ʻOku tui ʻa e Kau Fakamoʻoni ʻa Sihová “ko e potu Folofola kotoa pē kuo fakamānavaʻi ia ʻe he ʻOtuá pea ʻoku ʻaonga.” (2 Tīmote 3:16) ʻOku mau ngāueʻaki ʻa e Tohi Tapú ko ha tataki ʻaonga ke ako ai fekauʻaki mo e Tokotaha-Fakatupú pea moʻui ʻi ha moʻui mohu ʻuhinga.

ʻOku pehē ʻe he Tohi Tapú: “Koeuhi ke ilo e he kakai ko koe, ko ho huafa oou ko Jihova, koe Fugani Maoluga i mamani kotoabe.” (Saame 83:18, PM) Ko ia ai, ko Sihova pē ko e ʻOtuá ʻoku mau lotu ki aí pea ʻi he hoko ko ʻene Kau Fakamoʻoní, ʻoku mau feinga mālohi ke ʻai ke ʻiloa hono huafa fakafoʻituituí.—ʻAisea 43:10-12.

ʻI he tuʻunga ko e kau Kalisitiané, ʻoku mau tui ko Sīsū, “ko e ʻAlo ia ʻo e ʻOtuá,” a naʻá ne haʻu ki he māmaní pea hoko ko e Mīsaiá. (Sione 1:34, 41; 4:25, 26) Hili ʻa e pekia ʻa Sīsuú, naʻe fokotuʻu hake ia ki hēvani. (1 Kolinitō 15:3, 4) Ki mui ai, naʻá ne hoko ko e Tuʻi ʻo e Puleʻanga ʻo e ʻOtuá. (Fakahā 11:15) Ko e Puleʻanga ko iá ko ha founga-pule moʻoni ʻa ia te ne fakafoki mai ʻa e Palataisí ki he māmaní. (Taniela 2:44) “ʻE maʻu ʻa e fonua ʻe he faʻa kataki; pea te nau fefiefiaʻi ʻi he melino lahi,” ko e lau ia ʻa e Tohi Tapú.—Saame 37:11, 29.

ʻOku tui ʻa e Kau Fakamoʻoni ʻa Sihová ko e ngaahi tefitoʻi moʻoni Fakatohitapú ʻe lava ke maʻu ʻaonga mei ai naʻa mo e kakai ʻi he ʻaho ní. (ʻAisea 48:17, 18) Ko ia ai, ʻoku mau pipiki ofi ki he ngaahi tefitoʻi moʻoni ko iá. Ko e fakatātaá, koeʻuhi ʻoku fakatokanga mai ʻa e Tohi Tapú ke fakaʻehiʻehi mei he ngaahi tōʻonga ʻe ʻuliʻi ai ʻemau fakakaukaú mo homau sinó, ʻoku ʻikai ai ke mau ifi tapaka pe ngāuekoviʻaki ʻa e faitoʻo kona tapú. (2 Kolinitō 7:1) ʻOku mau toe fakaʻehiʻehi mei he ngaahi tōʻonga ʻoku fakahalaiaʻi mahino ʻe he Tohi Tapú, hangē ko e faʻa konā, fehokotaki fakasino taʻetaau mo e kaihaʻa.—1 Kolinitō 6:9-11.