Uthenga Wamampha wo Ukulembeka ndi Mariko 9:1-50

JULANI

Yesu wasambuka (1-13)
Mnyamata wa mzimu uheni wachizgika (14-29)
- Ku munthu yo we ndi chivwanu, vinthu vosi vichitika (23)
Nyifwa yaku Yesu yikambikiya so limu (30-32)
Akusambira asuskana kuti mura ndiyani (33-37)
Weyosi yo waleka kususkana nasi, we kuchigaŵa chidu (38-41)
Chakuguŵiska (42-48)
“Jani ndi mche mwaku mwaŵeni” (49, 50)

9 Yesu wangulutirizga kuŵakambiya kuti: “Nditikuneneskiyani kuti pe anyaki wo ama panu, wo afwengi cha mpaka po awone dankha kuti Ufumu waku Chiuta waza ndi nthazi.”+ ² Pati pajumpha mazuŵa 6, Yesu wanguto Peturo, Yakobe ndi Yohane ndipu wanguluta nawu muphiri litali kwakuŵija. Iyu wangusambuka yiwu achilereska.+ ³ Malaya ngaki ngakubwalu ngangwamba kugabuka, ndipu ngangutowa ukongwa kuluska mo wakuchapa malaya weyosi pacharu chapasi wangatowese vakuvwala. ⁴ Kweniso Mozesi ndi Eliya anguŵawoneke penipo, yiwu akambiskananga ndi Yesu. ⁵ Pavuli paki, Peturo wangukambiya Yesu kuti: “Rabi, mwachita umampha kuza nasi kunu. Sonu tijinthi mahema ngatatu, limoza linu, limoza laku Mozesi ndipuso linyaki laku Eliya.” ⁶ Peturo waziŵanga cha vo wangachita chifukwa ŵenga ndi mantha ukongwa. ⁷ Sonu kunguchita mtambu wo unguŵabenekere ndipu mumtambu wo mungutuwa mazu+ ngakuti: “Uyu ndi Mwana wangu, mweniyo nditanja.+ Muvwiyeni.”+ ⁸ Ndipu nyengu yeniyo, ŵati alereskalereska anguwonapu munthu weyosi cha, kweni penga Yesu pe. ⁹ Achisika muphiri, Yesu wangukaniza akusambira ŵaki kuti angakambiyanga munthu weyosi cha vo awona,+ mpaka po Mwana wa munthu wazamuyuskikiya.+ ¹⁰ Yiwu angusunga mazu ngenanga mumtima,* kweni akambiskananga vo kuyuka kwaki ku nyifwa kung’anamuwa. ¹¹ Yiwu angufumba Yesu kuti: “Ntchifukwa wuli alembi akamba kuti Eliya+ watenere kuza dankha?”+ ¹² Iyu wanguŵamuka kuti: “Eliya watenere nadi kuza dankha ndipu wazamuweziyapu vinthu vosi.+ Kweni nanga ntchifukwa wuli malemba ngakamba kuti Mwana wa munthu watenere kukumana ndi masuzgu nganandi+ ndipuso kuti azakumuchitiya vinthu vachipongu?+ ¹³ Kweni nditikukambiyani kuti Eliya+ wakuza, ndipu angumuchitiya chechosi cho akhumbanga nge mo vikulembeke vakukwaskana ndi iyu.”+ ¹⁴ Ŵati afika ko kwenga akusambira ŵaki anyaki, anguwona chigulu cha ŵanthu cho chenga pafupi ndi yiwu, ndipu penga so alembi wo asuskananga ndi akusambira wo.+ ¹⁵ Chigulu chosi cha ŵanthu chati chawona ŵaka Yesu, chinguzizwa ndipu chingumutchimbiriya kuti chikamutawuzgi. ¹⁶ Sonu Yesu wanguŵafumba kuti: “Kumbi mususkananji nawu?” ¹⁷ Ndipu yumoza wa ŵanthu wo, wangumuka kuti: “Msambizi, ndinguza ndi mwana wangu kwaku yimwi, chifukwa we ndi mzimu uheni wo utimutondekesa kulongoro.+ ¹⁸ Asani wamuyukiya, utimuponya pasi, watuwa phovu kumulomu, wakekechuwa minyu ndipuso utimumala nthazi. Ndingupempha akusambira ŵinu kuti awutuzgi, kweni atondeka.” ¹⁹ Pakumuka, Yesu wanguŵakambiya kuti: “Hate! mugonezi wambula chivwanu uwu!+ Kumbi ndilutirizgengi kuŵa namwi mpaka zuŵanji? Kumbi ndikunthiyengepu namwi mpaka zuŵanji? Zani nayu kunu.”+ ²⁰ Sonu mnyamata yo anguza nayu kwaku Yesu, ndipu mzimu wo wati wamuwona ŵaka, nyengu yeniyo unguwisa mwana yo pasi, ndipu wangwamba kunyutuka. Wati wawa pasi, wangukunkhulukakunkhuluka ndi kutuwa phovu kumulomu. ²¹ Pavuli paki, Yesu wangufumba awisi kuti: “Kumbi venivi vikwamba zuŵanji kumuchitikiya?” Yiwu angumuka kuti: “Kutuliya pa unamana waki. ²² Ndipu kanandi utimuwisa pamotu kweniso mumaji kuti wafwi. Kweni asani mungafiska, tichitiyeni lisungu, tiwovyeni chondi.” ²³ Yesu wangumukambiya kuti: “Ntchifukwa wuli ukamba kuti, ‘Asani mungafiska?’ Ku munthu yo we ndi chivwanu, vinthu vosi vichitika.”+ ²⁴ Nyengu yeniyo, awisi a mwana yo angudaniriza kuti: “Chivwanu nde nachu! Ndiwovyeni kuti ndije ndi chivwanu chakukho!”+ ²⁵ Sonu Yesu wati wawona kuti chigulu cha ŵanthu chikhumukiya kwaku iyu, wanguchenya mzimu uheni wo kuti: “Yiwi mzimu wakutondekesa kulongoro kweniso kuvwa, nditikulamula kuti tuwa mwaku iyu ndipu ungaserengamu so cha!”+ ²⁶ Mwana yo wangudaniriza ndi kwamba kunyutuka, pavuli paki mzimu wo ungutuwamu mwaku iyu ndipu wanguja nge kuti wafwa, mwakuti ŵanthu anandi akambanga kuti: “Wafwa!” ²⁷ Kweni Yesu wangumuko pajanja ndi kumuyuska ndipu wangusoka. ²⁸ Sonu Yesu wati wasere munyumba, akusambira ŵaki angumufumba kwakuŵija kuti: “Ntchifukwa wuli isi tatondeka kutuzga mzimu uheni wuwa?”+ ²⁹ Iyu wanguŵamuka kuti: “Mzimu wa mtundu uwu utuzgika ndi pempheru pe.” ³⁰ Sonu angutuwaku kwenuku ndipu angujumpha mu Galileya, kweni Yesu wangukhumba cha kuti munthu weyosi waziŵi ko iyu wenga. ³¹ Chifukwa wasambizanga akusambira ŵaki ndipu waŵakambiya kuti: “Mwana wa munthu waperekekengi mu manja mwa ŵanthu, ndipu amubayengi+ kweni chinanga kuti amubayi, pa zuŵa lachitatu* wayuskikengi.”+ ³² Yiwu anguvwisa cha vo wakambanga kweni awopanga kumufumba. ³³ Pavuli paki, angufika ku Kaperenao. Sonu we munyumba wanguŵafumba kuti: “Kumbi mwasuskananganji munthowa?”+ ³⁴ Yiwu anguja ŵaka cheti chifukwa munthowa asuskananga kuti mura ndi yani pakati pawu. ³⁵ Sonu wanguja pasi ndi kudana akusambira ŵaki 12, ndipu wanguŵakambiya kuti: “Asani munthu wakhumba kuja wakwamba, watenere kuja wakumaliya paku wosi kweniso mteŵeti waku wosi.”+ ³⁶ Ndipu wanguto kamwana ndi kukamika pakati pawu, wangukako paphewa ndipu wanguŵakambiya kuti: ³⁷ “Weyosi yo walonde kamoza mwa tiŵana ta nge kamwana yaka+ chifukwa cha zina langu, walonde so ini. Ndipu weyosi yo walonde ini, walonde ini pe cha, kweni walonde so Yo wakundituma.”+ ³⁸ Yohane wangukambiya Yesu kuti: “Msambizi, tinguwona munthu munyaki wachituzga viŵanda mu zina linu, sonu tingumukaniza chifukwa we mu gulu lidu cha.”+ ³⁹ Kweni Yesu wangukamba kuti: “Mungamukanizanga cha, chifukwa palivi munthu yo wachita vakuziziswa mu zina langu, yo wangakamba mwaliŵi chiheni chechosi chakukwaskana ndi ini. ⁴⁰ Chifukwa weyosi yo waleka kususkana nasi, we kuchigaŵa chidu.+ ⁴¹ Ndipu weyosi yo watikupaskani kapu ya maji kuti mumwi chifukwa chakuti mwe aku Khristu,+ nditikuneneskiyani kuti wazakuyitayapu cha mphotu yaki.+ ⁴² Kweni weyosi yo waguŵiska kamoza mwa tiŵana teniti to te ndi chivwanu, vingaŵa umampha kumumangiriya mukhosi chimwa chakupere nge cho bulu waguza, ndi kumubizga munyanja.+ ⁴³ “Asani janja laku litikuguŵiska, ulidumuwi. Nkhanthu kusere mu umoyu we wakupunduka, kuluska kuti uponyeki mu Gehena* we ndi manja ngosi ngaŵi, mo mwe motu wambula kuzimwika.+ ⁴⁴ * —— ⁴⁵ Ndipu asani phazi laku litikuguŵiska, ulidumuwi. Nkhanthu kusere mu umoyu we wakupunduka, kuluska kuti uponyeki mu Gehena* we ndi maphazi ngosi ngaŵi.+ ⁴⁶ * —— ⁴⁷ Ndipu asani jisu laku litikuguŵiska, litayi kutali.+ Nkhanthu kusere mu Ufumu waku Chiuta we ndi jisu limoza, kuluska kuti uponyeki mu Gehena* we ndi masu ngosi ngaŵi,+ ⁴⁸ ko mphorozi zitufwa cha ndipuso motu uzimwika cha.+ ⁴⁹ “Chifukwa weyosi watenere kuwazika mche wo we nge motu.+ ⁵⁰ Mche ngwamampha kweni asani wasukuluka, kumbi kunowa kwaki kungaweriyamu so wuli?+ Jani ndi mche mwaku mwaŵeni+ ndipu jani mwachimangu ndi anyinu.”+