Yoswa 1:1-18
1 Mozesi mteŵeti waku Yehova wati wafwa, Yehova wangukambiya Yoswa*+ mwana waku Nuni, mteŵeti+ waku Mozesi kuti:
2 “Mozesi mteŵeti wangu wafwa.+ Sonu soka, uyambuki Yorodani, yiwi limoza ndi ŵanthu wosi yaŵa, ndipu muluti mucharu cho ndiŵapaskengi, charu cho ndipaskengi Ayisirayeli.+
3 Ndikupaskeningi charu chosi cho mukandengepu maphazi nginu, nge mo ndingulayizgiya Mozesi.+
4 Chigaŵa chinu chiyambiyengi kuchipululu mpaka ku Lebanoni, kweniso mpaka kumsinji ukulu wa Yufureti, ndipuso charu chosi cha Ahiti+ mpaka ku Nyanja Yikulu* kuzambwi.*+
5 Palivi yo wafiskengi kulimbana nawi nyengu yosi yo uŵiyengi ndi umoyu.+ Nge mo ndinguŵiya ndi Mozesi, ndimu so ndiŵiyengi ndi yiwi.+ Ndikulekengi cha, pamwenga kukujowo.+
6 Uje ndi chiganga kweniso uje ndi nthazi,+ pakuti yiwi ndiwi uchitiskengi kuti ŵanthu yaŵa akahari charu cho ndingulapizga kuti ndipaskengi apapi ŵawu akali.+
7 “Yiwi uje ndi chiganga kweniso uje ndi nthazi ukongwa, ndipuso usungengi mwakuphwere Dangu losi lo Mozesi mteŵeti wangu wakukulamula. Ungalisiyanga cha, mwakuluta kumaryi pamwenga kumazge,+ kuti uchiti vinthu mwazeru kwekosi ko ulutengi.+
8 Buku ili la Dangu lingatuwangapu cha pamulomu paku+ ndipu uliŵerengengi ndi kulunguruka* msana ndi usiku, kuti usungi mwakuphwere vosi vo valembekamu;+ pakuti asani uchitengi viyo, vinthu vikuyendiyengi umampha ndipuso uchitengi vinthu mwazeru.+
9 Asi ini ndini ndakulamula venivi? Uje ndi chiganga kweniso uje ndi nthazi. Ungachitanga mantha cha pamwenga kopa, chifukwa Yehova Chiuta waku we nawi kwekosi ko ungaluta.”+
10 Sonu Yoswa wangulamula alongozgi a ŵanthu kuti:
11 “Yendanimu mumsasa wosi ndi kulamula ŵanthu kuti, ‘Nozgani vakukhumbika, chifukwa pa zuŵa lachitatu muyambukengi Yorodani kuti mukato charu cho Yehova Chiuta winu wakupaskeningi kuti chije chinu.’”+
12 Ndipu Yoswa wangukambiya fuku laku Rubeni, fuku laku Gadi ndi hafu ya fuku laku Manasi kuti:
13 “Kumbukani vo Mozesi mteŵeti waku Yehova wangukulamulani kuti:+ ‘Yehova Chiuta winu wakupaskani charu ichi kuti mujemu mwachimangu.*
14 Awolu ŵinu ndi ŵana ŵinu limoza ndi viŵetu vinu ajengi mucharu cho Mozesi wakupaskani kusirya linu* la Yorodani,+ kweni yimwi mosi mwakwenere kuluta ku nkhondu+ muyambukengi panthazi pa abali ŵinu mumzeri wakunozgeke nkhondu.+ Mutenere kuŵawovya
15 mpaka po Yehova wapaskiya abali ŵinu malu ngakuti ajengemu mwachimangu* nge mo wakupaskiyani yimwi, ndipu nawu akato charu cho Yehova Chiuta winu waŵapaska kuja chawu. Pavuli paki muziwere mucharu cho mwapaskika kuti mujengemu ndipu muzichito kuja chinu, charu cho Mozesi mteŵeti waku Yehova wakukupaskani kuvuma* kwa Yorodani.’”+
16 Yiwu angumuka Yoswa kuti: “Tichitengi vosi vo mwatilamula, ndipu tilutengi kwekosi ko mutitumengi.+
17 Nge mo tavwiyanga chechosi cho Mozesi watikambiyanga, ndimu so tivwiyengi yimwi. Yehova Chiuta winu waŵi namwi nge mo wanguŵiya ndi Mozesi.+
18 Munthu weyosi yo wagarukiyengi marangu nginu ndipuso walekengi kuvwiya vo mwamukambiya, wabayikengi.+ Muje ndi chiganga kweniso muje ndi nthazi.”+
Mazu Ngam'mphata
^ Pamwenga kuti, “Yehoshuwa,” kung’anamuwa kuti “Yehova Mbutaski.”
^ Pamwenga kuti, “ko kuselere lumwi.”
^ Kung’anamuwa Nyanja ya Meditereniyani.
^ Pamwenga kuti, “uliŵerengengi chapasipasi.”
^ Mazu ngaki chayingu, “watikupaskani chipumulu ndipuso wakupaskani charu ichi.”
^ Kung’anamuwa chigaŵa cha kuvuma.
^ Mazu ngaki chayingu, “wapaskiya abali ŵinu chipumulu.”
^ Pamwenga kuti, “kwakutuliya lumwi.”
