Fakakaukau ki he taha ʻo e vahaʻangatae vāofi taha ʻoku maʻu ʻe he tangatá​—ʻa ia ko ha ongo māhanga faitatau. ʻOkú na maʻu ha haʻi fekoekoeʻi makehe. Ko e māhanga ʻe niʻihi ʻoku aʻu ʻo nau “ʻiloʻi ʻa e meʻa ke leaʻaki ki he tokotaha ko eé ʻa ia te ne mahinoʻi ʻa e meʻa tofu pē ko iá ʻo ʻikai ke fakamatalaʻi,” ko e lau ia ʻa Nancy Segal, ko e talēkita ʻo e Twin Studies Center pea ko ha māhanga foki ia. Naʻe peheni hono fakamatalaʻi ʻe he fefine ʻe taha ʻa hono vahaʻangatae mo hono māhanga faitataú: “ʻOkú ma feʻilongaki ʻi he meʻa kotoa pē.”

ʻOku tupu mei he hā ʻa e mahino makehe ko ení? ʻOku pehē ʻe ha fakatotolo neongo ʻoku kaunga ki ai ʻa e ʻātakai mo e tauhi fakaemātuʻá, ʻoku hā ngali ʻoku fakahoko ʻe he faʻunga fakakēnisi meimei tatau ʻo e ongo māhanga faitataú ha ngafa mātuʻaki mahuʻinga.

FAKAKAUKAU ANGÉ: Ko e Tokotaha-Fakatupu ʻo e faʻunga fakakēnisi fakaofo kotoa ko ʻení ʻokú ne maʻu ʻa e mahino makehe moʻoni ki he faʻunga ʻo e tokotaha kotoa pē. Ko e moʻoni, naʻe talaki ʻe he tokotaha-tohi-saame ko Tēvitá: “Naʻá ke fufū au ʻi he manava ʻo ʻeku faʻeé. Ko hoku ngaahi huí naʻe ʻikai puli ia meiate koe ʻi hono ngaohi au ʻi he liló. . . . Naʻe aʻu ʻo vakai mai ho fofongá kiate au ʻi heʻeku kei hoko ko e konga toto pē; ko hoku ngaahi kupú kotoa naʻe hiki ia ʻi hoʻo tohí.” (Saame 139:13, 15, 16) Ko e ʻOtuá pē taha ʻokú ne ʻafioʻi mo mahinoʻi kakato ʻo ʻikai ngata pē ʻi hotau faʻunga fakakēnisí kae toe pehē foki ki he meʻa kotoa pē ʻoku hoko ʻi heʻetau moʻuí ʻa ia ʻokú ne fakafuo kitautolú. Ko e ʻilo makehe ʻa e ʻOtuá kiate kitautolu mo hotau faʻunga fakakēnisí ʻoku fakapapauʻi mai ai ʻokú ne mahinoʻi fakaikiiki kitautolu.

Naʻe lotu ʻa Tēvita: “ʻE Sihova, kuó ke sivisiviʻi au, pea ʻokú ke ʻilo au. ʻOkú ke ʻilo ʻa ʻeku tangutu hifó mo ʻeku tuʻu haké. ʻOkú ke ʻiloʻi ʻa ʻeku ngaahi fakakaukaú mei he mamaʻó. ʻI he teʻeki ke fai ʻe hoku ngutú ha leá, vakai, ʻe Sihova, ʻokú ke ʻosi ʻiloʻi lelei ia.” (Saame 139:1, 2, 4) ʻIkai ko ia pē, ʻoku ʻiloʻi ʻe Sihova ʻetau ngaahi ongoʻi taupotu taha ʻi lotó pea ʻokú ne toe “ʻiloʻi ʻa e hehema kotoa pē ʻo e ngaahi fakakaukaú.” (1 Kalonikali 28:9; 1 Sāmiuela 16:6, 7) Ko e hā ʻoku fakahaaʻi mai ʻe he ongo vēsí ni fekauʻaki mo e ʻOtuá?

Neongo ʻa e ʻikai nai ke tau leaʻaki ʻa ʻetau fakakaukaú mo ʻetau ngaahi ongoʻí kotoa ʻi heʻetau lotú, ʻoku ʻikai ngata pē ʻi hono ʻiloʻi ʻe hotau Tokotaha-Fakatupú ʻa e meʻa ʻoku tau faí ka ʻokú ne toe mahinoʻi ʻa e ʻuhinga ʻoku tau fai ai iá. ʻIkai ko ia pē, ʻokú ne mahinoʻi ʻa e lelei ʻoku tau fie faí neongo kapau ʻoku taʻofi kitautolu ʻe hotau ngaahi ngataʻangá mei heʻetau fakahoko ʻetau holi loto-moʻoní. Ko e moʻoni, koeʻuhi naʻe fokotuʻu ʻe he ʻOtuá ʻa e ʻofá ʻi hotau lotó tonu, ʻokú ne loto-lelei​—naʻa mo e vēkeveke—​ke ne vakai mai mo mahinoʻi ʻa ʻetau ngaahi fakakaukau ʻofá mo ʻetau ngaahi taumuʻá.​—1 Sione 4:7-10.

