‘I HE Kōsipeli ‘a Mātiú ‘oku tau lau ai: “Na‘e hū atu ‘a Sīsū ki he temipalé ‘o laku ki tu‘a ‘a kinautolu kotoa na‘a nau fai ‘a e fakatau atu mo e fakatau mai ‘i he temipalé, peá ne fulihi ‘a e ngaahi tēpile ‘a e kau fakafetongi pa‘angá mo e ngaahi sea ‘a e kau fakatau lupé. Pea na‘á ne pehē kiate kinautolu: ‘Kuo tohi, “Ko hoku falé ‘e ui ko e fale fai‘anga lotu,” ka ‘oku mou ngaohi ia ko e ‘ana ‘o e kau kaiha‘a.’”—Māt. 21:12, 13.

‘Oku hā ‘i he hisitōliá ko e kau mēsianiti ‘i he temipalé na‘a nau fakafeangai ta‘etotonu ki he kau fakataú ‘aki ‘enau hilifaki ha totongi mā‘olunga ‘aupito. Ko e fakatātaá, na‘e anga-maheni ‘aki ko e fanga lupé na‘e totongi ma‘ama‘a ‘aupito ke lava ‘a e kau masivá ‘o fakatau mai ia ki he ngaahi feilaulaú. Kae kehe, ‘oku pehē ‘e he ngaahi tohi motu‘a faka-Siú na‘e ‘i ai ha taimi ‘i he ‘uluaki senitulí na‘e pau ke ma‘u ai ‘e ha taha ‘a e totongi ko ha fo‘i tēnali koula kae lava ke ne fakatau mai ha fo‘i lupe ‘e ua. Na‘e fe‘unga mo e ‘aho ‘e 25 ki ha tokotaha ngāue ke ne ma‘u ai ‘a e pa‘anga ko ení. Na‘e totongi mamafa ‘aupito ‘a e fanga lupé ‘o ‘ikai ke kei lava ‘e he kau masivá ‘o fakatau mai. (Liv. 1:14; 5:7; 12:6-8) Na‘e ‘ita lahi ‘a Lāpai Simeon ben Gamaliel fekau‘aki mo e me‘á ni ‘o ne fakasi‘isi‘i ai ‘a e ngaahi feilaulau na‘e fiema‘u ke fai ‘e he kau Siú. Na‘e holo leva ai ‘a e totongi ‘o e fo‘i lupe ‘e uá ki he vahe teau ‘o ha fo‘i tēnali koula.

‘Oku lava ke tau ‘ilo‘i heni, na‘e mānumanu ‘a e kau mēsianiti ‘i he temipalé pea na‘a nau feinga ke ma‘u ha‘anau tupu mei he‘enau kau fakataú. Ko e ‘uhinga ia na‘e fe‘ungamālie ai ‘a hono ui kinautolu ‘e Sīsū ko e “kau kaiha‘a.”