ki he ʻaho naʻá ne fakatauʻatāinaʻi ai hono kakaí mei ʻIsipité. Ko e ʻaho 14 ʻo Nīsani ʻi he taʻu 1513 ki muʻa ʻia Kalaisí. Ki mui ai, naʻe tohi ʻa Mōsese fekauʻaki mo e ʻaho ko iá: “Pea ʻi he ʻosi ʻa e taʻu ʻe fangeau ma tolungofulu, ʻi he ʻaho pe ko ia naʻe ʻalu atu mei Isipite ʻa e ngaahi matatau ʻo Sihova.” (ʻEki. 12:40-42) ʻI Nīsani 14 ʻi he taʻu 1943 ki muʻa ʻia Kalaisí, ko e taʻu tofu pē ia ʻe 430 ki muʻa ʻi hono fakatauʻatāinaʻi ʻa e kau ʻIsilelí, naʻe fakahoko ai ʻa e talaʻofa ʻa Sihova te ne tāpuakiʻi ʻa e hako ʻo ʻĒpalahamé. (Kal. 3:17, 18) ʻI ha taimi ki mui ai, naʻe tala ʻe Sihova kia ʻĒpalahame: “Ke ke matuʻaki ʻilo ʻe nofo muli ʻa ho hako ʻi ha fonua ʻoku ʻikai ʻonautolu; pea te nau ngaue ki he kakai ko ia; ʻa ia te nau ngaohikoviʻi kinautolu ʻo fangeau taʻu.” (Sēn. 15:13; Ngā. 7:6) Ko e taʻu ʻe 400, naʻe kamata ia ʻi he taʻu 1913 ki muʻa ʻia Kalaisí ʻi he taimi naʻe kamata ke ngaohikoviʻi ai ʻe ʻIsimeʻeli ʻa ʻAisaké. Naʻe ngata ia ʻi he ʻaho naʻe fakatauʻatāinaʻi ai ʻe Sihova ʻa e kau ʻIsilelí mei ʻIsipité. (Sēn. 21:8-10; Kal. 4:22-29) ʻIo, naʻe fokotuʻu ʻe Sihova ʻa e ʻaho tofu pē te ne fakatauʻatāinaʻi ai hono kakaí ʻi he taʻu ia ʻe lauingeau ki muʻa ai!

6. Ko e hā ʻoku lava ai ke tau fakapapauʻi ʻe fakahaofi ʻe Sihova hono kakaí?

⁶ Ko Siosiua ko e taha ia ʻi he kau ʻIsileli naʻe fakatauʻatāinaʻi mei ʻIsipité. ʻI he ngaahi taʻu ki mui aí, naʻá ne fakamanatu ki he kakaí: “ʻOku ʻilo  ʻe he kotoa ʻo homou loto, mo e kotoa ʻo homou laumalie, kuo ʻikai to kelekele ha momoʻi meʻa ʻe taha ʻi he ngaahi lelei fuape naʻe talaʻofa ʻe Sihova ko homou ʻOtua maʻamoutolu; kuo hoko kotoa pe kiate kimoutolu, kuo ʻikai ke hala ha meʻa ʻe taha.” (Sios. 23:2, 14) Kuo talaʻofa ʻe Sihova te ne fakahaofi hono kakaí ʻi he fuʻu mamahi lahí pea te ne ʻoange kiate kinautolu ʻa e moʻui taʻengata ʻi he māmani foʻoú. Pea ʻoku lava ke tau fakapapauʻi ʻe fakahoko moʻoni ʻene talaʻofá. Ko ia kapau ʻoku tau loto ke tau ʻi he māmani foʻoú, kuo pau ke tau hanganaki leʻo.

7, 8. (a) Ko e hā ʻa e fatongia ʻo ha tangata leʻo ʻi he kuonga muʻá, pea ko e hā ʻa e lēsoni ʻoku akoʻi mai ai kiate kitautolú? (e) ʻOmai ha fakatātā ʻo e meʻa ʻe lava ke hoko ʻi he taimi ʻoku māʻumohe ai ʻa e kau tangata leʻó lolotonga ʻenau leʻó?

