Dotoronome 22:1-30
22 “Asani wawona kuti ng’ombi pamwenga mbereri ya mubali waku yalanda, ungayilereskanga ŵaka cha.+ Uyikhwemiyengi kwa mubali waku kwambula kutondeka.
2 Kweni asani mubali waku waja kutali ndi yiwi pamwenga asani utimuziŵa cha, nyama yo ulutengi nayu kunyumba yaku, ndipu yije ndi yiwi mpaka po mubali waku wayambiyengi kuyipenjapenja. Pavuli paki, uyiweze kwaku iyu.+
3 Venivi ndivu utenere kuchita ndi bulu waki, chakuvwala chaki, ndipuso chinthu chechosi cho mubali waku wataya ndipu yiwi wachisaniya. Ungachilereskanga ŵaka cha.
4 “Asani wawona kuti bulu pamwenga ng’ombi ya mubali waku yawa pa msewu, ungayilereskanga ŵaka cha. Umuwovyengi kusoska nyama yo kwambula kutondeka.+
5 “Munthukazi wangavwalanga cha chakuvwala cha munthulumi, ndipu munthulumi wangavwalanga cha chakuvwala cha munthukazi. Pakuti weyosi yo wachita viyo Yehova Chiuta waku waseruka nayu.
6 “Asani wawona chizimbu cha chiyuni mumphepeti mwa msewu ndipu mwe tana pamwenga mazira, kwali che muchimiti pamwenga che pasi, ndipu nyina wafungatiya tana to pamwenga wagona pamazira, ungatonga nyina pamoza ndi tana taki cha.+
7 Uwonesesi kuti wato tana pe ndipu nyina umuleki kuti wakengi. Uchitengi venivi kuti vinthu vikuyende umampha kweniso kuti uje ndi umoyu utali.
8 “Asani wazenga nyumba yifya, uzengengi so kampanda pachanya pa denga+ kuchitiya kuti uleki kuŵika mulandu wa ndopa pa nyumba yaku asani munthu wawa pasi kutuliya pachanya.
9 “Mumunda waku wa mphereska ungapandangamu so mbewu ya mtundu unyaki cha.+ Asani wachita viyo, vosi vo wavuna kutuliya ku mbewu yo ndipuso vipasu va mphereska uviperekengi kumalu ngakupaturika.
10 “Asani ulima, ungamangiriyanga ng’ombi ndi bulu mugoli limoza cha.+
11 “Ungavwalanga cha chakuvwala cho chikupangika mwakusazga weya ndi salu.+
12 “Uŵikengi mphonji mumakona nganayi nga chakuvwala chaku.+
13 “Asani munthulumi wato munthukazi ndipu wagonana nayu kweni pavuli paki wayamba kumutinkha,*
14 ndipu watimumba mulandu wakuti wangwenda uheni ndipuso watimunangiya mbiri yaki mwakukamba kuti: ‘Ndato munthukazi uyu, kweni ndati ndagonana nayu, ndawusaniya cha ukaboni wakuti wenga mwali,’
15 awisi ndi anyina a msungwana yo azengi kwa ŵara pageti la tawuni yo ndi ukaboni wakuti msungwana yo wenga mwali.
16 Awisi a msungwana yo akambiyengi ŵara kuti, ‘Ndingupereka mwana wangu munthukazi kwa munthulumi uyu kweni wamutinkha,*
17 ndipu watimumba mulandu wakuti wangwenda uheni, mwakukamba kuti: “Ndawusaniya cha ukaboni wakuti mwana winu wenga mwali.” Sonu ukaboni wakuti mwana wangu wenga mwali ndi uwu.’ Pavuli paki, atambasuwengi salu pa masu pa ŵara a mutawuni yo.
18 Ŵara+ a mutawuni yo atongi munthulumi yo ndi kumulanga.+
19 Yiwu amulipirisengi masekeli* 100 nga siliva ndipu angaperekengi kwa awisi a msungwana yo chifukwa chakuti munthulumi yo wananga mbiri ya mwali wa mu Isirayeli,+ ndipu walutirizgengi kuja muwolu waki. Iyu wazomerezekengi cha kumupata pa nyengu yosi yo wajaliyengi ndi umoyu.
20 “Kweni asani munthulumi yo waneneskanga, ndipu palivi ukaboni wakuti msungwana yo wenga mwali,
21 msungwana yo amutuzgiyengi pakhomu la nyumba ya awisi, ndipu anthulumi a mutawuni yaki amuponyengi ndi mya kuti wafwi, chifukwa chakuti wachita chinthu chakulengesa+ mu Isirayeli, iyu wachita ureŵi* munyumba ya awisi.+ Mwaviyo, mutuzgengepu chinthu chiheni pakati pinu.+
22 “Asani munthulumi amusaniya kuti wagona ndi muwolu wamweni, wosi ŵaŵi atenere kubayika, munthulumi yo wagonana ndi muwolu wamweni kweniso munthukazi yo.+ Mwaviyo, mutuzgengemu chinthu chiheni mu Isirayeli.
23 “Asani mwali wakulayizgika nthengwa ndi munthulumi, ndipu munthulumi munyaki wakumana nayu mutawuni ndi kugonana nayu,
24 wosi ŵaŵi mulutengi nawu pageti la tawuni yo ndi kuŵaponya mya kuti afwi. Msungwana yo waponyeki mya chifukwa chakuti wangudaniriza cha mutawuni yo ndipu munthulumi yo waponyeki mya chifukwa chakuti walengesa muwolu wa munyaki.+ Mwaviyo, mutuzgengepu chinthu chiheni pakati pinu.
25 “Asani munthulumi yo wangukumana ndi msungwana yo kudondu, ndipu wangumuluska nthazi ndi kumukolere, munthulumi yo wamukolere ndiyu watenere kubayika.
26 Msungwana yo mungachitanga nayu chechosi cha. Iyu wachita ubudi wakwenere nyifwa cha. Mulandu uwu uyanana ŵaka ndi mulandu wa munthu yo wayukiya munyaki ndi kumubaya.+
27 Pakuti wangukumana nayu kudondu, ndipu msungwana yo wangudaniriza kweni pengavi wakuti wamutaski.
28 “Asani munthulumi wakumana ndi msungwana yo ndi mwali, ndipuso yo wakulayizgika nthengwa cha ndipu wamuko ndi kugona nayu ndipu aŵasaniya,+
29 munthulumi yo wagona nayu watenere kupereka masekeli 50 nga siliva kwa awisi a msungwana yo, ndipu wajengi muwolu waki.+ Chifukwa chakuti wamulengesa, munthulumi yo wazomerezekengi cha kumupata pa nyengu yosi yo wajaliyengi ndi umoyu.
30 “Munthulumi wangatonga muwolu wa awisi cha, kuti waleki kulengesa awisi.*+
Mazu Ngam'mphata
^ Pamwenga kuti, “wayamba kumukana.”
^ Pamwenga kuti, “kweni wamukana.”
^ Sekeli yimoza yayanananga ndi magilamu 11.4. Wonani Fundu Zakukumaliya B14.
^ Pamwenga kuti, “uhuli.”
^ Mazu ngaki chayingu, “waleki kubenuwa siketi ya awisi.”
