KO E kai fakataha ʻi he tēpile ʻa Sihová kuo hoko maʻu pē ia ko ha taimi fakateokalati fakafiefia. ʻI he taimi ʻoku fakatahataha ai ʻa e kakai ʻa e ʻOtuá ki ha kātoanga kai fakalaumālie, ʻoku toe tānaki mai ki heʻenau fiefiá ʻa hono fevahevaheʻaki ʻa e meʻakai fakamatelié.

ʻI Sepitema 1919, naʻe fakahoko ai ʻe he Kau Ako Tohi Tapú ha fakataha-lahi ʻaho ʻe valu ʻi Cedar Point, Ohio, ʻAmelika. Naʻe teuteu ʻe he ngaahi hōtelé ʻa e nofoʻanga mo e meʻakai maʻá e kau fakafofongá, ka naʻe laka hake ʻi he toko laui afe naʻe tūʻuta maí ʻi he tokolahi naʻe ʻamanekiná. Ke lava ʻo tokangaʻi kotoa e fuʻu kakaí, naʻe ngāue fakataha ai ʻa e kau ngāue tali-tēpilé. Naʻe kole ʻe he pule ʻo e falekaí pe ʻe lava ke tokoni ange ha kau fakafofonga kei siʻi, pea naʻe tali lelei ʻe he tokolahi. Ko e taha ʻo kinautolu ko Sadie Green. “Ko e ʻuluaki taimi eni ke u ngāue ai ko ha tokotaha tali-tēpile,” naʻá ne hoko atu, “ka naʻa mau maʻu ha taimi lelei.”

ʻI he ngaahi taʻu ki mui aí, ko e ngaahi fokotuʻutuʻu ki he falekai ʻo e fakataha-lahí, naʻe malava ai ha fuʻu kau ngāue pole fiefia tokolahi ke ngāue maʻa honau fanga tokouá mo e fanga tuofāfiné. Ko e ngāue fakataha mo e kaungātuí naʻe toe tokoniʻi ai ʻa e kau talavoú ke nau fokotuʻu ha ngaahi taumuʻa fakalaumālie. Ko Gladys Bolton naʻe ngāue ʻi he falekaí ʻi he fakataha-lahi ʻo e 1937. “Naʻá ku fetaulaki mo e kakai mei he ngaahi feituʻu kehekehe,” ko ʻene laú ia, “pea naʻá ku fanongo ki he founga naʻa nau ikuʻi ai honau ngaahi palopalemá. Ko e taimi ia naʻá ku fuofua kamata ai ke maʻu ʻa e fakakaukau ke hoko ko ha tāimuʻa.”

Naʻe pehē ʻe ha tokotaha maʻu fakataha-lahi ko Beulah Covey: “Ko e līʻoa ʻa e kau ngāué naʻá ne ʻai ai ʻa e meʻa kotoa ke lele lelei.” Neongo ia, ko e ngāué naʻe ʻi ai hono ngaahi pole. Naʻe toki ʻiloʻi pē ʻe Angelo Manera ʻi heʻene aʻu atu ki Dodger Stadium ʻi Los Angeles, Kalifōnia ʻi he 1969, kuo fakanofo ia ke ne tokangaʻi ʻa e falekaí. Naʻá ne pehē, “Naʻá ku hokosia ʻa e taha ʻo e ngaahi meʻa fakaʻohovale taha ʻi heʻeku moʻuí!” Ko e teuteu ki he fakataha-lahí naʻe kau ki ai hono keli ha fakatafenga mita ʻe 400 (kilomita ʻe 0.4) ke fakatoka ai ha foʻi paipa kasa ki he peitó!

ʻI Siela Leone ʻi he 1982, naʻe pau ke fakaʻataʻatā ʻe he kau pole ngāue mālohí ʻa e konga ʻapí pea toki langa ai ʻa e falekaí ʻo ngāueʻaki pē ʻa e naunau langa naʻe maʻú. ʻI Frankfurt, Siamane ʻi he 1951, naʻe haea ai ʻe he fanga tokoua mohu fakakaukaú ha lēlue ke ʻomai ʻa e maó ki he ngaahi fuʻu kulo feimeʻakai ʻe 40.  Naʻe houa ʻe taha hono tufa atu ʻa e meʻakaí ki he toko 30,000. Ke fakasiʻisiʻi ʻa e ngāue ʻa e kau fufulu peleti ʻe toko 576, naʻe ʻomai ʻe he kau maʻu fakataha-lahí ʻenau hele mo e huhu pē ʻa kinautolu. ʻI Yangon, Mienimā, naʻe fakakaukau lelei ʻa e kau kukí ʻo fakafifisi feʻunga pē ʻa e meʻatokoni ʻa e kau fakafofonga fakavahaʻapuleʻangá.

