“‘I hono fai ha lotú, ‘oua ‘e toutou lea‘aki ‘a e ngaahi me‘a tatau.”​—Mātiu 6:7.

‘Oku ‘ikai ke finangalo ‘a Sihova ke tau toutou lea‘aki ha ngaahi lotu kuo ako ma‘uloto pe lau ia mei ha tohi lotu. ‘I hono kehé, ko hono finangaló ke tau lotu mei he lotó. Sioloto atu ki he fakatupu ‘ita ‘a ha kaume‘a ‘okú ne toutou lea‘aki ‘a e me‘a tatau ‘i he ‘aho ki he ‘aho. Ko e ngaahi kaume‘a leleí ‘oku nau lea tau‘atāina mo loto-mo‘oni. ‘I he‘etau lotu ‘o ngāue‘aki ‘etau lea pē ‘atautolú, ‘oku tau talanoa fekoekoe‘i ai mo ‘etau Tamai fakahēvaní.

“‘I he taimi ‘oku mou kole aí, ‘oku ‘ikai te mou ma‘u koe‘uhí ‘oku mou kole ‘i ha taumu‘a hala.”​—Sēmisi 4:3.

He‘ikai ‘aupito ke tau ‘amanekina ‘e tali ‘e he ‘Otuá ‘etau ngaahi lotú kapau te tau kole ha ngaahi me‘a ‘oku tau ‘ilo‘i ‘oku ‘ikai ke ne finangalo ke tau fai pe ma‘u. Ko e fakatātaá, ‘e tali ‘e Sihova ‘a e kole ha tokotaha pelepa‘anga ki ha monū lolotonga iá kuó Ne fakatokanga mahino mai fekau‘aki mo e mānumanú mo e tui fakafa‘ahikehe ki he monuú? (‘Aisea 65:11; Luke 12:15) He ta‘e‘uhinga ē ke ‘amanekina ‘e tali ‘e Sihova ‘a e ngaahi lotu peheé! Ke tali ‘e he ‘Otuá ‘etau lotu kiate iá, kuo pau ke tau fakapapau‘i ‘oku fehoanaki ‘etau ngaahi kolé mo e me‘a ‘okú ne tala mai ‘i he Tohi Tapú.

 “Ko e tokotaha ‘oku fakafisi ke fanongo ki he laó​—na‘a mo ‘ene lotú ‘oku fakalielia ia.”​—Palōveepi 28:9.

‘I he taimi ‘o e Tohi Tapú, na‘e ‘ikai ke tali ‘e he ‘Otuá ‘a e fa‘ahinga ko ia na‘a nau si‘aki ‘ene ngaahi lao mā‘oni‘oní. (‘Aisea 1:15, 16) Kuo ‘ikai liliu ‘ene ngaahi ongo‘í. (Malakai 3:6) Kapau ‘oku tau loto ke tali ‘e he ‘Otuá ‘etau lotú, kuo pau ke tau feinga ke mo‘ui ‘o fehoanaki mo ‘ene ngaahi laó. Kae fēfē kapau na‘a tau fai ‘a e ngaahi fehālaaki ‘i he kuohilí? ‘Oku ‘uhinga iá he‘ikai ‘aupito ke fanongo mai ‘a e ‘Otuá kiate kitautolu? ‘Ikai ‘aupito! ‘E fakamolemole‘i anga-‘ofa kitautolu ‘e he ‘Otuá kapau te tau tafoki pea fai hotau lelei tahá ke fakahōifua‘i ia.​—Ngāue 3:19.