Dotoronome 10:1-22
10 “Pa nyengu yeniyo, Yehova wangundikambiya kuti, ‘Sema mya yiŵi ya nge yakwamba,+ ndipu uzi kwaku ini kuphiri. Kweniso upangi bokosi lamathabwa.
2 Ndipu pamya yo, ndilembengepu mazu ngo ngenga pamya yakwamba yo ukuswa, ndipu uziyiŵiki mubokosi.’
3 Mwaviyo, ndingupanga bokosi lamathabwa nga vimiti va akeshiya kweniso ndingusema mya yiŵi nge yakwamba, ndipu ndingukwera paphiri ndi mya yiŵi mumanja mwangu.+
4 Pavuli paki, pamya yo, wangulembapu mazu ngo wangulemba pakwamba,+ Marangu 10,*+ ngo Yehova wangukukambiyani paphiri kutuliya mumotu+ pa zuŵa lo munguwungana pamoza,*+ ndipu Yehova wanguyipereka kwaku ini.
5 Pavuli paki, ndingung’anamuka ndipu ndingusika muphiri.+ Ndinguŵika mya yo mubokosi lo ndingupanga, ndipu yeche mwenimo, nge mo Yehova wangundilamuliya.
6 “Pavuli paki, Ayisirayeli angutuwaku ku Beroti Bene-yakani, ndipu anguluta ku Mosera. Kwenuku ndiku Aroni wangufwiya ndi kuŵikika,+ ndipu mwana waki Eliyazara wangwamba kuteŵete nge wasembi mumalu mwaki.+
7 Ŵati atuwa kwenuku, anguluta ku Gudigoda, ndipu ŵati atuwa ku Gudigoda anguluta ku Yotibata,+ charu cho che ndi misinji ya maji.*
8 “Pa nyengu yeniyo, Yehova wangupatuwa Alevi+ kuti anyamuwengi bokosi la phanganu laku Yehova,+ kuti amengi pa masu paku Yehova ndi kumuteŵete, kweniso kuti atumbikengi mu zina laki,+ nge mo achitiya mpaka msanawale.
9 Ndichu chifukwa chaki Alevi alivi chigaŵa pamwenga chihara pakati pa abali ŵawu. Yehova ndiyu chihara chawu, nge mo Yehova Chiuta winu wanguŵakambiya.+
10 Ini ndinguja paphiri mazuŵa 40, msana ndi usiku,+ nge mo ndinguchitiya pakwamba, ndipu Yehova wangundivwa so+ pa nyengu yeniyi. Yehova wangukhumba cha kukunangani.
11 Pavuli paki, Yehova wangundikambiya kuti, ‘Longozga ŵanthu yaŵa, ndipu nozgeka kuti unyamuki, kuti ŵanthu yaŵa akasere ndi kuto charu cho ndikulapizga kwa apapi ŵawu akali kuti ndiŵapaskengi.’+
12 “Sonu yimwi Ayisirayeli, kumbi Yehova Chiuta winu wakhumba kuti muchitengenji?+ Iyu wakhumba kuti muwopengi Yehova Chiuta winu,+ muyendengi mu nthowa zaki zosi,+ mumuyanjengi, muteŵetiyengi Yehova Chiuta winu ndi mtima winu wosi kweniso umoyu winu wosi,+
13 ndipuso kuti mulondongi ulongozgi ndi marangu ngaku Yehova ngo nditikulamulani msanawale, kuti vinthu vikuyendiyeningi umampha.+
14 Awonani, kuchanya nkhwaku Yehova Chiuta winu ndipu chinanga nkhuchanya kwa kuchanya* kweniso charu chapasi ndi vosi vo vilimu, vaki.+
15 Kweni Yehova wangundere pafupi ndi apapi ŵinu pe kuti waŵalongo chanju chaki, ndipu wakusankha yimwi mphapu yawu kutuliya pakati pa mitundu ya ŵanthu,+ nge mo muliri msanawale.
16 Sonu mutenere kutowesa* mitima yinu+ ndipu muleki kuchita mtafu.*+
17 Pakuti Yehova Chiuta winu ndi Chiuta wa achiuta,+ Mbuya wa ambuya, Chiuta mukulu, wanthazi kweniso wakuchitiska mantha, yo watanjiya munthu weyosi cha+ ndipuso walonde vinyeda cha.
18 Iyu wayeruzga mwaurunji mwana mulanda* kweniso choko.+ Watanja mulendu+ ndipu watimupaska chakurya kweniso vakuvwala.
19 Namwi muyanjengi alendu, chifukwa mwenga alendu mucharu cha Ijipiti.+
20 “Muwopengi Yehova Chiuta winu, mumuteŵetiyengi,+ mumudemeteriyengi kweniso mulapizgiyengi mu zina laki.
21 Iyu ndiyu mumuthamikengi.+ Iyu ndi Chiuta winu yo wakuchitiyani vinthu vikulu kweniso vakuchitiska mantha vosi ivi, vo masu nginu ngawona.+
22 Apapi ŵinu achiluta ku Ijipiti ŵengapu ŵanthu 70,+ kweni sonu Yehova Chiuta winu wachitiska kuti muje anandi ukongwa nge nyenyezi zakuchanya.+
Mazu Ngam'mphata
^ Mazu ngaki chayingu, “Mazu 10.”
^ Pamwenga kuti, “pa zuŵa lo mpingu unguwungana pamoza.”
^ Pamwenga kuti, “cho che ndi madambu nga maji.” Yanga ndi madambu ngo ngaja ndi maji mu nyengu ya vuwa pe.
^ Pamwenga kuti, “chinanga nkhuchanya ukongwa.”
^ Mazu ngaki chayingu, “kudumuwa khungu la.”
^ Mazu ngaki chayingu, “muleki kumizga makhosi nginu.”
^ Mazu ngaki chayingu, “mwana wambula awisi.”