Ko e tuʻu he vela ʻa e laʻaá ʻo kiu ki he falekai ʻi ha fakataha-lahi ʻi ʻAmelika he 1950, naʻe hoko ia ko e tāpuaki kia Annie Poggensee. Naʻá ne pehē: “Naʻá ku fanongo kakato ki ha fetalanoaʻaki fakalotomāfana ʻa e ongo tuofāfine naʻá na folau vaka mai mei ʻIulope.” Naʻá na taki taha fakamatala ki he anga hono tokoniʻi kinaua ʻe Sihova ke maʻu ʻa e fakatahá. Naʻe pehē ʻe Annie, “Naʻe ʻikai ha taha ʻe fiefia ange ʻi he ongo tuofāfine ko ení. Ko e taimi naʻe mole ʻi he kiu he lainé—pea mo e velá—naʻe ʻikai haʻana tokanga ki ai.”

Ko e lahi ʻo e ngaahi fakataha-lahi lalahí, naʻe fokotuʻu ai ʻi he ngaahi fuʻu falekai tēnití ha ʻū tēpile māʻolunga ke fakafaingofuaʻi ai ʻa e maʻu meʻatokoní kae ʻatā vave ki he niʻihi kehé. Naʻe lava fēfē ke fafanga ha toko laui afe ʻi he taimi kai hoʻataá? Naʻe pehē ʻe ha tokotaha naʻe ʻikai ko ha Fakamoʻoni: “Ko ha lotu faikehe ia. ʻOku nau tuʻu pē ʻo kai ai.”

Naʻe ʻohovale ʻa e kau maʻu mafai fakakautaú mo fakapuleʻangá ʻi heʻenau sio ki heʻenau lavameʻa mo fokotuʻutuʻu māú. ʻI he hili ʻenau sivisiviʻi hotau falekai ʻi he Yankee Stadium ʻi he Kolo Niu ʻIoké, naʻe fakaʻaiʻai ʻe he kau ngāue Fakakautau ʻa ʻAmeliká ʻa Mēsia Faulkner mei he Vaʻa Fakakautau ʻa Pilitāniá ke ne fai ha sivisiviʻi meimei tatau. Ko ia, naʻá ne ʻalu ai mo hono uaifí ki he ʻAsemipilī “Puleʻanga Ikuna” ʻi Twickenham, ʻIngilani ʻi he 1955. Naʻá ne pehē naʻe lava ke ne sio ki hono fakaleleʻaki ʻa e falekaí ʻa e ʻofá.

ʻI he ngaahi hongofuluʻi taʻu, naʻe ʻoatu ʻe he kau ngāue loto-leleí ʻi he anga-ʻofa ha meʻakai fakatupu ivi mo ʻikai totongi mamafa ke maʻu ʻaonga mei ai ʻa e kau maʻu fakataha-lahí. Ka ko e fatongia lahi ko ení naʻe faʻa fiemaʻu ki ai ha kau ngāue pole tokolahi ke ngāue ʻi ha ngaahi houa lōloa pea aʻu ʻo nau tō mei ha konga pe kotoa ʻo e polokalamá. Naʻe fakafaingofuaʻi ʻa e ngaahi fokotuʻutuʻu ʻo e feimeʻakai ki he fakataha-lahí ʻi he ngaahi feituʻu lahi ʻi he konga ki mui ʻo e 1970. Kamata leva ʻi he 1995, naʻe kole ki he kau fakafofongá ke nau haʻu pē mo ʻenau meʻakai ki he ngaahi fakataha-lahí. Naʻe malava ai heni ʻa e faʻahinga naʻa nau teuteu mo tufa ʻa e meʻakaí ke fiefia ʻi he polokalama fakalaumālié mo e feohi faka-Kalisitiané. *

Kuo pau pē ʻoku koloaʻaki ʻe Sihova ʻa e faʻahinga ko ia ʻoku nau ngāue mālohi maʻa honau kaungātuí! ʻOku manatu melie nai ʻa e niʻihi fekauʻaki mo e ngaahi ʻaho fakafiefia ko ia ʻo e ngāue ʻi he falekaí. Ka ko e meʻa ʻe taha ʻoku paú: ʻOku kei hoko pē ʻa e ʻofá ko e uho ia ʻo ʻetau ngaahi fakataha-lahí—Sione 13:34, 35.