Ko Sihova ko e ʻOtuá ʻokú ne fakaafeʻi mai kitautolu ke tau talanoa kiate ia fekauʻaki mo ha faʻahinga kavenga pē ʻokú ne taʻotaʻomia hotau ʻatamaí mo e lotó. (Saame 55:22) ʻOku ʻikai ha palopalema ʻoku fuʻu lahi pe fuʻu siʻisiʻi ke lotu fekauʻaki mo ia. Kapau ʻoku mahuʻinga ia kiate kitautolu, ʻoku mahuʻinga ia kia Sihova. Ko e lotu kiate iá ko ha sitepu mahuʻinga ia ki hono maʻu ʻa e nonga ʻo e ʻatamaí.​—Filipai 4:6, 7.

ʻI he taimi ʻoku tau fāinga ai mo ʻetau tuʻunga moʻui lelei fakaʻatamaí, te tau ongoʻi mātuʻaki tuēnoa nai. Ko e kakai kehé ʻoku ʻikai ke nau mahinoʻi kakato maʻu pē ʻa e meʻa ʻoku tau fouá. (Palōveepi 14:10) Ka ʻi heʻetau talanoa loto-moʻoni ki he ʻOtuá ʻi he lotu ʻo fekauʻaki mo e anga ʻetau ongoʻí, te tau maʻu ai ha tokotaha-fanongo kaungāongoʻi mo mahino. ʻOku ʻafio mai ʻa Sihova kiate kitautolu, ʻokú ne ʻiloʻi ʻetau mamahí mo e ngaahi fāingá, pea ʻokú ne loto ke tau lotu ange kiate ia fekauʻaki mo ha meʻa pē ʻoku tau hohaʻa ki ai.​—2 Kalonikali 6:29, 30.

Ko e talanoa kia Sihova ʻi he lotú ʻokú ne fakaivimālohiʻi ʻetau falala pau ʻokú ne tokanga mai kiate kitautolú. ʻE lava ke tau ongoʻi tatau mo e tokotaha-tohi-sāmé ʻa ia naʻá ne lotu: “Kuó ke ʻafioʻi ʻa ʻeku tuʻutāmakí; ʻokú ke lāuʻilo ki heʻeku fuʻu mamahí.” (Saame 31:7) Ko hono ʻiloʻi pē ʻoku ongoʻi ʻe Sihova ʻa e meʻa ʻoku tau fekuki mo iá ʻe lava ke tokoni lahi ia kiate kitautolu ke hokohoko atu ʻetau kātekina ʻi he taimi faingataʻá. Ka ʻokú ne fai ʻa e meʻa lahi ange ʻi hono ʻafioʻi pē ʻetau mamahí. ʻOkú ne mahinoʻi ʻa e meʻa ʻoku tau fouá ʻo laka mamaʻo ange ia ʻi ha toe taha, pea ʻokú ne tokoniʻi kitautolu ke maʻu ʻa e fakafiemālié mo e fakalototoʻá ʻi he Tohi Tapú.