1. (a) Ko e hā ʻoku mātuʻaki mahuʻinga ai he taimí ni ʻetau faitau mo Sētané? (e) ʻOku tau ʻilo fēfē ʻe lava ke tau ikuna ʻi he faitau mo Sētané?

 ʻOKU faitau ʻa Sētane mo e kau pani ʻoku kei toe ʻi he māmaní mo e “fanga sipi kehe.” (Sione 10:16) ʻI he toe siʻi hono taimí, ʻoku loto ʻa e Tēvoló ke fakaʻauha ʻa e tui ʻa e tokolahi taha ʻo e kau sevāniti ʻa Sihová. (Lau ʻa e Fakahā 12:9, 12.) Ka ʻoku lava ke tau ikuna ʻi he faitau mo Sētané. ʻOku pehē ʻe he Tohi Tapú: “Talitekeʻi ʻa e Tēvoló, pea te ne hola meiate kimoutolu.”—Sēm. 4:7.

2, 3. (a) Ko e hā ʻoku loto ai ʻa Sētane ke tui ʻa e kakaí ʻoku ʻikai ke ne ʻi aí? (e) ʻOku anga-fēfē hoʻo ʻiloʻi ko e tokotaha moʻoni ʻa Sētane?

² ʻOku fakaoliʻia ʻa e tokolahi ʻi he foʻi fakakaukau ʻo pehē ʻoku ʻi ai ʻa e Sētane. Kia kinautolu, ko Sētane mo e kau tēmenioó ko e faʻahinga pē ia ʻoku ʻasi ʻi he ngaahi tohi, faiva fakailifia mo e ngaahi keimi vitiō. ʻOku ongoʻi ʻe he kakai peheé kapau ʻokú ke poto, heʻikai te ke tui ʻoku ʻi ai ha ngaahi laumālie fulikivanu. ʻOku hohaʻa ʻa Sētane ki he ʻikai tui ʻa e kakaí ko ia mo ʻene kau tēmenioó ko e faʻahinga moʻoni? ʻIkai. ʻOku faingofua ange kia Sētane ke ne kākaaʻi ʻa e faʻahinga ʻoku veiveiua ki heʻene ʻi aí. (2 Kol. 4:4) ʻOku pouaki moʻoni ʻe Sētane ʻa e ngaahi fakakaukau hangē ko ení koeʻuhí ke ne lava ʻo takihalaʻi ai ʻa e kakaí.

 ³ ʻI he tuʻunga ko e kau sevāniti ʻa Sihová, ʻoku ʻikai ke takihalaʻi kitautolu. ʻOku tau ʻiloʻi ko e Tēvoló ko e tokotaha moʻoni. ʻOku tau ʻilo fēfē eni? ʻOku tala mai ʻe he Tohi Tapú kia kitautolu naʻe lea ʻa Sētane kia ʻIvi fakafou ʻi ha ngata. (Sēn. 3:1-5) Naʻá ne talanoa mo Sihova, ʻo fehuʻia ʻa e ngaahi fakaueʻiloto ʻa Siopé. (Siope 1:9-12) Naʻe feinga ʻa Sētane ke ʻahiʻahiʻi ʻa Sīsū. (Māt. 4:1-10) Pea hili ʻa e hoko ʻa Sīsū ʻo Tuʻi ʻi he 1914, naʻe kamata ʻa Sētane “ke faitau” mo e kau pani ʻoku kei toe ʻi he māmaní. (Fkh. 12:17) ʻOku hokohoko atu ʻa e faitau ko ení ʻi he feinga ʻa e Tēvoló ke fakaʻauha ʻa e tui ʻa e kau paní mo e fanga sipi kehé. Ke ikuna ʻi he faitau ko ení, kuo pau ke tau faitau mo Sētane pea tauhi ke mālohi ʻetau tuí. ʻOku lāulea ʻa e kupu ko ení ki he founga ʻe tolu ke fai pehē aí.

4. ʻOku anga-fēfē hoko ʻa Sētane ko e faʻifaʻitakiʻanga lahi taha ia ʻo e pōlepolé?

