Machitidu nga Akutumika 27:1-44
27 Sonu ŵati atikambiya kuti tiluti ku Itale,+ angupereka Paulo ndi akayidi anyaki mu manja mwaku Juliyasi mura wa gulu la asilikali lo ladanikanga kuti Ogasito.
2 Tingukwera sitima yakutuliya ku Adiramutiyo yo yenga pafupi kusoka kuluta mumadowoku ngamumphepeti mwa chigaŵa cha Asia. Sonu tingusoka ndipu Arisitako+ wa ku Tesalonika muchigaŵa cha Makedoniya wenga nasi limoza.
3 Mawa laki tingufika ku Sidoni ndipu Juliyasi wamuchitiyanga vinthu mwalisungu Paulo, kweniso wangumuzomereza kuluta kwa anyaki kuti akamuwovyi.
4 Tati tatuwa kwenuku, tingwenda panyanja mumphepeti mwa chirwa* cha Kupuro kuti chitijalizengi, chifukwa mphepu yo yenga panyanja yatuwanga ko takanga.
5 Pavuli paki, tingwenda mukati mwa nyanja chakufupi ndi Kilikiya ndi Pamfuliya ndipu tingufika padowoku la Mira ku Lukiya.
6 Kwenuku, mura wa gulu la asilikali wangusaniya sitima yakutuliya ku Alekizandiriya yo yalutanga ku Itale ndipu wangutikweza yeniyo.
7 Tati tayenda kamanakamana kwa mazuŵa nganandiku, tingufika ku Kinido mwakusuzgikiya. Sonu chifukwa chakuti mphepu yatitondekesanga kuluta kunthazi, tingwende kufupi ndi ku Salimone mumphepeti mwa chirwa* cha Kirete kuti chitijalizengi.
8 Tati tayenda mwakusuzgikiya mumphepeti mwa nyanja, tingufika pamalu ngo ngadanika kuti Jiti Lamampha, ngo ngenga pafupi ndi tawuni ya Laseya.
9 Sonu pangujumpha nyengu yitaliku ndipu kwenda pamaji kwenga kwakofya pa nyengu iyi, chifukwa chinanga ndi nyengu yakufunga ya Zuŵa Lakubenekere Maubudi+ nayu ndipu yamala kali. Mwaviyo Paulo wanguŵatcheŵeska
10 kuti: “Mwaŵanthu, ndiwona kuti ulendu uwu unangisengi katundu ndi sitima pe cha, kweni utayisengi so maumoyu ngidu.”
11 Kweni mura wa gulu la asilikali wanguvwiya wakwendesa sitima ndipuso mweneku wasitima, mumalu mwakuvwiya vo Paulo wakambanga.
12 Pakuti pajiti ili penga pamampha cha kujapu mu chipwepwi, ŵanthu anandi angukamba kuti tituweku kuti akawoni asani ku Fonikisi kungaŵa kwamampha kujaku mu chipwepwi. Fonikisi ndi jiti la pachirwa* cha Kirete lo likulazga kunkhondi* chakuvuma* ndipuso kumwera cha kuvuma.
13 Mphepu yakutuliya kumwera yati yayamba kugowoka, anguŵanaŵana kuti vo akhumbanga vifiskikengi, ndipu anguzuwuwa ndondowa ndi kwamba kwenda mumphepeti mwa chirwa* cha Kirete kufupi ndi kumtunda.
14 Kweni pati pajumpha kanyengu kamanavi, chimphepu chanthazi chakutuliya kunkhondi* chakuvuma* chingwamba kututuzgiya kuvuli sitima yo.
15 Pakuti mphepu yenga yikulu, sitima yasuzgikanga ukongwa kwenda mwakuti yingutondeka kuluta ko kwatuwanga mphepu. Mwaviyo, tinguleka kulimbana ndi mphepu yo, ndipu tapingikanga ŵaka nayu.
16 Pavuli paki, tingwamba kwenda mumphepeti mwa kachirwa* kanyaki ko kadanika kuti Kauda kuti katijalizengi, kweni kaboti* ko angukamangiriya kuvuli kwa sitima katondekanga kwenda umampha.
17 Ŵati akweza kaboti musitima, angwamba kumanga sitima ndi vingwi ndipu chifukwa chakuti awopanga kusere pachipali cha ku Suriti,* angusiska vingwi va thanga ndipu tapingikanga ŵaka ndi mphepu.
18 Mawa laki, angwamba kutaya katundu kuti sitima yipepukeku chifukwa chakuti mphepu yatitutuzganga mwanthazi.
19 Pa zuŵa lachitatu, angwamba kutaya ŵija vingwi vakumangiya sitima.
20 Lumwi ndi nyenyezi vinguleka kuwoneka kwa mazuŵa nganandi ndipu mphepu yanthazi yatitutuzganga ukongwa, mwakuti maŵanaŵanu ngosi ngakuti tingapona ngangwamba kumala.
21 Ŵati aja kwambula kurya kwa mazuŵa nganandi, Paulo wangusoka pakati pawu ndi kukamba kuti: “Mwaŵanthu, asani munguvwiya ulongozgi wangu kuti tileki kunyamuka ulendu wapanyanja kutuwa ku Kirete, mphanyi vinthu vanangika viyo cha ndi kutayika.+
22 Kweni chinanga kuti ve viyo, nditikukambiyani kuti mukhwimi mtima, chifukwa palivi chinanga njumoza waku yimwi yo wafwengi, sitima pe ndiyu yiswekengi.
