Ua Kolinitō 12:1-21
12 Kuo pau ke u pōlepole. ʻOku ʻikai ke ʻaonga ia, ka te u hoko atu ki he ngaahi vīsone fakaofo+ mo e ngaahi meʻa fakahā ʻa e ʻEikí.+
2 ʻOku ou ʻilo ha tangata ʻoku fāʻūtaha mo Kalaisi, ʻa ia, ʻi he taʻu ʻe 14 kuo maliu atú—pe naʻe ʻi he sinó pe ʻikai ʻi he sinó, ʻoku ʻikai te u ʻilo ki ai; ka ʻoku ʻafioʻi ia ʻe he ʻOtuá—naʻe hamusi hake ia ki he langi hono tolú.
3 ʻIo, ʻoku ou ʻilo ha tangata pehē—pe naʻe ʻi he sinó pe ʻikai ʻi he sinó, ʻoku ʻikai te u ʻilo ki ai; ka ʻoku ʻafioʻi ia ʻe he ʻOtuá—
4 ʻa ia naʻe hamusi ʻo ʻave ki palataisi peá ne fanongo ki he ngaahi lea ʻa ia heʻikai lava ke leaʻaki pea ʻoku ʻikai ngofua ki ha tangata ke ne leaʻaki.
5 Te u pōlepole fekauʻaki mo ha tangata pehē, ka heʻikai te u pōlepole fekauʻaki mo au tuku kehe ʻa e ngaahi meʻa ʻokú ne fakahaaʻi ʻa hoku ngaahi vaivaiʻangá.
6 He neongo kapau ʻoku ou loto ke u pōlepole, heʻikai te u hoko ʻo vale ai, he te u leaʻaki ʻa e moʻoní. Ka ʻoku ou fakaʻehiʻehi mei he hoko ʻo pōlepolé, koeʻuhi ke ʻoua naʻa ʻi ai ha taha te ne ʻomai kiate au ha lāngilangi lahi ange ia ʻi he meʻa ʻokú ne mātā ʻiate aú pe fanongo ai meiate aú,
7 koeʻuhí pē ko hono maʻu ʻa e ngaahi meʻa fakahā makehe peheé.
Ke ʻoua naʻa hakeakiʻi tōtuʻa au, naʻe ʻomai kiate au ha tolounua ʻi he kakanó,+ ko ha ʻāngelo ʻa Sētane, ke ne hanganaki sipiʻi* au, koeʻuhi ke ʻoua naʻa hakeakiʻi tōtuʻa au.
8 Naʻe tuʻo tolu ʻeku kōlenga ki he ʻEikí ʻo fekauʻaki mo e meʻá ni, ke mavahe atu ia meiate au.
9 Ka naʻá ne pehē mai kiate au: “Ko ʻeku ʻofa maʻataʻataá ʻoku feʻungaʻānoa ia kiate koe, he ko hoku mālohí ʻoku fakahaohaoaʻi ia ʻi hoʻo hoko ʻo vaivaí.”+ Ko e meʻa leva ʻoku fakafiefia tahá, te u pōlepole ʻo fekauʻaki mo hoku ngaahi vaivaiʻangá, koeʻuhi ke hoko ʻa e mālohi ʻo e Kalaisí ʻo hangē ha tēniti ʻokú ne hanganaki fakamalumalu aú.
10 Ko ia ʻoku ou fiefia ʻi hoku ngaahi vaivaiʻangá, ʻi hoku ngaahi taʻetokaʻí, ʻi he ngaahi taimi ʻo e masivá, ʻi he ngaahi fakatangá mo e ngaahi faingataʻá, koeʻuhí pē maʻa Kalaisi. He ʻi heʻeku vaivaí, ʻoku ou toki mālohi leva.+
11 Kuó u hoko ʻo vale. Naʻa mou mātuʻaki ʻai au ke u hoko ʻo pehē, he naʻe totonu ke mou fakaongoongoleleiʻi au. He naʻe ʻikai fakamoʻoniʻi ʻi ha meʻa ʻe taha ʻoku ou māʻulalo ange ʻi hoʻomou kau ʻapositolo makehe atú, neongo kapau ko e meʻa noa pē au.+
12 Ko e moʻoni, naʻá ku fakahaaʻi atu kiate kimoutolu ʻa e ngaahi fakaʻilonga ʻo ʻeku hoko ko e ʻapositoló ʻaki ʻa e kātaki lahi,+ pea ʻaki ʻa e ngaahi fakaʻilonga mo e ngaahi mana mo e ngaahi ngāue fakaofo.+
13 Naʻe ʻikai te u hoko ko ha kavenga kiate kimoutolu, ko e founga pē ia ʻoku ʻikai te mou tatau ai mo e ngaahi fakatahaʻanga kehé. Naʻá ku fai ai ha fehālaaki?+ Kapau ko ia, mou fakamolemoleʻi ange muʻa au ʻi he fehālaakí ni.
