1, 2. Ko e hā ‘oku fiema‘u ai ke tau lāulea ki he founga ki hono fakafiemālie‘i ‘a e fa‘ahinga ‘oku mamahí? (Sio ki he ‘uluaki fakatātā ‘i he kupú ni.)

“‘I HE meimei ta‘u ‘e taha mei he mate ‘a homa fohá, na‘á ma ongo‘i mamahi lahi faka‘ulia,” ko e lau ia ‘a Susi. Na‘e pehē ‘e ha tokoua ‘e taha ‘i he hili ‘a e mate fakafokifā ‘a hono uaifí, na‘á ne hokosia ha “mamahi fakaesino ta‘ealafakamatala‘i.” Ko e me‘a fakamamahí, ‘oku hokosia ‘e he kakai tokolahi ‘a e fa‘ahinga mamahi ko ení. ‘I he fakataha‘anga Kalisitiane he ‘aho ní, na‘e ‘ikai ke ‘amanekina ai ‘e he tokolahi ‘o hotau fanga tokouá mo e fanga tuofāfiné ‘e mate ‘a e fa‘ahinga ‘oku nau ‘ofa aí ki mu‘a ‘i ‘Āmaketone. Mahalo pē kuo mate ha taha ‘okú ke ‘ofa ai, pe mahalo pē ‘okú ke ‘ilo‘i ha taha ‘oku mamahi. Kapau ko ia, te ke fifili nai, ‘‘E lava fēfē ke ma‘u ‘e ha tokotaha mamahi ha fakafiemālie?’

² ‘Oku pehē ‘e he kakai ‘e ni‘ihi ‘e lava ke faito‘o ‘e he taimí ‘a e lavea kotoa pē. Ka ‘oku pehē ma‘u pē? Na‘e pehē ‘e ha uitou, “Kuó u ‘ilo‘i ‘oku totonu ange ke pehē ko e me‘a ‘oku fai ‘e ha taha ‘aki hono taimí ‘a e me‘a ‘okú ne tokoni‘i ‘a e toko taha ko iá ke ne saí.” ‘Oku fiema‘u ki ha lavea ‘i he sinó ‘a e taimi mo e tokanga fakaalaala koe‘uhí ke mo‘ui. ‘I ha founga meimei tatau, ‘oku fiema‘u ‘a e taimi mo e tokanga fakaalaala ke sai ai ha mamahi fakaeongo. Ko e hā ‘a e me‘a tefito  ‘e lava ke tokoni ki he fa‘ahinga ‘oku mamahí ke si‘i ai ‘enau mamahi fakaeongó?

3, 4. Ko e hā ‘oku lava ai ke tau fakapapau‘i ‘oku mahino‘i ‘e Sihova ‘etau mamahí?

³ Ko ‘etau Tamai manava‘ofá, ‘a Sihova, ‘a e tokotaha tefito ‘okú ne ‘omai kiate kitautolu ‘a e fakafiemālie ‘oku tau fiema‘ú. (Lau ‘a e 2 Kolinitō 1:3, 4.) Ko e fa‘ifa‘itaki‘anga lahi taha ia ‘i he kaungāongo‘í, pea ‘okú ne tala‘ofa ki hono kakaí: “Ko au ia ‘a e Tokotaha ‘okú ne fakafiemālie‘i kimoutolú.”​—‘Ai. 51:12; Saame 119:50, 52, 76.

⁴ Kuo toe hokosia ‘e he‘etau Tamai ‘ofá ‘a e mole ‘o e fa‘ahinga ‘ofeina ‘i he maté, hangē ko ‘ene kau sevāniti ko ‘Ēpalahame, ‘Aisake, Sēkope, Mōsese, mo Tu‘i Tēvita. (Nōm. 12:6-8; Māt. 22:31, 32; Ngā. 13:22) ‘Oku fakahaa‘i mai ‘e he Tohi Tapú ko Sihová ‘okú ne fakatu‘amelie mo‘oni atu ki he ‘aho ‘a ia te ne fokotu‘u hake ai ‘a e kau tangata faitōnunga ko iá. (Siope 14:14, 15) ‘I he taimi ko iá, te nau fiefia pea ma‘u ‘a e mo‘ui lelei haohaoa. Na‘e toe hokosia ‘e Sihova ‘a e pekia ‘a hono ‘Alo na‘e ‘uluaki fakatupú. ‘Oku pehē ‘e he Tohi Tapú ko Sīsū ‘a e tokotaha na‘e ‘tautefito ‘a e ‘ofa ai’ ‘a e ‘Otuá. (Pal. 8:22, 30) ‘Oku ta‘emalava ke tau sioloto atu ki he mamahi kuo pau na‘e hoko kia Sihova ‘i he‘ene sio ki he pekia fakamamahi ‘a hono ‘Aló.​—Sione 5:20; 10:17.

