Ezekiyeli 5:1-17
5 “Kweni yiwi mwana wa munthu, to lipanga lakuthwa kuti uligwiriskiyi ntchitu nge lezara. Umeti sisi laku kweniso mwembi, uto vakupimiya kuti ulipimi ndipu uligaŵi patatu.
2 Uto chimoza mwa vigaŵa vitatu va sisi lo, ndipu uchiwotchi pamotu mukati mwa tawuni yo asani mazuŵa ngakuzingilizika kwaki ngamala.+ Pavuli paki uto chigaŵa chinyaki, ndipu uchipumi ndi lipanga kuzunguliya tawuni yo.+ Chigaŵa chakumaliya uchitchupusiyi mumphepu, ndipu ndazamusolo lipanga kuti ndiŵatchimbizi.+
3 “Pa chigaŵa chakumaliya, utopu sisi limanavi ndipu ulivungi pachakuvwala chaku.
4 Utopu so sisi linyaki ndipu uliponyi pamotu kuti lipiriyi. Motu utuwengi penapa ndipu usapaliyengi munyumba yosi yaku Isirayeli.+
5 “Yehova, Ambuya Fumu Yikulu wakamba kuti: ‘Uyu ndi Yerusalemu. Ndamuŵika pakati pa mitundu ya ŵanthu ndipu wazingilizika ndi vyaru vinyaki.
6 Kweni wagarukiya vyeruzgu vangu ndipuso marangu ngangu, wachita vinthu viheni ukongwa kuluska vo mitundu ya ŵanthu yichita kweniso vo vyaru vo vamuzunguliya vichita.+ Pakuti yiwu akana vyeruzgu vangu ndipu angwenda cha mu marangu ngangu.’
7 “Mwaviyo, Yehova, Ambuya Fumu Yikulu wakamba kuti: ‘Chifukwa chakuti wenga wakusuzga ukongwa kuluska mitundu yo yakuzunguliya kweniso chifukwa chakuti ungwenda cha mu marangu ngangu pamwenga kulondo vyeruzgu vangu, kweni mumalu mwaki ungulondo vyeruzgu va mitundu yo yakuzunguliya,+
8 Yehova, Ambuya Fumu Yikulu wakamba kuti: “Ndimalanengi nawi, yiwi tawuni,+ ndipu ndiperekengi cheruzgu pakati paku pa masu pa mitundu ya ŵanthu.+
9 Chifukwa cha vinthu vosi vakuseruska vo uchita, ndichitengi vinthu vakuti ndikuchitapu cha pakati paku, ndipu ndazamuchitapu so cha vinthu va nge venivi.+
10 “‘“Pakati paku, ada azamukurya ŵana ŵawu,+ ndipu ŵana azamukurya awusewu. Ndazamupereka cheruzgu pakati paku ndipu ŵanthu wosi wo ajaku ndazakuŵambininiskiya muvigaŵa vosi.”’*+
11 “Yehova, Ambuya Fumu Yikulu wakamba kuti, ‘Mwaviyo, nge mo ini ndiliri wamoyu, chifukwa chakuti mungufipiska malu ngangu ngakupaturika ndi angoza ŵinu wosi akuseruska kweniso vinthu vosi vakuseruska vo mwachitanga,+ nani ndikukaneningi;* jisu langu likuchitiyeningi chitima cha, ndipu ndikulongoningi lisungu cha.+
12 Chimoza mwa vigaŵa vitatu vaku yimwi chifwengi ndi mulili* pamwenga kumala ndi nja pakati pinu. Chigaŵa chinyaki chazamubayika ndi lipanga+ kuzunguliya yiwi. Chigaŵa chakumaliya ndazakuchimbininiskiya muvigaŵa vosi,* ndipu ndazamusolo lipanga kuti ndiŵatchimbizi.+
13 Asani venivi vazichitika, kukwiya kwangu kwazamumala, ukali wangu wazamutuna ndipuso ndazamukhorwa.+ Asani ndazimaliza kuŵalongo ukali wangu, azamuziŵa kuti ini, Yehova, ndalongoro chifukwa chakuti ndikhumba kuti ŵanthu ajiperekengi kwaku ini pe.+
14 “‘Ndazakukusambusa malu ngakunangika ndipuso chinthu chakunyozeka pakati pa mitundu ya ŵanthu yo yakuzunguliya ndipuso pa masu pa munthu weyosi yo wajumpha pafupi ndi yiwi.+
15 Ndazakukusambusa chinthu chakunyozeka kweniso chakusekeka,+ wazamuja chakuwoniyapu chakutcheŵeska ndipuso chinthu chakuchitiska mantha ku mitundu ya ŵanthu yo yakuzunguliya, asani ndazipereka cheruzgu paku yiwi chifukwa cha kukwiya ndi ukali ndipuso asani ndazikulanga chifukwa cha kufya mtima. Ini Yehova, ndalongoro.
16 “‘Ndazakuŵatumiya nja yo yazakuŵapweteka nge mivi. Mivi yo nditumengi yazakuŵamala.+ Ndazamuchitiska kuti nja yikuwi ukongwa ndipu chakurya chazamusoŵa.*+
17 Ndazakukutumiyani nja kweniso vinyama vakofya vamudondu,+ ndipu vazamubaya ŵana ŵinu. Mwazamusuzgika ndi milili kweniso kubayana, ndipu ndazamukuza ndi lipanga kwaku yimwi.+ Ini Yehova, ndalongoro.’”
Mazu Ngam'mphata
^ Mazu ngaki chayingu, “ku mphepu zosi.”
^ Pamwenga kuti, “ndikumaleningi.”
^ Pamwenga kuti, “nthenda.”
^ Mazu ngaki chayingu, “ku mphepu zosi.”
^ Mazu ngaki chayingu, “ndipu ndazamuphwanya timiti tinu ta viŵandi.” Panyaki iti nthimiti takutungaku viŵandi kuti visungiki.
