Fehu‘i mei he Kau Lautohí

Ko e hā ‘oku totonu ke u fai he taimi ‘oku ‘i ai ai ha‘aku fehu‘i fekau‘aki mo ha me‘a ‘oku ou lau he Tohi Tapú pe ‘i he taimi ‘oku ou fiema‘u ai ha fale‘i fekau‘aki mo ha palopalema fakafo‘ituitui?

‘Oku ekinaki mai kia kitautolu taki taha ‘a e Palovepi 2:1-5, ke tau “ha‘ao” pe fekumi ki he ‘ilome‘á mo e fakahinohinó ‘o hangē ko ha‘atau fekumi ki ha “koloa fufu.” ‘Oku fakahu‘unga mai heni ‘oku totonu ke tau feinga mālohi ‘i he fekumi ki he ngaahi tali ki he‘etau ngaahi fehu‘i Fakatohitapú pea ki hono ma‘u ha ngaahi fakalelei‘anga ki he‘etau ngaahi palopalema fakafo‘ituituí. ‘E lava fēfē ke tau fai eni?

‘Oku ‘analaiso ‘i he Ma‘u ‘Aonga mei he Ako Fakafaifekau Fakateokalatí, peesi 33 ki he 38, ‘a e “Founga ‘o Hono Fai ‘a e Fekumí” ‘aki hono ngāue‘aki e ngaahi me‘angāue kuo tokonaki mai ‘e he “tamaioeiki agatonu mo boto.” (Mt. 24:45, PM) ‘Oku fakamatala‘i ‘i he peesi 36 ‘a e founga hono ngāue‘aki ‘a e Watch Tower Publications Index, ‘a ia ko e pulusinga taki taha ‘oku vahevahe ia ki ha ‘initeki fakakaveinga mo ha ‘initeki konga Tohi Tapu. ‘Oku ‘ai ai heni ke malava ‘o fekumi ‘aki ha ngaahi fo‘i lea tefito pe ‘aki ha ngaahi veesi Tohi Tapu, ‘a ia te ke ma‘u ai ha lisi ‘o ha ngaahi ma‘u‘anga fakamatala ke sio ki ai. Anga-kātaki ‘i he fekumi ki he tali pe fakahinohino pau ‘okú ke fiema‘ú. Manatu‘i, ‘okú ke fekumi ki ha “koloa fufu,” ‘a ia ‘oku fiema‘u ki ai e taimi mo e feinga.

Ko e mo‘oni, ‘oku ‘i ai e ngaahi tu‘unga-lea mo e ngaahi konga Tohi Tapu ‘e ni‘ihi kuo te‘eki ke lave hangatonu ki ai ‘etau ‘ū tohí. Pea na‘a mo e taimi kuo mau lave ai ki ha konga Tohi Tapu pau, kuo te‘eki nai te mau fai ha lau ki he fehu‘i pau ko ia ‘oku ‘i ho‘o fakakaukaú. Pehē foki, ko e ngaahi fakamatala Tohi Tapu ‘e ni‘ihi ‘okú ne langa‘i e ngaahi fehu‘i koe‘uhí ‘oku ‘ikai fakalau kotoa mai ‘a e ngaahi fakaikiikí ‘i he Tohi Tapú. Ko ia ai, ‘e ‘ikai lava ke tau ma‘u leva ‘a e ngaahi tali ki he fehu‘i kotoa pē ‘oku malanga hake. ‘I ha tu‘unga peheé, ‘oku totonu ke tau faka‘ehi‘ehi mei he fakamahalo fekau‘aki mo e ngaahi me‘a ‘e ‘ikai lava ke talí, na‘a faifai pea tau kau ‘i hono fakakikihi‘i “‘a e ngaahi fehu‘i ke fai ha fekumi ki ai kae ‘ikai ko hono tokonaki mai ha me‘a mei he ‘Otuá ‘oku fekau‘aki mo e tuí.” (1 Tim. 1:4, NW; 2 Tim. 2:23; Tai. 3:9) ‘Oku ‘ikai malava ‘e he ‘ōfisi va‘á pe ‘ulu‘i ‘ōfisi ‘i māmaní ke na ‘analaiso mo tali ‘a e fehu‘i kotoa kuo te‘eki lāulea ki ai ‘i he‘etau ‘ū tohí. ‘E lava ke tau fiemālie he ‘oku tokonaki mai ‘e he Tohi Tapú ‘a e fakamatala fe‘unga ke tataki kitautolu ‘i he mo‘uí ka ‘oku toe to‘o mei ai ‘a e ngaahi fakaikiiki fe‘unga koe‘uhi ke fiema‘u ai kia kitautolu ke ma‘u ha tui mālohi ki hono Fa‘utohi faka‘otuá.—Sio ki he peesi 185 ki he187 ‘o e tohi ‘Unu‘unu Ofi kia Sihova.

Fēfē kapau kuó ke fai e me‘a kotoa ‘okú ke malavá ke fekumi ai ki ha me‘a ‘okú ne uesia fakafo‘ituitui koe kae te‘eki ai pē ke ma‘u e fakahinohino pe fakalelei‘anga ‘okú ke fiema‘ú? Ongo‘i tau‘atāina ke lea ki ha kaungātui matu‘otu‘a, mahalo ko ha taha ‘o e kau mātu‘a fakalotofonuá. ‘Oku nau ma‘u ha ‘ilo Fakatohitapu lahi ‘aupito pea pehē foki ki he taukei ‘i he mo‘ui faka-Kalisitiané. Ko ‘enau tokoni mafamafatataú ‘e fe‘unga ia tautefito kapau ‘okú ke fiema‘u fale‘i fekau‘aki mo ha palopalema pe fili fakafo‘ituitui, he ‘oku nau ‘ilo koe pea ‘oku nau ofi kia koe mo ho tu‘ungá. Pea ‘oua ‘aupito na‘a ngalo ke lotu kia Sihova tautefito fekau‘aki mo ho‘o ngaahi hoha‘á pea kole kiate ia ke ne tataki ho‘o fakakaukaú fakafou ‘i hono laumālie mā‘oni‘oní, “he ‘oku foaki poto ‘e Sihova . . . mo e fakahinohino.”—Pal. 2:6; Luke 11:13.