5, 6. ‘Oku anga-fēfē hono fakafiemālie‘i kitautolu ‘e Sihová?

⁵ ‘Oku lava ke tau mātu‘aki fakapapau‘i ‘e tokoni‘i kitautolu ‘e Sihova. Ko ia ‘oku totonu ke tau ongo‘i tau‘atāina ma‘u pē ke lotu kiate ia pea fakahaa‘i ki ai ‘a e lahi ‘o ‘etau mamahí mo e faingata‘a‘iá. He fakafiemālie mo‘oni ke ‘ilo‘i ‘oku mahino‘i ‘e Sihova ‘etau ongo‘í pea ‘okú ne ‘omai ‘a e fakafiemālie ‘oku tau fiema‘ú! Ka ‘oku anga-fēfē ‘ene fai iá?

⁶ Ko e taha ‘o e ngaahi founga lahi ‘oku fakafiemālie‘i ai kitautolu ‘e Sihová ‘oku fakafou mai ‘i hono laumālie mā‘oni‘oní. (Ngā. 9:31) Na‘e tala‘ofa mai ‘a Sīsū ‘e foaki ‘e he‘etau Tamaí ‘a hono laumālie mā‘oni‘oni mālohí ki he fa‘ahinga kotoa ‘oku nau kole iá. (Luke 11:13) Ko Susi, ‘a ia na‘e lave ki ai ki mu‘á, ‘okú ne pehē: “Na‘e lahi ‘a e taimi na‘á ma tū‘ulutui ai ‘o kōlenga kia Sihova ke ne fakafiemālie‘i kimaua. ‘I he taimi taki taha, na‘e malu‘i mo‘oni ‘e he nonga ‘a e ‘Otuá ‘a homa lotó mo ‘ema fakakaukaú.”​—Lau ‘a e Filipai 4:6, 7.

7, 8. Ko e hā ‘oku lava ai ke tau fakapapau‘i ‘e fakafiemālie‘i kitautolu ‘e Sīsuú?

⁷ ‘I he ‘i māmani ‘a Sīsuú, na‘á ne fa‘ifa‘itaki haohaoa ki he ngaahi ‘ulungaanga faka‘ofo‘ofa ‘o ‘ene Tamaí ‘i he me‘a na‘á ne lea‘akí mo e me‘a na‘á ne faí. (Sione 5:19) Na‘e fekau‘i mai ‘e Sihova ‘a Sīsū ki he māmaní ke ne fakafiemālie‘i “‘a e kau loto-mafesí” mo “kinautolu kotoa ‘oku mamahí.” (‘Ai. 61:1, 2; Luke 4:17-21) Na‘e ‘ilo‘i ‘e he kakaí na‘e mahino‘i ‘e Sīsū ‘enau faingata‘a‘iá pea na‘á ne loto mo‘oni ke tokoni‘i kinautolu.​—Hep. 2:17.

⁸ ‘I he kei si‘i ‘a Sīsuú, ‘oku ngalingali na‘e mate ‘a hono ngaahi kaume‘a ofi mo e ngaahi mēmipa ‘o hono fāmilí. Ko e fakatātaá, ‘oku hā ngali ko ‘ene tamai na‘á ne ohi iá, ‘a Siosifa, na‘á ne mate nai ‘i he taimi na‘e kei talavou ai ‘a Sīsuú. * (Sio ki he fakamatala ‘i lalo.) Sioloto atu ki he faingata‘a na‘e hoko ki ha ki‘i talavou ‘ofa pehē ‘i he‘ene kātekina ‘a ‘ene mamahí tonu, pea pehē ki he mamahi ‘a ‘ene fa‘eé, fanga tokouá, mo e fanga tuofāfiné.

