Ngaahi Tokoni ʻOku Fakamāfanaʻi Ai ʻa e Loto ʻo e ʻOtuá

KO E foʻi talanoá ʻoku ʻikai ko ha foʻi talanoa lelei ia. Naʻe maʻu ʻe Kuini ʻAtalaia ʻa e taloni ʻo Siutá fakafou ʻi he faʻufaʻu kākā mo e fakapō. ʻI he fakamahalo hala kuo ʻosi tāmateʻi ʻa e kotoa ʻo e ngaahi ʻea totonú, naʻá ne fokotuʻu ai ia tonu ko ha kuini. Naʻe hanga ʻe ha fefine ia ʻe taha, ko pilinisesi Siosepa, ʻa ia naʻá ne ʻofa lahi ʻia Sihova mo ʻene Laó, ʻo fufū loto-toʻa ha hako fakatuʻi, ko e pēpē ko Sōasí. Ko Siosepa mo hono husepānití, ʻa e Taulaʻeiki Lahi ko Sihoiatá, naʻá na fūfuuʻi ʻa e ʻeá ʻi he taʻu ʻe ono ʻi hona nofoʻanga he temipalé.​—2 Tuʻi 11:​1-3.

ʻI he taimi naʻe aʻu ai ʻa Sōasi ki hono taʻu fitú, naʻe mateuteu ʻa e Taulaʻeiki Lahi ko Sihoiatá ke kamataʻi ʻa ʻene fokotuʻutuʻu ke toʻo ʻa e kuini fakamālohí mei he taloni naʻá ne faʻao kākāʻí. Naʻá ne fakahaaʻi ʻa e tamasiʻi naʻá ne fufuú peá ne hilifaki kalauni ia ko e ʻea totonu ki he puleʻangá. Naʻe toki toho leva ki tuʻa ʻe he kau kaʻate fakatuʻí ʻa e Kuini kovi ko ʻAtalaiá mei he ʻēlia ʻo e temipalé pea tāmateʻi ia, ʻo ʻomi ai ʻa e fiemālie mo e fiefia lahi ki he kakaí. Fakafou ʻi heʻena ngaahi ngāué, naʻe tokoni lahi ai ʻa Sihoiata mo Siosepa ki hono toe fakafoʻou ʻa e lotu moʻoní ʻi he fonua ʻo Siutá. Ka ko e meʻa mahuʻinga angé, naʻá na tokoni ki he hokohoko atu ʻa e laine fakatuʻi ʻo Tēvitá, ʻa ia ʻe taki atu ki he Mīsaiá.​—2 Tuʻi 11:​4-​21.

Naʻe toe teu mo e tuʻi ko ia naʻe toki fokotuʻu foʻoú ke ne fai ha tokoni ʻa ia ʻe fakamāfanaʻi ai ʻa e loto ʻo e ʻOtuá. Naʻe fiemaʻu lahi ha ngaahi ngāue monomono ki he fale ʻo Sihová. Ko e holi tōtuʻa ko ia ʻa ʻAtalaia ke hoko ko e pule tāfataha ʻo Siutá naʻe iku ai ʻo ʻikai ki hono siʻaki pē ʻo e temipalé ka ki hono toe maumauʻi lahi ia. Ko ia naʻe fakapapauʻi ai ʻe Sōasi ke ne toe langa mo toe fakafoʻou ʻa e temipalé. ʻI he ʻikai toe tautoloí, naʻá ne ʻoatu ha tuʻutuʻuni ke tānaki fakataha ʻa e ngaahi paʻanga tokoni naʻe fiemaʻú ki hono toe fakaleleiʻi ʻa e fale ʻo Sihová. Naʻá ne pehē: “ʻIlonga ha paʻanga ʻo e ngaahi tuʻutuʻuni tapu, ʻa ia ʻoku ʻomi ki he fale ʻo Sihova—ʻa e paʻanga ʻo e tohi kakai, mo e paʻanga kuo tuʻutuʻuni ke huhuʻi ʻaki ʻa e ngaahi meʻa moʻui, mo e paʻanga kotoa ʻoku ake ʻi he loto ʻo ha taha ke ʻave ki he fale ʻo Sihova—ʻe tanaki ia ʻe he kau taulaʻeiki, taki taha mei hono feʻiloaki, pea ko kinautolu te nau monomono ʻa e ngaahi maumau ʻo e fale, ha potu pe ʻoku ʻilo ai ha maumau.”​—2 Tuʻi 12:​4, 5.