⁴ ʻOku hīkisia ʻaupito ʻa Sētane. Naʻe poleʻi ʻe he ʻāngelo fulikivanu ko ení ʻa e totonu ʻa e ʻOtuá ke pulé, pea naʻá ne feinga ke ʻai ʻa e niʻihi kehé ke lotu ange kiate ia kae tuku ʻa Sihova ia. Ko ia ʻa e faʻifaʻitakiʻanga lelei taha ʻo e pōlepolé mo e hīkisiá. Ko ia ai, ko e founga ʻe taha ʻe lava ke tau faitau ai mo Sētané ko hono talitekeʻi ʻa e pōlepolé pea hoko ʻo anga-fakatōkilalo. (Lau ʻa e 1 Pita 5:5.) Ka ko e hā ʻa e pōlepole? ʻOku kovi maʻu pē ia?

5, 6. (a) ʻOku kovi maʻu pē ʻa e pōlepolé? Fakamatalaʻi. (e) Ko e hā ʻa e faʻahinga pōlepole ʻoku fakatuʻutāmakí, pea ko e hā ʻa e faʻifaʻitakiʻanga Fakatohitapu ʻe niʻihi ʻo e meʻá ni?

⁵ Fakatatau ki he tikisinale ʻe taha, ko e pōlepolé ko ha ongoʻi ia ʻo e falala-pau mo e tokaʻi pē kitautolu. Pehē foki “ko ha ongoʻi fiemālie ia koeʻuhí ko koe pe ko e kakai ʻoku mou vāofí kuo mou fai ha meʻa lelei pe maʻu ha meʻa lelei.” ʻOku ʻikai hala ke ongoʻi pehē. Naʻe pehē ʻe he ʻapositolo ko Paulá ki he fanga tokoua ʻi Tesalonaiká: “Ko kimautolu tonu ʻoku mau laukauʻaki ai kimoutolu ʻi he haʻohaʻonga ʻo e ngaahi fakatahaʻanga ʻa e ʻOtuá koeʻuhí ko hoʻomou kātaki mo e tui ʻi he kotoa ʻo homou ngaahi fakatangá pea mo e ngaahi mamahi ko ia ʻoku mou tofanga aí.” (2 Tes. 1:4) Ko ia ko e ongoʻi lelei fekauʻaki mo e ngāue ʻa e niʻihi kehé pea aʻu ʻo maʻu ha pōlepole ʻia kitautolú ʻe lava ke tau maʻu ʻaonga mei ai. ʻOku ʻikai fiemaʻu ke tau maaʻi hotau fāmilí, anga fakafonuá pe feituʻu naʻa tau tupu hake aí.—Ngā. 21:39.

⁶ Kae kehe, ʻoku ʻi ai ʻa e faʻahinga pōlepole ia ʻe lava ke ne maumauʻi ʻa e ngaahi vahaʻangataé, tautefito ki heʻetau kaumeʻa mo Sihová. Ko e faʻahinga pōlepole ko ení ʻe lava ke ne ʻai ke tau ongoʻi loto-mamahi ʻi hano akonakiʻi kitautolu. ʻE aʻu ʻo lava ke ne ʻai kitautolu ke talitekeʻi ʻa e akonakí kae ʻikai tali anga-fakatōkilalo ia. (Saame 141:5) ʻOku fakamatalaʻi ʻa e faʻahinga pōlepole ko ení ko e fakakaukau tōtuʻa fekauʻaki mo kitautolu pe ko ha “fakakaukau hīkisia ʻoku fakahaaʻi ʻe he kakai ʻoku nau tui pe faʻa fakaʻuhinga hala ʻoku nau lelei ange ʻi he niʻihi kehé.” ʻOku fehiʻa ʻa Sihova ʻi he hīkisiá mo e pōlepolé. (ʻIsi. 33:28; ʻĒmosi 6:8) Ka ʻoku saiʻia ai ʻa Sētane ʻi he taimi ʻoku faʻifaʻitaki ai ʻa e faʻahinga ʻo e tangatá ki heʻene hīkisiá ʻaki ʻa e pōlepole fekauʻaki mo kinautolu. Sioloto atu ki he fiefia ʻa Sētane ʻi he taimi naʻe fakahaaʻi ai ʻe Nimilote, Felo mo ʻApisalome ʻa e pōlepole taʻetotonu ʻaki ʻenau hīkisia! (Sēn. 10:8, 9; ʻEki. 5:1, 2; 2 Sām. 15:4-6) Ko e pōlepolé ko e toe ʻuhinga ia ʻe taha naʻe mole ai meia Keini hono vahaʻangatae mo e ʻOtuá. Naʻe akonakiʻi tonu ʻe Sihova ʻa Keini, ka naʻe fuʻu pōlepole ʻa Keini ke fanongo. Naʻá ne anga-fefeka ʻo tukunoaʻi ʻa e fakatokanga ʻa e ʻOtuá, pea ʻikai toumoua ke faiangahala kia Sihova.—Sēn. 4:6-8.