⁷ ʻOku lava ke tau ako ha lēsoni mei he kau tangata leʻo naʻa nau leʻohi ʻa e ngaahi kolo ʻi he kuonga muʻá. Ko e lahi ʻo e ngaahi kolo ko ení, ʻo kau ai ʻa Selusalema, naʻe ʻaaʻi takai ʻaki ʻa e ngaahi ʻā māʻolunga koeʻuhí ke ʻoua naʻa lava ʻo hū ki loto ʻa e filí. Naʻe tuʻu ʻa e kau tangata leʻó ʻi he ngaahi ʻā ko ení, pea mei ai naʻe malava ke nau sio kotoa ai ki he koló. Naʻe tuʻu ʻa e kau tangata leʻo ʻe niʻihi ʻi he veʻe matapā ʻo e koló. Naʻe pau ke hanganaki leʻo ʻa e kau tangata ko iá ʻi he ʻaho mo e pō, pea kapau naʻa nau sio ʻoku haʻu honau filí, naʻe fiemaʻu ke nau fakatokanga ki he kakai ʻi he koló. (ʻAi. 62:6) Naʻa nau ʻiloʻi ʻa e mahuʻinga ʻo e nofoʻaki ʻāʻā pea tokanga lelei ki ha meʻa ʻe hoko. Kapau naʻe ʻikai ke nau fai ia, ʻe lava ke mate ai ha kakai tokolahi.​—ʻIsi. 33:6.

⁸ Naʻe fakamatalaʻi ʻe Siosifasi ʻi heʻene tohi ʻa e hisitōlia ʻo e kau Siú, ki he founga naʻe malava ai ʻa e kau Lomá ʻo hū ki Selusalema ʻi he taʻu 70 hili ʻa Kalaisí. Naʻe māʻumohe ha niʻihi ʻo e kau tangata leʻo ʻi he koló. Ko e olá, naʻe malava ai ʻa e kau sōtia Lomá ke nau hū ki he koló. Naʻa nau hū ki he temipalé, tutu ia mo fakaʻauha ʻa e toenga ʻo Selusalemá. Naʻe hoko ia ko e konga fakaʻosi ʻo e fuʻu mamahi lahi taha naʻe faifai ange pea hokosia ʻe he puleʻanga Siú.

9. Ko e hā ʻoku ʻikai ke ʻiloʻi ʻe he tokolahi taha ʻo e kakaí ʻi he ʻahó ni?

⁹ ʻI he ʻahó ni, ko e lahi taha ʻo e ngaahi fonuá ʻoku leʻohi honau ngaahi kauʻāfonuá ʻe he kau sōtiá pea pehē ki ha ngaahi meʻa fakaongo fili, ʻo ngāueʻaki ʻa e tekinolosia fakamuimui tahá. Ko e ngaahi puleʻanga ko ení ʻoku nau siofi ha taha, pe ko ha meʻa ʻe lava ke ne fakamanamanaʻi ʻa e tuʻunga malu honau fonuá. Ka ʻoku ʻikai ke nau ʻiloʻi ʻoku ʻi ai ha founga-pule ia ʻi hēvani ʻoku mālohi mamaʻo ange ia pea ko Kalaisi Sīsū ʻoku pule aí. ʻOku vavé ni ke faitau ʻa e founga-pule ko iá mo e ngaahi founga-pule kotoa pē ʻi he māmaní. (ʻAi. 9:6, 7 [5, 6, PM]; 56:10; Tan. 2:44) ʻOku tau tatali vēkeveke ke hoko mai ʻa e ʻaho ko iá pea ʻoku tau loto ke mateuteu ki ai. ʻI heʻene peheé, ʻoku tau tokanga ai ki he kikite ʻi he Tohi Tapú pea hanganaki tauhi faitōnunga kia Sihova.​—Saame 130:6.

10, 11. (a) Ko e hā kuo pau ke tau tokanga ki aí, pea ko e hā hono ʻuhingá? (e) Ko e hā ʻokú ke tuipau ai ʻoku tākiekina ʻe he Tēvoló ʻa e kakaí ke nau tukunoaʻi ʻa e kikite ʻi he Tohi Tapú?