9. Na‘e anga-fēfē hono fakahāhā ‘e Sīsū ‘a e kaungāongo‘i ‘i he taimi na‘e mate ai ‘a Lāsalosí?

 ⁹ Lolotonga ‘ene ngāue fakafaifekaú, na‘e fakahāhā ‘e Sīsū na‘á ne mahino‘i mo‘oni ‘a e kakaí pea na‘á ne ongo‘i kinautolu. Ko e fakatātaá, ‘i he taimi na‘e mate ai ‘a hono kaume‘a ofi ko Lāsalosí, na‘e ongo‘i ‘e Sīsū ‘a e mamahi lahi ‘a ia na‘e hokosia ‘e Mele mo Mā‘atá. Na‘e mātu‘aki mālohi ‘ene ongo‘i kinauá ‘o kamata ai ke ne tangi, neongo na‘á ne ‘ilo‘i te ne fokotu‘u hake ‘a Lāsalosi.​—Sione 11:33-36.

10. ‘Oku lava fēfē ke tau fakapapau‘i ‘oku mahino‘i ‘e Sīsū ‘a e anga ‘o ‘etau ongo‘i he ‘aho ní?

¹⁰ ‘Oku lava fēfē ke tokoni‘i kitautolu ‘i he ‘ahó ni ‘e he ngaahi lea fakafiemālie ‘a Sīsū ‘i he kuohilí? ‘Oku fakahaa‘i mā‘ala‘ala ‘e he Tohi Tapú kuo ‘ikai ke liliu ‘a Sīsū. ‘Oku pehē ai: “Ko Sīsū Kalaisi ‘oku tatau ai pē ‘i he ‘aneafí mo e ‘ahó ni, pea ta‘engata.” (Hep. 13:8) ‘Oku ui ia ko e “Fakafofonga Tefito ‘o e mo‘uí” koe‘uhí ‘okú ne ‘ai ke tau malava ‘o mo‘ui ta‘engata. ‘Oku toe mahino‘i fakafo‘ituitui ‘e Sīsū ‘a e mamahí pea “‘okú ne malava ai ke tokoni mai ki he fa‘ahinga ‘oku ‘ahi‘ahi‘í.” (Ngā. 3:15; Hep. 2:10, 18) Ko ia ‘oku lava ke tau fakapapau‘i ‘oku kei ongo‘i pē ‘e Sīsū ‘a e faingata‘a‘ia ‘a e ni‘ihi kehé. ‘Okú ne mahino‘i ‘enau mamahí, pea ‘okú ne malava ke ‘oange kiate kinautolu ‘a e fakafiemālie “‘i he taimi totonú.”​—Lau ‘a e Hepelū 4:15, 16.

11. Ko e hā ‘a e ngaahi konga Tohi Tapu ‘oku tautefito ‘ene fakafiemālie kiate koé?

¹¹ Ko e fakamatala fekau‘aki mo e mamahi lahi ‘a Sīsū ‘i he taimi na‘e mate ai ‘a Lāsalosí ko e taha pē ia ‘o e ngaahi konga Tohi Tapu fakafiemālie ‘oku ma‘u ‘i he Folofola ‘a e ‘Otuá. ‘Oku ‘ikai ke tau ofo ‘i he me‘á ni koe‘uhí “ko e ngaahi me‘a kotoa pē na‘e tohi ‘i mu‘á na‘e tohi ko hotau fakahinohino, koe‘uhí ke tau lava fakafou ‘i he‘etau kātakí pea fakafou ‘i he fakafiemālie mei he Folofolá ke tau ma‘u ai ha ‘amanaki.” (Loma 15:4) Kapau ‘okú ke mamahi, ‘e lava foki ke ke ma‘u ‘a e fakafiemālie mo‘oni mei he ngaahi konga Tohi Tapu ko ení:

• “‘Oku ofi ‘a Sihova ki he loto-laveá; ‘okú ne fakahaofi ‘a e fa‘ahinga ‘oku laumālie mafesí.”​—Saame 34:18, 19.

• “‘I hono lōmekina au ‘e he ngaahi loto-mo‘uá, na‘á ke [Sihova] fakafiemālie‘i mo fakanonga au.”​—Saame 94:19.