7, 8. (a) Ko e hā ʻa e lau-lanu, pea ʻoku anga-fēfē ʻene fekauʻaki mo e pōlepolé? (e) Fakamatalaʻi ʻa e founga ʻe lava ai ke fakaʻauha ʻe he pōlepolé ʻa e melino ʻa ha fakatahaʻanga.

⁷ ʻI he ʻahó ni, ʻoku fakahaaʻi ʻe he kakaí ʻa e pōlepolé ʻi he ngaahi founga fakatupu maumau lahi. ʻOku fakafekauʻaki he taimi ʻe niʻihi ʻa e pōlepolé ki he lau-lanú. Fakatatau ki he tikisinale ʻe taha, ko e lau-lanú ko e tomuʻa fehiʻa ki he kakai ʻoku kau ki ha matakali kehe. ʻOku toe ʻuhinga ia ki he “tui ko e kakai ʻo e matakali kehekehe ʻoku  nau maʻu ʻa e ʻulungaanga mo e ngaahi malava kehekehe, pea ko e ngaahi matakali ʻe niʻihi ʻoku fakanatula ke nau māʻolunga pe māʻulalo.” Ko e lau-lanú ʻoku iku ia ki he ngaahi fekeʻikeʻi, tau pea aʻu ki he tāmate fakatokolahi.

⁸ Ko e moʻoni, ʻoku totonu ke ʻoua ʻe hoko ha ngaahi meʻa pehē ʻi he fakatahaʻanga Kalisitiané. Neongo ia, ko e ngaahi taʻefelotoi ʻi he vahaʻa ʻo e fanga tokouá mo e fanga tuofāfiné ʻe kamata nai ʻi he pōlepole pea ʻe lava ke hoko ʻo taʻemapuleʻi. Naʻe hoko ia ki he niʻihi ʻo e muʻaki kau Kalisitiané, ʻa ia ko e ʻuhinga ia naʻe ʻeke ai ʻe Sēmisi kia kinautolu ʻa e fehuʻi mālohi ko ení: “Ko e hā ʻa e tupuʻanga ʻo e ngaahi tau mo e ngaahi fekeʻikeʻi ʻoku ʻi he lotolotonga ʻo kimoutolú?” (Sēm. 4:1) Kapau ʻoku tau ongoʻi tāufehiʻa ki he niʻihi kehé pea ongoʻi ʻoku tau lelei ange ʻia kinautolu, te tau leaʻaki pe fai nai ha meʻa ʻe fakalotomamahi moʻoni kia kinautolu. (Pal. 12:18) ʻOku hā mahino, ʻe lava ke maumauʻi ʻe he pōlepolé ʻa e melino ʻa ha fakatahaʻanga.

9. ʻOku anga-fēfē hono tokoniʻi kitautolu ʻe he Tohi Tapú ke talitekeʻi ʻa e lau-lanú mo e faʻahinga kehe ʻo e pōlepole taʻetotonú? (Sio ki he ʻuluaki fakatātā ʻi he kupú ni.)