¹⁰ Sioloto atu ki ha tangata leʻo kuó ne ʻā ʻi he poó kakato. Lolotonga ʻa e kiʻi houa fakaʻosi ʻo ʻene leʻó, ʻoku mātuʻaki faingataʻa ange kiate ia ke ne nofoʻaki ʻāʻā koeʻuhí ʻokú ne fuʻu helaʻia. ʻI he founga meimei tatau, ʻoku tau moʻui ʻi he ngaahi ʻaho fakaʻosi ʻo e māmani ko ení. Pea ko ʻetau ofi ange ki he ngataʻangá, ko e faingataʻa ange ia ke tau nofoʻaki ʻāʻā. He meʻa fakamamahi ē kapau naʻe ʻikai ke tau hanganaki leʻo! Tau lāulea angé ki he meʻa ʻe tolu ʻe lava ke ne taʻofi kitautolu ʻi heʻetau nofoʻaki ʻāʻaá.

¹¹ ʻOku kākaaʻi ʻe he Tēvoló ʻa e kakaí. Ko ia ʻa e “pule ʻo e māmani ko ení.” Taimi nounou ki muʻa ke pekia ʻa Sīsuú, naʻe tuʻo tolu ʻene fakamanatu ki heʻene kau ākongá ʻa e moʻoniʻi meʻa ko ení. (Sione 12:31; 14:30; 16:11) Kuo ngāueʻaki ʻe he Tēvoló ʻa e lotu loí ke kākaaʻi ʻaki ʻa e kakaí. Ko e ʻuhinga ia ʻoku tukunoaʻi ai ʻe he kakai tokolahi ʻa e ngaahi kikite ʻi he Tohi Tapú, ʻa ia ʻoku fakahaaʻi māʻalaʻala mai ai ko e ngataʻanga ʻo e  māmani ko ení ʻoku mātuʻaki ofi. (Sēf. 1:14) ʻOku hā mahino hono hanga ʻe Sētane ʻo ‘fakakuihi ʻa e ʻatamai ʻo e kau taʻetuí.’ (2 Kol. 4:3-6) Ko e olá, ʻi he taimi ʻoku tau feinga ai ke tala ki he kakaí ko e māmani ko ení ʻoku vavé ni ke ngata pea ʻoku pule ʻa Kalaisi he taimi ní, ko e tokolahi ʻo kinautolu ʻoku ʻikai te nau loto ke fanongo. ʻOku nau faʻa pehē, “ʻOku ʻikai ke u mahuʻingaʻia.”

12. Ko e hā kuo pau ai ke ʻoua te tau fakaʻatā ʻa e Tēvoló ke ne kākaaʻi kitautolú?

¹² Neongo ko e tokolahi ʻoku ʻikai ke nau mahuʻingaʻia ʻi he ngaahi kikite ʻa e Tohi Tapú, kuo pau ke ʻoua te tau fakaʻatā ʻenau fakakaukaú ke ne fakalotosiʻiʻi kitautolu. ʻOku tau ʻiloʻi ʻa e ʻuhinga ʻoku mahuʻinga ai ke hanganaki leʻó. Naʻe pehē ʻe Paula ki hono fanga tokouá: “Ko kimoutolú tonu ʻoku mou ʻiloʻi lelei ko e ʻaho ʻo Sihová ʻoku haʻu ia.” Naʻá ne tānaki mai: “ʻO hangē tofu pē ko ha kaihaʻa ʻi he poʻulí.” (Lau ʻa e 1 Tesalonaika 5:1-6.) Naʻe ʻomai ʻe Sīsū ʻa e fakatokanga: “Hanganaki mateuteu koeʻuhi ʻi ha houa ʻoku ʻikai te mou fakakaukau atu ai ngalingali ko iá, ʻoku haʻu ai ʻa e Foha ia ʻo e tangatá.” (Luke 12:39, 40) ʻOku vavé ni ke kākaaʻi ʻe Sētane ʻa e kakaí ʻaki hono ʻai kinautolu ke nau fakakaukau ʻoku “melino mo e malu” ʻa e māmaní. ʻE hoko fakafokifā mai leva ʻa e ʻaho ʻo Sihová, pea te nau ʻohovale. Fēfē kitautolu? Kapau ʻoku tau loto ke hoko ʻo mateuteu ki he ʻaho ko iá pea ke ʻoua ʻe kākaaʻi kitautolu ʻo hangē ko e niʻihi kehé, kuo pau ke tau “nofoʻaki ʻāʻā mo tauhi maʻu ʻetau fakakaukau leleí.” Ko e ʻuhinga ia ʻoku fiemaʻu ai ke tau lau ʻa e Folofola ʻa e ʻOtuá ʻi he ʻaho kotoa pē pea fakalaulauloto ki he meʻa ʻoku fakahaaʻi mai ʻe Sihova kiate kitautolú.