Naʻe tokoni loto-lelei ʻa e kakaí. Kae kehe, naʻe ʻikai ʻaufuatō ʻa e kau taulaʻeikí ia ʻi hono fakahoko honau fatongia ke monomono ʻa e temipalé. Ko ia ai, naʻe fakapapauʻi ʻe he tuʻí ke ne fakaleleiʻi ʻe ia tonu ʻa e tuʻungá peá ne fekauʻi ke ʻave hangatonu kotoa ʻa e ngaahi tokoní ki ha puha makehe. Naʻá ne fakanofo ʻa Sihoiata ke ne tokangaʻi ia, pea ʻoku pehē ʻe he fakamatalá: “Pea naʻe toʻo ʻe Sihoiata ko e taulaʻeiki ha puha, ʻo ne vili ha ava ʻi hono tapuni, ʻo ne tuku ʻi he tafaʻaki olita, ʻi hono potu toʻomataʻu ʻi hoʻo hu ki he fale ʻo Sihova: pea ko e kau taulaʻeiki naʻe tauhi ʻa e matapa naʻa nau tuku ʻa e paʻanga kotoa naʻe ʻomi ki he fale ʻo Sihova. Pea ʻi he faifai pea ha kiate kinautolu kuo lahi ha paʻanga ʻi he puha, pea toki ʻalu hake ʻa e sikalaipe ʻa e tuʻi, mo e taulaʻeiki lahi, ʻo nau haʻi tangai mo lau ʻa e paʻanga naʻe ʻilo ʻi he fale ʻo Sihova. Pea nau tuku ʻa e paʻanga kuo fua ki he nima ʻo e kakai naʻe fai  ʻa e ngaue, ʻakinautolu naʻe angi ki he fale ʻo Sihova; pea nau tufa ia ki he kau kapeta, mo e kau langa fale, ʻakinautolu naʻe ngaue ʻi he fale ʻo Sihova, pea ki he kau fakatoka maka, mo e kau ta maka, pea ke fakatau ʻaki ʻa e ʻakau mo e maka kuo hele, ke monomono ʻa e ngaahi maumau ʻo e fale ʻo Sihova, mo e ha fua ha meʻa naʻe ʻalu atu ai ʻa e paʻanga ʻi he ngaohi ʻo e fale.”​—2 Tuʻi 12:​9-​12.

Naʻe ʻaufuatō e tali ʻa e kakaí. Ko e fale ʻo Sihova ki he lotú naʻe toe fakafoki ia koeʻuhi ke lava ai ʻene lotú ke hokohoko atu ia ʻi ha founga fakangeingeia. Ko ia ai, ko e ngaahi tokoni kotoa naʻe foakí naʻe ngāueʻaki totonu ia. Naʻe fakapapauʻi ʻe Tuʻi Sōasi ʻa e meʻa ko iá!

ʻI he ʻahó ni, ʻoku siofi fakalelei ʻe he kautaha hāmai ʻa Sihová, ko e ngaahi tokoni kotoa pē ʻoku meʻaʻofaʻaki angé ʻoku ngāueʻaki totonu ia ke laka ki muʻa ai ʻa e lotu ʻa Sihová, pea kuo tali ki ai e kau Kalisitiane moʻoní ʻo hangē ko ia naʻe fai ʻe he kau ʻIsileli ko ia ʻo e kuonga muʻá​—ʻi ha founga ʻaufuatō. Mahalo ʻokú ke ʻi he haʻohaʻonga ʻo e faʻahinga naʻa nau tokoni ki hono fakalahi ʻa e ngaahi meʻa ʻo e Puleʻangá lolotonga ʻa e taʻu fakangāue naʻe toki ʻosí. Tau vakai angé ki he niʻihi ʻo e ngaahi founga kuo ngāueʻaki ai ʻa hoʻo ngaahi tokoní.

PULUSI

Takatakai he māmaní, ko e ʻū tohi hokó naʻe pulusi ia ki he ako pea ki hono tufaki:

• Kiʻi Tohi: 6,834,740

• Makasini: 1,179,266,348

• Polosiua: 167,854,462

• Tohi: 47,490,247

• Tohimāhina: 5,405,955

• Tuleki: 440,995,740

• Vitiō: 3,168,611

ʻOku fakahoko ʻa e pulusí ʻi he ngaahi puleʻanga ʻotu motu ʻo e Pasifikí, ʻi ʻAfilika, ʻAmelika Lotoloto, ʻAmelika Tokelau mo ʻAmelika Tonga, ʻĒsia mo ʻIulope​—ko ha fakakātoa ʻo e ngaahi fonua ʻe 19.

