Boza: Akaboni aku Yehova achita cha Isitala chifukwa Mbakhristu cha.

 Fundu Yauneneska: Tigomezga kuti Yesu ndiyu mtaski widu, ndipu titesesa kulondo “menderu ngaki.”—1 Petro 2:21; Luka 2:11.

 Boza: Mugomezga cha kuti Yesu wakuyuskika kwa akufwa.

 Fundu Yauneneska: Tigomezga kuti Yesu wakuyuskika, ndipu chigomezgu cha Akhristu chagona pa fundu yeniyi, ndichu chifukwa chaki titiyikamba ukongwa nkhani yeniyi asani tipharazga.—1 Ŵakorinte 15:3, 4, 12-15.

 Boza: Mutiŵalenge lisungu cha ŵana chifukwa chakuti achita cha Isitala.

 Fundu Yauneneska: Titanja ukongwa ŵana ŵidu ndipu titesesa kuŵasambiza ndi kuŵawovya kuti ajengi alikondwa.— Tito 2:4.

•   Bayibolo likambapu cha kuti tichitengi Isitala.

•   Yesu wakukambapu cha kuti tikumbukengi chiyuka chaki m’malumwaki wakulangula kuti tikumbukiyengi nyifwa yaki. Tikumbuka nyifwa yaki chaka chechosi pa zuŵa lo wangufwiya mwakukoliyana ndi kalendala ya chiyuda.—Luka 22:19, 20.

•   Tigomezga kuti Isitala ikwambiya ku midawuku ya visopa vakali yakukondwere achiuta wo awonanga kuti atovya ŵanthu kuti abalanengi, kweni Chiuta wakondwanga navu cha. Chiuta wakhumba kuti timusopengi iyu pe, ndipu watinkha kusopa kwekosi ko kuleka kukoliyana ndi khumbu laki.—Chituwa 20:5; 1 Ŵakaronga 18:21.

 Tichita cha Isitala chifukwa Bayibolo likambapu cha kuti tichitengi Isitala. Bayibolo likamba kuti titenere kugwiriskiya nchitu “zeru yeneku ndi kuŵanaŵana kwamampha,” m’malu mwakulondo ŵaka midawuku ya ŵanthu. (Nthanthi 3:21; Mateyu 15:3) Kweni asani tikonkhoske ŵanthu vo tigomezga vakukwaskana ndi Isitala, titesesa kutumbika maŵanaŵanu ngawu mwakuleka kuŵakambiya vo angachita.—1 Petro 3:15