23 Usiku wunu mungelu+ waku Chiuta yo nditimusopa kweniso yo nditimuchitiya uteŵeti wakupaturika, wanguma pafupi nani
24 ndipu wangundikambiya kuti: ‘Ungawopanga cha Paulo. Utenere kuchiwoneke pa masu paku Kayisara+ ndipu awona! Chiuta wakupaska ŵanthu wosi wo we nawu musitima.’
25 Mwaviyo khwimani mtima mwaŵanthu, chifukwa ndigomezga Chiuta kuti vinthu vichitikengi ndendende nge mo mungelu wandikambiya.
26 Kweni sitima yamusweka pachirwa* chinyaki.”+
27 Sonu pa usiku wa 14 tichisewasewa ŵaka pa Nyanja ya Adiriya, pakati pa usiku akwendesa sitima angwamba kuŵanaŵana kuti te pafupi kufika ku mtunda.
28 Ŵati apima angusaniya kuti pe mamita pafufupi 36* kufika pasi. Ŵati alutiriyaku kamanavi angupima so ndipu angusaniya kuti pe mamita pafufupi 27* kufika pasi.
29 Chifukwa cha kopa kumwantha mya, anguponya ndondowa zinayi zakuvuli ndipu akhumbisiskanga kuti mphanyi kungucha.
30 Kweni akwendesa sitima akhumbanga kuthaŵamu, ndipu asisiyanga kaboti mumaji achipusikiziya kuti akhumba kuchiponya ndondowa zakunthazi.
31 Paulo wangukambiya mura wa gulu la asilikali ndi asilikali kuti: “Asani ŵanthu yaŵa alekengi kuja munu musitima, muponengi cha.”+
32 Sonu asilikali angudumuwa vingwi vakumangiya kaboti ndipu angukaleka kuti kawi.
33 Sonu chakumatandakucha, Paulo wanguŵachiska wosi kuti aryi. Iyu wanguŵakambiya kuti: “Msanawale ndi zuŵa la nambala 14 kutuliya po mukwambiya kulindizga kuti kuwengenji, ndipu mwaja kwambula kurya chechosi.
34 Sonu nditikuchiskani kuti muryeku chakurya. Venivi viwovyengi kuti vikuyendiyeni umampha, chifukwa chinanga ndi sisi limoza la kumutu kwa munthu weyosi waku yimwi linangikengi cha.”
35 Wati wakamba venivi, wanguto chiŵandi, wanguwonga kwaku Chiuta pa masu paku wosi, wangumenya ndi kwamba kurya.
36 Mwaviyo wosi anguchiskika ndipu nawu angwamba kurya.
37 Musitima iyi tengamu taŵanthu 276.
38 Ŵati arya chakurya chakukwana ndi kuguta, angwamba kutaya munyanja tirigu yo wenga musitima kuti yipepukeku.+
39 Kwati kwacha anguchiziŵa cha charu cho,+ kweni anguwona dowoku la mchenga ndipu anguŵanaŵana kuti asani angafiska, sitima akayikochezi penipo.
40 Sonu angudumuwa ndondowa ndipu zinguwiya munyanja. Nyengu yeniyo, yiwu angufwatuwa so vingwi va nkhafu, ndipu ŵati akweze muchanya thanga lakunthazi, angulazga kulikumba.
41 Ŵati asere muchipali cho chenga po pakumananga mayiŵa, sitima yingusere mumchenga ndipu yinguphata kunthazi, mwakuti yayendanga cha. Sonu mayiŵa ngangwamba kuvikita sitima yo kuvuli.+
42 Venivi vati vachitika, asilikali akhumbanga kubaya akayidi kuti paŵevi yumoza wakuti wasambiri ndi kuthaŵa.
43 Kweni mura wa gulu la asilikali wakhumbisiskanga kuti Paulo wakamufikisi umampha ndipu wanguŵakaniza kuti angaŵabayanga cha. Iyu wangulamula kuti wosi wo aziŵanga kusambira, andwikiyi munyanja kuti ndiwu akayambi kufika kumtunda,
44 ndipu anyaki wosi alondongi muvuli, anyaki pamathabwa penipo anyaki pa vibanthu va sitima yo. Mwaviyo wosi angufika umampha kumtunda.+
Mazu Ngam'mphata
^ Anyaki akamba kuti, “chilumba.”
^ Anyaki akamba kuti, “chilumba.”
^ Anyaki akamba kuti, “chilumba.”
^ Anyaki akamba kuti, “kumpotu.”
^ Pamwenga kuti, “ko kutuliya lumwi.”
^ Anyaki akamba kuti, “chilumba.”
^ Anyaki akamba kuti, “kumpotu.”
^ Mphepu iyi yadanikanga kuti Yurakulo.
^ Kaboti ko ŵanthu ataskikiyangamu pa ngozi.
^ Anyaki akamba kuti, “chilumba.”
^ Wonani Mazu ngo Ngakonkhoskeka.
^ Anyaki akamba kuti, “chilumba.”
^ Mazu ngaki chayingu, “mafatomu 20”; (mafiti 120). Wonani Fundu Zakukumaliya B14.
^ Mazu ngaki chayingu, “mafatomu 15”; (mafiti 90). Wonani Fundu Zakukumaliya B14.