“Ko hoku hingoá ko Katelyn May. ʻOku ou taʻu valu. ʻOku ʻi ai ʻeku $28, pea ʻoku ou saiʻia ke mou maʻu ia ke tokoni ki hono totongi ʻo e ngaahi mīsini pulusí. Ko homou kiʻi tuofefine, Katelyn.”

“Naʻe fai haʻamau fakataha fakafāmili ʻo fekauʻaki mo e ngaahi mīsini pulusi foʻoú. Naʻe fakapapauʻi ʻe heʻema fānaú, ʻa ia ko e taʻu 11 mo e 9, ke toʻo ha silini mei heʻena paʻanga fakahuú pea fai ʻena tokoní. ʻOkú ma fiefia ke ʻoatu fakataha ʻena tokoní mo ʻema tokoní.”

 LANGA

ʻOku hoko heni ʻa e niʻihi ʻo e ngaahi ngāue langa naʻe fakahoko ke poupouʻiʻaki ʻa e ngaahi ngāue ʻa e Kau Fakamoʻoni ʻa Sihová:

• Ngaahi Fale Fakatahaʻanga ʻi he fonua ʻoku fakangatangata ai ʻa e ngaahi maʻuʻanga koloá: 2,180

• Holo ʻAsemipilī: 15

• Vaʻa: 10

• Kau ngāue pole fakavahaʻapuleʻanga ʻi he ngāue taimi-kakató: 2,342

“ʻI he fakaʻosinga uike ko ení naʻe fai ai ʻemau ʻuluaki fakataha ʻi homau Fale Fakatahaʻanga foʻoú. ʻOku mau fiefia ʻaupito ke maʻu ha feituʻu totonu ke ʻoatu ai ʻa e fakahīkihiki ki heʻetau Tamaí, ʻa Sihova ko e ʻOtuá. ʻOku mau fakamālō kia Sihova pea mo kimoutolu ʻi hoʻomou tokanga ki heʻemau ngaahi fiemaʻú ʻaki hono langa ʻa e ngaahi Fale Fakatahaʻanga lahi angé. ʻOku moʻoni, ko homau Fale Fakatahaʻangá ko ha tāpuaki moʻoni ia ki he kaungāʻapí.”​—Sili.

“ʻOku houngaʻia lahi ʻaupito ʻa e fanga tokouá mo e fanga tuofāfiné ʻi he tokoni kuo tokonaki mai ʻe he kautaha ʻa Sihová. Aʻu mai ki he ʻahó ni, ʻoku mau hokohoko atu ʻa e talanoa ʻo fekauʻaki mo e taimi fakafiefia naʻa mau fakamoleki mo e kau ngāue langá.”​—Molotova.

“Ko au mo hoku uaifí naʻá ma kātoangaʻi ki muí ni mai ʻa e fakamanatu ʻo e taʻu hono 35 ʻo ʻema nofo malí. Naʻá ma feinga ke fakapapauʻi pe ko e hā ʻa e meʻa ke ma fefoakiʻaki ai ʻi he meʻa naʻe hokó, peá ma fakapapauʻi ai ke foaki ha meʻa kia Sihova mo ʻene kautahá, he ka ne ʻikai ʻenau tokoní, mahalo ne ʻikai lavameʻa ʻema nofo malí. ʻOkú ma saiʻia ke ngāueʻaki ʻa e paʻanga ko eni ʻoku ʻoatú ke tokoniʻaki ki hono langa ha Fale Fakatahaʻanga ʻi he taha ʻo e ngaahi fonua masiva angé.”

“Naʻá ku toki maʻu ki muí ni mai ha koloa tukufakaholo, pea koeʻuhi ʻoku siʻisiʻi ʻa e meʻa ʻoku ou ‘fiemaʻú’ pea ʻoku toe siʻisiʻi ange ʻa e meʻa ʻoku ou ‘fiemaʻu paú,’ ʻoku ou saiʻia ke mou maʻu ʻa e paʻanga ko eni ʻoku ʻoatú ke tokoniʻaki ki hono langa ʻa e ngaahi Fale Fakatahaʻangá, ʻa ia ʻoku fiemaʻu lahi ʻi he ngaahi fonua lahi.”

