1. (a) Ko e hā ʻa e fatongia naʻe ʻoange ʻe he ʻOtuá kia ʻĀtamá? (e) Talu mei ai, kuo anga-fēfē hono ngāueʻaki ʻe he kakai ʻa e ʻOtuá ʻa e meʻaʻofa ko e leá?

 NAʻE foaki ʻe Sihova ko e ʻOtuá ki he faʻahinga ʻo e tangatá ʻa e meʻaʻofa ko e leá. ʻI he ngoue ʻo ʻĪtení, naʻe ʻoange ai ʻe he ʻOtuá kia ʻĀtama ʻa e fatongia ke ne fakahingoa ʻa e kotoa ʻo e fanga manú. Naʻe fakahingoa ʻe ʻĀtama ʻa e fanga manu taki taha ʻaki ha hingoa lelei. (Sēn. 2:19, 20) Talu mei ai mo hono ngāueʻaki ʻe he kakai ʻa e ʻOtuá ʻa e meʻaʻofa ko e leá ke nau fakahīkihikiʻi ʻa Sihova mo tala ki he niʻihi kehé ʻo fekauʻaki mo ia. Ki muí ni mai, kuo ngāueʻaki ʻe he kakai ʻa e ʻOtuá ʻa e meʻaʻofa ko ení ke liliu ʻa e Tohi Tapú, koeʻuhi ke lava ai ʻo ako ʻa e kakai tokolahi ange fekauʻaki mo Sihova.

2. (a) Ko e hā ʻa e ngaahi tefitoʻi moʻoni naʻe muimui ki ai ʻa e kau mēmipa ʻo e Kōmiti Liliu Tohi Tapu Māmani Foʻoú ʻi heʻenau ngāué? (e) Ko e hā te tau ako ki ai ʻi he kupu ko ení?

² ʻOku laui afe ʻa e ngaahi liliu Tohi Tapú, ka ʻoku tonu ange ʻa e niʻihi ʻi he niʻihi. Ke liliu totonu ʻa e Tohi Tapú, naʻe fakapapauʻi ai ʻe he Kōmiti Liliu Tohi Tapu Māmani Foʻoú ke nau muimui ʻi he ngaahi tefitoʻi moʻoni ʻe tolu: (1) Fakalāngilangiʻi ʻa e huafa ʻo e ʻOtuá pea ke toutou ngāueʻaki ia ʻi heʻene Folofolá ʻo hangē ko ia ʻi he muʻaki tataú. (Lau ʻa e Mātiu 6:9.) (2) Liliu fakafoʻilea ʻa e  muʻaki pōpoakí ʻo ka malava. Kapau ʻoku ʻikai malava, liliu ʻa e ʻuhinga totonú. (3) Ngāueʻaki ʻa e lea ʻoku faingofua ke lau mo mahinoʻí. a (Lau ʻa e Nehemaia 8:8, 12.) Ko e ngaahi tefitoʻi moʻoni ʻe tolu ko ení kuo muimui ki ai ʻa e kau liliu lea ʻo e New World Translation ʻi he ngaahi lea ʻe 130 tupu. ʻI he kupu ko ení, te tau ako ai ki he founga ʻoku ngāueʻaki ai ʻa e ngaahi tefitoʻi moʻoni ko ení ki he New World Translation ʻa ia naʻe fakaleleiʻi ʻi he 2013, pea pehē ki hono liliu ki he ngaahi lea kehé.

3, 4. (a) Te tau maʻu ʻi fē ʻa e Tetakalamatoni? (e) Ko e hā kuo fai ʻe he ngaahi liliu Tohi Tapu lahi ʻo fekauʻaki mo e huafa ʻo e ʻOtuá?

