“ʻOKU lava ke u talitekeʻi ha faʻahinga meʻa tuku kehe pē ʻa e fakatauelé.” Ko e tūkuhua anga-maheni ko ení ʻoku fakamatalaʻi lelei ai ʻa e anga ʻo e vakai ʻa e kakai ʻe niʻihi ki he fakatauelé—ko hono fakakātoá ʻoku nau saiʻia ai. Neongo ia, ʻoku pehē ʻe he niʻihi ko e fakatauelé ko e fakafili tuʻuloa ia ʻoku nau loto moʻoni ke ikuʻi. Ko e hā hoʻo fakakaukaú? ʻI he taimi ʻokú ke fehangahangai ai mo e fakatauelé, ʻoku totonu ke ke ʻulutukua ki ai pe talitekeʻi ia?

Ko e moʻoni, ʻoku ʻikai ke iku atu ʻa e fakatauele kotoa pē ki he ngaahi palopalema mafatukituki. Ko e fakatātaá, ko hono toe kai ha konga keke lolotonga hoʻo fakaholó heʻikai kau kovi ia ki hoʻo moʻuí. Ka ko e fakavaivai ki he ngaahi fakatauele kehé—tautefito ki he ngaahi meʻa ʻe iku atu ki he ʻulungaanga taʻetaau fakaefehokotaki fakasinó—ʻe lava ke hoko ai ʻa e ngaahi nunuʻa fakamamahi. ʻOku fakatokanga mai ʻa e Tohi Tapú: “Ko ia ʻoku tono . . . ko e taha masiva ʻatamai; ko e fakapoongi oʻota—ha taha ʻoku fai pehe.”—Palōveepi 6:32, 33.

Kapau ʻe fakafokifā haʻo fehangahangai mo ha fakatauele totonu ʻe fēfē hoʻo fakafeangaí? ʻOku tali ʻe he Tohi Tapú: “Ko e finangalo ʻo e ʻOtuá ʻa eni ia, ʻoku totonu ke mou hoko ʻo māʻoniʻoni pea fakaʻehiʻehi mei he feʻauakí. Ko e tokotaha taki taha ʻo kimoutolú ʻoku totonu ke ne ʻiloʻi ʻa e founga ke mapuleʻi ai hono sino ʻoʻoná ʻi he māʻoniʻoni mo e ngeia.” (1 Tesalonaika 4:3, 4) ʻE lava fēfē ke ke fakatupulekina ʻa e mālohi ke fakaʻehiʻehí? Fakakaukau ki he ngaahi sitepu ʻe tolu ʻe lava ke tokoni.

Ko e fafangaʻi ho matá ʻaki ʻa e ngaahi ʻata fakalieliá ko e fakaʻaiʻai ai pē ia ʻo e ngaahi holi taʻetotonú. ʻOku fakapapauʻi ai ʻa e fehokotaki ʻa e sió mo e holí, naʻe fakatokanga ʻa Sīsū: “Ko e tokotaha kotoa ʻoku hanganaki fakasio ki ha fefine ke tafunaki ki ai ʻene holí kuó ne ʻosi tonoʻi ia ʻi hono lotó.” Naʻá ne ngāueʻaki ʻa e fakatātā mahino ʻaki ʻene ekinaki: “Kapau leva ko ho mata toʻomataʻú ʻokú ne ʻai koe ke ke tūkiá, kapeʻi ia ʻo liʻaki.” (Mātiu 5:28, 29) Ko e hā e poiní? Ke talitekeʻi ʻa e fakatauelé, kuo pau ke tau fai ha ngāue pau pea ʻoua ʻe fafangaʻaki hotau matá ʻa e ngaahi ʻata fakatauelé.

 Ke fakatātaaʻi: Fakaʻuta atu ʻoku popongi ho matá ʻi he tapa mai ha kasa ʻuhila. Te ke hanganaki sio fakamamaʻu pē ki ai? Ko hono moʻoní ʻe ʻikai! Te ke tafoki pe paleʻi ho matá ke maluʻi ia. ʻI he tuʻunga meimei tatau, kapau ʻe ʻasi hake ha ʻata fakatupu holi kovi—ʻi ha tohi, vitiō televīsone, pe sio tonu ki ai—vave tahá hanga kehe. Maluʻi ho ʻatamaí naʻa hoko ʻo uesia. Ko ha tokotaha ko Sua naʻe maʻunimā ia ki muʻa ʻe he ʻata fakalieliá naʻá ne pehē: “ʻI he taimi ʻoku ou sio ai ki ha fefine talavou, ʻoku ou faʻa ongoʻi ʻa e fakaʻaiʻai ke u sio tuʻo ua mo tuʻo tolu ki ai. Ko ia naʻá ku fakamālohiʻi hoku matá ke hanga kehe, peá u pehē pē kiate au: ‘Lotu kia Sihova! ʻOku fiemaʻu moʻoni ke ke lotu he taimí ni!’ Hili ʻeku lotú, ko e holi ko iá naʻe vave ʻene mole atú.”—Mātiu 6:9, 13; 1 Kolinitō 10:13.