 TOKONI KI HE FAKATAMAKÍ

ʻI he ngaahi ʻaho fakaʻosí ni, ʻoku faʻa hoko fakafokifā ai ʻa e ngaahi fakatamakí ʻo ʻikai ha fakatokanga. Ko e tokolahi ʻo e Kau Fakamoʻoni ʻa Sihová ʻoku nau fai ʻa e ngaahi tokoni lahi ange koeʻuhi ke lava ai ʻo tokoniʻi honau fanga tokoua ʻi he feituʻu kuo uesiá. Ko ha fakamanatu, ko e ngaahi tokoni ki he ngaahi fakatamakí ʻoku tokangaʻi ia ko ha konga ʻo e ngāue ʻi māmani lahí. ʻOku hoko hake heni ʻa e ngaahi feituʻu ʻa ia kuo tokoni ai ʻa e Kau Fakamoʻoni ʻa Sihová ki he kau maʻukovia ʻe he fakatamakí:

• ʻAfilika

• ʻĒsia

• Vahefonua Kalipiané

• ʻOtu Motu Pasifikí

“ʻOku ou fiefia mo hoku husepānití ke fakamālō lahi atu kiate kimoutolu ʻi hono foaki mai ʻa e ngaahi tokonaki ki he ngaahi feinga tokoni ki he maumau naʻe hoko lolotonga ʻa e afaá. Naʻá ma malava ʻo fokotuʻu ha ʻato foʻou ʻi homa falé. ʻOkú ma houngaʻia moʻoni ʻi hoʻomou tali vave maí.”

“Ko hoku hingoá ko Connor, pea ʻoku ou taʻu 11. ʻI heʻeku sio ki he meʻa naʻe hoko ʻi he taimi naʻe hoko ai ʻa e peau kulá, naʻá ku loto ai ke tokoni. ʻOku ou fakaʻamu ʻe tokoni eni ki hoku fanga tokouá mo e fanga tuofāfiné.”

 KAU SEVĀNITI MAKEHE TAIMI-KAKATO

ʻOku tokolahi ʻa e kau Kalisitiane ʻoku nau ngāue taimi-kakato ʻi he ngāue fakaʻevangelioó pe ʻi he ngaahi ʻapi Pētelí. ʻOku poupouʻi ʻa e niʻihi ʻo e kau ngāue pole taimi-kakató ʻaki ʻa e ngaahi tokoni loto-fiefoaki. ʻOku ʻi he haʻohaʻonga ʻo e faʻahingá ni ʻa e faʻahinga hoko haké:

• Misinale: 2,635

• ʻOvasia fefonongaʻaki: 5,325

• Ngāue Pēteli: 20,092

“Koeʻuhi ʻoku ʻikai lava ke u ʻalu ʻo ngāue ʻi he Pētelí he taimí ni [kiʻi tamasiʻi taʻu nima], ʻoku ou loto ke ʻoatu ʻa e tokoni ko ení fakataha mo e ʻofa lahi. ʻI heʻeku fuʻu lahi haké, te u ʻalu ki he Pētelí ke ngāue mālohi ai.”

Ki Hono Pouaki ʻa e Ako Fakatohitapú

Naʻe fekauʻi ʻe Sīsū Kalaisi ʻa hono kau muimuí ke nau “ngaohi ʻa e kakai ʻo e ngaahi puleʻanga kotoa pē ko e kau ākonga.” (Mātiu 28:​19, NW) ʻI he talangofua ki heʻene ngaahi leá, ʻoku femoʻuekina ʻa e Kau Fakamoʻoni ʻa Sihová ʻi hono malangaʻi mo hono akoʻi ʻa e pōpoaki ʻo e Tohi Tapú ʻi he ngaahi fonua ʻe 235. ʻOku nau pulusi pea tufaki ʻa e ngaahi tohi Fakatohitapú ʻi he ngaahi lea ʻe 413.

ʻOku moʻoni, ko e tokoni mahuʻinga taha ʻe lava ke fai ʻe ha Kalisitiane ke tokoniʻi ai ʻa e kakai tokolahi ange ke nau ako ʻo fekauʻaki mo e ʻOtuá mo ʻEne ngaahi taumuʻá ko hono taimí. Kuo foaki lahi atu ʻe he Kau Fakamoʻoni ʻa Sihová honau taimí mo e iví ke tokoniʻiʻaki ʻa honau ngaahi kaungāʻapí. Kuo nau toe tokoni loto-fiefoaki foki ʻi ha founga fakapaʻanga, pea ko e kotoa ʻo ʻenau ngaahi tokoní, ʻi he ngaahi founga kehekehé, kuo tokoni ia ke ʻai ai ke ʻiloa ʻa e huafa ʻo Sihová mo ʻene ngaahi taumuʻá ʻi he kotoa ʻo e māmaní. ʻOfa ke hokohoko faitāpuekina ʻe Sihova ʻa e ngaahi feinga ko eni ke tokoniʻi ʻa e niʻihi kehé ke nau ako lahi ange ʻo fekauʻaki mo iá. (Palovepi 19:17) Ko e loto-lelei pehē ke tokoní ʻoku fakamāfanaʻi ai ʻa e loto ʻo Sihová!​—Hepelu 13:​15, 16.