⁹ Kapau te tau hehema ke ongoʻi ʻoku tau lelei ange ʻi he niʻihi kehé, ʻoku fiemaʻu ke tau manatuʻi ʻoku fehiʻa ʻa Sihova “kiate kinautolu fua pe ʻoku loto afungi.” (Pal. 16:5) ʻOku fiemaʻu foki ke tau sivisiviʻi hotau lotó pea ʻeke hifo kia kitautolu, ‘ʻOku ou ongoʻi ʻoku ou lelei ange ʻi he kakai ʻo ha matakali, fonua pe anga fakafonua ʻe taha?’ Kapau ko ia, ʻoku ngalo ʻia kitautolu ko e ʻOtuá “naʻá ne ngaohi mei he tangata pē taha ʻa e puleʻanga kotoa pē ʻo e tangatá.” (Ngā. 17:26) ʻI he founga ko iá, ko kitautolu kotoa ko e matakali pē taha koeʻuhí naʻe haʻu ʻa e tokotaha kotoa pē meia ʻĀtama. ʻOku fakavalevale moʻoni ke tui naʻe ngaohi ʻe he ʻOtuá ʻa e matakali ʻe niʻihi ʻo lelei ange ʻi ha matakali kehe. Kapau ʻoku tau fakakaukau pehē, ʻoku tau fakaʻatā ai ʻa Sētane ke ne fakaʻauha ʻetau ʻofa mo e fāʻūtaha faka-Kalisitiané. (Sione 13:35) Ke faitau mo Sētane pea ikuná, kuo pau ke tau fakaʻehiʻehi mei he faʻahinga pōlepole taʻetotonu kotoa pē.—Pal. 16:18.

10, 11. (a) Ko e hā ʻoku faingofua ai ke ʻofa ki he māmaní? (e) Ko e hā ʻa e nunuʻa ʻo e ʻofa ʻa Tīmasi ki he māmaní?

¹⁰ Ko Sētane ʻa e “pule ʻo e māmani ko ení,” pea ʻokú ne puleʻi ia. (Sione 12:31; 1 Sio. 5:19) Ko e lahi ʻo e ngaahi meʻa ʻoku pouaki ʻe he māmani ko ení ʻoku fepaki ia mo e ngaahi tuʻunga ʻa e Tohi Tapú. Ko e moʻoni, ʻoku ʻikai kovi ʻa e meʻa kotoa pē ʻi he māmaní. Kae kehe, ʻe lava ke tau fakapapauʻi ʻe ngāuekoviʻaki ʻe Sētane hono māmaní ke ngāueʻaki ʻetau ngaahi holí pea feinga ke ʻai ke tau faiangahala. Pe te ne feinga ke ʻai kitautolu ke tau ʻofa ki he māmaní kae liʻaki ʻetau lotu kia Sihová.—Lau ʻa e 1 Sione 2:15, 16.

¹¹ Naʻe ʻofa ʻa e muʻaki kau Kalisitiane ʻe niʻihi ki he māmaní. Ko e fakatātaá, naʻe tohi ʻe Paula: “Ko Tīmasi kuó ne liʻaki au koeʻuhi naʻe ʻofa ia ʻi he ngaahi meʻa ʻo e fokotuʻutuʻu lolotongá.” (2 Tīm. 4:10) ʻOku ʻikai tala mai hangatonu ʻe he Tohi Tapú ʻa e konga ʻo e māmani ko eni naʻe ʻofa ai ʻa Tīmasí, ʻa ia naʻá ne ʻai ia ke ne liʻaki ʻa Paulá. ʻOku pau pē naʻe kamata ke ʻofa ʻa Tīmasi ʻi he ngaahi meʻa fakamatelié ʻo lahi ange ia ʻi heʻene ngāue kia Sihová. Kapau naʻe moʻoni ia, naʻe mole meia Tīmasi ʻa e faingamālie ke maʻu ʻa e ngaahi monū fakafiefia ʻi he ngāue ʻa e ʻOtuá. Naʻe tuha moʻoni ia? ʻIkai. Naʻe mei hoko ai pē ʻa Tīmasi ko e tokoni ʻo Paula. Heʻikai ʻaupito malava ʻe he māmaní ke ʻoange kiate ia ha meʻa ʻe lelei ange ia ʻia Sihova!—Pal. 10:22.