14 Vakai! Ko hono tuʻo tolu ʻaki eni ʻeku mateuteu ke u ʻalu atu kiate kimoutolu, pea heʻikai te u hoko ko ha kavenga kiate kimoutolu. He ʻoku ou kumi, ʻo ʻikai ki hoʻomou ngaahi koloá,+ ka kiate kimoutolu; he ʻoku ʻikai ʻamanekina ʻa e fānaú+ ke nau tātānaki meʻa maʻa ʻenau ngaahi mātuʻá, ka ko e ngaahi mātuʻá maʻa ʻenau fānaú.
15 ʻI heʻeku tafaʻakí, te u foaki atu ʻa e meʻa kotoa ʻi he fiefia lahi pea foaki atu au ke ʻosiʻosingamālie maʻamoutolu.+ Kapau ʻoku ou ʻofa ʻiate kimoutolu ʻo lahi pehē fau, ʻe siʻi ange koā hono ʻofaʻi aú?
16 Kae tatau ai pē pe ko e hā ʻa e tuʻungá, naʻe ʻikai te u fakakavengaʻi kimoutolu.+ Ka neongo ia, ʻoku mou pehē naʻá ku “olopoto” pea naʻá ku maʻu kimoutolu “ʻaki ʻa e kākā.”
17 Naʻe ʻikai te u ngāuekākāʻaki kimoutolu fakafou ʻi ha taha ʻo e faʻahinga naʻá ku fekau atu kiate kimoutolú, ʻikai ko ia?
18 Naʻá ku fakalototoʻaʻi ʻa Taitusi pea naʻá ku fekau atu ʻa e tokoua ʻe taha fakataha mo ia. Naʻe ʻikai teitei ngāuekākāʻaki ʻe Taitusi kimoutolu, ʻikai ko ia?+ Naʻa mau ʻaʻeva ʻi he laumālie pē taha, ʻikai ko ia? ʻO mau topuvaʻe taha pē, ʻikai ko ia?
19 Kuo mou fakakaukau koā kuo mau fai atu hano taukapoʻi ʻo kimautolu kiate kimoutolu? ʻOku fai ʻi he ʻao ʻo e ʻOtuá ʻa ʻemau lea ʻi he fāʻūtaha mo Kalaisí. Kae kehe, siʻi faʻahinga ʻofeina, ʻoku mau fai ʻa e meʻa kotoa pē ke langa hake ai kimoutolu.
20 He ʻoku ou manavahē telia naʻá ku aʻu atú ʻoku ʻikai te mou hangē kimoutolu ko ia ʻoku ou fakaʻamu ki aí, pea ʻikai te u hangē au ko ia ʻoku mou fakaʻamu ki aí, ka ʻi hono kehé, ʻe ʻi ai nai ha fekeʻikeʻi, meheka, feʻiteʻitani, taʻefelotoi, laukovi, fefanafanahi,* hoko ʻo fakafuofuolahi ʻi he hīkisia pea mo e māveuveu.
21 Mahalo pē ʻi haʻaku toe ʻalu atu, ʻe fakamaaʻi nai au ʻe hoku ʻOtuá ʻi homou ʻaó, pea pau ai ke u ongoʻi mamahi ʻi he tokolahi ʻo e faʻahinga ne nau faiangahala ki muʻa ka kuo teʻeki ai ke nau fakatomalaʻi ʻenau taʻemaʻá mo e fehokotaki fakasino taʻetāú,* mo e faikovi taʻemīngao* kuo nau tōʻongaʻakí.
Fakamatala ‘i Lalo
^ Pe “taaʻi.”
^ Pe “ngutu-lau.”
^ Faka-Kalisí, por·neiʹa. Sio ki he Lea mo Hono ʻUhinga.
^ Pe “tōʻonga taʻenā.” Faka-Kalisí, a·selʹgei·a. Sio ki he Lea mo Hono ʻUhinga.
