ʻUluaki Kolinitō 16:1-24
16 ʻI he fekauʻaki leva mo e tānaki ha tokoni maʻá e kakai tapú,+ mou muimui ʻi he ngaahi fakahinohino naʻá ku ʻoatu ki he ngaahi fakatahaʻanga ʻo Kalētiá.
2 ʻI he ʻuluaki ʻaho ʻo e uike kotoa pē, ko e tokotaha taki taha ʻo kimoutolu ʻoku totonu ke ne tuku mavahe ha meʻa ʻo fakatatau ki he meʻa ʻokú ne maʻú, koeʻuhi ke ʻoua naʻa fai ha ngaahi tānaki ʻo ha tokoni ʻi he taimi te u aʻu atu aí.
3 Ka ʻi heʻeku aʻu atu ki hená, te u fekau atu ʻa e kau tangata naʻa mou pehē ʻi hoʻomou ngaahi tohí ʻoku nau tāú+ ke nau ʻave ʻa hoʻomou foaki ʻofá ki Selusalema.
4 Kae kehe, kapau ʻoku hā ngali fakapotopoto ke u ʻalu mo au ki ai, te u ʻalu ki ai mo kinautolu.
5 Ka te u ʻalu atu kiate kimoutolu ʻi he hili ʻeku fou atu ʻi Masitōniá, he te u fou atu ʻi Masitōnia;+
6 pea mahalo pē te u nofo atu hena, pea kapau ʻe pehē, te u nofo mo kimoutolu kae ʻoua ke ʻosi ʻa e faʻahitaʻu momokó, koeʻuhi ke mou toki ʻave au ʻi ha konga ʻo e fonongá ki he feituʻu te u ʻalu nai ki aí.
7 He ʻoku ʻikai te u loto ke u sio kiate kimoutolu he taimí ni ʻi heʻeku fou atú pē, he ʻoku ou ʻamanaki te u nofo atu mo kimoutolu ʻi ha vahaʻa taimi,+ kapau ko e finangalo ia ʻo Sihová.*
8 Ka te u nofo ʻi ʻEfesō+ ʻo aʻu ki he Kātoanga ʻo e Penitekosí,
9 koeʻuhi kuo ʻomi kiate au ha faingamālie lahi* ke fakahoko ai ʻeku ngāué,+ ka ʻoku tokolahi ʻa e kau fakafepakí.
10 Pea kapau ʻe aʻu atu ʻa Tīmote,+ mou fakapapauʻi ke ʻoua naʻa ʻi ai ha meʻa te ne manavasiʻi ai lolotonga ʻene ʻiate kimoutolú, he ʻokú ne fai ʻa e ngāue ʻa Sihová,*+ ʻo hangē ko ia ʻoku ou faí.
11 Ko ia ai, tuku ke ʻoua naʻa siolalo ha taha kiate ia. Mou ʻomi ia ʻi ha konga ʻo e fonongá mo tokangaʻi ia, koeʻuhi ke ne lava ʻo haʻu kiate au, he ʻoku ou tatali atu kiate ia fakataha mo e fanga tokouá.
12 ʻI he fekauʻaki leva mo ʻApolosi+ ko hotau tokouá, naʻá ku mātuʻaki fakaʻaiʻai ia ke ne ʻalu atu mo e fanga tokouá kiate kimoutolu. Naʻe ʻikai ko ʻene taumuʻá ia ke ne ʻalu atu he taimí ni, ka te ne toki ʻalu atu ʻi haʻane faingamālie.
13 Mou nofoʻaki ʻā,+ tuʻu maʻu ʻi he tuí,+ hokohoko atu ʻo ngali tangata,*+ hoko ʻo mālohi.+
14 Mou fai ʻa e meʻa kotoa pē ʻi he ʻofá.+
15 Ko ia ʻoku ou enginaki atu kiate kimoutolu, fanga tokoua: ʻOku mou ʻilo ko e fale ʻo Setivená ko e ʻuluaki fua ia ʻo ʻĀkeiá pea naʻa nau līʻoa ki hono tokangaʻi ʻo e kakai tapú.
16 ʻOfa ke hokohoko atu ai pē foki hoʻomou fakamoʻulaloaʻi kimoutolu ki he kakai hangē ko iá pea ki he faʻahinga kotoa ʻoku ngāue fetakinima mo ngāue mālohi mo kitautolú.+
17 Ka ʻoku ou fiefia ʻi he ʻi heni ʻa Setivena+ mo Fotunato mo ʻĀkeikó, koeʻuhi naʻa nau tokoni lahi kiate au ʻi he ʻikai te mou ʻi hení.
18 He kuo nau fakaivifoʻou hoku laumālié mo hoʻomoutolú. Ko ia ai, mou fakahoungaʻi ʻa e kau tangata peheé.
19 ʻOku ʻoatu ʻe he ngaahi fakatahaʻanga ʻo ʻĒsiá honau ʻofa kiate kimoutolu. Ko ʻAkuila mo Pīsila fakataha mo e fakatahaʻanga ʻoku ʻi hona ʻapí+ ʻoku ʻoatu honau ʻofa māfana kiate kimoutolu ʻi he ʻEikí.
20 ʻOku ʻofa atu kiate kimoutolu ʻa e fanga tokouá kotoa. Mou fefaiʻaki hoʻomou feʻiloakí ʻaki ha ʻuma māʻoniʻoni.*
21 Ko au, Paula, ʻoku ou tohi atu ʻa e ʻofá ni ʻaki hoku nimá tonu.
22 Kapau ʻoku ʻi ai ha taha ʻoku ʻikai ʻofa ʻi he ʻEikí, tuku ke ne malaʻia. ʻE homau ʻEiki, hāʻele mai muʻa!
23 Fakatauange ke ʻiate kimoutolu ʻa e ʻofa maʻataʻatā ʻa e ʻEiki ko Sīsuú.
24 Fakatauange ke ʻiate kimoutolu kotoa ʻa ʻeku ʻofá ʻi he fāʻūtaha mo Kalaisi Sīsuú.
Fakamatala ‘i Lalo
^ Sio ki he Fakamatala Fakalahi A5.
^ ʻI he faka-Kalisí, “kuo fakaava mai kiate au ha matapā lahi.”
^ Sio ki he Fakamatala Fakalahi A5.
^ Pe “hoko ʻo loto-toʻa.”
^ Pe “ha fakafeʻiloaki māfana.”