 ʻOku fakapapauʻi mai ʻe he Tohi Tapú

• “Ko e fofonga ʻo Sihová ʻoku ʻi he kau māʻoniʻoní, pea ʻoku fanongo hono telingá ki heʻenau hū tōtōakí.”​—1 PITA 3:12.

• ʻOku talaʻofa mai ʻe he ʻOtuá: “Te u ʻoatu kiate koe ʻa e fakamaama pea fakahinohino koe ʻi he hala ʻoku totonu ke ke fou aí. Te u ʻoatu kiate koe ʻa e faleʻi pea ʻe ʻiate koe ʻa hoku fofongá.”​—SAAME 32:8.

ʻE lava ʻe he ʻiloʻi ko ia ʻoku mahinoʻi ʻe he ʻOtuá hotau tuʻungá mo ʻetau ngaahi ongoʻí ʻo tokoniʻi kitautolu ke tau kātekina ʻa e faingataʻá? Fakakaukau ki he meʻa naʻe hoko kia Anna mei Naisīlia. “Naʻá ku fehuʻia pe ʻoku kei taau ke kei hokohoko atu ʻeku moʻuí koeʻuhi ko e ngaahi tuʻunga ʻikai ha ʻamanaki naʻá ku ʻi aí,” ko ʻene fakamatalá ia. “Ko ha uitou au ʻo tokangaʻi ʻeku taʻahine, naʻe nofo falemahaki tupu mei he haitolokefālasi (tōtuʻa ʻa e vai ʻi he ʻutó), ko e taimi ia naʻe ʻiloʻi ai ʻoku ou puke ʻi he kanisā huhú, pea naʻe pau ke fai ha tafa, kimo, mo e faitoʻo hulu. Naʻe mātuʻaki faingataʻa kiate au ke u fuesia ʻa e nofo falemahaki ʻi he taimi tatau heʻeku puké mo e puke ʻa ʻeku taʻahiné.”

Ko e hā naʻá ne tokoniʻi ʻa Anna ke fekuki mo iá? “Naʻá ku fakakaukauloto ki he ngaahi konga Tohi Tapu hangē ko e Filipai 4:6, 7, ʻa ia ʻoku pehē ‘ko e nonga ʻa e ʻOtuá ʻa ia ʻoku fakalaka atu ʻi he mahino kotoa pē te ne maluʻi homou lotó pea mo homou ngaahi mafai fakaefakakaukaú.’ Ko e taimi taki taha naʻá ku fakakaukau ai ki he ngaahi konga Tohi Tapú ni, naʻá ku ongoʻi ha haʻi fakafoʻituitui vāofi mo Sihova, ʻi hono ʻiloʻi ʻokú ne mahinoʻi lelei ange ʻe ia au ʻiate au tonu. Naʻá ku toe maʻu ha fakalototoʻa lahi mei hoku fanga tokoua mo e fanga tuofāfine fakalaumālie ʻofa ʻi he fakatahaʻanga Kalisitiané.

“Neongo ʻeku kei fāinga mo e tuʻunga ʻo ʻeku moʻuí, kuo fakalakalaka hoku tuʻungá mo e tuʻunga ʻoku ʻi ai ʻeku taʻahiné. Koeʻuhi ʻokú ma ʻai ʻa Sihova ke ʻi homa tafaʻakí, kuó ma ako ke ʻoua te ma fakakaukau ʻikai lelei ʻi heʻema fehangahangai mo e ngaahi faingataʻá. ʻOku fakapapauʻi mai ʻe he Sēmisi 5:11: ‘ʻOku tau lau ʻoku fiefia ʻa e faʻahinga kuo nau kātakí. Kuo mou fanongo ʻi he kātaki ʻa Siopé pea kuo mou mātā ʻa e ola naʻe ʻoange ʻe Sihová, ʻa ia ko Sihová ʻoku manavaʻofa loloto ʻaupito mo mohu meesi.’ ” Naʻe mahinoʻi haohaoa ʻe Sihova ʻa e tuʻunga ʻo Siopé, pea ʻoku lava ke tau fakapapauʻi ʻokú ne mahinoʻi pehē ha faingataʻa pē ʻoku tau fou ai.