12. ʻE lava fēfē ke ngāuekoviʻaki ʻe Sētane ʻetau ngaahi holí ʻi hono ngāueʻaki ʻa e “mālohi kākā ʻo e koloá”?

¹² ʻE lava ke hoko ʻa e meʻa tatau kia kitautolu he ʻahó ni. ʻI he tuʻunga ko e kau Kalisitiané, ʻoku tau angamaheniʻaki ʻa e loto ke tokonaki maʻa kitautolu mo hotau fāmilí. (1 Tīm. 5:8) ʻOku loto ʻa Sihova ke tau fiefia ʻi he moʻuí. ʻOku tau ʻilo ia koeʻuhí naʻá ne ʻoange kia ʻĀtama mo ʻIvi ha palataisi fakaʻofoʻofa ke na nofo ai. (Sēn. 2:9) Ka ʻe lava ʻa Sētane ke ne ngāuekoviʻaki ʻetau ngaahi holí ʻi hono ngāueʻaki ʻa e “mālohi kākā ʻo e koloá.”  (Māt. 13:22) ʻOku fakakaukau ʻa e tokolahi ko e paʻangá mo e ngaahi meʻa fakamatelié ʻe ʻai ai kinautolu ke nau fiefia pe lavameʻa. Kapau ʻoku tau fakakaukau pehē, ʻe lava ke ne ʻai ke mole meia kitautolu ʻa e meʻa mahuʻinga taha ʻoku tau maʻú, ko ʻetau kaumeʻa mo Sihová. Naʻe fakatokanga ʻa Sīsū: “ʻOku ʻikai lava ha taha ke ngāue fakatamaioʻeiki ki ha ʻeiki ʻe toko ua, he te ne fehiʻa ki he taha kae ʻofa ki he taha, pe te ne pīkitai ki he taha kae taʻetokaʻi ʻa e taha. Heʻikai lava ke mou ngāue fakatamaioʻeiki ki he ʻOtuá pea ki he Koloá.” (Māt. 6:24) Kapau ʻoku tau ngāue fakatamaioʻeiki pē ki he ngaahi meʻa fakamatelié, kuo ʻosi tuku ʻetau tauhi kia Sihová. Ko e meʻa tofu pē ia ʻoku loto ʻa Sētane ke tau faí. ʻOfa ke ʻoua ʻaupito te tau tuku ʻa e paʻangá pe ko e ngaahi meʻa ʻoku lava ke fakatau mai ʻakí ke hoko ʻo mahuʻinga ange ia ʻi heʻetau kaumeʻa mo Sihová. Ke faitau mo Sētane pea ikuná, kuo pau ke tau maʻu ha fakakaukau totonu ki he ngaahi meʻa fakamatelié.—Lau ʻa e 1 Tīmote 6:6-10.

13. Kuo anga-fēfē hono pouaki ʻe he māmani ko ení ha fakakaukau hala fekauʻaki mo e nofo malí mo e fehokotaki fakasinó?

¹³ Ko e tauhele ʻe taha ʻa Sētané ko e feʻauakí. ʻOku fakakaukau ʻa e kakai tokolahi ko e hoko ʻo faitōnunga ki ha husepāniti pe ko ha uaifi, kae pehē ki he nofo malí tonu, kuo ʻolokuonga, pea fakangatangata ai ʻenau tauʻatāiná. Ko e fakatātaá, naʻe pehē ʻe ha fefine ʻeti faiva ʻoku taʻemalava ke faitōnunga ki he tokotaha. Naʻá ne tānaki mai, “ʻOku ʻikai te u ʻilo ha taha ʻokú ne faitōnunga pe loto ke fai pehē.” Naʻe pehē ʻe ha tangata ʻeti faiva, “ʻOku ʻikai te u fakapapauʻi pe ko hotau natula moʻoní ia ke fakataha mo ha taha ʻi he kotoa ʻetau moʻuí.” Kuo pau pē ʻoku fiefia lahi ʻa Sētane ʻi he taimi ʻoku fakaangaʻi ai ʻe he kakai ongoongoá ʻa e meʻaʻofa ʻa e ʻOtuá ko e nofo malí. ʻOku ʻikai poupouʻi ʻe he Tēvoló ʻa e fokotuʻutuʻu ʻo e nofo malí, pea ʻoku ʻikai te ne loto ke lavameʻa ʻa e nofo malí. Ko ia ke faitau mo Sētane pea ikuná, kuo pau ke tau maʻu ʻa e anga ʻo e vakai ʻa e ʻOtuá ki he nofo malí.