• “Fakatauange ki hotau ‘Eiki ko Sīsū Kalaisí mo e ‘Otuá ko ‘etau Tamaí, ‘a ia na‘á ne ‘ofa ‘iate kitautolu mo ne ‘omai ‘a e fakafiemālie ta‘engata mo e ‘amanaki lelei fakafou ‘i he ‘ofa ma‘ata‘ataá, ke na fakafiemālie‘i homou lotó mo ‘ai kimoutolu ke mou tu‘u ma‘u.”​—2 Tes. 2:16, 17. *​—Sio ki he fakamatala ‘i lalo.

12. ‘Oku lava fēfē ke tau fakafiemālie‘i ‘a e ni‘ihi kehé?

¹² ‘Oku lava foki ke toe ma‘u ‘e he fa‘ahinga ‘oku mamahí ‘a e fakafiemālie mei he fakataha‘anga Kalisitiané. (Lau ‘a e 1 Tesalonaika 5:11.) ‘E lava fēfē ke ke fakaivimālohi‘i mo fakafiemālie‘i ‘a e fa‘ahinga ‘oku nau ma‘u ha “laumālie mafesi”? (Pal. 17:22) Manatu‘i ‘oku ‘i ai “ha taimi ke fakalongolongo mo ha taimi ke lea.” (Tml. 3:7) ‘Oku fakamatala ha uitou ko Dalene ‘o pehē ko e fa‘ahinga ‘oku mamahí ‘oku fiema‘u ke nau fakahāhā ‘enau fakakaukaú mo e ongo‘í. Ko ia ai, ko e me‘a mahu‘inga taha ‘e lava ke ke faí ko e fanongo ‘o ‘ikai ke toe fakahoha‘asi. Ko Junia, ‘a ia na‘e taonakita ‘a hono tokouá, ‘okú ne pehē, “Neongo he‘ikai nai ke ke malava ke mahino‘i kakato ‘enau mamahí, ko e me‘a ‘oku mahu‘ingá ko ho‘o loto ke mahino‘i ‘a e anga ‘o ‘enau ongo‘í.”

13. Ko e hā ‘oku fiema‘u ke tau manatu‘i fekau‘aki mo e mamahí?

¹³ ‘Oku fiema‘u ke tau manatu‘i ko kitautolu kotoa ‘oku ‘ikai ke tau ongo‘i mo fakahāhā ‘a e  mamahí ‘i he founga tatau. ‘I he taimi ‘e ni‘ihi ‘oku faingata‘a ke fakamatala‘i ‘a e lahi tofu pē ‘o e mamahi ‘oku tau ongo‘í. ‘Oku pehē ‘e he Folofola ‘a e ‘Otuá: “‘Oku ‘ilo ‘e he lotó ‘a ‘ene mamahi ‘a‘aná, pea ‘oku ‘ikai ha taha mei tu‘a ‘e lava ke ‘inasi ‘i he‘ene fiefiá.” (Pal. 14:10) Na‘a mo e taimi ‘oku fakahāhā ai ‘e ha taha ‘a e anga ‘o ‘ene ongo‘í, ‘oku ‘ikai faingofua ma‘u pē ki he ni‘ihi kehé ke nau mahino‘i ‘a e me‘a ‘okú ne feinga ke lea‘akí.

14. Ko e hā ‘e lava ke tau lea‘aki ke fakafiemālie‘i ‘a e fa‘ahinga ‘oku mamahí?

¹⁴ ‘Oku lava ke faingata‘a hono ‘ilo‘i ‘a e me‘a ke lea‘aki ki ha taha ‘oku mamahi. Ka ‘oku pehē ‘e he Tohi Tapú “ko e ‘elelo ‘o e potó ko ha faito‘o.” (Pal. 12:18) Kuo ma‘u ‘e he tokolahi ‘a e ngaahi lea fakafiemālie ke vahevahe atu mei he polosiua ‘I he Mate ha Taha ‘Okú Ke ‘Ofa ‘Ai. Neongo ia, ‘oku fa‘a hoko ko e tokoni lahi taha ‘e lava ke ke faí ko e “tangi mo e fa‘ahinga ‘oku tangí.” (Loma 12:15) Ko Gaby, ‘a ia na‘e mate ‘a hono husepānití, ‘okú ne pehē ‘i he taimi ‘e ni‘ihi ko e founga pē taha kiate ia ke fakahāhā ai ‘ene ongo‘í ko ‘ene tangi. ‘Okú ne toe pehē: “Ko e ‘uhinga ia ‘oku ou ma‘u ai ‘a e fiemālie ‘i he taimi ‘oku tangi fakataha ai mo au ‘a hoku ngaahi kaume‘á. ‘I he mōmeniti pē ko iá, ‘oku ‘ikai te u ongo‘i mātu‘aki tuēnoa ‘i he‘eku mamahí.”