13. ʻOku anga-fēfē hono uesia ʻe he laumālie ʻo e māmaní ʻa e faʻahinga ʻo e tangatá, pea ʻe lava fēfē ke tau fakaʻehiʻehi mei he tākiekina fakatuʻutāmaki ko iá?

¹³ ʻOku tākiekina ʻe he laumālie ʻo e māmaní ʻa e anga ʻo e fakakaukau ʻa e kakaí. Ko e tokolahi ʻi he ʻahó ni ʻoku nau ongoʻi ʻoku ʻikai fiemaʻu ke nau ʻilo ki he ʻOtuá. (Māt. 5:3) ʻI hono kehé, ʻoku nau ngāueʻaki ʻa e lahi taha honau taimí mo e iví ke maʻu ʻa e ngaahi meʻa ʻoku tuʻuaki mai ʻe he māmaní. (1 Sio. 2:16) Pehē foki, ʻoku lahi ange ʻi ha toe taimi ki muʻa ʻa e ngaahi fakafiefia kehekehe ʻoku tohoakiʻi ki ai ʻa e kakaí pea ʻoku fakaʻaiʻai ai kinautolu ke nau ʻofa ki he mālié mo fakalato ha faʻahinga holi pē ʻoku nau maʻu. (2 Tīm. 3:4) ʻOku hoko ʻa e ngaahi meʻa ko ení ke ne fakaleluʻi ai ʻa e kakaí mei he meʻa ʻoku mahuʻinga angé pea ʻikai ai ke nau fakakaukau ki honau vahaʻangatae mo e ʻOtuá. Ko e ʻuhinga ia naʻe fakamanatu ai ʻe Paula ki he kau Kalisitiané ʻoku  totonu ke nau “ʻā hake ai mei he mohé” ʻo ʻoua ʻe fakatefito ʻenau moʻuí ʻi hono fakalato ʻenau ngaahi holí.​—Loma 13:11-14.

14. Ko e hā ʻa e fakatokanga ʻoku tau maʻu ʻi he Luke 21:34, 35?

¹⁴ ʻOku tau fiemaʻu ʻa e laumālie ʻo e ʻOtuá ke ne tākiekina ʻa e anga ʻo ʻetau fakakaukaú kae ʻikai ko e laumālie ʻo e māmaní. Kuo tokoniʻi kitautolu ʻe Sihova ʻo fakafou ʻi hono laumālié ke tau mahinoʻi māʻalaʻala ʻa e meʻa ʻe hokó. (1 Kol. 2:12) ^[1] Ka ʻoku fiemaʻu ke tau tokanga. Naʻa mo e ngaahi meʻa anga-maheni ʻi he moʻuí ʻe lava ke ne fakaleluʻi kitautolu ʻi he tauhi kia Sihová. (Lau ʻa e Luke 21:34, 35.) ʻE tala mai nai ʻe ha niʻihi kia kitautolu ʻoku fakavalevale ʻetau tui ʻoku tau moʻui ʻi he ngaahi ʻaho fakaʻosi ʻo e māmani ko ení. (2 Pita 3:3-7) Ka kuo pau ke ʻoua te tau fakaʻatā kinautolu ke nau fakalotosiʻiʻi kitautolu. ʻOku tau maʻu ʻa e fakamoʻoni māʻalaʻala ʻoku vavé ni ke hoko mai ʻa e ngataʻangá. Kapau ʻoku tau loto ke tākiekina kitautolu ʻe he laumālie ʻo e ʻOtuá, kuo pau ke tau maʻu maʻu pē ʻa e ngaahi fakatahá mo hotau fanga tokouá.

