Nthanthi 11:1-31
11 Sikelu zachinyengu* Yehova waseruka nazu,Kweni chakupimiya uzitu chauneneska chitimukondwesa.*+
2 Asani kujikuzga kwafika, soni nazu zilondo muvuli,+Kweni zeru ze ndi ŵanthu akujiyuyuwa.+
3 Kugomezgeka kwa ŵanthu akunyoloka ndiku kutiŵalongozga,+
Kweni ukhuluku wa ŵanthu aryarya uŵaparanyengi.+
4 Chuma chazamuja chambula* phindu pa zuŵa la ukali,+Kweni urunji ndiwu wazamutaska munthu ku nyifwa.+
5 Urunji wa munthu wambula kafukwa uchitiska kuti nthowa yaki yije yakunyoloka,Kweni munthu muheni wawengi chifukwa cha vinthu viheni vo wachita.+
6 Urunji wa ŵanthu akunyoloka uŵataskengi,+Kweni ŵanthu aryarya awirengi chifukwa cha vinthu vo akhumba.+
7 Asani munthu muheni wafwa, vo walindizganga vimaliya penipo;Vinthu vo wakhazanga chifukwa cha nthazi zaki, navu vimala.+
8 Munthu murunji wataskika ku suzgu,Ndipu munthu muheni ndiyu wasere mumalu mwaki.+
9 Ndi mulomu waki, munthu wampatuku* wachitiska kuti munyaki waparanyiki,Kweni ŵanthu arunji ataskika chifukwa cha kuziŵa vinthu.+
10 Tawuni yikondwa chifukwa cha vinthu vamampha vo munthu murunji wachita,Ndipu asani ŵanthu aheni ŵafwa, ŵanthu adaniriza mwalikondwa.+
11 Chifukwa cha vitumbiku va ŵanthu akunyoloka, tawuni yikwezeka,+Kweni milomu ya ŵanthu aheni yitiyibwanganduwa.+
12 Munthu weyosi wambula zeru* wayuyuwa munyaki,Kweni munthu wakuwamu waja cheti.+
13 Munthu yo wakamba vinthu viheni vakukwaskana ndi anyaki, watendatenda ndi kuvumbuwa nkhani zachisisi,+Kweni munthu wakugomezgeka* wasunga chisisi.*
14 Asani palivi ulongozgi wazeru, ŵanthu atuwa,Kweni vinthu vitenda umampha* asani pe ŵanthu anandi wo apereka ulongozgi.+
15 Weyosi yo wazomera kuti wawezengi ngongoli mumalu mwa mulendu* wapwetekekengi,+Kweni weyosi yo wakhwecha* kukolana manja pakuzomereza phanganu, wajengi mwakuvikilirika.
16 Munthukazi wamampha* wasaniya unkhankhu,+Kweni anthulumi ankhaza aphanga chuma.
17 Munthu walisungu* wasaniya phindu,*+Kweni munthu wankhaza watijidaniya masuzgu.*+
18 Munthu muheni walonde malipiru ngachinyengu,+Kweni yo wapanda urunji walonde mphotu chayiyu.+
19 Munthu yo wanderezeka cha pa urunji wasaniyengi umoyu,+Kweni yo walondo vinthu viheni wasaniyengi nyifwa.
20 Ŵanthu a mtima wauryarya Yehova waseruka nawu,+Kweni ŵanthu wo nthowa yawu yilivi kafukwa atimukondwesa.+
21 Ziŵani ivi:* Munthu muheni walekengi cha kulangika,+Kweni ŵana a ŵanthu arunji aponengi.
22 Nge ndeŵereŵi yagolidi yo ye pa mphunu ya nkhumba,Ndimu waliri munthukazi wakutowa yo wakana zeru.
23 Vinthu vo ŵanthu arunji akhumba, vilongozge kwamampha,+Kweni vo ŵanthu aheni alindizga, vilongozge ku ukali.
24 Munthu yo wapereka ndi mtima wosi,* wasaniya vinthu vinandi;+Kweni yo wakaniriya cho watenere kupereka, wakavuka.+
25 Munthu yo wapereka ndi mtima wosi, vinthu vimuyendiyengi umampha,*+Ndipu yo wasisipuwa anyaki* nayu wasisipulikengi.+
26 Ŵanthu atembengi munthu yo wakaniriya chakurya,Kweni atumbikengi munthu yo wazomera kuchigulisa.
27 Munthu yo watesesa kuchita vinthu vamampha wapenja lisungu,+Kweni yo wapenjapenja vinthu viheni, vinthu venivi ndivu vimuwiyengi.+
28 Munthu yo wathemba chuma wawengi,+Kweni ŵanthu arunji abiriŵirengi nge mani ngaŵisi.+
29 Weyosi yo wachitiska kuti nyumba yaki yikumani ndi masuzgu,* waharengi mphepu,+Ndipu munthu muzereza wajengi mteŵeti wa munthu wa mtima wazeru.
30 Chipasu cha munthu murunji ntchimiti cha umoyu,+Ndipu yo wayanduwa ŵanthu we ndi zeru.+
31 Asani munthu murunji ndiyu walonde mphotu pacharu chapasi,Sonu kwe uli munthu muheni kweniso munthu wakubuda!+
Mazu Ngam'mphata
^ Pamwenga kuti, “mwa wakukwana wakupimiya uzitu utimukondwesa.”
^ Pamwenga kuti, “zaboza.”
^ Pamwenga kuti, “Vinthu vakuzirwa vazamuja vambula.”
^ Pamwenga kuti, “munthu wambula kopa Chiuta.”
^ Mazu ngaki chayingu, “wa mtima wambula zeru.”
^ Mazu ngaki chayingu, “wa mzimu wakugomezgeka.”
^ Mazu ngaki chayingu, “wabenekere nkhani.”
^ Pamwenga kuti, “ŵanthu ataskika.”
^ Pamwenga kuti, “kuti wajengi chikoli cha ngongoli ya mulendu.”
^ Mazu ngaki chayingu, “watinkha.”
^ Pamwenga kuti, “wakutowa.”
^ Pamwenga kuti, “Munthu yo we ndi chanju chambula kumala.”
^ Pamwenga kuti, “wachitiya vamampha umoyu waki.”
^ Pamwenga kuti, “soni.”
^ Mazu ngaki chayingu, “Janja ku janja.”
^ Mazu ngaki chayingu, “yo wamija.”
^ Mazu ngaki chayingu, “watutuŵengi.”
^ Mazu ngaki chayingu, “wadiriya anyaki ndi mtima wosi.”
^ Pamwenga kuti, “yichiti soni.”
