Yobu 3:1-26
3 Ivi vati vachitika, Yobu wangwamba kulongoro, ndipu wangutemba zuŵa lo wanguwiya.*+
2 Yobu wangukamba kuti:
3 “Linangiki zuŵa lo ndinguwiya,+Kweniso usiku wo munthu munyaki wangukamba kuti: ‘Munthulumi wapangika mumoyu!’
4 Zuŵa lenili liŵi mdima.
Chiuta wakuchanya wangaliŵanaŵaniyanga cha;Ndipu ukweru ungaliŵaliyanga cha.
5 Mdima ukulu* ulito.
Mtambu wa vuwa uje paku ilu.
Kweniso chinthu chechosi cho chichitiska kuti zuŵa lije la mdima, chiliwofyezi.
6 Usiku weniwo, ukoleki ndi mdima;+
Ungakondwiyanga limoza cha ndi mazuŵa nga mu chaka,Kweniso ungasazgikiyangapu cha pa chiŵerengeru cha myezi.
7 Hinya! Usiku weniwo uje chumba;Ndipuso mungavwikanga kudaniriza kwekosi cha kwa likondwa.
8 Ŵanthu wo atemba zuŵa awutembi,Wo afiska kuyuska Leviyatani.*+
9 Nyenyezi zaki za ku matandakucha zileki kuŵala;Usiku wo, ulindizgi ukweru kweni ungawuwonanga cha,Kweniso ungangawonanga cha malazi nga ukweru wa ku matandakucha.
10 Pakuti ungujala cha visasa va nthumbu ya ama;+Ndipuso ungungabisa cha masuzgu kuti ndileki kungawona.
11 Ndingulekiyanji kufwa pa nyengu yo ndawiyangaku?
Ndingulekiyanji kufwa ndati ndatuwa ŵaka mumoyu?+
12 Ntchifukwa wuli penga makongonu kuti ngandilondereKweniso maŵe kuti ndiwonkhi?
13 Chifukwa mphanyi sonu ndigona kwambula kutimbanyizgika;+Mphanyi ndigona kweniso ndipumuwa+
14 Limoza ndi mafumu nga pacharu kweniso akuŵalunguchizga,Wo angujizenge malu ngo sonu ndi mahami,*
15 Pamwenga limoza ndi alongozgi wo ŵenga ndi golidi,Wo munyumba zawu munguzaza siliva.
16 Pamwenga ntchifukwa wuli ndinguleka kuja nge nthumbu yo yalutiriya kwambula kuziŵika,Nge ŵana wo akuwuwona cha ukweru?
17 Kweniko, chinanga mbanthu aheni asuzgika cha;Ndipu kweniko, ŵanthu ambula nthazi apumuwa.+
18 Kweniko, akayidi aja pamoza mwachimangu;Yiwu atingavwa so cha mazu nga munthu yo watiŵachichizga kuti agwiri ntchitu.
19 Mwana ndipuso mura ayanana ŵaka kweniko,+Ndipu kapolu wafwatulika kwa ambuyaki.
20 Ntchifukwa wuli iyu wapereka ukweru ku munthu yo wasuzgikaNdipuso umoyu ku ŵanthu wo apwetekeka mtima?+
21 Ntchifukwa wuli yiwu akhumbisiska nyifwa, kweni yituza cha?+
Atiyipenjapenja ukongwa kuluska mo akumbiya chuma chakubisika,
22 Ŵanthu ŵenaŵa akondwa ukongwa,Akondwa ukongwa asani asaniya dindi.
23 Ntchifukwa wuli iyu wapereka ukweru ku munthu yo wasoŵa nthowa yaki,Munthu yo Chiuta wamujaliza?+
24 Pakuti mumalu mwa chakurya changu, kuŵaŵika mtima ndiku kutuza,+Ndipu kutamantha kwangu+ kupunguka nge maji.
25 Pakuti chinthu cho ndachitenthemanga chaza paku ini,Ndipu chinthu cho ndachiwopanga chandiwiya.
26 Ndechendajepu mwachimangu, mwakufwasa pamwenga kupumuwa,Kweni masuzgu ngalutirizga kuza.”
Mazu Ngam'mphata
^ Mazu ngaki chayingu, “zuŵa laki.”
^ Pamwenga kuti, “Mdima ndipuso mduzi wa nyifwa.”
^ Mazu yanga ngangang’anamuwa mung’ona pamwenga chinyama chinyaki cha mumaji, chikulu ndipuso chanthazi.
^ Yapa pangafwatulikiya so kuti, “Wo angujizenge mahami.”
