Dotoronome 23:1-25
23 “Munthulumi weyosi yo akumuthena mwakuphwanya matongu ngaki pamwenga yo akumudumuwa nkhuli, wangaserenga cha mu mpingu waku Yehova.+
2 “Mwana wapadondu wangaserenga cha mu mpingu waku Yehova.+ Ŵana ŵaki angaserenga cha mu mpingu waku Yehova, mpaka mugonezi wa 10.
3 “Aamoni ndipuso Amowabu angaserenga cha mu mpingu waku Yehova.+ Ŵana ŵawu angaserenga cha mu mpingu waku Yehova, mpaka mugonezi wa 10,
4 chifukwa chakuti angukupaskani cha chakurya ndipuso maji muchituwa ku Ijipiti,+ kweniso chifukwa chakuti angulembera Balamu mwana waku Beyori wa ku Petori ku Mesopotamiya kuti wakutembeni.+
5 Kweni Yehova Chiuta winu wangukana kuvwiya Balamu.+ Ndipu Yehova Chiuta winu wangukutumbikani mumalu mwakukutembani,+ chifukwa chakuti Yehova Chiuta winu wangukuyanjani.+
6 Pa nyengu yosi yo mujaliyengi ndi umoyu, mungachitanga cha chechosi cho chingawovya kuti ajengi mwachimangu kweniso kuti vinthu viŵayendiyengi umampha.+
7 “Aedomu mungaŵatinkhanga cha chifukwa mbabali ŵinu.+
“Ayijipiti mungaŵatinkhanga cha chifukwa mwenga alendu mucharu chawu.+
8 Mugonezi wachitatu wa ŵana ŵawu ungasere mu mpingu waku Yehova.
9 “Asani mwajintha mahema kuti muchiti nkhondu ndi arwani ŵinu, mungachitanga cha chinthu chechosi chiheni.*+
10 Asani munthulumi wafipiskika chifukwa chakuti watuzga unthulumi ndi usiku,+ watuliyengi kubwalu kwa msasa ndipu wangaserenga dankha cha.
11 Ndi mazulu wasambengi ndipu waweriyengi mumsasa asani lumwi lasere.+
12 Mujengi ndi malu* kubwalu kwa msasa ndipu kweniko ndiku mulutengi.
13 Pa vidya vo mwe navu, paŵengi so chakukumbiya. Asani mwaluta kubwalu kwa msasa kuchijiwovya, mukumbengi zenji ndi chakukumbiya ndipu asani mwamala kujiwovya, muwundengepu.
14 Pakuti Yehova Chiuta winu watenda mumsasa winu+ kuti wakutaskeni kweniso kuti wapereki arwani ŵinu mumanja mwinu, ndipu msasa winu ujengi utuŵa+ alinga kuti Chiuta waleki kuwona chinthu chechosi chiheni pakati pinu ndi kuleka kwenda namwi.
15 “Asani kapolu wathaŵa kwa ambuyaki ndi kuza kwaku yiwi, ungachimuperekanga cha kwa ambuyaki.
16 Wangaja pakati pinu, peposi po wasankha mu yimoza mwa matawuni nginu, kwekosi ko wakhumba. Mungamuchitiyanga nkhaza cha.+
17 “Mwana munthukazi weyosi wa Ayisirayeli wangajanga cha huli la panyumba yakusopiyamu,+ ndipuso mwana munthulumi weyosi wa Ayisirayeli wangajanga cha huli la panyumba yakusopiyamu.+
18 Ndalama zo huli linthukazi pamwenga zo huli linthulumi lalipirika,* ungazanga nazu cha kunyumba yaku Yehova Chiuta waku kuti ufiski vo ukulapizga, chifukwa chakuti wosi ŵaŵi Yehova Chiuta waku waseruka nawu.
19 “Asani mubali waku wamubwereka ndalama, chakurya pamwenga chinthu chinyaki chechosi, ungamukambiyanga cha kuti wakusazgiyepu+ asani watikuweze.
20 Mulendu ungamukambiya kuti wakusazgiyepu,+ kweni mubali waku ungamukambiyanga cha kuti wakusazgiyepu,+ kuti Yehova Chiuta waku wakutumbiki pa vinthu vosi vo uchita mucharu cho wakuchito kuti chije chaku.+
21 “Asani walapizga kwaku Yehova Chiuta waku,+ ungasweranga cha kufiska.+ Pakuti Yehova Chiuta waku wakhumbengi kuti ufiski vo walapizga; asani ulekengi kufiska, mbwenu ubudengi.+
22 Kweni asani waleka kulapizga, ubudengi cha.+
23 Usungengi mazu ngapamulomu waku+ ndipu ufiskengi vo walayizga ndi mulomu waku, nge sembi yo upereka mwakukhumba wija kwaku Yehova Chiuta waku.+
24 “Asani wasere mumunda wa mphereska wa munyaku, ungarya vipasu va mphereska mpaka kuguta, kweni vinyaki ungaviŵikanga muchiyaŵi chaku cha.+
25 “Asani wasere mumunda wa tirigu wa munyaku, ungapuluwa tirigu ndi manja ngaku, kweni ungasenganga cha tirigu wa munyaku ndi chisenga.+
Mazu Ngam'mphata
^ Pamwenga kuti, “chinthu chechosi chakufipiska.”
^ Kung’anamuwa chimbuzi.
^ Mazu ngaki chayingu, “pamwenga zo galu walipirika.”