[Puha ʻi he peesi 28-30]

Ngaahi Founga ʻOku Fili Ai ʻa e Niʻihi ke Fai ha Foakí

NGAAHI MEʻAʻOFA KI HE NGĀUE ʻI MĀMANI LAHÍ

ʻOku tuku mavahe, pe vaheʻi ʻe he tokolahi ha paʻanga, ʻa ia ʻoku nau tuku ki he ngaahi puha meʻaʻofa kuo leipolo ko e “Ngaahi Meʻaʻofa ki he Ngāue ʻi Māmani Lahí​—Mātiu 24:14.”

ʻI he māhina taki taha, ʻoku ʻoatu ai ʻe he ngaahi fakatahaʻangá ʻa e paʻanga ko ení ki he ʻōfisi vaʻa ʻo e Kau Fakamoʻoni ʻa Sihova ʻa ia ʻokú ne tokangaʻi ʻa honau ngaahi fonuá taki taha. Ko e ngaahi tokoni paʻanga loto-fiefoakí ʻe lava ke toe ʻoatu fakahangatonu ia ki he ʻŌfisi Tauhi Paʻangá, Watch Tower Bible and Tract Society of New Zealand, P O Box 75-142, Manurewa, pe ki he ʻōfisi vaʻa ʻo e Kau Fakamoʻoni ʻa Sihová ʻokú ne tokangaʻi ʻa ho fonuá. ʻE lava foki ke tokoni nai ʻaki ʻa e ngaahi siueli pe ngaahi koloa mahuʻinga kehé. Ko ha tohi nounou ʻo fakamatalaʻi ai ko e meʻaʻofa fakahangatonu ia ʻoku totonu ke ʻave fakataha mo e ngaahi tokoni ko ení.

FOKOTUʻUTUʻU ʻO E TOKONI ʻOFÁ

ʻE lava ke meʻaʻofaʻaki ha paʻanga ʻi he malumalu ʻo ha fokotuʻutuʻu makehe ʻa ia, ʻoku totonu ai ki he tokotaha-foakí ke ne maʻu ha fiemaʻu fakafoʻituitui, ʻe lava ʻo fai ai ha tokoni fakapaʻanga kiate ia. Ki ha fakamatala lahi ange, kātaki ʻo fetuʻutaki ki he ʻŌfisi Tauhi Paʻangá ʻi he tuʻasila kuo hiki ʻi ʻolungá.

FOAKI ʻOSI PALANI

Tānaki atu ki he ngaahi meʻaʻofa paʻanga fakahangatonú mo e ngaahi tokoni ʻofa ʻo e paʻangá, ʻoku ʻi ai ʻa e ngaahi founga kehe ʻo e foakí ke ʻaonga ki he ngāue ʻo e Puleʻangá ʻi māmani lahí. ʻOku kau ki heni ʻa e:

Maluʻi: ʻE lava ke tohi-tuku nai ki he Sōsaieti Taua Leʻó ha tohi fakamoʻoni maluʻi moʻui/fokotuʻutuʻu ʻo ha vāhenga mālōlō.

Ngaahi ʻInasi mo e Ngaahi Pōnite: ʻE foaki atu nai ʻa e ngaahi ʻinasi mo e ngaahi pōnite ki he Sōsaieti Taua Leʻó ko ha meʻaʻofa fakahangatonu.

Kelekele: ʻE lava nai ke foaki ha konga kelekele ʻe ala fakatau ki he Sōsaieti Taua Leʻó ʻi hano fai ha meʻaʻofa fakahangatonu pe ʻi hano tauhi ha kelekele ʻo e tokotaha-foakí, ʻa ia ʻe lava ke hokohoko atu ʻene nofo aí ʻi heʻene kei moʻuí. Fetuʻutaki ki he ʻōfisi vaʻa ʻi ho fonuá ki muʻa ke ʻoatu ha kelekelé.

Ngaahi Tohi-Tuku mo e Ngaahi Talāsiti: ʻE tohi-tuku nai ha koloa pe paʻanga ki he Sōsaieti Taua Leʻó ʻo fakafou ʻi ha tohi-tuku fakahoko fakalao, pe ʻe ʻai nai ʻa e hingoa ʻo e Sōsaieti Taua Leʻó ke tohi-tuku ki ai ha aleapau ʻo ha talāsiti.

[Maʻuʻanga ʻo e Tā ʻi he peesi 27]

Foʻi vitiō Faithful: Stalin: U.S. Army photo