Saame 73:1-28
Ko e hiva ʻa ʻĒsafe.+
73 ʻOku lelei moʻoni ʻa e ʻOtuá ki ʻIsileli, ki he faʻahinga ʻoku loto-maʻá.+
2 Ka ko e meʻa kiate aú, naʻe meimei hē ʻa hoku vaʻé;Naʻe meimei hekea ʻa ʻeku ngaahi laká.+
3 He naʻá ku hoko ʻo meheka ki he kau pōlepolé*ʻI he taimi naʻá ku sio ai ki he lakalakaimonū ʻa e kau fulikivanú.+
4 He ʻoku ʻikai haʻanau mamahi ʻi heʻenau maté;ʻOku moʻui lelei ʻa honau sinó.*+
5 ʻOku ʻikai te nau faingataʻaʻia ʻo hangē ko e faʻahinga kehe ʻo e tangatá,+Pea ʻoku ʻikai te nau mamahi ʻo hangē ko e kau tangata kehé.+
6 Ko ia ai, ko e hīkisiá ʻa honau kahoá;+ʻOku fakatui ʻiate kinautolu ʻa e fakamālohí ʻo hangē ha kofú.
7 Ko ʻenau lakalakaimonuú* ʻokú ne ʻai ke nau mata sino;Ko e meʻa kuo nau maʻú naʻe lahi ange ia ʻi he meʻa naʻa nau fakakaukauloto atu ki aí.
8 ʻOku nau manuki mo leaʻaki ʻa e ngaahi meʻa ʻoku kovi.+
ʻOku nau fakamanamana ʻi he pōlepole ke fai ha fakafeʻātungia.+
9 ʻOku nau lea ʻo hangē ia kuo nau māʻolunga tatau mo e langí,Pea ʻoku nau ʻalu takai ʻi he māmaní mo lea pōlepole ʻaki honau ʻeleló.
10 Ko ia ʻoku tafoki ʻa hono kakaí kiate kinautolu,Pea nau inu mei he lahi ʻo ʻenau vaí.
11 ʻOku nau pehē: “ʻOku anga-fēfē hono ʻiloʻi ʻe he ʻOtuá?+
ʻOku ʻi ai moʻoni koā ha ʻilo ʻi he Fungani Māʻolungá?”
12 ʻIo, ko e kau fulikivanu eni, ʻoku nau fakafiefiemālie maʻu pē.+
ʻOku nau hanganaki fakalahi ʻa ʻenau koloá.+
13 Ko e moʻoni ko e koto kulanoa ʻa ʻeku tauhi ke maʻa ʻa hoku lotóMo e fanofano ʻa hoku nimá ʻi he taʻehalaiá.+
14 Pea naʻá ku faingataʻaʻia ʻi he ʻahó kotoa;+Naʻe tauteaʻi au ʻi he pongipongi kotoa.+
15 Ka ʻo kapau naʻá ku leaʻaki ʻa e ngaahi meʻá ni,Naʻá ku mei lavakiʻi ai ho kakaí.*
16 ʻI heʻeku feinga ke mahinoʻi iá,Naʻá ne fakahohaʻasi au
17 Kae ʻoua kuó u toki hū ki he feituʻu toputapu maʻongoʻonga ʻo e ʻOtuáPea naʻá ku ʻiloʻi ai ʻa honau kahaʻú.
18 Ko e moʻoni ʻokú ke fokotuʻu kinautolu ʻi ha kelekele hekeheke.+
ʻOkú ke ʻai ke nau tō ʻo ʻauha.+
19 He fakaʻohovale moʻoni ē ko ʻenau ʻauhá!+
He fakafokifā moʻoni ē ko honau ngataʻangá ʻi heʻenau hoko ki ha ikuʻanga fakalilifú!
20 ʻI he hangē ko ha misi ʻa ia ʻoku ngalo ʻi heʻete ʻā haké, ʻe Sihova,ʻI hoʻo ʻā haké, te ke toʻo mei hoʻo fakakaukaú* ʻa honau ʻīmisí.
21 Ka ko hoku lotó naʻe kona,+Pea naʻá ku ongoʻi ʻa e langa lahi ʻi loto.*
22 Naʻá ku taʻefakakaukau pea naʻe ʻikai te u maʻu ha mahino;Naʻá ku hangē ko ha manu taʻeʻatamai ʻi ho ʻaó.
23 Ka ko eni ʻoku ou ʻiate koe maʻu ai pē;Kuó ke puke ʻa hoku nima toʻomataʻú.+
24 ʻOkú ke tataki au ʻaki hoʻo faleʻí,+Pea ʻi he hili iá te ke taki au ki he lāngilangí.+
25 Ko hai ia ha toe taha ʻoku ou maʻu ʻi he langí?
Pea tuku kehe koe ʻoku ʻikai te u holi ki ha meʻa ʻe taha ʻi he māmaní.+
26 Ko hoku sinó mo hoku lotó ʻe lava nai ke vaivai,Ka ko e ʻOtuá ʻa e makatuʻu ʻi hoku lotó pea ko hoku ʻinasí ia ʻo taʻengata.+
27 Ko e moʻoni, ko e faʻahinga ʻoku hanganaki fakamamaʻo meiate koé te nau ʻauha.
Te ke fakangata* ʻa e tokotaha kotoa ʻokú ne liʻaki koe+ ʻi he ʻulungaanga taʻetāú.*
28 Ka ko e meʻa kiate aú, ko e fakaofiofi ki he ʻOtuá ʻoku lelei ia kiate au.+
Kuó u ʻai ʻa e ʻEiki Hau ko Sihová ko hoku hūfangaʻanga,Ke u talaki ai ʻa hoʻo ngaahi ngāué kotoa.+
Fakamatala ‘i Lalo
^ Pe “kau hīkisiá.”
^ Pe “ʻOku fōlahi ʻa honau keté.”
^ Fakafoʻilea, “sinó.”
^ Fakafoʻilea, “ʻa e toʻutangata ʻo ho ngaahi fohá.”
^ Fakafoʻilea, “taʻetokaʻi.”
^ Fakafoʻilea, “ʻi hoku kofuuá.”
^ Fakafoʻilea, “fakasīlongoʻi.”
^ Pe “taʻefaitōnungá.”