15. ‘E lava fēfē nai ke tau fakafiemālie‘i ‘a e ni‘ihi kehé kapau ‘oku tau faingata‘a‘ia ‘i hano fai fakafo‘ituitui ia? (Sio foki ki he puha “ Ngaahi Lea Fakafiemālie.”)

¹⁵ Kapau ‘okú ke faingata‘a‘ia ke lea‘aki fakafo‘ituitui ha fakafiemālie, ‘e faingofua ange nai ke ‘ave ha kaati, ‘īmeili, pōpoaki he telefoní, pe ko ha tohi. ‘E lava pē ke ke hiki ha konga Tohi Tapu fakafiemālie, lave ki ha ‘ulungaanga makehe ‘okú ke manatu‘i fekau‘aki mo e tokotaha kuo maté, pe vahevahe ha manatu melie ‘okú ke tukuloto‘i. “Ko hono ma‘u ha pōpoaki fakalototo‘a nounou pe ko ha fakaafe ke feohi mo ha kaungā Kalisitiane ‘oku ‘ikai lava ke u fakamatala‘i ‘a ‘ene tokoni lahi kiate aú,” koe lau ia ‘a Junia.  “Ko e ngaahi kupu‘i lea ko iá ‘okú ne ‘ai ke u ongo‘i ‘oku ‘ofa‘i mo tokangaekina au.”

16. Ko e hā ha founga ola lelei ‘aupito ke fakafiemālie‘i ‘aki ‘a e ni‘ihi kehé?

¹⁶ Ko ‘etau ngaahi lotú ‘e lava ke tokoni ki hotau fanga tokoua mo e fanga tuofāfine ‘oku mamahí. ‘E lava ke tau lotu ma‘anautolu pe na‘a mo e lotu fakataha mo kinautolu. Neongo ‘e faingata‘a nai ke fai pehē koe‘uhí ‘okú ke ongo‘i nai te ke tangi, ko ho‘o lotu loto-mo‘oní ‘e lava ke hoko ko ha fakafiemālie lahi. “‘I he ha‘u he taimi ‘e ni‘ihi ‘a e fanga tokouá ke fakafiemālie‘i aú,” ko e manatu ia ‘a Dalene, “Na‘á ku kole kiate kinautolu pe ‘oku nau loto-lelei ke fai ha lotu. ‘Oku nau kamata leva ke lotu, ‘o fa‘a fāinga ‘i he ‘uluaki taimí ke lea, ka ‘i he taimi kotoa pē, ‘i ha ngaahi sētesi si‘i, ‘oku ‘alu ke toe mālohi ange honau le‘ó pea ‘oku nau lea‘aki ‘a e lotu mātu‘aki loto-mo‘oni. Ko ‘enau tui mālohí, ko ‘enau ‘ofá, mo ‘enau tokangá kuo mātu‘aki fakatupu tui mālohi.”

17-19. Ko e hā ‘oku fiema‘u ai ke tau hanganaki fai ha fakafiemālié?

¹⁷ ‘Oku ‘ikai malava ke ‘ilo‘i ‘a e fuoloa tofu pē ‘o e mamahi ‘a e tokotaha taki taha. ‘I he mate ha tokotaha ‘ofeina, ‘oku ‘i ai ‘i he ‘uluaki taimí ‘a e ngaahi kaungāme‘a mo e kāinga tokolahi ‘o nau fai ha fakafiemālie. Ka ‘i he hili ‘enau foki ki he‘enau mo‘ui anga-mahení, ‘oku kei fiema‘u pē ‘e he fa‘ahinga ‘oku mamahí ‘a e fakafiemālie. Ko ia mateuteu ke tokoni. “Ko ha kaume‘a mo‘oni ‘okú ne ‘ofa ‘i he taimi kotoa pē pea ko ha tokoua ia ‘oku fanau‘i mai ki he taimi faingata‘á.” (Pal. 17:17) ‘Oku fiema‘u ke tau fakafiemālie‘i ‘a e fa‘ahinga ‘oku mamahí ‘i he taimi ‘oku nau kei fiema‘u ai ia meiate kitautolú.​—Lau ‘a e 1 Tesalonaika 3:7.