³ Ko e huafa ʻo e ʻOtuá ʻoku fakafofongaʻi ia ʻe he mataʻitohi faka-Hepelū ʻe fā ʻa ia ʻoku ui ko e Tetakalamatoni. ʻOku lava ke tau maʻu ʻa e Tetakalamatoní ʻi he ngaahi maniusikilipi faka-Hepelū motuʻá, ʻo hangē ko e Ngaahi Takainga Tohi Tahi Maté. ʻOku lava ke tau toe maʻu ia ʻi he niʻihi ʻo e ngaahi tatau Sepituakini faka-Kalisí. Naʻe faʻu ʻa e ngaahi tatau ko ení ʻi he ngaahi taʻu ʻe 200 ki muʻa ʻia Kalaisí pea ʻi he taʻu ʻe 100 ki mui ʻia Kalaisí. ʻOku maongo ki he kakai tokolahi ʻi heʻenau sio ki he toutou hā ʻa e huafa ʻo e ʻOtuá ʻi he ngaahi maniusikilipi motuʻá.

⁴ ʻOku hā mahino, ko e huafa ʻo e ʻOtuá ʻoku totonu ke ʻi he Tohi Tapú. Ka ʻoku ʻikai ngāueʻaki ʻe he ngaahi liliu lahi ʻa e huafa ʻo e ʻOtuá. Ko e fakatātaá, ʻi he taʻu pē ʻe ua hili hono tukuange mai ʻa e Liliu Tohi Tapu ʻo e Māmani Foʻoú ʻo e Ngaahi Konga Tohi Tapu Faka-Kalisi Kalisitiané, naʻe tukuange mai leva ʻa e pulusinga naʻe fakaleleiʻi ʻo e American Standard Version. Ko e pulusinga ʻo e 1901 naʻe ngāueʻaki ai ʻa e huafa ʻo e ʻOtuá, ka ʻi hono fakaleleiʻi ʻi he 1952 naʻe toʻo ia mei ai. Ko e hā hono ʻuhingá? Naʻe ongoʻi ʻe he kau liliú ʻoku “taʻefeʻunga ʻaupito” ke ngāueʻaki ai ʻa e huafa ʻo e ʻOtuá. Ko e ngaahi liliu lahi, ʻi he faka-Pilitāniá mo e ngaahi lea kehé kuo nau fai ʻa e meʻa tatau.

5. Ko e hā ʻoku mahuʻinga ai ke ngāueʻaki ʻa e huafa ʻo e ʻOtuá ʻi he Tohi Tapú?

⁵ ʻOku mātuʻaki mahuʻinga ke fakakau ʻe he kau liliu leá ʻa e huafa ʻo e ʻOtuá? ʻIo! ʻOku finangalo ʻa Sihova, ko e Faʻutohi ʻo e Tohi Tapú ke ʻiloʻi ʻe he kakaí hono huafá. Ko ha tokotaha liliu lelei ʻoku totonu ke ne ʻiloʻi ʻa e meʻa ʻoku fiemaʻu ʻe he faʻutohí pea ʻoku totonu ke tākiekina ai ʻene ngaahi fili ki he liliú. ʻOku fakahaaʻi ʻe he ngaahi konga Tohi Tapu lahi ʻa e mahuʻinga ʻa e huafa ʻo e ʻOtuá pea kuo pau ke fakalāngilangiʻi ia. (ʻEki. 3:15; Saame 83:18; 148:13; ʻAi. 42:8; 43:10; Sione 17:6, 26; Ngā. 15:14) Pea naʻe fakamānavaʻi ʻe Sihova ʻa e kau hiki Tohi Tapú ke nau ngāueʻaki hono huafá ʻo tuʻo laui afe ʻi he ngaahi maniusikilipi motuʻá. (Lau ʻa e ʻIsikeli 38:23.) Ko ia, ʻi he taimi ʻoku toʻo ai ʻe he kau liliú ʻa e huafa ʻo e ʻOtuá, ʻoku ʻikai ai te nau fakaʻapaʻapaʻi ʻa Sihova.

6. Ko e hā naʻe tānaki mai ai ʻa e huafa ʻo e ʻOtuá ki he ngaahi konga Tohi Tapu kehe ʻe onó ʻi hono fakaleleiʻi ʻa e New World Translation?