Toe fakakaukau atu ki he tangata faitōnunga ko Siopé ʻa ia naʻá ne pehē: “Naʻa ma alea mo hoku mata, ʻo u fai tuʻutuʻuni ki ai; Pea fefe ai haʻaku sio kovi ki ha taʻahine?” (Siope 31:1) Ko e hā ʻoku ʻikai te ke fai ai ha fakapapau meimei tataú?

ʻAhiʻahiʻi eni: Kapau ʻe ʻasi hake ha ʻata fakalielia vave tahá hanga kehe. Faʻifaʻitaki ki he tokotaha tohi Tohi Tapu ʻa ia naʻá ne lotu: “Leʻei hoku mata ke ʻoua te na sio ki he muna.”—Saame 119:37.

Koeʻuhi ʻoku tau taʻehaohaoa kotoa, ʻi he taimi ʻe niʻihi ʻoku tau fekuki mo e ngaahi holi ʻoku hala. ʻOku fakamatala ʻa e Tohi Tapú: “ʻOku ʻahiʻahiʻi ʻa e tokotaha taki taha ʻi hono tohoakiʻi mo fakataueleʻi pē ʻe heʻene holi ʻaʻaná. Ko e holí leva, ʻi heʻene hoko ʻo tuʻituʻiá, ʻokú ne fanauʻi mai ʻa e angahala.” (Sēmisi 1:14, 15) ʻE lava fēfē ke fakaʻehiʻehi mei he hoko ʻo maʻunimā ʻi ha tuʻunga ololalo pehē?

ʻI he taimi ʻokú ke hokosia ai ha ngaahi holi taʻetotonu, manatuʻi ʻe lava ke ke fili ʻa e founga ke fakafeangai ki aí. Fakafepakiʻi ʻa e ngaahi holi ko iá. Toʻo fakaʻaufuli ia mei ho ʻatamaí. Fakafisi mei he ngaahi fakaʻānaua taʻetāú. Ko ha tangata ko Tali naʻe maʻunimā ia he sio ʻi he ʻata fakalielia ʻi he ʻInitanetí naʻá ne pehē: “Naʻá ku faitau ke toʻo ʻosi ʻa e ngaahi fakakaukau hala mei hoku ʻatamaí ʻaki ʻa e tokangataha pē ki he ngaahi fakakaukau ʻoku leleí. Naʻe ʻikai faingofua. Naʻe lahi ʻeku toutou humú. Ka naʻe faai atu pē ʻou ako ke u mapuleʻi ʻeku fakakaukaú.” Ko ha fefine ko ʻElesā, naʻá ne fāinga mo e fakatauele taʻetāú ʻi  heʻene kei taʻu hongofulu tupú naʻá ne pehē: “Naʻá ku malava ke mapuleʻi ʻa e fakakaukau taʻetotonú ʻi he hanganaki femoʻuekina mo lotu kia Sihová.”

ʻAhiʻahiʻi eni: ʻI he taimi ʻoku maʻunimā ai koe ʻe he ngaahi fakakaukau taʻetāú, taʻofi leva ia pea lotu. Tauʻi ʻa e ngaahi fakakaukau halá ʻaki ʻa e fakafonu ho ʻatamaí ʻaki “ʻa e ngaahi meʻa ʻoku moʻoní, ʻilonga ʻa e ngaahi meʻa ʻoku mafatukitukí, ʻilonga ʻa e ngaahi meʻa ʻoku māʻoniʻoní, ʻilonga ʻa e ngaahi meʻa ʻoku maʻá, ʻilonga ʻa e ngaahi meʻa ʻoku ʻofeiná, ʻilonga ʻa e ngaahi meʻa ʻoku lauʻi leleí, ʻilonga ʻa e ngaahi meʻa ʻoku leleí, pea ʻilonga ʻa e ngaahi meʻa ʻoku taau ke fakahīkihikiʻí.”—Filipai 4:8.

