Masalimo 86:1-17
Pempheru laku Davidi.
86 Yimwi Yehova, khazaniku gutu linu* ndipu mundimuki,Pakuti ndasuzgika kweniso ndakavuka.+
2 Vikiliyani umoyu wangu, pakuti nde wakugomezgeka.+
Taskani mteŵeti winu yo watikuthembani,Pakuti yimwi ndimwi Chiuta wangu.+
3 Ndichitiyeni lisungu yimwi Yehova,+Pakuti ndidana yimwi zuŵa losi lamphumphu.+
4 Chitiskani kuti mteŵeti winu wakondwi,Pakuti ini nding’anamukiya kwaku yimwi, yimwi Yehova.
5 Chifukwa yimwi Yehova, ndimwi wamampha+ ndipuso wakunozgeka kugowoka;+Wosi wo adaniya paku yimwi, mutiŵalongo chanju chikulu chambula kumala.+
6 Yimwi Yehova, vwisiyani pempheru langu;Kweniso vwisiyani kuliya kwangu kwakupempha chovyu.+
7 Ndidana yimwi pa zuŵa la suzgu,+Pakuti yimwi mundimukengi.+
8 Yimwi Yehova, pakati pa achiuta, palivi munyaki yo wayanana ndi yimwi,+Palivi ntchitu zo ziyanana ndi zinu.+
9 Mitundu yosi yo mukupangaYizengi ndi kuzijikama pa masu pinu yimwi Yehova,+Ndipu yiwu akankhuskengi zina linu.+
10 Pakuti yimwi ndimwi mukulu kweniso muchita vinthu vakuziziswa;+Yimwi pe, ndimwi Chiuta.+
11 Yimwi Yehova ndisambizeni nthowa yinu.+
Ndiyendengi mu uneneska winu.+
Ndipaskeni mtima wamphumphu* kuti ndiwopengi zina linu.+
12 Nditikuthamikani ndi mtima wangu wosi yimwi Yehova Chiuta wangu,+Ndipu ndikankhuskengi zina linu mpaka muyaya.
13 Pakuti chanju chinu chambula kumala cho mutindilongo, ntchikulu,Ndipu mwataska umoyu wangu ku ndimba ya Dindi.*+
14 Yimwi Chiuta, ŵanthu akujikuzga atindiyukiya;+Gulu la ŵanthu ankhaza lipenja umoyu wangu,Ndipu yiwu atikuwopani cha.*+
15 Kweni yimwi Yehova, ndimwi Chiuta walisungu kweniso wawezi,Wambula kukwiya liŵi, wakuzaza ndi chanju chambula kumala ndipuso wakugomezgeka.*+
16 Ng’anamukiyani kwaku ini ndipu ndilongoni lisungu.+
Mteŵeti winu mupaskeni nthazi zinu,+Ndipu taskani mwana wa kapolu winu munthukazi.
17 Ndilongoni chisimikizu cha* umampha winu,Kuti ŵanthu wo atinditinkha achiwoni ndipu achiti soni.
Pakuti yimwi Yehova, ndimwi mutindiwovya kweniso mutindipembuzga.
Mazu Ngam'mphata
^ Pamwenga kuti, “sindamani muvwisiyi.”
^ Pamwenga kuti, “mtima wambula kugaŵikana.”
^ Pamwenga kuti, “Shelo.” Mazu yanga ngang’anamuwa masanu nga ŵanthu wosi. Wonani Mazu ngo Ngakonkhoskeka.
^ Pamwenga kuti, “atikuŵikani panthazi cha.”
^ Pamwenga kuti, “wauneneska.”
^ Pamwenga kuti, “ukaboni wa.”