14, 15. Ko e hā ʻe lava ke ke fai kapau ʻoku fakataueleʻi koe ke ke feʻauaki?

¹⁴ Pe ʻoku tau mali pe taʻemali, kuo pau ke tau ngāue mālohi ke talitekeʻi ʻa e faʻahinga kotoa ʻo e feʻauakí. ʻOku faingofua eni? ʻIkai ʻaupito! Ko e fakatātaá, kapau ko ha toʻutupu koe, te ke fanongo nai ki he pōlepoleʻaki ʻe ho kaungāakó ʻa e fehokotaki fakasino mo ha taha pē ʻoku nau loto ki ai. ʻOku nau toe pōlepoleʻaki ʻa e feʻaveʻaki pōpoaki taʻetaau, ʻa ia ko hono ʻave ʻa e ngaahi pōpoaki mo e ngaahi ʻata fakalielia ʻi heʻenau ngaahi telefoni toʻotoʻó. Ko hono moʻoní, ʻi he ngaahi fonua ʻe niʻihi, ko e feʻaveʻaki pōpoaki taʻetāú, ʻoku tatau pē ia mo hono ʻave ki ha taha ha ʻata fakalielia ʻo ha kiʻi tama. ʻOku pehē ʻe he Tohi Tapú: “Ko ia ʻokú ne tōʻongaʻaki ʻa e feʻauakí ʻoku faiangahala ia ki hono sino pē ʻoʻoná.” (1 Kol. 6:18) Ko e lahi ʻo e faingataʻá mo e maté ko e nunuʻa ia ʻo e ngaahi mahaki ʻoku mafola ʻi he fehokotaki fakasinó. Pea ko e tokolahi taha ʻo e toʻutupu kuo nau fehokotaki fakasino kae ʻikai malí ʻoku nau pehē ʻoku nau fakaʻiseʻisa ʻi he meʻa naʻa nau faí. Ko e māmani ʻo e fakafiefiá ʻoku nau loto ke tau tui ʻoku ʻikai ha nunuʻa ia ʻo hono maumauʻi ʻa e ngaahi lao ʻa e ʻOtuá. Kapau te tau tui ki he ngaahi loi ko iá, ʻe lava ke tau hoko ʻo takihalaʻi ʻe he “mālohi kākā ʻo e angahalá.”—Hep. 3:13.

¹⁵ Kapau ʻoku fakataueleʻi koe ke fai ha feʻauaki, ko e hā ʻe lava ke ke faí? Fakatokangaʻi ʻoku ʻi ai ho vaivaiʻanga. (Loma 7:22, 23) Lotu ki he ʻOtuá ki ha mālohi. (Fil. 4:6, 7, 13) Fakaʻehiʻehi mei he ngaahi tuʻunga ʻe lava ke ne fakatupunga ai ke ke feʻauakí. (Pal. 22:3) Pea ʻi he taimi ʻoku hoko ai ha fakatauele, talitekeʻi leva ia.—Sēn. 39:12.

16. Ko e hā naʻe leaʻaki ʻe Sīsū ʻi he taimi naʻe feinga ai ʻa Sētane ke ʻahiʻahiʻi iá, pea ko e hā ʻe lava ke tau ako mei he faʻifaʻitakiʻanga ko iá?