⁶ ʻI he ʻahó ni, ʻoku toe lahi ange ʻa e fakamoʻoni ʻoku totonu ke tau ngāueʻaki ʻa e huafa ʻo Sihová. Ko e New World Translation kuo fakaleleiʻi ʻi he 2013, ʻoku ngāueʻaki ai ʻa e huafa ʻo e ʻOtuá ʻo tuʻo 7,216. ʻOku laka hake ʻi he tuʻo onó mei he pulusinga ki muʻá. Naʻe tānaki tuʻo nima mai ʻa e huafa ʻo e ʻOtuá koeʻuhí naʻe ʻiloʻi ia ki muí ni ʻi he Ngaahi Takainga Tohi Tahi Maté. b Ko e konga tohi ʻe nima ko ení ʻoku maʻu ia ʻi he 1 Sāmiuela 2:25; 6:3; 10:26; 23:14, 16. Ko hono onó ʻa e Fakamaau 19:18, ko e ola ia ʻo ha fekumi lahi ange ʻo e ngaahi maniusikilipi Fakatohitapu motuʻa alafalalaʻanga.

7, 8. Ko e hā ʻa e ʻuhinga ʻo e huafa Sihová?

 ⁷ ʻOku ongoʻi ʻe he kau Kalisitiane moʻoní ʻoku mahuʻinga ke mahinoʻi ʻa e ʻuhinga kakato ʻa e huafa ʻo e ʻOtuá. ʻOku ʻuhinga hono huafá ki he “ʻOkú Ne Fakatupunga ke Hoko.” c ʻI he kuohilí, naʻe fakamatalaʻi ai ʻi heʻetau ʻū tohí ʻa e ʻuhinga ʻo e huafa ʻo e ʻOtuá ʻi hono ngāueʻaki ʻa e ʻEkisoto 3:14, ʻa ia ʻoku pehē ai: “Ko Au Ko Au Ai Pe.” ʻI he pulusinga ʻo e 1984, naʻe fakamatalaʻi ai ko Sihová ʻokú ne fakatupunga ia ke ne hoko ki ha meʻa pē ʻokú ne fili ke fai ke fakahoko ʻene talaʻofá. d Kae kehe, ʻoku fakamatalaʻi ʻi he pulusinga kuo fakaleleiʻi ʻo e 2013: “Neongo ko e huafa Sihová ʻoku kau nai ʻi he fakakaukau ko ení, ʻoku ʻikai ke fakangatangata ai ʻa e meʻa ʻokú ne fili ke hoko ki aí. ʻOku toe kau ki ai ʻa e meʻa ʻokú ne fakatupunga ke hokó ʻi he fekauʻaki mo ʻene ngaahi fakatupú pea mo hono fakahoko ʻene taumuʻá.”

⁸ ʻOku fakatupunga ʻe Sihova ʻene ngaahi meʻa fakatupú ke nau hoko ki ha meʻa pē ʻokú ne fili ki ai. Ko e fakatātaá, naʻe fakatupunga ʻe he ʻOtuá ʻa Noa ke ne hoko ko e tokotaha tufunga ʻo e ʻaʻaké, ko Pesalili ko e tokotaha ngāue fakameaʻa pōtoʻi, ko Kitione ko ha pāteʻi tau pea naʻe hoko ʻa Paula ko ha misinale. Ko e huafa ʻo e ʻOtuá ʻoku ʻi ai hono ʻuhinga moʻoni ki heʻene kakaí, pea ko e ʻuhinga ia ʻoku hanga ai ʻe he Kōmiti Liliu Tohi Tapu Māmani Foʻoú ʻo fakakau ʻa e huafa ʻo e ʻOtuá ʻi he liliu ko ení.