ʻI he taimi ʻoku hoko fakataha mai ai ʻa e holí, fakatauelé mo ha foʻi faingamālie, ʻe faingofua leva ai ke fai ha meʻa ʻoku kovi. (Palōveepi 7:6-23) ʻE lava fēfē ke ke fakaʻehiʻehi mei he hoko ʻo maʻukovia?

ʻOku akonaki fakapotopoto mai ʻa e Tohi Tapú: “Ko e fakapotopoto ʻoku ne sio ki he kovi, ʻo ne toi: Ka ko e hehemangofua ʻoku nau laka atu pe, ʻo moʻua ai.” (Palōveepi 22:3) Ko ia tokanga ki hoʻo ngaahi laká. Tomuʻa fakakaukau ki he ngaahi tuʻunga ʻe lava ke hoko ai ha ngaahi palopalema, fakaʻehiʻehi mei ai. (Palōveepi 7: 25) Ko ha tangata ko Filipe naʻá ne ikuʻi hono maʻunimā ia ʻi he ʻata fakalieliá, naʻá ne pehē: “Naʻá ku tuku ʻa e komipiutá ʻi he feituʻu ʻe lava ʻa e tokotaha kotoa ʻo sio ki aí pea fokotuʻu mo ha polokalama sivi fakakomipiuta. ʻOku ou toki ʻInitaneti pē lolotonga ʻoku ʻi ai ʻa e niʻihi kehé.” ʻI he tuʻunga meimei tatau, ko Tali ʻa ia naʻe lave ki ai ki muʻá, naʻá ne pehē: “ʻOku ou fakaʻehiʻehi ʻi he sio he ngaahi faiva fakatauelé mo e feohi mo e kakai ʻoku nau talanoa kovi fekauʻaki mo e fehokotaki fakaesinó. ʻOku ʻikai te u saiʻia ke kau ʻi he ngaahi tōʻonga kovi ko iá.”

ʻAhiʻahiʻi eni: Sivisiviʻi faitotonu ho ngaahi vaivaiʻangá, pea palani tokamuʻa ke fakaʻehiʻehi mei he ngaahi tuʻunga ʻe lava ke ne fakaʻaiʻai koe ki he fakatauelé.—Mātiu 6:13.

Fēfē kapau ʻokú ke feinga ʻaki ho lelei tahá ka ʻokú ke kei vaivai pē mo tō ʻi he fakatauelé? ʻOua te ke loto-siʻi mo tuku hoʻo feingá. ʻOku pehē ʻe he Tohi Tapú: “He tuʻo fitu ʻa e to ki lalo ʻa e faitotonu, ka ne tuʻu pe.” (Palōveepi 24:16) Ko ia, ʻoku fakalototoʻaʻi kitautolu ʻe heʻetau Tamai fakahēvaní ke tau “tuʻu pe.” Te ke tali ʻene tokoni anga-ʻofá? Pea ʻoua leva ʻe foʻi ʻi he lotu kiate iá. Langa hake hoʻo tuí ʻi hono ako ʻene Folofolá. Fakaivimālohiʻi hoʻo fakapapaú ʻaki hoʻo maʻu ʻa e ngaahi fakataha faka-Kalisitiané. Hoko ʻo loto-toʻa ʻi he talaʻofa ʻa e ʻOtuá: “Te u poupou koe ʻe au; ʻio, te u tokoni kiate koe.”—ʻAisea 41:10.

Ko Koti naʻe lave ki ai ʻi he kamatá, ʻokú ne pehē: “ʻOku fiemaʻu ʻa e feinga lahi ʻaupito ke ikuʻi ʻa e tōʻongaʻaki ʻo e sio ʻi he ʻata fakalieliá. Neongo naʻá ku toutou tō ka ʻi he tokoni ʻa e ʻOtuá naʻá ku lavameʻa.” Ko Tīleni, naʻe lave ki ai ki muʻá naʻá ne pehē: “Naʻe faingofua pē ke u fehokotaki fakaesino mo hoku kaungāngāué. Ka naʻá ku tuʻumaʻu peá u tala ange kiate ia ‘ʻIkai!’ ʻOku ou fiemālie moʻoni ʻi he maʻu ha konisēnisi maʻa. Ka ko e meʻa mahuʻinga tahá ko ʻeku ʻiloʻi naʻá ku ʻai ʻa Sihova ke fiefia.”

ʻI he taimi ʻokú ke tuʻumaʻu ai mo talitekeʻi ʻa e fakatauelé, ʻoku lava foki ke ke fakapapauʻi ai ʻokú ke ʻai ʻa e ʻOtuá ke fiefia!—Palōveepi 27:11.