Nthanthi 24:1-34
24 Ungachitiyanga sanji ŵanthu aheni cha,Ndipu ungakhumbiranga cha kuja pa gulu lawu,+
2 Pakuti mitima yawu yilunguruka nkhaza,Ndipu milomu yawu yilongoro vakukwaskana ndi chiwawa.
3 Nyumba yizengeka chifukwa cha zeru,+Ndipu yikho chifukwa cha kuwamu.
4 Chifukwa cha kuziŵa vinthu, vipinda vaki vizazaNdi vinthu vakupambanapambana vakuzirwa ndipuso vakukondwesa.+
5 Munthu wazeru ngwanthazi,+Ndipu chifukwa cha kuziŵa vinthu, munthu wasazgiyaku nthazi zaki.
6 Chita nkhondu yaku ndi ulongozgi wazeru,+Ndipu asani pe ŵanthu anandi wo apereka ulongozgi, patuŵa kuthereska.*+
7 Muzereza wangazisaniya cha zeru chayizu,+Ndipu iyu walivi chechosi chakuti wakambi pageti la tawuni.
8 Weyosi yo wanozga viŵembuWadanikengi kuti mweneku wa viŵembu.+
9 Maŵanaŵanu ngauzereza* mbubudi,Ndipu ŵanthu aseruka nayu munthu wakunyoza.+
10 Asani walopwa pa zuŵa la soka,*Nthazi zaku zijengi zimana.
11 Taskani ŵanthu wo atoleke ku nyifwa,Ndipu wezaniku ŵanthu wo ambendyambendya kuluta kuchibayika.+
12 Asani mukambengi kuti, “Kweni isi taviziŵanga cha,”
Asi Yo wasanda mitima* waziŵa?+
Hinya, Yo watikuwonani waziŵengiNdipu waweziyengi munthu weyosi mwakukoliyana ndi ntchitu zaki.+
13 Wamwana wangu, yirya uchi, chifukwa ngwamampha;Uchi wa muchisa unowa ukongwa.
14 Mwakuyanana ŵaka, ziŵa kuti zeru zamampha* kwaku yiwi.+
Asani wazisaniya, vinthu vikuyendiyengi umampha kunthaziNdipu chilindizga chaku chidumulikengi cha.+
15 Ungakhazanga pafupi ndi nyumba ya munthu murunji cha;Ndipu malu ngaki ngakupumuliyapu, ungangananganga cha.
16 Pakuti munthu murunji wangawa maulendu 7, kweni wayuka so,+Kweni munthu muheni waguŵa chifukwa cha soka.+
17 Asani murwani waku wawa, ungasekeriyanga cha,Ndipu asani waguŵa, mtima waku ungakondwanga cha;+
18 Chifukwa Yehova wawonengi kweniso wakwiyengi,Ndipu watuzgengepu ukali waki paku iyu.*+
19 Ungakwiyanga cha chifukwa cha ŵanthu aheni;Ungachitiyanga sanji ŵanthu aheni cha,
20 Pakuti ŵanthu aheni kulivi kawu kunthazi;+Ndipu nyali ya munthu muheni yizimwisikengi.+
21 Wamwana wangu, uwopengi Yehova kweniso fumu.+
Ndipu ungachitiyanga vinthu limoza ndi ŵanthu akususka cha.*+
22 Pakuti soka liŵawiyengi mwamabuchibuchi.+
Ndiyani yo waziŵa pharanyiku lo wosi ŵaŵi* aŵawisiyengi?+
23 Mazu yanga nangu nga ŵanthu azeru:
Kuyeruzga mwakwanjiya nkhwamampha cha.+
24 Weyosi yo wakambiya munthu muheni kuti, “Ndiwi murunji,”+
Watembekengi ndi ŵanthu ndipuso mitundu ya ŵanthu yimususkengi.
25 Kweni wo atimuchenya, vinthu viŵayendiyengi umampha;+Atumbikikengi ndi vinthu vamampha.+
26 Ŵanthu afyofyonthengi milomu ya munthu yo wamuka uneneska.*+
27 Nozga ntchitu yaku yakubwalu kweniso nozga vosi mumunda waku;Pavuli paki, zenga nyumba yaku.
28 Ungajanga kaboni wakususkana ndi munyaku cha asani ulivi ukaboni.+
Ungagwiriskiyanga ntchitu milomu yaku cha kuti upusisi anyaku.+
29 Ungakambanga cha kuti: “Vo iyu wandichitiya ndivu nani ndimuchitiyengi;Ndimuweziyengi chifukwa cha vo wachita.”*+
30 Ndingujumpha pafupi ndi munda wa munthu mulesi,+Pafupi ndi munda wa mphereska wa munthu wambula zeru.*
31 Ndipu ndinguwona kuti waŵinda ndi dondu;Kweniso vakume vakunyenye vingubulumutizga munda wosi,Ndipu mpanda waki wamya wenga wakubwanganduka.+
32 Ndinguwona venivi ndipu ndinguviŵika mumtima;Ndinguviwonesesa ndipu ndingusambirapu kuti:*
33 Asani ulutirizgengi kugona kamanavi, asani usiwengepu kamanavi,Asani upetengi manja kamanavi kuti upumuwi,
34 Ukavu waku uzengi nge munkhungu,Ndipu kusoŵa vinthu vakukhumbika kukuziyengi nge munthu yo we ndi vidya.+
Mazu Ngam'mphata
^ Pamwenga kuti, “vinthu vitenda umampha; utaski.”
^ Pamwenga kuti, “viŵembu va munthu muzereza.”
^ Pamwenga kuti, “pa nyengu ya suzgu.”
^ Pamwenga kuti, “vilatu.”
^ Pamwenga kuti, “zakunowa.”
^ Kung’anamuwa murwani.
^ Pamwenga kuti, “ŵanthu wo akhumba kuti vinthu visinthi.”
^ Kung’anamuwa Yehova ndi fumu.
^ Yapa pangafwatulikiya so kuti, “Kumuka mwambula kubisa kwe nge kufyofyontha.”
^ Pamwenga kuti, “Ndipu tiyananengi.”
^ Mazu ngaki chayingu, “wa mtima wambula zeru.”
^ Mazu ngaki chayingu, “ndingutopu ulongozgi wakuti.”