9. Ko e hā kuo hoko ai ʻa hono liliu ʻo e Tohi Tapú ki he ngaahi lea kehé ko e meʻa mahuʻinga tahá ia?

⁹ ʻOku ʻalu ke toe lahi ange ʻa e ngaahi liliu Tohi Tapu ʻoku nau toʻo ʻa e huafa fakafoʻituitui ʻo e ʻOtuá. ʻI hono kehé, ʻoku nau ngāueʻaki ʻa e hingoa fakalakanga ko e “ʻEiki” pe hingoa fakalotofonua ʻo ha ʻotua. Ko e taha eni ʻo e ngaahi ʻuhinga tefito naʻe fakakaukau ai ʻa e Kulupu Pulé ʻoku mātuʻaki mahuʻinga ai ke maʻu ʻe he kakai mei he ngaahi lea kotoa, ha Tohi Tapu ʻoku fakalāngilangiʻi ai ʻa e huafa ʻo e ʻOtuá. (Lau ʻa e Malakai 3:16.) Ko ia ai, ko e huafa Sihová kuo fakalāngilangiʻi ia ʻi he Tohi Tapu New World Translation ʻi he lea ʻe 130 tupu.

10, 11. Ko e hā ʻoku faingataʻa ai he taimi ʻe niʻihi ʻa hono liliu ʻa e New World Translation ki he ngaahi lea kehé?

¹⁰ Kuo ʻi ai ha ngaahi palopalema ʻi he lolotonga hono liliu ʻa e New World Translation faka-Pilitāniá ki he ngaahi lea kehé. Ko e fakatātaá, ʻi he pulusinga faka-Pilitāniá naʻe ngāueʻaki ai ʻa e foʻi lea faka-Hepelū ko e “Seoli” ʻi he Koheleti 9:10 mo e ngaahi veesi kehe pē. Ko e foʻi lea ko ení ʻoku lahi hono ngāueʻaki ʻi he ngaahi Tohi Tapu faka-Pilitānia kehé. Kae kehe, ko e foi lea ko ení ʻoku ʻikai ke lava ʻo ngāueʻaki eni ʻi he ngaahi lea lahi koeʻuhí ko e tokolahi taha ʻo e kau lautohi ʻi he lea ko ení naʻe ʻikai te nau ʻiloʻi ʻa e foʻi lea faka-Hepelū ko e “Seoli.” ʻOku ʻikai hā ia ʻi heʻenau tikisinalé, pea naʻe fakakaukau ʻa e niʻihi naʻa ko ha hingoa ia ʻo ha feituʻu. ʻI he ngaahi ʻuhinga ko ení, naʻe ʻoatu ai ki he kau liliu leá ha ngofua ke nau liliu ʻa e foʻi lea faka-Hepelū ko e “Seoli” mo e foʻi lea faka-Kalisi ko e “Hētesi” ki he “Faʻitoka.” ʻOku tonu ʻa e liliu ko ení pea ʻoku ʻai ai ke toe mahino ange ʻa e konga tohí.

¹¹ Ko e foʻi lea faka-Hepelū mo faka-Kalisi ki he “soulu” naʻe toe faingataʻa ke liliu ki he ngaahi lea ʻe niʻihi. ʻI he ngaahi lea ko ení, ʻoku faʻa ʻuhinga ʻa e foʻi lea “soulu” ki ha faʻahikehe pe konga ʻoku mavahe mei he sinó hili ʻa e maté. Ke fakaʻehiʻehi mei he maʻuhala ko ení, naʻe ʻoatu ai ki he kau liliu leá ha ngofua ke nau liliu ʻa e foʻi lea “soulu” ʻo fakatatau ki he potutohi ʻoku hā aí. Ko hono fakamatalaʻi ʻo e ngaahi ʻuhinga  kehekehe ʻo e foʻi lea ko e “soulu” ʻoku maʻu ia ʻi he fakamatala fakalahi ʻo e New World Translation of the Holy Scriptures—With References. Ko ha fakamatala ʻaonga fekauʻaki mo e ngaahi foʻi lea faka-Hepelū mo faka-Kalisí ʻoku hā ia ʻi he fakamatala ʻi lalo ʻo e pulusinga foʻoú koeʻuhí ke faingofua hono lau mo mahinoʻi ʻa e fakamatala ʻi he Tohi Tapú.

