Ua Kolinitō 8:1-24
8 Ko ia ʻoku mau loto leva ke mou ʻilo, fanga tokoua, ʻo fekauʻaki mo e ʻofa maʻataʻatā ʻa e ʻOtuá kuó ne tuku atu ki he ngaahi fakatahaʻanga ʻo Masitōniá.+
2 ʻI he lolotonga ko ia ʻo ha ʻahiʻahi lahi ʻi he malumalu ʻo e ngaohikoviá, naʻe ʻai ʻe heʻenau fiefia lahi faú mo ʻenau masiva ʻangoʻangó ʻa e lahi ʻo ʻenau nima-homó ke mahulu atu.*
3 He naʻe fai ia ʻo fakatatau ki he meʻa naʻa nau maʻú,+ ʻio, ʻoku ou fakamoʻoni ki ai, naʻe aʻu ʻo mahulu atu ia ʻi he meʻa naʻa nau maʻú,+
4 lolotonga ia ʻenau hanganaki kole fakamātoato mai ʻiate kinautolu pē ke nau maʻu ʻa e monū ʻo hono fai ha foaki ʻofa, ke kau ʻi he ngāue tokoni ki he kakai tapú.+
5 Pea naʻe ʻikai ʻi he meʻa pē naʻa mau ʻamanaki ki aí, ka naʻa nau ʻuluaki foaki kinautolu ki he ʻEikí pea kiate kimautolu fakafou ʻi he finangalo ʻo e ʻOtuá.
6 Ko ia naʻa mau fakalototoʻaʻi ʻa Taitusi,+ hangē tofu pē ko ʻene kamataʻi ʻa e ngāué ni ʻi homou lotolotongá, ʻoku totonu ke ne fakakakato pehē pē foki ʻa e foaki ʻofa tatau pē ko eni mei hoʻomou tafaʻakí.
7 Ka neongo ia, hangē tofu pē ko hoʻomou hulu atu ʻi he meʻa kotoa, ʻi he tuí mo e leá mo e ʻiló mo e tōtōivi ʻi he meʻa kotoa pē pea ʻi heʻemau ʻofa kiate kimoutolú, fakatauange ke mou hulu atu foki ʻi he foaki ʻofá ni.+
8 ʻOku ou leaʻaki ení, ʻo ʻikai ko ha fekau kiate kimoutolu, ka ke ʻai kimoutolu ke mou ʻilo ʻo fekauʻaki mo e tōtōivi ʻa e niʻihi kehé pea ke sivi ʻa e moʻoni ʻo hoʻomou ʻofá.
9 He ʻoku mou ʻilo ʻa e ʻofa maʻataʻatā ʻa hotau ʻEiki ko Sīsū Kalaisí, he neongo naʻá ne koloaʻia, naʻá ne hoko ʻo masiva koeʻuhi ko ha lelei maʻamoutolu,+ ke mou hoko ai ʻo koloaʻia ko e meʻa ʻi heʻene masivá.
10 Pea ʻi he meʻá ni, ʻoku ou ʻoatu ai ʻeku fakakaukaú:+ Ko e meʻá ni ko ha lelei pē maʻamoutolu, ʻi he sio ko ia kuo mahili atu eni ha taʻu naʻe ʻikai ngata pē ʻi hoʻomou ʻosi kamataʻi ʻa e ngāué ka naʻa mou fakahāhaaʻi foki ʻa hoʻomou holi ke fai iá.
11 Ko ia mou fakakakato foki ʻa e meʻa naʻe kamata ke mou faí, koeʻuhí ke hoko ʻo kakato ʻa hoʻomou loto-vēkeveke ke fai iá, ʻo fakatatau ki he meʻa ʻoku mou ala maʻú.
12 He kapau ʻoku ʻuluaki ʻi ai ʻa e loto-vēkeveké, ʻoku tautefito ʻene fakahōifuá ʻi hono fai ʻo fakatatau ki he meʻa ʻoku maʻu ʻe ha taha,+ ʻo ʻikai fakatatau ki he meʻa ʻoku ʻikai maʻu ʻe ha taha.