¹⁸ Manatu‘i ‘e lōmekina fakafokifā nai ha taha ‘e he mamahí ‘i ha fa‘ahinga taimi pē. ‘E lava ke hoko ení koe‘uhí ko ha fakamanatu ‘o e ‘aho malí, fo‘i fasi pau, ‘ū tā, ngaahi me‘a ‘oku fai, pe na‘a mo ha nanamu ‘o ha me‘a, ongo ‘o ha me‘a, pe fa‘ahita‘u ‘o e ta‘ú. ‘I hono fai toko taha ‘e ha uitou ‘oku mamahi ha me‘a ‘i he ‘uluaki taimí, hangē ko hono ma‘u ‘o ha ‘asemipilī pe ko e Fakamanatú, ‘e lava ke hoko ‘o mātu‘aki fakalotomamahi. “Na‘á ku ‘amanekina ‘e fakalotomamahi ‘aupito ‘a e fakamanatu ‘o homa ‘aho malí,” ko e fakamatala ia ‘a ha tokoua, “pea na‘e ‘ikai ke faingofua. Ka na‘e palani ‘e ha fanga tokoua mo e fanga tuofāfine ha ki‘i fakatahataha ‘a hoku ngaahi kaume‘a ofí koe‘uhí ke ‘oua na‘á ku toko taha.”

¹⁹ Manatu‘i ko e fa‘ahinga ‘oku mamahí ‘oku nau fiema‘u ‘a e fakalototo‘a ‘o ‘ikai ‘i he ngaahi me‘a makehe pē ‘oku faí. “‘Oku fa‘a hoko ‘a e tokoni mo e feohi ‘oku fai ‘i he ‘ikai ha ‘aho fakamanatu makehé ‘o mātu‘aki ‘aonga,” ko e fakamatala ia ‘a Junia. “Ko e ngaahi mōmeniti tofu pē ko iá ‘oku mātu‘aki mahu‘inga pea ‘oku ‘omai ai ‘a e fakafiemālie lahi.” Ko e mo‘oni, he‘ikai lava ke tau to‘o kotoa ‘enau mamahí pe ta‘elatá, ka ‘e lava ke tau fakafiemālie‘i ‘a e fa‘ahinga ‘oku mamahí ‘aki hono fai ha ngaahi me‘a ma‘anautolu. (1 Sio. 3:18) ‘Oku pehē ‘e Gaby: “‘Oku ou fakamālō mo‘oni kia Sihova koe‘uhi ko e kau mātu‘a ‘ofa na‘a nau tokoni‘i au ‘i he vā‘ihala faingata‘a kotoa pē na‘á ku fouá. Kuo nau ‘ai mo‘oni ke u ongo‘i ‘oku puke au ‘e he to‘ukupu ‘ofa ‘o Sihová.”

20. Ko e hā ‘oku hoko ai ‘a e ngaahi tala‘ofa ‘a Sihová ko ha matavai ‘o e fakafiemālie lahí?

²⁰ ‘Oku fakafiemālie ke ‘ilo‘i ko Sihova, ‘a e ‘Otua ‘o e fakafiemālie kotoa pē, te ne to‘o ‘osi ‘a e mamahi kotoa ‘i he toetu‘ú. (Sione 5:28, 29) ‘Oku tala‘ofa mai ‘a e ‘Otuá “te ne to‘o atu ‘a mate ‘o ta‘engata, pea ‘e holoholo ‘e he ‘Eiki Hau ko Sihová ‘a e lo‘imatá mei he mata kotoa pē.” (‘Ai. 25:8, fakamatala ‘i lalo) Pea ‘i he ‘ikai ke “tangi mo e fa‘ahinga ‘oku tangí,” ko e tokotaha kotoa pē ‘i he māmaní te nau “fiefia mo kinautolu ‘oku fiefiá.”​—Loma 12:15.