12. Ko e hā ʻa e ngaahi liliu ʻe niʻihi ʻi hono fakaleleiʻi ʻa e pulusinga 2013? (Toe sio ki he kupu “Ko Hono Fakaleleiʻi ʻo e New World Translation 2013” ʻi he ʻīsiu ko ení.)

¹² Ko e ngaahi fehuʻi mei he kau liliu leá naʻe hā mei ai ʻoku malava ke ʻi ai ʻa e ngaahi maʻuhala ʻi ha konga Tohi Tapu. Ko ia ʻi Sepitema 2007, naʻe ʻoatu ai ʻe he Kulupu Pulé ha ngofua ke fakaleleiʻi ʻa e pulusinga faka-Pilitāniá. Naʻe vakaiʻi fakaʻāuliliki ai ʻe he kōmití ʻa e laui afe ʻo e ngaahi fehuʻi mei he kau liliu Tohi Tapú lolotonga hono fakaleleiʻi ʻa e pulusinga faka-Pilitāniá. Ko e ngaahi lea faka-Pilitānia motuʻá naʻe fetongi ʻaki ʻa e ngaahi lea ʻoku fakaonopooni ange, ʻo ne ʻai ai ke faingofua ange hono lau mo mahinoʻi ʻa e konga tohí kae kei tonu pē. Ko e ngaahi liliu Tohi Tapu kuo fakahoko ki muí ni ʻi he ngaahi lea kehé, naʻe toe tokoni ia ke fakaleleiʻi ai ʻa e konga tohí ʻi he lea faka-Pilitāniá.—Pal. 27:17.

13. ʻOku anga-fēfē ʻa e ongoʻi ʻa e tokolahi ʻo fekauʻaki mo hono fakaleleiʻi ʻa e pulusinga 2013?

¹³ ʻOku anga-fēfē ongoʻi ʻa e tokolahi ʻo fekauʻaki mo hono fakaleleiʻi ʻo e New World Translation ʻi he lea faka-Pilitāniá? Kuo maʻu ʻe he ʻuluʻi ʻapitanga ʻo e Kau Fakamoʻoni ʻa Sihova ʻi Brooklyn, Niu ʻIoké, ha tohi ʻo e houngaʻia mei he laui afe ʻo hotau fanga tokouá mo e fanga tuofāfiné. ʻOku ongoʻi ʻe he tokolahi ʻo hangē ko ia naʻe tohi ʻe ha tuofefine ʻe taha: “Ko e Tohi Tapú ko ha puha tukuʻanga koloa ʻoku fonu mahuohua ai ʻa e ngaahi siueli mahuʻingá. Ko hono lau ke māʻalaʻala ʻa e folofola ʻa Sihová ʻo ngāueʻaki ʻa e pulusinga 2013, ʻoku lava ke fakahoa ia ki hano sivisiviʻi ʻa e siueli taki taha, ʻi he fakaʻofoʻofaʻia ʻi hono ngaahi fuó, ngingilá, lanú mo hono fakaʻofoʻofá. Ko hono ʻomai ʻa e Folofolá ʻi he lea faingofuá kuo tokoniʻi ai au ke u toe vāofi ange mo Sihova, ʻo hangē ha tamai ʻokú ne puke au lolotonga ʻene lau mai ʻene ngaahi lea fakafiemālié.”

14, 15. ʻOku anga-fēfē ongoʻi ʻa e kakai ʻi he ngaahi lea kehé ʻo fekauʻaki mo e New World Translation?

¹⁴ Ko e kakai ko ia ʻoku ʻikai te nau lea ʻi he lea faka-Pilitāniá ʻoku nau toe houngaʻia ʻi he New World Translation. Naʻe pehē ʻe ha tangata taʻumotuʻa  mei Pulukālia ʻo fekauʻaki mo e pulusinga ʻi he lea faka-Pulukāliá: “Kuó u lau ʻa e Tohi Tapú ʻi he ngaahi taʻu lahi, ka kuo teʻeki ai ke u lau ha liliu Tohi Tapu ʻoku faingofua ange ke mahinoʻí pea mo aʻu ki he lotó.” ʻI tuʻunga meimei tatau, naʻe tohi ai ha tuofefine ʻAlipēnia: “He ongo fakaueʻiloto ē ko e Folofola ʻa e ʻOtuá ʻi he lea faka-ʻAlipēniá! Ko ha monū ia ke lea mai ʻa Sihova ʻi heʻemau leá tonu!”

