Saame 41:1-13
Ki he pule hivá. Ko e hiva ʻa Tēvita.
41 Fiefia ē ko ha taha ʻokú ne fakahāhā ʻa e fakaʻatuʻi ki he tokotaha māʻulaló;+ʻE fakahaofi ia ʻe Sihova ʻi he ʻaho ʻo e faingataʻá.
2 ʻE leʻohi ia ʻe Sihova pea tauhi ia ke ne moʻui.
ʻE fakahaaʻi ia ko ha tokotaha fiefia ʻi he māmaní;+ʻE ʻikai ʻaupito te ke tuku atu ia ke faʻiteliha ai* ʻa hono ngaahi filí.+
3 ʻE tokoniʻi ia ʻe Sihova ʻi heʻene ʻi he mohenga ʻo e mamahí;+Lolotonga ʻene puké te ke mātuʻaki fetongi ʻa hono mohengá.
4 He naʻá ku pehē: “ʻE Sihova, ke ke hōifua mai.+
Fakamoʻui au,+ he kuó u faiangahala kiate koe.”+
5 Ka ko hoku ngaahi filí ʻoku nau lea kovi ʻo fekauʻaki mo au:
“Ko ʻafē te ne mate ai pea mole atu ʻa hono hingoá?”
6 Kapau ʻe haʻu ha taha ʻo kinautolu ke ʻaʻahi mai kiate au, ʻokú ne leaʻaki ʻa e loi ʻa ia ʻoku ʻi hono lotó.
ʻOkú ne tātānaki ha meʻa fakatupu maumau ke leaʻaki;Pea ʻokú ne ʻalu atu leva ʻo fakamafola holo ia.
7 Ko e faʻahinga kotoa ʻoku fehiʻa kiate aú ʻoku nau fefanafanahi;ʻOku nau faʻufaʻu ha kovi ke fai mai kiate au:
8 “Kuo hoko kiate ia ha meʻa mātuʻaki kovi;Pea ko eni kuó ne tō, ʻe ʻikai ke ne toe tuʻu hake.”+
9 Naʻa mo e tangata ʻa ia ko hoku kaumeʻa mamaé, ʻa e tokotaha naʻá ku falala ki aí,+ʻA ia naʻá ne kai ʻi heʻeku maá, kuó ne hiki hono muivaʻé kiate au.*+
10 Ka ko koe, ʻe Sihova, ke ke hōifua mai peá ke fokotuʻu hake au,Koeʻuhí ke u fai ha sāuni kiate kinautolu.
11 Ko e meʻá ni te u ʻilo ai ʻokú ke hōifua mai kiate au:
ʻA e ʻikai kalanga fiefia ʻa hoku filí kiate au+ ʻi haʻanau ikuna.
12 Ka ko au, kuó ke puke hake au koeʻuhí ko ʻeku anga-tonú;+Te ke tauhi au ʻo taʻengata ʻi ho ʻaó.+
13 Fakatauange ke fakahīkihikiʻi ʻa Sihova, ko e ʻOtua ʻo ʻIsilelí,ʻI he kotoa ʻo ʻitānití.*+
ʻĒmeni pea ʻĒmeni.
Fakamatala ‘i Lalo
^ Pe “fai ki ai ʻa e loto.”
^ Pe “tafoki ʻo fakafepaki kiate au.”
^ Pe “Mei ʻitāniti ki ʻitāniti.”