¹⁶ Naʻe fokotuʻu mai ʻe Sīsū ha faʻifaʻitakiʻanga mālohi kia kitautolu. Naʻe ʻikai kākaaʻi ia ʻe he ngaahi palōmesi ʻa Sētané. Naʻa mo haʻane kiʻi  tuʻu ʻo fakakaukau ki ai. ʻI hono kehé, naʻá ne tala ange leva kia Sētane: “Kuo tohi.” (Lau ʻa e Mātiu 4:4-10.) Naʻe ʻiloʻi ʻe Sīsū ʻa e Folofola ʻa e ʻOtuá, ko ia naʻe malava ke ne toʻo lea leva mei he ngaahi konga Tohi Tapú ʻi he feinga ʻa Sētane ke ʻahiʻahiʻi iá. Ke faitau mo Sētane pea ikuná, kuo pau ke ʻoua te tau fakaʻatā kitautolu ke ʻahiʻahiʻi ke fakahoko ha feʻauaki.—1 Kol. 6:9, 10.

17, 18. (a) Ko e hā ʻa e ngaahi tauhele kehe ʻoku ngāueʻaki ʻe Sētané, pea ko e hā ʻoku tau ʻamanekina ai iá? (e) Ko e hā ʻe hoko kia Sētané, pea ʻoku fakalototoʻaʻi fēfē ai koe ke kātakí?

¹⁷ Ko e hīkisiá, tuli ki he meʻa fakamatelié mo e feʻauakí ko e tauhele pē eni ʻe tolu ʻo e ngaahi tauhele ʻa Sētané. ʻOku ʻi ai mo e ngaahi tauhele lahi ange. Ko e fakatātaá, ko e kau Kalisitiane ʻe niʻihi ʻoku ʻi ai honau ngaahi fāmili ʻoku nau fakafepakiʻi kinautolu pe fakakataʻaki kinautolu ʻe honau ngaahi kaungāakó. ʻOku nofo ʻa e niʻihi ʻi he ngaahi fonua ʻoku feinga ai ʻa e puleʻangá ke taʻofi ʻenau malangá. ʻOku tau ʻamanekina te tau fehangahangai mo e ngaahi faingataʻa pehē. Naʻe fakatokanga mai ʻa Sīsū tonu: “Te mou hoko ko e fehiʻanekina ʻe he kakai kotoa pē koeʻuhi ko hoku hingoá, ka ko ia kuó ne kātaki ʻo aʻu ki he ngataʻangá ko e tokotaha ia ʻe fakahaofí.”—Māt. 10:22.

¹⁸ ʻE lava fēfē ke tau faitau mo Sētane pea ikuná? Naʻe pehē ʻe Sīsū: “ʻI he kātaki mei hoʻomou tafaʻakí, te mou maʻu mai ai hoʻomou moʻuí.” (Luke 21:19) Heʻikai lava ke tuʻuloa ha meʻa ʻe fai ʻe he tangatá ke uesia kitautolu. Heʻikai lava ʻe ha taha ke toʻo ʻetau kaumeʻa mo e ʻOtuá tuku kehe ka tau fakaʻatā ia ke hoko. (Loma 8:38, 39) Neongo kapau ʻe mate ha niʻihi ʻo e kau sevāniti faitōnunga ʻa Sihová, ʻoku ʻikai ʻuhinga ia aí ʻoku ikuna ʻa Sētane. ʻE fokotuʻu hake kinautolu ʻe Sihova. (Sione 5:28, 29) Ka ʻoku ʻikai ha kahaʻu ia ʻo Sētane. Hili hono fakaʻauha atu ʻa e māmani fulikivanu ko ení, ʻe lī ia ki he luo taʻehanotakelé ʻi he taʻu ʻe 1,000. (Fkh. 20:1-3) ʻI he ngataʻanga ʻo e taʻu ʻe 1,000 ʻo e pule ʻa Kalaisí, “ʻe tukuange mai ʻa Sētane mei hono pilīsoné” pea te ne feinga fakaʻosi ke takihalaʻi ʻa e faʻahinga haohaoa ʻo e tangatá. Hili iá, ʻe fakaʻauha ia. (Fkh. 20:7-10) Neongo ʻoku ʻikai ha kahaʻu ʻo e Tēvoló, ʻoku ʻi ai ho kahaʻu ia ʻo koe! Hokohoko atu ke faitau mo Sētane, pea tauhi ke mālohi hoʻo tuí. ʻE lava ke ke faitau mo Sētane pea ikuna!