13 He ʻoku ʻikai te u loto ke ʻai ke faingofua ki he niʻihi kehé, kae faingataʻa kiate kimoutolu;
14 kae fakafou ʻi ha vahevahe tatau, ʻoku hoko ai hoʻomou ngaahi meʻa ʻoku hulu atu ʻi he taimi ní ʻo fakalatoʻaki ʻenau fiemaʻú, koeʻuhi ke haʻu foki ʻenau ngaahi meʻa ʻoku hulu atú ʻo fakalatoʻaki ʻa hoʻomou fusimoʻomó, ke hoko ai ha vahevahe tatau.
15 Hangē tofu pē ko ia kuo tohí: “Ko e tokotaha naʻe lahi ʻene ngaahi meʻá naʻe ʻikai ke fuʻu lahi ʻa e meʻa ia naʻá ne maʻú, pea ko e tokotaha naʻe siʻisiʻi ʻene ngaahi meʻá naʻe ʻikai ke fuʻu siʻisiʻi ʻa e meʻa ia naʻá ne maʻú.”+
16 Ko ia he fakafetaʻi ē ki he ʻOtuá heʻene ʻai ʻi he loto ʻo Taitusí ʻa e tokanga fakamātoato tatau kiate kimoutolú,+
17 koeʻuhí kuó ne fai ha tali moʻoni ki he fakalototoʻá, ka ʻi heʻene mātuʻaki vēkeveké, ʻokú ne ʻalu atu ai ʻiate ia pē kiate kimoutolu.
18 Ka ʻoku mau fekau fakataha atu mo ia ʻa e tokoua ʻa ia ko hono fakahīkihikiʻi ʻi he fekauʻaki mo e ongoongo leleí kuo mafola ia ʻi he kotoa ʻo e ngaahi fakatahaʻangá.
19 ʻIkai ko ia pē, ka naʻe toe fakanofo ia ʻe he ngaahi fakatahaʻangá ke ne hoko ko homau kaungā-fononga ʻi heʻemau fakahoko atu ʻa e foaki ʻofa ko ení ke lāngilangiʻia ai ʻa e ʻEikí pea ko e fakamoʻoni ia ʻo ʻemau mateuteu ke tokoní.
20 Ko ia ʻoku mau fakaʻehiʻehi ai ke ʻoua naʻa ʻi ai ha tangata te ne maʻu haʻamau hala ʻi he fekauʻaki mo e fuʻu foaki tokoni lahi ko eni ʻoku mau fakahoko atú.+
21 He ʻoku mau ‘tokangaʻi ʻa e meʻa kotoa pē ʻi he faitotonu, ʻo ʻikai ngata pē ʻi he vakai mai ʻa Sihová,* kae pehē foki ʻi he vakai mai ʻa e tangatá.’+
22 ʻIkai ko ia pē, ʻoku mau fekauʻi atu fakataha mo kinaua homau tokoua ʻa ia kuo mau faʻa sivisiviʻi ʻo ʻiloʻi ʻokú ne tōtōivi ʻi he ngaahi meʻa lahi, ka ʻoku toe ʻāsili ange ʻene tōtōiví he taimí ni koeʻuhi ko ʻene fuʻu falala atu kiate kimoutolú.
23 Kapau leva ʻoku ʻi ai ha fehuʻi fekauʻaki mo Taitusi, ko hoku takanga ia pea ko ha kaungāngāue ki ha lelei maʻamoutolu; pe kapau ʻoku ʻi ai ha ngaahi fehuʻi fekauʻaki mo homau ongo tokouá, ko e ongo ʻapositolo kinaua ʻo e ngaahi fakatahaʻangá pea mo ha lāngilangi kia Kalaisi.
24 Ko ia mou fakahāhā ʻa e fakamoʻoni ʻo hoʻomou ʻofa kiate kinautolú,+ pea fakahaaʻi ki he ngaahi fakatahaʻangá ʻa e ʻuhinga naʻa mau pōlepole ai fekauʻaki mo kimoutolú.
