Chivumbuzi Kwaku Yohane 7:1-17
7 Pavuli paki, ndinguwona angelu anayi wo anguma mumakona nganayi nga charu chapasi. Yiwu angukolesa mphepu zinayi za charu chapasi kuti mphepu yileki kuputiya pacharu chapasi, panyanja pamwenga pachimiti chechosi.
2 Ndinguwona so mungelu munyaki wachikwera kutuliya ko kutuliya lumwi* ndipu wenga ndi chidindu chaku Chiuta wamoyu. Mungelu yo, wangudaniriziya angelu anayi wo anguzomerezeka kuti anangi charu chapasi ndi nyanja.
3 Iyu wangudaniriza kuti: “Mungananganga cha charu chapasi, nyanja pamwenga vimiti, mpaka po tadindiya+ akapolu aku Chiuta widu pavisku vawu.”+
4 Ndipu ndinguvwa chiŵerengeru cha ŵanthu wo angudindika chidindu. Ŵanthu wo, ŵengapu 144,000+ ndipu angutuliya mu mafuku ngosi nga ŵana aku Isirayeli:+
5 Mu fuku laku Yuda, mungudindika ŵanthu 12,000;mu fuku laku Rubeni, 12,000;mu fuku laku Gadi, 12,000;
6 mu fuku laku Ashere, 12,000;mu fuku laku Nafutali, 12,000;mu fuku laku Manasi,+ 12,000;
7 mu fuku laku Simiyoni, 12,000;mu fuku laku Levi, 12,000;mu fuku laku Isakara, 12,000;
8 mu fuku laku Zebuloni, 12,000;mu fuku laku Yosefi, 12,000;mu fuku laku Benjamini, mungudindika ŵanthu 12,000.
9 Pavuli paki, awonani! ndinguwona mzinda ukulu wa ŵanthu wo pengavi munthu yo wangufiska kuwuŵerenga. Ŵanthu wo atuliyanga mu mitundu yosi, mu mafuku ngosi, mu ŵanthu wosi ndipuso mu malilimi ngosi.*+ Yiwu anguma panthazi pa mpandu waufumu ndi panthazi pa Mwanawambereri, avwala mikhanju yituŵa;+ ndipu ŵenga ndi mani nga vimiti va kantchindi mumanja mwawu.+
10 Ndipu adanirizanga ukongwa kuti: “Utaski widu watuliya kwaku Chiuta widu mweniyo waja pampandu waufumu+ kweniso ku Mwanawambereri.”+
11 Angelu wosi anguma mwakuzunguliya mpandu waufumu, ŵara+ kweniso vamoyu vinayi, ndipu yiwu angujikama ndi kusindama mpaka visku vawu pasi panthazi pa mpandu waufumu ndi kusopa Chiuta.
12 Yiwu akambanga kuti: “Ame! Chiuta widu wazeru, wakwenere kuwongeka, wanthazi ndipuso yo wachita vinthu vikulu, wathamikiki, wakankhuskiki kweniso wapaskiki ulemu muyaya mpaka muyaya.+ Ame.”
13 Pavuli paki, yumoza mwa ŵara wangundifumba kuti: “Kumbi yaŵa avwala mikhanju yituŵa+ mbayani ndipu akutuliya pani?”
14 Nyengu yeniyo, ndingumukambiya kuti: “Ambuya, yimwi ndimwi muziŵa.” Iyu wangundikambiya kuti: “Yaŵa mbeniwo atuwa mu chisuzgu chikulu,+ ndipu achapa mikhanju yawu ndi kuyitowesa kuŵa yituŵa mundopa za Mwanawambereri.+
15 Ndichu chifukwa chaki ŵe panthazi pa mpandu waufumu waku Chiuta, ndipu atimuchitiya uteŵeti wakupaturika msana ndi usiku munyumba yaki yakusopiyamu. Ndipu Mweniyo waja pampandu waufumu+ wazamutandawuliya chihema chaki paku yiwu.+
16 Yiwu azamukuvwa so nja cha pamwenga nyota, ndipu lumwi lazakuŵawotcha cha kweniso azamukufya cha ndi chifundizi,+
17 chifukwa Mwanawambereri+ yo we pakati pa mpandu waufumu, wazakuŵaliska+ ndi kuŵalongozge ku akasupi a maji nga umoyu.+ Ndipu Chiuta wazamuleska masozi ngosi mumasu mwawu.”+
