Ko ʻEsitele a ko ha tokotaha maʻu lotu fakataha mo ʻene fānaú. “Naʻá ku tala ange ki heʻeku faifekaú ʻoku ou loto ke ako ʻa e Tohi Tapú,” ko ʻene laú ia. Ka naʻe ʻikai ʻaupito ke ne fie akoʻi ia. Naʻe iku ʻo ʻikai toe ʻalu ia ki he lotú. ʻOkú ne hoko atu: “Ko e kau maʻu lakanga ʻo e siasí naʻa nau tohi ʻo tala mahino mai kapau heʻikai lava ke u ʻalu ange, ʻoange pē ha paʻanga. Naʻá ku fakakaukau, ‘ʻoku ʻikai haʻanau tokanga ʻe taha pe te u ʻalu ange; ʻoku nau fiemaʻu pē ʻeku paʻangá.’”

Ko ʻEniselina, ko ha tokotaha lotu ia naʻá ne pehē: “ʻI hoku siasí, naʻa nau paasi tuʻo tolu ai ha kato lolotonga ʻa e lotu taki taha pea naʻe ʻamanekina meiate kimautolu ke fai ha foaki ʻi he taimi taki taha. Naʻa nau kole paʻanga maʻu pē. Naʻá ku fakakaukau hifo, ‘‘ʻOku ʻikai ke nau maʻu ʻa e laumālie ʻo e ʻOtuá.’”

ʻOku ngāueʻaki ʻe he ngaahi lotu ʻi ho feituʻú ʻa e founga fakaʻaiʻai fakahangatonu pe olopotó ke maʻu ai ha paʻanga? ʻOku fehoanaki ia mo e Tohi Tapú?

Ko Sīsū naʻá ne fokotuʻu ʻa e lotu faka-Kalisitiané, naʻá ne pehē: “Kuo mou maʻu taʻetotongi, foaki taʻetotongi.” (Mātiu 10:8) Ko e pōpoaki ʻo e Tohi Tapú ʻoku mahuʻinga taʻehanotatau pea ʻoku totonu ke malava ʻo maʻu ia ʻe he faʻahinga kotoa ʻoku nau fiemaʻu iá.

Naʻe anga-fēfē hono tokangaʻi ʻa e ngaahi fakamole ʻa e fakatahaʻangá ʻe he muʻaki kau Kalisitiané?

Ko e tokotaha taki taha naʻa nau foaki ʻa e “meʻa tofu pē ko ia kuó ne fakapapauʻi ʻi hono lotó, ʻo ʻikai ʻi he taʻefiefiefai pe ʻi hono kounaʻi, he ʻoku ʻofa ʻa e ʻOtuá ʻi ha tokotaha foaki fiefia.” (2 Kolinitō 9:7) Naʻe pehē ʻe he ʻapositolo ko Paulá: “Naʻa mau ngāue ʻi he pō mo e ʻaho koeʻuhi ke ʻoua te mau hilifaki ai ha kavenga fakamole lahi ki ha taha pē ʻo kimoutolu ʻi he taimi ne mau malangaʻi atu ai ʻa e ongoongo lelei.” (1 Tesalonaika 2:9) Naʻe ngāue ʻa Paula ko ha tokotaha ngaohi-tēniti ke tokoni ki heʻene ngāue fakafaifekaú.—Ngāue 18:2, 3.

ʻOku anga-maheniʻaki ʻe he Kau Fakamoʻoni ʻa Sihová ʻa e fakataha ʻi he ngaahi fale feʻunga ʻa ia ʻoku ui ko e ngaahi Fale Fakatahaʻangá. ʻOku anga-fēfē hono feau ʻa e ngaahi fakamolé? ʻOku ʻikai ʻaupito te nau paasi holo ha ngaahi peleti tānaki paʻanga; pea ʻoku ʻikai te nau ʻoatu ha ngaahi sila ko ha kole ki ha tokoni paʻanga. ʻI hono kehé, ko ha taha pē ʻokú ne houngaʻia ʻi he polokalama fakalaumālié ʻoku lava ke ne tuku fakapotopoto ha tokoni ki he puha meʻaʻofa ʻi he Fale Fakatahaʻangá.

Ko e makasini ko ení ʻoku mahino taʻetoeveiveiua ʻoku ʻi ai hono fakamole fakapaʻanga ki hono pulusí mo hono fakaheka vaká. Neongo ia, ʻe ʻikai ʻaupito te ke sio koe ki ha tuʻuaki fakakomēsiale pe ko ha kole paʻanga. ʻOku tō ʻa e fakamamafá ia ki hono vahevahe atu ʻa e moʻoni Fakatohitapú.

Ko e hā hoʻo fakakaukaú: Ko e laumālie ʻoku ʻi he ngaahi fokotuʻutuʻu ko ení ʻoku fehoanaki ia mo e ngaahi lea ʻa Sīsuú mo e faʻifaʻitakiʻanga ʻa e muʻaki kau Kalisitiané?