15. Ko e hā naʻe hoko kia Pita, Sēmisi mo Sioné, pea ʻe anga-fēfē ke hoko nai mo eni kiate kitautolú?

¹⁵ ʻOku ʻai ʻe hotau ngaahi vaivaiʻangá ke faingataʻa ange ʻetau nofoʻaki ʻāʻā. Naʻe mahinoʻi ʻe Sīsū ʻoku taʻehaohaoa ʻa e faʻahinga ʻo e tangatá pea ʻi ai honau ngaahi vaivaiʻanga. Fakakaukau fekauʻaki mo e meʻa naʻe hoko ʻi he pō ki muʻa ke ne pekiá. Neongo naʻe haohaoa ʻa Sīsū, naʻá ne ʻiloʻi ke hanganaki faitōnungá, naʻe fiemaʻu ke ne lotu ki heʻene Tamaí ʻo kole ʻene tokoní. Naʻe kole ʻe Sīsū ki he ʻapositolo ko Pita, Sēmisi mo Sione ke nau nofoʻaki ʻāʻā lolotonga ʻene lotú. Ka naʻe ʻikai ke ʻiloʻi ʻe he kau ʻapositoló ʻa e mahuʻinga ke nau nofoʻaki ʻāʻaá. Naʻa nau helaʻia pea nau mohe. Naʻe helaʻia foki mo Sīsū, ka naʻá ne nofoʻaki ʻāʻā mo lotu ki heʻene Tamaí. Naʻe totonu foki ke lotu mo e kau ʻapositoló ʻi he taimi ko iá.​—Mk. 14:32-41.

16. Fakatatau ki he Luke 21:36, naʻe anga-fēfē hono fakahinohinoʻi kitautolu ʻe Sīsū ke tau “hanganaki ʻā”?

¹⁶ Ko e hā te ne tokoniʻi kitautolu ke tau “hanganaki ʻā” pea hoko ʻo mateuteu ki he ʻaho ʻo Sihová? ʻOku fiemaʻu ke tau maʻu ha holi mālohi ke hanganaki fai ʻa e meʻa ʻoku totonú. Ka ʻoku ʻikai ke feʻunga pē ia. ʻI he ʻaho siʻi ki muʻa ke pekia ʻa Sīsuú, naʻá ne tala ai ki heʻene kau ākongá ʻa e fiemaʻu ke nau lotu maʻu pē ʻo kole ʻa e tokoni ʻa Sihová. (Lau ʻa e Luke 21:36.) Ke nofoʻaki ʻāʻā ʻi he taimi ko eni ʻo e ngataʻangá, kuo pau ke tau toe lotu maʻu pē kia Sihova.​—1 Pita 4:7.

17. ʻE lava fēfē ke tau fakapapauʻi ʻoku tau mateuteu ki he meʻa ʻoku vavé ni ke hoko ʻi he kahaʻú?

¹⁷ Naʻe pehē ʻe Sīsū ʻe hoko mai ʻa e ngataʻangá “ʻi ha houa ʻa ia ʻe ʻikai te mou fakakaukau atu ai ko iá.” (Māt. 24:44) Ko ia kuo pau ke tau mateuteu ʻi he taimi kotoa pē. ʻOku ʻikai ko ha taimi eni ke tau feinga ke maʻu ʻa e founga moʻui ʻoku pehē ʻe he māmani ʻo Sētané te ne ʻomai ʻa e fiefiá. Ko ha misi pē ia. ʻI hono kehé, kuo fakahaaʻi mai ʻe Sihova mo Sīsū ʻo fakafou ʻi he Tohi Tapú, ʻa e founga ʻe lava ke tau hanganaki leʻo aí. Ko ia ʻofa ke tau tokanga ki he ngaahi kikite ʻa e Tohi Tapú pea mo e anga hono fakahoko iá. Pea ʻofa ke tau hanganaki ʻunuʻunu ofi ange ai kia Sihova mo fakamuʻomuʻa hono Puleʻangá ʻi heʻetau moʻuí. Te tau hoko leva ai ʻo mateuteu ki he taimi ʻe hoko mai ai ʻa e ngataʻangá. (Fkh. 22:20) Ko ʻetau moʻuí ʻoku makatuʻunga ai!