¹⁵ ʻI he ngaahi fonua lahi, ʻoku totongi mamafa ʻa e Tohi Tapú pe faingataʻa ʻaupito ke maʻu ia. Ke maʻu ha Tohi Tapu ko ha tāpuaki lahi ia! Naʻe pehē ʻe ha līpooti mei Luanitā: “ʻI ha taimi fuoloa, naʻe ʻikai fakalakalaka ʻa e kakai tokolahi ʻi heʻenau ako mo e fanga tokouá koeʻuhí he naʻe ʻikai haʻanau Tohi Tapu. Naʻe ʻikai malava ke nau fakatau mai ʻa e Tohi Tapu ʻa e siasí. Pea naʻe ʻikai ke nau faʻa mahinoʻi māʻalaʻala ʻa e ʻuhinga ʻo e ngaahi veesi ʻe niʻihi, ʻa ia naʻe faingataʻa ai ʻenau fakalakalaká.” ʻI he taimi naʻa nau maʻu ai ʻa e New World Translation ʻi heʻenau lea tuʻufonuá, naʻe pehē ai ʻe ha ongo mātuʻa Luanitā mo ʻena fānau toʻutupu ʻe toko fā: “ʻOku mau fakamālō lahi kia Sihova mo e tamaioʻeiki anga-tonu mo potó ʻi hono ʻomai ʻa e Tohi Tapu ko ení. ʻOku mau masiva ʻaupito pea ʻikai ha paʻanga ke fakatau mai ha Tohi Tapu ki he mēmipa taki taha ʻo e fāmilí. Ka ʻi he taimi ní kuo mau taki taha ʻa e Tohi Tapu. Ke fakahāhā ʻemau houngaʻia kia Sihová, ʻoku mau lau ai ʻa e Tohi Tapú ko ha fāmili ʻi he ʻaho kotoa.”

16, 17. (a) Ko e hā ʻoku fiemaʻu ʻe Sihova mei hono kakaí? (e) Ko e hā ʻoku totonu ke tau fakapapauʻi ke faí?

¹⁶ Ko e New World Translation kuo fakaleleiʻí ʻe maʻu ia ʻi he ngaahi lea lahi ange ʻi he kahaʻú. ʻOku feinga ʻa Sētane ke taʻofi ʻa e ngāue ko ení, ka ʻoku tau ʻiloʻi ʻoku finangalo ʻa Sihova ke fanongo ʻene kakaí kotoa ʻi he taimi ʻokú ne lea mai ai kiate kinautolu ʻi ha founga ʻoku mahino mo māʻalaʻalá. (Lau ʻa e ʻAisea 30:21.) ʻOku vavé ni ke “fonu ʻa mamani ʻi he ʻiloʻi ʻo Sihova, ʻo hange ko e mafola ʻa e vai ʻi he tahi.”—ʻAi. 11:9.

¹⁷ Tau fakapapauʻi muʻa ke ngāueʻaki ʻa e meʻaʻofa kotoa meia Sihová, ʻo kau ai ʻa e liliu Tohi Tapu ko eni ʻoku fakalāngilangiʻi ai hono huafá. Tuku ke ne lea mai kiate koe ʻi he ʻaho kotoa ʻo fakafou ʻi heʻene Folofolá. ʻOku malava ke ne fanongo tokanga ki he kotoa ʻo ʻetau ngaahi lotú. Ko e founga fetuʻutaki eni te ne tokoniʻi ai kitautolu ke toe lahi ange ʻetau ʻilo kia Sihová, pea ʻe tupulaki ai pē ʻetau ʻofa kiate iá.—Sione 17:3.